лео варадкар – Kurir.mk

Варадкар: Израелските напади во Газа се повеќе наликуваат на одмазда

Ивона Петрова — Fri, 03 Nov 2023 09:06:15 +0000

Ирскиот премиер Лео Варадкар повторно ги критикуваше операциите на Израел во Газа, велејќи дека тие се повеќе наликуваат на одмазда. -Цврсто верувам дека Израел има право да се брани, има право да го нападне Хамас. Но, тука не се работи само за самоодбрана. Ова се повеќе наликува на одмазда, изјави денеска Варадкар за државното радио РТЕ, пренесено од Гардијан. Ирскиот премиер веќе изјави дека Израел има право да се брани, но дека нема право да прави зло. На почетокот на бомбардирањето на Газа тој кажа дека реакцијата наликува на колективна казна.

За време на епидемијата на Ковид-19, ирскиот премиер повторно ќе работи како лекар

Ивона Петрова — Mon, 06 Apr 2020 06:55:28 +0000

Ирскиот премиер Лео Варадкар, кој е лекар по професија, повторно се пријавил за медицинска пракса и ќе работи една смена неделно за време на епидемија на коронавирус, соопшти денеска портпаролот на владиниот кабинет. Варадкар работеше како лекар седум години пред да ја напушти професијата и да влезе во политика, по што во 2013 година беше избришан од медицинскиот регистар. Во март, министерот за здравство Симон Харис ги повика медицинските лица да се пријават и да му помогнат на здравствениот систем на земјата во борбата против коронавирусот, со порака: „На Вашата земја сте потребни“. Илјадници медицински лица се пријавиле за да помигнат. Според „Ајриш Тајмс“, Варадкар повторно се пријавил во март кога почна кризата и ќе работи во Јавната здравствена служба (ХСЕ), каде телефонски ќе контактира со луѓе кои мислат дека го имаат вирусот и ќе изнесува проценка за нивната состојба. Ирскиот премиер потекнува од лекарско семејство. Татко му бил лекар, мајка му медицинска сестра, а уште неколку челнови од неговото семејство работат во здравство.

Ирскиот премиер поднесе оставка

Дарко Андоновски — Fri, 21 Feb 2020 08:15:12 +0000

Ирскиот премиер Лео Варадкар поднесе оставка, но поради преговорите за формирање нова влада, тој ќе остане да ја извршува функцијата. Тој синоќа му ја предал својата оставка на претседателот на државата Мајкл Хигинс. Според ирскиот Устав, премиерот и владата ќе продолжат да ги исполнуваат своите должности се додека не се назначат нивни наследници, се наведува во владиното соопштение. Преговорите за состав на нова влада се веројатно многу тешки, поради паритет во новиот ирски парламент. Билансот на моќ во Парламентот е таков што најмалку три партии ќе треба да постигнат договор за да формираат коалициска влада. На изборите кои се одржаа на 8 февруари ниту една партија не покажа убедлив резултат. Партијата на Варадкар „Фин Гејл“ е трета политичка сила со 35 пратеници, но има само три помалку од првопласираната „Фин Фојл“ (38) и два помалку од втората „Шин Фејн“ (37), која се смета за политичко крило на Ирската републиканска армија (ИРА), паравоена организација што се спротивставува на британското присуство во Северна Ирска. Фин Фојл и Фин Гејл ја отфрлија можноста за соработка со Шин Фејн, кој, пак, започна консултации со помалите левичарски партии со надеж дека ќе формираат широка коалиција. Но, шансите за успех се мали. Преговорите би можеле да одземат време и доколку не успеат ќе доведат до нови избори. По последните парламентарни избори во 2016 година, беа потребни 70 дена да се формира коалициска влада во која беа вклучени и Фин Фојл и Фин Гејл.