курир – Kurir.mk

СКАНДАЛ: Обид за цензура и дрска селективност – Владата не дозволува КУРИР да известува за одбележувањето на роденденот на Гоце Делчев

Ивана Ефремовски — Fri, 03 Feb 2023 18:31:55 +0000

Владата не само што тргува со тоа чиј е Гоце Делчев, сега си даде за право да одлучува и за тоа кој треба да биде дел од одбележувањето на роденденот на македонскиот великан! Редакцијата на КУРИР навремено испрати барање за акредитација за следење на утрешниот настан во црквата Свети Спас, по повод роденденот на Гоце Делчев. Но, нашите новинар и снимател беа ОДБИЕНИ од страна на Владата која барањето го ОДБИ! КУРИР како еден од најчитаните интернет медиуми во Македонија, утре нема да биде во можност на многубројните читатели да им ја пренесе атмосферата и начинот на кој се одбележува овој голем ден. Таа одлука ја донесе Владата која си даде себеси за право да одлучува кој новинар и кој медиум е подобен, а кој не смее да присуствува кога државниот врв и бугарските политичари лицемерно ќе се поклонат пред споменот на Гоце Делчев - оној кој им беше точка од преговорите и договорите. Ова е класичен обид за цензура врз КУРИР како медиум. Според нашите информации, ваков одговор добиле и други медиуми кои власта очигледно се обидува да ги остави со “врзани раце“! Дополнително е скандалозно тоа што одговорот за одбивање го добиваме доцна попладнево, за настан закажан за утре. Владата и нејзините први луѓе треба да знаат дека со ваквиот удар врз медиуми, удираат врз граѓаните на Република Македонија кои имаат право да бидат информирани за ваквите настани. Додека Ковачевски и Спасовски прават вакви чекори за да им се додворуваат на бугарските политичари, очекуваме македонските новинарски здруженија да го осудат ваквиот обид за цензурирање на медиуми и спречување на новинари да си ја вршат својата работа!

СРЕЌНА НОВА ГОДИНА

Ивана Ефремовски — Sat, 31 Dec 2022 23:01:03 +0000

Почитувани читатели на КУРИР.МК Зад нас ја оставаме 2022-ра година, а кажуваме “добредојде“ за 2023-та. Вам и на вашите семејства ви посакуваме здравје и среќа, љубов и успех. Нека новата година донесе само убави моменти и позитивни промени во вашите домови и животи. Благодарни сме за вашата доверба која никогаш нема да ја изневериме. Во 2023-та година, останете со КУРИР.МК, каде секогаш ги добивате сите информации, брзо и точно. Се надеваме дека во следниве 12 месеци ќе имаме повеќе позитивни вести и убави приказни кои заедно ќе ги раскежеме. СРЕЌНА НОВА ГОДИНА Со почит, редакција на КУРИР

КУРИР во жариштето – ексклузивно видео по големиот пожар кај Треска!

Ивана Ефремовски — Thu, 14 Apr 2022 14:57:49 +0000

Екипата на КУРИР беше на лице место од избувнувањето на пожарот кај поранешната фабрика Треска, па се до неговото гаснење. Од таму ви пренесуваме ексклузивно видео. Погледнете колкава површина беше зафатена во пожарот и што зад себе оставија пламените јазли.

Демант на МТСП и коментар на КУРИР

Ивана Ефремовски — Wed, 10 Mar 2021 13:47:43 +0000

МТСП целосно и докрај ги почитува и спроведува мерките за заштита кои се наведени од Комисијата за заштита од заразни болести, со цел да се спречи ширење на вирусот, реагираат од министерството на вчерашниот текст на порталот Курир со наслов „МТСП се претвора во кластер од COVID-19“. Демантот на МТСП го пренесуваме во продолжение: Во согласност со Одлуката на Владата на Република Северна Македонија донесена на 13.10.2020 година, работниот процес во МТСП од 26.10.2020 до 11.01 2021 година се одвиваше според системот на наизменични ротации на вработените преку еден ден. Во деновите кога вработените не беа присутни на своето работно место, работните задачи ги извршуваа од дома. Но, со цел да се зголеми ефикасноста и соодветно да се одговори на потребите на граѓаните МТСП од 11.01.2021 година направи промена во организацијата на работата, со тоа што го зголеми присуството на раководните лица во Министерството. Истовремено беше наложено онаму каде што нема услови за одржување на дистанца да продолжи ротацијата преку еден ден. Министерството за труд и социјална политика, се грижи за обезбедување на социјална сигурност на најранливите категориии граѓани во нашето општество и тоа за материјално загрозени лица, како и обезбедување на помош и поддршка на децата и лицата со попреченост, старите и немоќни лица, децата без родители и родителска грижа. Во време на пандемија ова Министерство презема секојдневни активности за обезбедување на грижа на децата од предучилишна возраст, во дневните центри за лица со попреченост и за згрижените лица во Специјалниот завод Демир Капија, Завод за рехабилитација за деца и младинци–Скопје, Заводот за заштита и рехабилитација Бања Банско. Оттука, сите вработени во МТСП имаат обврска и одговорност, и во овие услови на пандемија, да им служат на граѓаните и да им излезат во пресрет на сите нивни потреби. Во оваа насока, непосредно или преку центрите за социјална работа, установите за социјална заштита и во соработка со други установи и институции се преземаат секојдневни мерки со цел на граѓаните да им се обезбеди остварување на нивните права и услуги. Министертвото за труд и социјална политика ги почитува препораките и насоките на епидемиолозите во однос на вработените коишто биле во контакт со лице заразено од вирусот COVID-19 и коишто имаат сомнеж дека се позитивни на вирусот. Во интерес на вистината и на објективното информирање, а и во согласност со Законот за граѓанска одговорност за навреда и клевета, бараме од порталот Курир да го објави овој демант во ист формат како што беше објавена посочената информација. Коментар: Редакцијата на КУРИР досега низа пати побарала одговори и ставови од МТСП за бројни проблеми со кои се соочуваат граѓаните на Република Македонија. Баравме од нив став за проблемот кој го имаат родителите со детските градинки, за мајките со третородено дете, за низа социјални случаи, проблеми на самохрани мајки. Одговор од МТСП немаме добиено! Бидејќи знаеме дека не одговараат на пораките од нашата редакција, КУРИР и јавно во своите текстови ги повикува да реагираат и да превземат нешто во врска со социјалните стории, да решат некој проблем и да сработат нешто кое е нивна должност. Интерес од нивна страна не видовме. КУРИР секогаш, во служба на читателите, ќе ги објавува сите проблеми на граѓаните за кои е належно МТСП и ќе се обидува да ја смени незаинтересираноста на институциите. На сите вработени во МТСП им посакуваме добро здравје и се извинуваме што МТСП го нарековме “кластер“ иако министерството во својот демант не ги негира наводите во текстот кој беше објавен, дека има повеќе заразени. Ја користиме оваа прилика да апелираме до МТСП, да не ги гледа само вработените во своите канцеларии кои имаат привилегии па цела година не работат секојдневно полно работно време, туку во рамки на своите надлежности, да провери како се третирани и дали се заштитени останатите работници, на пример, во приватните фирми!

По објавата на КУРИР: Тагата стана среќа во приказната на мајката-херој Весна и нејзиниот син Кристијан – семејството добива социјален стан

Ивана Ефремовски — Thu, 11 Feb 2021 12:07:50 +0000

Кристијан има 16 години. Прекрасно момче со добри манири и искрена насмевка. Желен е секој ден да биде поуспешен во своите обврски. Има прекрасни очи низ кои се гледа неговата радост, но и неговата тага. За рака го држи својот херој – неговата мајка Весна. Таа му е единствениот сопатник во тешкиот пат кој заедно го минуваат секој ден, секој час, многу долги години. Кристијан е дете со посебни потреби. Уште од кога бил мал ја покажувал својата хиперактивност, но неговото однесување сите го дефинирале како “карактер“, а не како “заболување“. Хиперактивното дете на 12-годишна возраст добива дијагноза на детска педијатрија – невидливата попреченост ADHD. Нарушувањето на вниманието со хиперактивност, познато и како ADHD (од англ. Attention Deficit Hyperactivity Disorder), е едно од најголемите невроразвојни нарушувања во детската и адолесцентната возраст. Ова нарушување вклучува зголемена моторичка активност кај детето, која е следена со неадекватно развиено и лесно отстранување на вниманието со нагли, непредвидливи и импулсивни реакции. Мајката на Кристијан во сведоштво за КУРИР ја раскажа својата животна приказна, преку приказната на нејзиниот син. КУРИР минатата недела излезе со објавата „Кристијан е дете со посебни потреби, а неговата мајка е херој: Била жртва на насилство, а секој ден води нова битка за своето дете“. Со Весна се запознавме спонтано, се соочивме со нејзината борба против неправдите. Донесовме одлука да помогнеме колку што е во наша можност. Првата заедничка цел ни беше да се слушне нејзината приказна, да допре крикот на неутешната мајка до институциите. Нејзиниот син да има безгрижни денови, мајката да добие конечно спокој по голготата која ја живее цел живот. И УСПЕАВМЕ!!! Само два дена по објавувањето на сторијата на КУРИР, Весна го добила повикот кој со години го очекувала. Повик од институциите. Идентитетот на лицето кое ја контактирало е познат во нашата редакција, но истиот нема да го објавиме. Станува збор за жена вработена во македонската Влада. Таа и тимот со кој работи ја прочитала животната приказна на Весна и одлучија да го разгледаат случајот. По констатирање дека сите наведени аргументи се факти - конечно одлучиле дека на ова семејство мора да му помогнат. Весна, возбудена и низ солзи, веднаш ја сподели убавата вест со нас. Добива социјален стан. Веќе нема да плаќа високи кирии и да живее во неисвесност секој месец. Била повикана на разговор во Влада и била информирана какви документи треба да подготви. Веднаш го направи тоа, поднесе се што е потребно и вчера доби официјална одлука дека наскоро влегува во социјален стан. Оваа одлука е донесена по повеќе основи, за кои КУРИР алармираше во текстот. Потсетуваме, таа е дете растено во Дом за деца без родители и родителска грижа и нејзина најголема мисија е да му пружи љубов и заштита на синот. Тешките моменти ги лекува со молитва и верба во Бог. -КУРИР, Ви благодарам. Ми дадовте сила да ја раскажам мојата приказна и конечно мојата најголема желба се исполни. Ви благодарам вас, му благодарам на Господ Исус Христос што сите овие години ми дава водство и што во ниту еден ден на тага не ме оставил сама. Благодарна сум на пасторите од Евангелска црква Скопје што цела оваа година беа во молитва за моето животно прашање да добијам стан како дете без родители. Меѓу другото, благодарност до сите граѓански институции кои помагаа кога бев на улица. Сакам да издвојам посебен момент кога заврши шелтерот, јас со децата останав на улица, кога Детското село и по завршување на работно време останаа со нас, Валентина и Јуле, истакнува мајката Весна. Како што веќе објавивме, таа била жртва на семејно насилство. Кога го напуштила домот, со две деца од кои едното е со посебни потреби, почнал нејзин нов пекол. -Останав на улица, барав стан за под кирија, но беше многу тешко. Ми помагаа од Детско село, ми го чуваа грбот. Потоа најдов стан кој ми беше скап за плаќање. Имавме разни проблеми - скапи лекови, кирија, сметки, далечинска настава, вели Весна. За тоа каков човек е мајка му на Кристијан доволно говори и фактот што таа работи во Црвениот крст. Ја избрала оваа професија за да им помага на луѓето од ранливите категории, знаејќи колку е тешко да нема кој да ти помогне. Вели дека тимот од Црвен крст се нејзиното второ семејство. Знаевме дека мора да бидеме нејзин сојузник во битката. И од неа, заедно излеговме како победници. Весна не штедеше зборови да ја искаже благодарноста, а ние ја споделивме среќата со неа. -Во целата моја несреќа, во мојот живот се појави новинарка на КУРИР. Таа ме охрабри да прозборам за проблемите, ми даде надеж да го бараме тоа што ми следува. Јас мислев дека не е можно да добијам и стан, барав само лекарства за синот, помош од државата и поголема вклученост од таткото. Ја објавивте мојата приказна, зборувавте во мое име и јас го добив тоа што ми беше најпотребно. Добив позитивен одговор, истакна Весна. Според тоа што го има како информација, за еден месец би требало таа и нејзините деца да влезат во својот стан. КУРИР останува да биде поддршка за Весна и Кристијан, но и за сите останати мајки и деца со посебни потреби кои се борат против неправдите и секојдневно живеат со предизвици. Ивана Ефремовски

СРЕЌНА НОВА ГОДИНА, ДА СТЕ ЖИВИ И ЗДРАВИ!

Ивана Ефремовски — Thu, 31 Dec 2020 23:01:52 +0000

Годината која ја испраќаме воопшто не беше лесна. Но, од неа можеме многу да научиме. Нека останат лошите работи зад нас, а новата 2021-ва година да биде подобра за сите! Почитувани читатели, редакцијата на КУРИР ви посакува многу здравје и среќа во годината која ни дојде како нова. Се надеваме дека 2020-тата ни остана како лекција која мора да ја знаеме сите: Здравјето и семејните вредности мора да ги негуваме бидејќи нема поважно од тоа да сме живи и здрави и да бидат добри и покрај нас нашите најблиски. КУРИР останува со вас, заедно да ги споделиме сите случувања, брзо и точно, како што тоа го правиме цели 10 години. Посакуваме во новата година да имаме повеќе радосни вести, да броиме заедно повеќе успеси на сите полиња. СРЕЌНА НОВА ГОДИНА, ДА СТЕ ЖИВИ И ЗДРАВИ!

КУРИР обиколка во комплексот клиники „Мајка Тереза“- ѓубре и хаос на сите страни, ова е доказ за неспособноста на Филипче и надлежните

Дарко Андоновски — Thu, 12 Nov 2020 13:32:36 +0000

Редакцијата на КУРИР денеска беше во обиколка на Клиничкиот центар „Мајка Тереза“ во Скопје каде затекна вистински хаос. Имено сликата на терен е повеќе од алармантна, на сите страни има ѓубре, а хигиената е на најниско можно ниво. Катастрофалните услови во болниците во комплексот клиники во време кога имаме црни бројки на новозаразени пациенти и такви кои секојдневно се хоспитализираат се само уште еден доказ за неспособноста на оваа власт предводена од министерот Венко Филипче. Инаку КУРИР целата сторија и фотогалерија ќе ја објави денеска во 17 часот, следете не.

Шилегов и ЈСП во хајка против КУРИР: Искршен автобус ги разоткри нивните лаги -за едни сликата стара 8 месеци, за друг 5 години

Ивана Ефремовски — Mon, 24 Feb 2020 15:52:19 +0000

Нашите читатели веќе се запознаени со лагата која ЈСП им ја пласираше откако КУРИР се залагаше за нивната безбедност. Претпријатието најпрво дрско нè навреди кога им укажавме на неправилност, се’ со цел да избега од одговорноста за грижа за безбедноста на патниците. КУРИР алармираше со фото-вест дека на скопските улици возат автобуси во очајна состојба. Бидејќи фотографијата која ја објавивме минатата недела тврдиме и ќе тврдиме дека е направена истиот ден кога и е објавена нашата вест и понудивме нивно стручно лице тоа да го истражи, од ЈСП останаа без зборови, па молчат и веќе не знаат со која лажна информација да излезат пред јавноста. Тие посочија дека фотографијата е стара 8 месеци и дека автобусот бил демолиран од полските навивачи кои беа во Македонија во јуни. Ние со факти ги демантиравме тие нивни лаги. Да не се повторуваме, нашите одговори до ЈСП можете да ги прочитате во продолжение:

ДРСКОСТА НА ЈСП: Ја загрозија безбедноста на граѓаните, па сега се закануваат и ЛАЖАТ

Нè нападнаа, па молчат: Нови докази дека ЈСП лаже и наместо со безбедноста на патниците се занимава со притисок врз медиуми!

И кога мислевме дека ЈСП го постигна својот максимум, градоначалникот Петре Шилегов, очигледно несвесен за кашата во која самите ЈСП се ставија, продолжи со неаргументираната хајка против КУРИР?! Замислете, тој тврди дека лажеме, но и дека ЈСП лаже?! А тој како градоначалник на Скопје е претпоставен на тоа претпријатие. ЈСП толку се намачија да објаснат дека сликата е од автобус демолиран од полските навивачи, на која дата конкретно, каде и кој се превезувал во него, кога точно е сликано... И оп, градоначалникот им ја сруши илузијата дека смислиле совршена лага. Петре Шилегов во малтене безобразниот пост, недоличен за еден „градски татко“, тврди дека фотографијата која КУРИР ја објави е стара, верувале или не, цели 5 години. Господине Шилегов, како што тоа го направивме со ЈСП, еве, ви се обраќаме и вам. Кога сакате и каде сакате, можете да го добиете телефонскиот апарат од кој е направена таа фотографија што многу ве заинтригира бидејќи е слика и прилика на возниот парк на ЈСП. Најдете ваш експерт, стручно лице, мастер за мобилни... Кого сакате. Нека провери кога е направена фотографијата. И за вас истото прашање: Кога ќе се утврди дека лажете, дали ќе им се извините на скопјани? Нам не треба! Вашите чувства кон КУРИР се јасни, за жал и Вашето неаргументирано и дневно-политичко безобразие во кое на најчитаниот интернет портал во државата му се обраќате со толку низок вокабулар и и простотилук, а тоа најдобро се гледа и во вашиот Фејсбук статус, каде и “пријателите“ на социјалната мрежа ви кажуваат колку е лош јавниот превоз. Друг пат, како совет, проверете ги фактите, па потоа напаѓајте и Ве молиме, вниматено со зборовите како „глупост“ и слични квалификаци, кои понекогаш најдобро го опишуваат ликот и делото на оној кој ги користи. Од друга страна, добро разбираме зошто ЈСП и Шилегов се обраќаат така недолично кон нас и што им пречи. Тоа е фактот што стотици илјади граѓани токму на КУРИР читаат за скандалите и проблемите во нивното работење. Но тоа е најмалку важно! Вие сте должни да работите за граѓаните. Градоначалникот зема висока плата од џебот на скопјани, а истовремено треба и да се грижи за безбедноста на граѓаните. Испокршените автобуси кои се ризик за нивната безбедност се задача на вашите директори, укажувањата на медиумите треба да служат за исправање на таквите аномалии, а не за да се подигрувате и терате кооперациски мајтап со медиумите. Така е барем во развиените демократии кон кои толку и очигледно само декларативно се стремите. Дали затоа, иако треба да се критикува себеси, некој критикува медиуми? За Ваша жал, ова е медиум кој нема да потпадне и да се уплаши од навредите и притисоците на почитуваниот „градски татко“ Шилегов и ЈСП, па ниту на нивната (од ЈСП) закана за тужба. Вистината е на наша страна, а фактите го потврдуваат тоа. Пред нив дури и боговоте молчат, а вие ги користите за неаргументиран сеир кој воопшто не ви доликува на улогата на т.н. „градски татко“. Извинете им се на граѓаните! Еден обичен автобус со скршена врата ве сврте еден против друг. Еден автобус ве натера помалку панично да смислите како да изманипулирате со граѓаните. Друг пат, Ве молиме барем да се кординирате со Вашите директори во хајката против медиумите. Со почит, КУРИР.

КУРИР останува број 1 портал во Македонија: Повторно доби златен медал за квалитет од QUDAL

Ивана Ефремовски — Thu, 13 Feb 2020 13:02:14 +0000

КУРИР останува број 1 интернет портал во Македонија. Според истражувањето на швајцарската агенција, Kurir.mk веќе шеста година по ред е интернет порталот кој нуди најголем квалитет. Во истражувањето е оценето дека „Интернет страницата со содржина на македонски јазик Kurir.mк нуди апсолутно највисоко ниво на квалитет меѓу сите интернет портали во Република Македонија“. Повторно добивме златен медал за квалитет од QUDAL! КУРИР го доби ова златно признание и за минатите две години. Во истражувањето на престижната швајцарска компанија, Kurir.mk e избран за интернет портал кој нуди апсолутно најдобар квалитет на македонскиот пазар и е добитник на престижниот КЈУДАЛ–Квалити меДАЛ 2018/2019. Kurir.mk освои најголем број гласови и го доби престижниот медал за „апсолутно највисоко ниво на квалитет во Македонија“ во неговата категорија. Бидејќи нашата редакција напорно работи во служба на читателите, нивните гласови се нашата најдобра мотивација. Затоа, почитувани, уште еднаш можеме да го споделиме со вас нашиот успех. Останавме најквалитетен портал и во новиот избор, за оваа година! „Со задоволство Ве информираме дека Вашата компанија освои најголем број гласови во најмалку една од испитуваните категории во најновото истражување на пазарот за QUDAL – QUality meDAL General 2020/2021 спроведено во Македонија во јануари, 2020 година. Нашето најново истражување за QUDAL – QUality meDAL покажува дека пазарот во Македонија, исто како и преостанатите пазари во регионот, е се попребирлив и побогат со конкуренција, што само дополнително ја нагласува важноста на Вашата победа во Вашата пазарна категорија. Честитки за овој извонреден успех! Преку освојување на првото место во најновото истражување на пазарот за QUDAL – QUality meDAL, врз основа на гласовите од испитаните граѓани во Македонија, ги победивте Вашите директни конкуренти“-информираат од QUDAL – QUality meDAL. Истражувањето за QUDAL – QUality meDAL( www.qudal.com), кое го спроведува меѓународната организација ICERTIAS – International Certification Association GmbH, го мери исклучиво искуството, мислењето и перцепцијата на корисниците за снабдувачите и производителите кои нудат апсолутно највисоко ниво на квалитет на пазарот. Швајцарската организација ICERTIAS - International Certification Association GmbH (www.icertias.com) во јануари 2020 година го спроведе наведеното истражување на пазарот QUDAL – QUality meDAL General Macedonia 2020/2021 преку интернет-анкета. Бројни почитувани меѓународни и локални компании гордо ја користат наградата од ICERTIAS во своите промотивни материјали. Тие се Allianz, Barilla, Bosch, Danone, GlaxoSmithKline, GREE, Heineken, Henkel, Hyundai, KAM, Kozuvcanka, McDonald's, Nestlé, Procter&Gamble, SIXT, Sport Vision, Technomarket, Triglav, Unilever и многу други.

Швајцарската асоцијација за сертифицирање ИЦЕРТИАС е организација со седиште во Цирих која врши испитување на светскиот пазар преку иноватина методологија. Мерењата што ги врши оваа асоцијација се задржуваат само на 100% квалитет што го нудат компаниите.

КУРИР во тесна трка за најдобар регионален портал

Катерина Бојаџиева — Fri, 01 Nov 2019 13:50:38 +0000

По вторпат стартуваше независниот избор за најдобар регионален портал кој „Media daily“ го спроведува од 1.11 до 30.11.2019 година. Во најтесен круг за оваа година влегоа 30 портали од шест земји- Словенија, Хрватска Србија, Босна и Херцеговина, Црна Гора и Македонија, меѓу кои и КУРИР, што е признание за нашиот долгогодишен квалитет и професионалност. Изборот се прави преку анкета меѓу читателите на порталите и бодување од жири. Минатата година на анкетата гласале 6.500 читатели. Победникот ќе биде прогласен на 10.12.2019 во 12 часот. Сите кандидати за оваа година можете да ги видите тука. ГЛАСАЈТЕ ОВДЕ.