ла манш – Kurir.mk

Британската полиција заплени над еден тон кокаин во каналот Ла Манш

Ивона Петрова — Thu, 20 Apr 2023 17:53:36 +0000

Британската гранична полиција заплени повеќе од еден тон кокаин во водите на Ла Манш, соопшти денеска британското Министерство за внатрешни работи. Британската полиција откри голем број предмети кои плутаат на површината на водата, по што биле однесени во пристаништето Довер, каде тестовите потврдиле дека се работи за повеќе од еден тон кокаин. Дрогата се запленува околу 1,5 месец откако два тона кокаин, спакувани во херметички затворени пакувања, од кои некои беа прикачени на елеци за спасување, беа исфрлени на брегот на француските плажи во Нормандија. Министерството наведува дека минатата година во Англија и Велс биле запленети 18,8 тони дрога, што е зголемување за 68 отсто во однос на периодот 2020-2021 година.

Во тек е спасувачка акција во Ла Манш откако се преврте мал брод

Ивона Петрова — Wed, 14 Dec 2022 09:52:06 +0000

Голема операција за пребарување и спасување е во тек во Ла Манш откако утрово доживеал несреќа мал брод, на кој се претпоставува дека имало околу 50 луѓе, јави Скај Њуз. Британската агенција за поморска и крајбрежна стража соопшти дека голем број агенции – вклучително и крајбрежната стража, Кралската морнарица, граничните сили и француската морнарица – трагаат по бродот кој се превртел, додека авионска брза помош исто така е испратена на местото на настанот во близина на брегот на Кент. Потрагата ќе продолжи цел ден, но во оваа фаза се стравува дека многумина се мртви со оглед на ниската температура на водата, пишува Скај Њуз. Секој ден ви изминатата седмица минималната температура се спушта под нулата. Крајбрежната стража информира дека во тек е спасувачка информација, посочувајќи дека „немаат други информации“.

Секој трети имигрант кој го минува Ла Манш е Албанец, тврдат британските медиуми

Ивона Петрова — Sun, 27 Nov 2022 09:11:07 +0000

Британските медиуми пренесуваат дека секој трет имигрант кој илегално го минува Ла Манш и стигнува на британска територија е Албанец, јави Топ чанел. – Бројот на баратели на азил кои добиваат поддршка финансирана од парите на британските даночни обврзници за првпат достигна 100.000. Тоа го покажуваат податоците на „ Home Office”, според кои ова е бројот на имигранти кои на крајот на септември добивале помош од владата, наспроти помалку од 69.000, колку што бил нивниот број минатата година, наведуваат медиумите. Додаваат дека повеќето добиваат бесплатно сместување и животен додаток од 40,85 фунти неделно за секое лице во нивното семејство. Албанците сочинуваат 35 отсто или нешто повеќе од една третина, од луѓето кои го преминале Ла Манш со мали бротчиња и гумени чамци во првите девет месеци од годинава, покажуваат новите податоци на британските власти. Тие, исто така, сочинуваат половина од луѓето забележани на оваа рута во периодот јули-септември, што е нагло зголемување во споредба со претходните години, кога 3 отсто од пристигнатите на британска територија во 2021 година биле од албанска националност а само 1 отсто во 2020 година. Информациите од Министерството за внатрешни работи покажуваат дека имало над 33.000 пристигнувања на мали бродови и чамци во Обединетото кралство од јануари до септември оваа година. Во овој период се проценува дека во оваа земја влегле повеќе од 11.200 Албанци. Авганистанците се втори на листата со 15 отсто од пристигнатите.

Повеќе од 360 мигранти спасени во Ла Манш

Ивона Петрова — Mon, 10 Oct 2022 05:37:26 +0000

Повеќе од 360 мигранти кои со мали чамци се обиделе да стигнат до брегот на Велика Британија преку Ла Манш се спасени на море, соопштија француските власти. Мигрантите беа спасени во неколку спасувачки операции и вратени во француските пристаништа. Од почетокот на годината Ла Манш го поминале над 33.500 луѓе, информираа властите.

Повеќе од 25.000 мигранти годинава го минале Ла Манш

Ивона Петрова — Mon, 29 Aug 2022 07:09:45 +0000

Над 25.000 мигранти годинава го минале Ла Манш, покажуваат податоците на британската Влада. На британското крајбрежје само во саботата пристигнале уште 19 мали чамци со 915 лица, соопшти британската полиција, пренесе Анадолија. Вкупниот број на лица кои само годинава го минале каналот изнесува 25.146, а вкупниот број на илегални премини би можел двојно да се зголеми во споредба со 2021 година. Британската Влада, пред два месеца, го објави контроверзниот план на Руанда за депортирање на мигрантите од Ла Манш во оваа централноафриканска земја, каде што ќе се обработуваат нивните барања за азил. Планот е во мирување во очекување на судска ревизија.

Годинава над 20.000 мигранти го преминаа Ла Манш за да стигнат до Велика Британија

Ивона Петрова — Sun, 14 Aug 2022 12:39:36 +0000

Повеќе од 20.000 мигранти, кои доаѓаат од Франција, досега годинава го преминаа Ла Манш со мали чамци за да стигнат до Британија, јави ДПА, повикувајќи се на податоци од британската влада. Бројот на мигранти кои вчера го преминаа Каналот изнесуваше 607, трет пат годинава бројот на мигранти да надмине 600 во еден ден. Вкупниот број на мигранти годинава достигна 20.017. Минатата година британските власти регистрираа 28.526 мигранти кои пристигнале на британска територија откако го преминале Ла Манш. Минатата година во ова време бројот на овие мигранти изнесуваше нешто повеќе од 11.300. Досега во август се регистрирани 3.618 мигранти, од кои 1.694 пристигнале во Велика Британија во изминатата недела. Најголем дневен број на мигранти годинава е забележан на 1 август, кога Ла Манш го преминале 696 со 14 пловни објекти – т.е. на еден брод во просек имало по 43 луѓе.

Обидите за илегален премин на Ла Манш се зголемија за 68 отсто во првата половина на 2022 година

Ивана Ефремовски — Mon, 20 Jun 2022 14:10:12 +0000

Бројот на обиди на мигранти илегално да го преминат Ла Манш за да стигнат до Англија значително се зголеми во првата половина на 2022 година по веќе рекордната 2021 година, соопшти денеска француското МВР. Помеѓу 1 јануари и 13 јуни 2022 година имало 777 случаи на преминување или обид за преминување на Ла Манш со мали чамци, во кои биле вклучени 20.132 мигранти, што претставува 68 отсто повеќе отколку во истиот период во 2021 година, соопшти Министерството во време кога на британска страна се заострува мигрантската политика. Во 2021 година, обидите да се премине главно со гумени чамци од северниот брег на Франција меѓу Кале и Данкерк достигна „рекорд“ од 52.000 луѓе кои се обиделе и 28.000 кои успеале, според податоците на Министерството во јануари. Министерството соопшти дека стапката на спречени обиди постојано се зголемува и дека 61,39 отсто од обидите за преминување преку морето биле спречени, што е за 4,2 процентни поени повеќе од 2021 година и дека од почетокот на годината биле приведени 10.090 лица, што е пораст од 65 отсто. (МИА)

Триесет и тројца мигранти спасени во каналот Ла Манш

Дарко Андоновски — Sat, 08 Aug 2020 16:43:25 +0000

Триесет и тројца мигранти беа спасени денеска од импровизирани чамци во две одделни операции, во обид да го преминат каналот Ла Манш за да стигнат до Англија, јави дописникот на МИА од Париз. Ангажиран од регионалниот центар за оперативно набљудување и спасување, првиот патролен чамец околу 8 часот спасил 17 мигранти кои се нашле во тешкотии на два импровизирани чамци северо-источно од пристаништето Кале, соопшти поморската префектура на Ла Манш и Северното море. Кратко време потоа, околу 9 часот, во друг чамец со 16 лица, биле спасени од друг патролен чамец во широчината на Сангат од поморската бригада на жандармеријата на Кале, се додава во соопштението. Сите 33 мигранти се безбедни и здрави, нивната националност не е одредена, тие се згрижени во пристаништето во Кале од страна на граничната полиција.

Франција: Спасени 12 мигранти во каналoт Ла Манш

Дарко Андоновски — Mon, 20 Jan 2020 17:56:38 +0000

Дванаесет мигранти, меѓу кои и едно дете, биле спасени денеска на северното француско крајбрежје, додека се обидувале да го преминат каналот Ла Манш за да стигнат до Велика Британија, соопштија француските власти, јави дописникот на МИА. Ова е прва спасувачка операција на мигранти во Франција од почетокот на 2020 година. Спасувачките служби биле „предупредени директно“ од мигрантите „кои забележале проблем со чамецот“, соопшти префектурата на Ла Манш и Северното Море. Групата во која имало и две жени и едно дете била успешно спасена и немало ниту еден повреден. Од крајот на 2018 година, обидите за преминување на каналот се зголемија и покрај опасноста од големиот сообраќај, силните струи и ниската температура на водата. Во 2019 година биле пресретнати 2.758 мигранти кои се обидоа да го преминат Каналот, четири пати повеќе отколку во 2018 година, според поморската префектура.

„Летечкиот човек” повторно ќе се обиде да го прелета Ла Манш

Ивона Петрова — Thu, 01 Aug 2019 07:47:51 +0000

„Летечкиот човек”, Французинот Френки Запата повторно ќе се обиде да го прелета Ла Манш на „флајбордот”, којшто инаку е негов изум. Неговиот прв обид пред неполна седмица, заврши на половина пат. Сопругата на пронаоѓачот, Кристел денеска изјави дека тој повторно ќе проба да го прелета 36 километри широкиот теснец меѓу Франција и Англија. Минатата седмица, при својот прв обид, Запата ја промаши платформата за слетување на брод каде што требаше да дополни гориво, на 20 километри пат. Така, тој сега ќе мора неговата „даска за летање“ да ја направи поголема, специјална и различна од оние што тој им ги продава на љубителите на водени спортови. Моторот на флајбордот работи на керозин. Авантуристот го носи резервоарот на грб, додека стапалата му се прицврстени за даската.