Ксавиер Бетел – Kurir.mk

Руте и Бетел: Нема да има нови санкции против Русија на самитот на ЕУ

Ивана Ефремовски — Thu, 24 Mar 2022 16:34:53 +0000

Лидерите на Европската унија нема да се согласат за воведување нови санкции против Русија за време на дводневниот самит во Брисел, изјави холандскиот премиер Марк Руте. -Не очекувам конкретни нови санкции денеска. Не можеме да размислуваме за санкции со толку голема група, ни требаат предлози. Веќе воведовме многу санкции, сега влегуваме на покомплексен терен, истакна Руте по пристигнувањето на состанокот на 27-те лидери на европскиот блок. Луксембуршкиот премиер Ксавиер Бетел изјави дека треба да се воведат нови санкции на ЕУ против Русија поради нападот врз Украина како реакција на новиот развој на кризата, што, според него, во моментов не е случај. -Ако сакаме да имаме нови санкции, мора да ги имаме како реакција на нешто. Засега ситуацијата не се подобрува, тоа е сигурно, нагласи Бетел по пристигнувањето на самитот. Според него, доколку сега се воведат дополнителни санкции во ситуацијата што претставува статус кво, „тогаш што би бил следниот чекор“. -Мислам дека мора да имаме градација, додаде Бетел. (МИА)

Премиерот Бетел останува во болница- еве каква е неговата состојба

Катерина Бојаџиева — Mon, 05 Jul 2021 16:10:06 +0000

Здравствената состојба на премиерот на Луксембург, Ксавиер Бетел, е во „сериозна, но стабилна“ и тој ќе остане во болница уште најмногу четири дена поради последиците на коронавирусот. Бетел на 27 јуни, веднаш по враќањето од самитот на ЕУ во Брисел, се покажа позитивен на тестот за коронавирус, а вчера е примен во болница. Бетел (48) во текот на викендот бил земен под медицински надзор поради недоволната сатурација во организмот. Тој, исто така, имал кашлица, главоболка и треска, пренесуваат британските медиуми. „Здравствената состојба на премиерот се смета за сериозна, но стабилна“, соопшти Владата на Луксембург. Во соопштението се наведува дека министерот за финансии, Пјер Грамења, го презема извршувањето на државните работи.

Премиерот на Луксембург, позитивен на Ковид-19 по учеството на самитот на ЕУ

Ивона Петрова — Mon, 28 Jun 2021 05:58:58 +0000

Премиерот на Луксембург, Ксавиер Бетел, е позитивен на тестот за Ковид-19 откако минатата недела присуствуваше на самитот на ЕУ во Брисел. „Засега тој има благи симптоми, треска и главоболка и од дома ќе ги извршува своите должности. Тој има намера да остане во карантин 10 дена“, објави весникот „Луксембургер Ворт“. Според луксембуршката Влада, Бетел на 6 мај примил само една доза од вакцината „АстраЗенека“, а втората доза требало да прими неделава. За време на самитот, Бетел се дружел со голем број европски лидери, вклучувајќи ја и германската канцеларка Ангела Меркел. Фотографиите од самитот покажуваат дека Бетел, меѓу другото, бил во близок контакт со австрискиот канцелар Себастијан Курц и претседателот на Европскиот совет, Шарл Мишел, но сите тие носеа маски на ваквите средби.