Летонија – Kurir.mk

Естонија и Летонија ќе купат воени возила во вредност од 693 милиони евра

Ивона Петрова — Wed, 04 Oct 2023 19:32:55 +0000

Естонија и Летонија планираат да ги прошират и модернизираат транспортните способности на нивните вооружени сили со заедничко купување воени возила во вкупна вредност од околу 693 милиони евра (729 милиони долари), соопштија денеска естонските власти. Естонскиот инвестициски центар за одбрана соопшти дека потпишал рамковен договор со локалните претставници на производителите Volvo, Scania и Mercedes Benz. Договорот е со рок од седум години, соопшти органот. Возилата се од различни типови и големини и треба да се нарачаат и испорачуваат во серии, се вели во соопштението. Меѓу нив ќе има и логистички возила наменети за патен транспорт и тактички возила кои ќе можат да се користат и на терен и на пат. Во првата фаза од набавката треба да се набават близу 400 возила, а првите ќе бидат испорачани следната година, се вели во соопштението. Естонија и Летонија неодамна ја проширија соработката во секторот за вооружување во светлината на инвазијата на Москва на Украина. Двете соседни балтички земји од ЕУ и НАТО, кои граничат со Русија, се договорија заеднички да го купат системот за воздушна одбрана со среден дострел Ирис-Т од германско производство, пренесе ДПА.

Казни за навивачите кои истакнуваа усташки симболи на мечот Хрватска – Летонија

Бошко Тасиќ — Sat, 16 Sep 2023 05:00:53 +0000

Европската фудбалска асоцијација (УЕФА) покрена дисциплинска постапка против Хрватската фудбалска федерација. Причината е истакнување на знамиња со забранета содржина на квалификацискиот натпревар во кој „коцкестите“ ја совладаа Летонија со убедливи 5-0. Двајца навивачи во неколку наврати истакнале знамиња со усташки симболи, а истите се одамна забранети во Хрватска. Двајцата биле приведени по завршување на натпреварот и биле изведени пред Судот во Ријека. Првиот навивач добил казна во висина од 1,300 евра, додека вториот приведен заработил затворска казна во времетраење од дваесет денови. Приведените исто така добиле двегодишна забрана за присуство на хрватските стадиони, како и изричита забрана за патувања на гостинските натпревари на „коцкестите“. Воедно, тие ќе мораат секоја недела да се пријавуваат во најблиската полициска станица.

Естонија ќе испрати граничари во Летонија за помош на границата со Белорусија

Тале Кристо — Fri, 15 Sep 2023 07:26:31 +0000

Естонија ќе испрати до 20 припадници на гранични патроли во Летонија за да му помогне на својот балтички сосед да ја заштити и провери нејзината граница со Белорусија, изјави естонскиот министер за внатрешни работи Лаури Ланеметс. Како што пренесе ДПА, според него, полицајците треба да им помагаат на своите летонски колеги во патроли и масовни контроли онолку долго колку што е потребно. Летонија неодамна регистрираше значително зголемување на бројот на мигранти кои се обидуваат без дозвола да ја преминат границата со Белорусија. - Белорусија ги тестира можностите на своите соседни земји, тоа се исто така хибридни напади, рече Ланеметс. Летонија, заедно со Полска и Литванија, го обвинува белорускиот лидер Александар Лукашенко дека на организиран начин носи мигранти на надворешната граница на ЕУ за да изврши политички притисок. Затоа, сите земји веќе ја зајакнаа заштитата на границата. Литванија веќе испрати до 20 граничари за поддршка на Летонија. Поради тоа, сите земји веќе ја зајакнаа заштитата на границата. Литванија веќе испрати 20 граничари за поддршка на Летонија. Летонија, Литванија, Естонија и Полска се членки и на Европската унија и на НАТО. Хибридните закани значат дека напаѓачите се потпираат на комбинација од класични воени операции, економски притисок, хакерски напади, па дури и пропаганда во медиумите и социјалните мрежи.

Бертанс промаши тројка за победа: Еве како Германците се извлекоа за полуфинале (ВИДЕО)

Ристе Здравков — Wed, 06 Sep 2023 12:42:37 +0000

Кошаркарите на Летонија имаат за што да жалат, бидејќи имаа шанса да се пласираат во полуфиналето на Светското првенство. Сепак, оваа храбра селекција претрпе пораз од Германија со минимални 81-79. Последните 20 секунди понудија голема драма. Германците имаа предност и напад, а одговорност презеде Денис Шрудер. Првата ѕвезда имаше натпревар за заборав, па така го промаши и шутот со кој ќе го решеше победникот. Летонците имаа напад со нешто повеќе од седум секунди. Топката ја поведе Давис Бертанс кој изненадувачки се најде осамен во противничко поле, па реши да шутне за три преку рака и блок, а на негова жал промаши. Последните 20 секунди од натпреварот: Останува нејасно зошто Бертанс не направи уште чекор-два, бидејќи време за шут имаше, па дури и по одбиената топка остана секунда. Летонија на овој Мундијал покажа неверојатен карактер. Без првата ѕвезда Криштапс Порзингис ги помати сметките на европските фаворити Франција и Шпанија, а имаше и шанса да игра полуфинале.

Летонија ја зајакна безбедноста на границата со Белорусија по 96 обиди за илегални преминувања

Ивана Ефремовски — Tue, 15 Aug 2023 17:53:42 +0000

Граничната служба на Летонија денеска побарала помош од армијата и полицијата за да ја чуваат границата со Белорусија по 96 обиди за илегално преминување во рок од 24 часа, соопшти граничната служба. На припадниците на Граничната служба им е скратен одморот за да можат да се вратат да патролираат по границата, се додава во соопштението. Летонија има „информации за можно зголемување на хибридните закани“ и дека властите во Белорусија сè повеќе се вклучени во организирањето на протокот на илегални имигранти, додаде гранична служба. (МИА)

Летонија со Порзингис и Бертанс ќе го напаѓа светскиот трон

Бошко Тасиќ — Thu, 29 Jun 2023 05:19:37 +0000

Најголемата ѕвезда на летонската кошарка, Кристапс Порзингис ќе биде дел од селекцијата на Летонија за Светското првенство 2023 година. Порзингис се најде на листата на кошаркари кои ќе се подготвуваат за првиот настап на Летонија на едно големо натпреварување по Евробаскетот 2017 година. На списокот на селекторот на Летонија се најдоа вкупно 24 играчи меѓу кои и кошаркарот на Оклахома Сити Тандер, Дејвис Бертанс, центарот на Жалгирис, Роландс Смитс, како и Артур Куруч од Басконија и Јанис Стрелниекс од грчки АЕК. Летонија на СП 2023 е во група со Франција, Канада и Либан.

Летонија и Литванија побараа зајакнување на источното крило на НАТО од „Вагнеровците“ во Белорусија

Тале Кристо — Tue, 27 Jun 2023 18:06:51 +0000

Летонија и Литванија денеска апелираа до НАТО да ги зајакне нивните источни граници. Повикот доаѓа како одговор на стравувањата дека руската приватна воена компанија „Вагнер“, позната по војната во Украина и неуспешниот бунт во Русија, наскоро ќе основа нова база во Белорусија. Евгениј Пригожин, шеф на „Вагнер“, пристигна во Белорусија. Пристигнувањето беше договорено со посредство на претседателот на Белорусија Александар Лукашенко, со кој беше ставен крај на бунтот на платениците на „Вагнер“ во Русија минатата сабота. Рускиот претседател Владимир Путин изјави дека на борците на „Вагнер“ ќе им се понуди можност да се преселат во Белорусија. -Мораме да го погледнеме овој потег од нов безбедносен агол. Запознаени сме со можностите на тие платеници, рече летонскиот министер за надворешни работи Едгарс Ринкевичс за време на посетата на Париз со неговите колеги од Балтикот. Министерот за надворешни работи на Литванија, Габриелиус Ландсбергис, ја истакна брзината со која „Вагнер“ напредуваше кон Москва, возејќи стотици километри во еднодневната трка до главниот град. Според него, овој индикатор укажува дека одбраната на балтичките држави мора дополнително да се зајакне.

Тројца кандидати за претседателската функција на Летонија

Ивана Ефремовски — Wed, 31 May 2023 06:53:58 +0000

Пратениците на еднодомниот парламент (Сејм) на Летонија денеска ќе гласаат за нов претседател. Актуелниот шеф на државата Егилс Левитс не се кандидира за втор мандат и ќе ја извршува функцијата до 8 јули, јави ДПА. За највисоката државна функција во републиката има тројца кандидати. Во конкуренција за функцијата се 42-годишната Елина Пинто, експерт за јавна администрација и активистка на летонската дијаспора во Европа, 66-годишниот архитект, бизнисмен и политичар Улдис Пиленс и 49-годишниот Едгарс Ринкевичс, министер за надворешни работи во сегашниот кабинет. Според аналитичарите, ниту еден од кандидатите нема доволно поддршка во Парламентот. Претседателот се избира со апсолутно мнозинство од гласовите на пратениците (51 глас од 100) за мандат од четири години. Доколку во првиот круг не се утврди победник, истиот ден може да се распише второ гласање со учество на првите двајца кандидати. Доколку и тогаш не биде избран претседателот, повторно ќе започне процесот на номинација, а изборите ќе се одложат за следниот месец. Претседателот на Летонија има ограничени овластувања. Тој е претставник на државата на меѓународната сцена и врховен командант на вооружените сили, има право да помилува, да предлага кандидат за премиер, може да свикува и одржува вонредни состаноци на Владата. Шефот на државата има право да спроведува законодавна иницијатива и да ги врати на ревизија законите усвоени од Сејмот. (МИА)

Естонија и Летонија заеднички ќе набавуваат германски системи за ПВО

Тале Кристо — Mon, 22 May 2023 07:45:37 +0000

Естонија и Летонија планираат заедничка набавка на германски системи за ПВО со цел да го заштитат воздушниот простор на тие две членки на НАТО, соопштија министерствата за одбрана на двете земји. Според привремениот договор, испораките на системот заедниза противвоздушна одбрана со среден дострел IRIS-T SLM, произведен од германскиот производител на оружје Diehl Defence, би можеле да започнат во 2025 година. Доколку се спроведе, тоа ќе биде најголемиот договор за одбранбена соработка меѓу балтичките соседи кои граничат со Русија. Вредноста на договорот и деталните информации за бројот на системи што се планира да се набават не се откриени, бидејќи преговорите со добавувачот се уште се во тек, соопштија министерствата за одбрана на Естонија и Летонија. Естонскиот министер за одбрана Хано Певкур го опиша договорот како „заеднички проект од историски размери“ за одбранбената соработка на двете земји, нагласувајќи дека тоа е „најголем досега“ договор меѓу Талин и Рига.

Летонија испраќа ракети „Стингер“ во Украина, а Шпанија тенкови „Леопард“

Ивона Петрова — Sat, 22 Apr 2023 18:01:39 +0000

Летонија ќе и испорача ракети „Стингер“ на Украина, а Шпанија борбени тенкови „Леопард 2“ како нова западна воена помош за таа земја во одбрана од Русија. Сите противвоздушни ракети „Стингер“ кои се уште се во вооружените сили на Летонија треба да бидат доставени до Киев, соопшти Министерството за одбрана на таа балтичка земја во ЕУ и НАТО. Освен тоа, во Летонија ќе има и поинтензивна обука на украинските војници. „Латвија одговори на барањето на Украина за испорака на системи за противвоздушна одбрана и одлучи да и ги даде на Украина сите преостанати системи „Стингер“. Ќе направиме се да ги испорачаме што е можно поскоро“, изјави министерката за одбрана Инара Мурниеце. Таа не откри колку и кога ќе бидат испорачани. Помош најави и Шпанија, која наскоро на Украина ќе и испорача шест тенкови „Леопард 2“. „По ова ќе следи втор пакет со уште четири тенкови“, изјави министерот за надворешни работи Хозе Мануел Албарес за германски „Функе“ во интервју објавено денеска. „Ќе ја поддржуваме Украина се додека ѝ е потребно. Тоа вклучува хуманитарна помош, прием на бегалци и снабдување со одбранбено оружје“, додаде тој.