лична карта – Kurir.mk

СО ТУЃА ЛИЧНА КАРТА СЕ ОБИДЕЛ ДА ЗЕМЕ БРЗ КРЕДИТ – скопјанец заврши со лисици на рацете откако ги убедувал вработените дека е истиот во живо и на документ

Дарко Андоновски — Fri, 03 Nov 2023 11:34:27 +0000

На 02.11.2023 околу 09.30 часот во Скопје, полициски службеници од Полициската станица Чаир го лишиле од слобода Х.З.(45) од с.Крушопек, скопско. Тој се сомничи дека одзел лична карта на лице од скопско село и во филијала на финансиско друштво на подрачје на Бутел се обидел да земе кредит, претставувајќи се дека е лицето, но од вработените бил забележан дека лажно се претставува. Тој бил приведен во полициска станица и по целосно документирање на случајот, во координација со јавен обвинител, против него ќе биде поднесена соодветна пријава.

Со туѓа лична карта сакал да земе кредит, приведен измамник во Скопје

Ивана Ефремовски — Fri, 03 Nov 2023 09:11:42 +0000

Нови правила за вадење лична карта – измените на законот во Собрание

Ристе Здравков — Tue, 05 Sep 2023 11:55:23 +0000

Се менуваат 9 члена од законот за издавање на лична карта. Собранието денес го усвои предлогот за измените на законот да се носат по скратена постапка, по што комисиите ќе го разгледуваат и ќе биде ставен на гласање пред пратениците. Со измените се ревидира членот 8 од законот, при што се предвидува дека доколку граѓанинот го промени живеалиштето или податоците од личната карта во тој случај мора во рок од 15 дена да побараат менување на живеалиштето и издавање нова лична карта, а притоа е потребно граѓанинот да приложи документ со кој ја докажува промената. За продолжување на личната карта отсега граѓаните кои го смениле живеалиштето во полиција ќе мора да носат и имотен лист, а за промена на други податоци соодветен доказ, предвидуваат измените на Законот за лична карта. Имено, со постојната состојба голем број на граѓани не ја менуваат личната карта иако смениле живеалиште, се до истекот на важечката лична карта. Со ова се оставаше можност и за избегнување на одредени законски обврски, но и непрецизни евиденции за издадени лични карти, кои се водат од страна на Министерството за внатрешни работи. Со Законот за личната карта е предвидено дека барањето за издавање на лична карта граѓанинот го поднесува лично во МВР според подрачјето на кое граѓанинот има живеалиште. При практичната примена на законот се утврди потребата да им се овозможи на граѓаните барањето да го поднесат во МВР според местото на престојување. При конципирање на ова решение се имаа предвид сè, интересите на граѓаните, но се имаше за цел и заживување на престојувалиштето, како законска категорија – се вели во предлог-измените на Законот за лична карта. Понатаму, во законот се додава и решение според кое член од семејството може да поднесе барање за издавање на лична карта за лице не може да го поднесе лично од оправдани здравствени причини и при тоа во прилог на барањето треба да достави документ со кој се докажуваат оправданите здравствени причини заради кои барателот не може да дојде лично. Се воведува и решение во случај кога бездомник за првпат поднесува барање за издавање на лична карта, земањето податоци за биометриските карактеристики за бездомникот се врши во присуство на службено лице од центарот за социјални работи. За бездомник се смета граѓанин кој нема место и адреса на живеење и средства со кои би можел да ја задоволи потребата од домување. На граѓанин над 65 години живот му се издава лична карта со трајно важење – се вели во предлог-измените.

Системот блокиран: Ако денес успеете да закажете за пасош и лична карта термин најрано во декември или во 2024 г.

Ристе Здравков — Fri, 11 Aug 2023 11:24:09 +0000

Ако денес успеете да закажете термин за вадење лични документи со новото име на државата, тој сигурно ќе биде во декември или во јануари идната година. Но, на граѓаните не им пречи тоа што толку ќе чекаат, колку што се револтирани што не можат да добијат никого кога се јавуваат во кол-центарот на телефонскиот број 072/92-92-92, додека закажувањето преку интернет страната на МВР е комплицирано и непрегледно, пишува Плусинфо. Од МВР за порталот велат дека граѓаните чекале „5 до 12“ за да ги променат личните документи, а според нив зголемениот обем на работа е тоа што веќе со години наназад во летниот период најмногу се издаваат лични документи (лична карта, возачка дозвола и пасош). – МВР ве известува дека не постои застој во нормалното функционирање – ниту на економскиот оператор којшто за сметка на МВР го сервисира повикувачкиот центар, односно неговите 12 повикувачки линии, ниту пак во организациските единици при Одделот за граѓански работи коишто на дневна основа примаат повеќе стотици апликации од граѓани за различните видови лични документи. Факт е дека волето се зголемува обемот на барања за вадење лични документи, велат од МВР за Плусинфо. Најавата на МВР дека до февруари мора да се сменат личните документи со новото име ги револтира граѓаните. Тие оправдано негодуваат дека е неразбирливо е важечки документи да мора да се сменат и тоа да биде на нивен трошок. Ако е така, велат тие промената на документите треба да биде на сметка на државата, пишува порталот Република. Но, власта на СДСМ и ДУИ, пишува натаму Република, сигурно нема да се откаже од неколку милиони евра за промена на документите, па граѓаните деновиве го „сардисаа“ сајтот на МВР во обид да закажат термин. На телефонскиот број за закажување со часови никој не се јавува и „сите оператори се зафатени“, додека на интернет страницата на МВР најчестиот одговор што го дава е „не постои слободен термин“. – Така е за секој термин, велат граѓаните. Но, она што најмногу ги револтира граѓаните е фактот што на интернет страницата на МВР за закажување стои „Република Македонија“ а се бара да извадиме документи со „Северна“, пишува Република.

Пријава за злоупотреба на лична карта за подигање брзи кредити

Катерина Бојаџиева — Fri, 04 Aug 2023 14:49:54 +0000

Четириесет и четиригодишна жена од Кочани со живеалиште во Пробиштип вчера во ОВР Пробиштип пријавила дека нејзината лична карта била злоупотребена за подигање брзи кредити. Според пријавеното, на Фејсбук таа ја објавила својата трансакциска сметка за уплата на донација за лекување на член на фамилијата, по што порака на социјалната мрежа ѝ пратило лице кое ја побарало личната карта за да направи донација. По кратко време на сметката ѝ биле исплатени 70.000 денари од две финансиски друштва. Како што соопшти МВР во дневниот Билтен, веднаш потоа ѝ се јавило машко лице кое, претставувајќи се како сопственик на фирма, ја известило дека наводно по грешка ѝ била извршена уплата на нејзината сметка. -Побарало парите да му ги врати, испраќајќи ги по такси возило во Скопје. Таа се посомневала дека е измамена и случајот го пријавила во полиција. Во координација со јавен обвинител се преземаат мерки за негово расчистување, наведува Министерството за внатрешни работи.

Граѓаните од западен Балкан во Албанија ќе може да влегуваат со лична карта

Тале Кристо — Wed, 01 Feb 2023 15:09:12 +0000

Албанската влада на денешната седница донесе одлука со која на граѓаните од земјите на западен Балкан за влез во земјата нема да им биде потребна патна исправа, туку тоа може да го направат со валидни лични карти, јави државната агенција АТА. Како што изјави министерот за внатрешни работи, Бледи Чучи одлуката влегува во сила веднаш и оти целта е создавање олеснителни можности за движење во регионот на Западен Балкан. -Донесената одлука има врска со слободното движење на граѓаните во Западен Балкан само со лична карта. Станува збор за договор кој беше потпишан во Берлин во ноември минатата година и сега тоа го одобрува албанската влада. Што значи дека со стапување во сила на оваа одлука сите граѓани од Западен Балкан можат слободно да дојдат и да се движат во Албанија само со лична карта, рече тој. Оценува дека „ова е во духот на две многу важни иницијативи за зајакнување на регионот и Западен Балкан, Берлинскиот процес и „Отворен Балкан“, еден од трите столба, како што рековме, слободното движење на луѓе, капитал и стоки“.

Скопјанка пронашла изгубена лична карта, па со неа аплицирала за брз кредит како да е нејзина

Катерина Бојаџиева — Mon, 30 Jan 2023 18:17:13 +0000

Единицата за економски и компјутерски криминал при СВР Скопје поднесе кривична пријава против Џ.Ш.(33) од Скопје, поради постоење основи на сомнение за сторено кривично дело „измама при добивање кредит или друга погодност“ по член 249 од Кривичниот законик. Имено, пријавената пронашла изгубена лична карта на лице од Скопје, по што со неа на 19.12.2022, во една филијала на финансиско друштво, аплицирала за одобрување брз кредит, со што имала намера да се стекне со противправна имотна корист во износ од 32.000 денари, обидувајќи се да го доведе во заблуда вработеното лице во друштвото дека личната карта е нејзина.

Тогаш се уште била Фахрета Јахиќ: Лепа Брена вака изгледала на својата лична карта на 18 години, буквално ќе мислите дека е фотошоп (ФОТО)

Дарко Андоновски — Tue, 10 Jan 2023 11:01:44 +0000

Пејачката Лепа Брена пред неколку години со своите следбеници сподели фотографија од младоста, поточно од периодот кога штотуку станала полнолетна и ја извадила првата лична карта. Брена на 18 години немала платинесто руса коса која со години ѝ беше, и се уште ѝ е заштитен знак, туку беше бринета. Очигледно си ги средила веѓите да ѝ бидат тенки. А си ставила и карминче. „Ова е единствената личност која успеала да изгледа убаво на фотографијата за лична карта“, „Тогаш немала ни поим што ќе им значи на луѓето, дека ќе стане Лепа Брена“, „Кој би знаел дека ќе биде ем „лепа“ ем Брена“ – ова беа само дел од многубројните коментари.

СО ТУЃА ЛИЧНА КАРТА ЗЕМАЛА КРЕДИТ – скопјанка заработи кривична пријава, еве ги деталите

Дарко Андоновски — Wed, 14 Dec 2022 13:39:19 +0000

Единицата за економски и компјутерски криминал при СВР Скопје поднесе кривична пријава против И.И.(54) од Скопје осомничен за сторени кривични дела „измама при добивање на кредит или друга погодност” по член 249 и „злоупотреба на лични податоци” по член 149 од Кривичниот законик. – На 04.11.2022 во финансиско друштва во Скопје, пријавената поднела документи за добивање кредит и притоа употребила лична карта на друго лице и се потпишала на апликацијата за кредит во име на другото лице на кое гласела личната карта, соопштија денеска од МВР. Притоа, појаснуваат од МВР, вработеното лице во финансиското друштво се посомневала во идентификацијата на пријавената и повикала полициски службеници од Единицата за економски и компјутерски криминал, кои по преземените мерки и активности и документирање на настанот изготвиле кривична пријава.

ОД 1 ЈАНУАРИ: До државјанство, пасош и лична карта по електронски пат

Ивона Петрова — Wed, 17 Aug 2022 09:30:08 +0000

Од 1 јануари уверението за државјанство ќе може да се издава и во електронска форма преку Националниот портал за електронски услуги или преку квалификувана електронска препорачана достава на електронска адреса. Граѓаните ќе можат по електронски пат да поднесуваат и барања за издавање на лична карта и пасош. Министерот за внатрешни работи Оливер Спасовски на својот фејсбук профил информира дека се усвоени законските измени за целосна дигитализација на процесите со цел подобрување на искуството на граѓаните при вадење на лични документи. – Со цел подобрување на искуството на граѓаните при вадење на лични документи и спроведување на целосна дигитализација на процесите, ова раководство на МВР пристапи кон хармонизирање на законската регулатива со европското законодавство, со тоа што беа предложени законски измени коишто Собранието на Република Северна Македонија ги усвои во март годинава, а стапуваат на сила 1 јануари 2023 година, наведува Спасовски. Поднесувањето на барање за издавање на лична карта и пасош е овозможено согласно измените и дополнувањата на Законот за лична карта, Законот за патни исправи, Законот за лично име и Законот за пријавување на живеалиштето и престојувалиштето. – Во постапки определени со закон, како што е прибавување на доказ за објава во Службен Весник за загубена лична карта, истиот го прибавува МВР по службена должност преку Националната платформа за интероперабилност. МВР може да издаде решение за поништување на матичен број на граѓанин или странец како електронски документ, појаснува Спасовски во фејсбук статусот. Со цел усогласување со дигитализацијата на процесите поврзани со постапките утврдени со закон, како што наведува Спасовски, формирани се работни групи кои работат на ревидирање на законите и подзаконските акти во надлежност на МВР и тоа на Законот за безбедност на сообраќајот на патиштата, Законот за оружјето, Законот за детективската дејност, Законот за странци, Законот за полиција, Законот за меѓународна и привремена заштита, Законот за заштита од експлозивни материи, Законот за следење на комуникациите, Законот за прометот на експлозивни материи и Законот за приватно обезбедување.