лифтови – Kurir.mk

Знаете ли која е главната причина зошто во лифтовите се ставаат огледала? Одговорот можеби ќе ве изненади

Ристе Здравков — Tue, 07 Mar 2023 12:32:27 +0000

Користењето на лифтови за некои луѓе претставува кошмар. Сепак, луѓето кои ги проектирале лифтовите ги искористиле огледалата за да им го олеснат секојдневното користење на луѓето, а како најважна причина се наведува безбедноста. Имено, огледало во лифтот ви овозможува да видите што другите прават додека се наоѓаат во лифт. На пример, може да го видите изразот на лице на другите личности и каде се наоѓаат нивните раце. Како резултат на тоа, огледалата можат да обесхрабрат кражба или некој непосакуван допир. Дополнителна причина за што можат да послужат огледалата е да го олеснат управувањето доколку сте во инвалидска количка или пренесувате некој поголем предмет. Тоа упатува дека огледалата можат да спречат и некои незгоди. Она на што луѓето прво помислуваат кога станува збор за огледалата во лифтот е чувството на клаустофобија, а огледалото ќе ви даде поширок простор. Поради тоа се препорачува да гледате во огледало доколку чувствувате тегоби додека се возите со лифт. Исто така, доколку ви е здодевно возењето со лифт, огледалата се наведуваат како одличен начин да се забавувате. Помалку е веројатно дека луѓето ќе помислат дека времето поминато во лифт е залудно кога при рака имаат огледало. Може да ја поправите фризурата или да си направите неколку фотографии.

ДКСК со подетални информации за непостоечката фирма за лифтови која добила 90 тендери

Магдалена Андонова — Tue, 15 Mar 2022 15:35:20 +0000

ДКСК во врска со предметот што беше рефериран на седницата на ДКСК одржана на 15.03.2022 година, а се однесува на сомнежи за користење фалсификувани ISO сертификати од страна на економски оператор од областа на сервис, ремонт и монтирање на лифтови при учество на отворена постапка за јавна набавка за набавка на стоки – болнички лифтови во ЈЗУ Градска болница, со цел правилно известување информира дека: - економскиот оператор е регистриран во Централниот регистер на РСМ но во тендерската постапка учествувал со фалсификувани ИСО сертификати, за што потврди овластената фирма за сертифицирање од Република Хрватска која од 2014 година не е присутна на македонскиот пазар. - фирмата што ги издала фалсификуваните сертификати користени во јавната набавка е со наводно седиште во Скопје но таков правен субјективитет не постои во правниот промет на РСМ и не е регистрирана во Централниот регистер на РСМ.

СКАНДАЛ: НЕПОСТОЕЧКА ФИРМА ЗА ЛИФТОВИ ДОБИЛА 90 ТЕНДЕРИ ОД ЈАВНИ ИНСТИТУЦИИ – давале пари од буџетските средства, цела фирма била со фалсификати

Магдалена Андонова — Tue, 15 Mar 2022 12:13:44 +0000

Непостоечка фирма во Скопје, со фалсификувани документи, фалсификувани ИСО сертификати, потписи, конкурирала и во периодот од 2018 до 2022 година има добиено најверојатно околу 90 тендери за монтажа и сервисирање лифтови, главно од јавни институции, кои давале буџетски средства. Ова е предмет што на денешната седница го образложи Владимир Георгиев, член на Државната комисија за спречување на корупцијата (ДКСК) од каде ќе биде доставена иницијатива за кривично гонење во Основното јавно обвинителство во Скопје, како и предупредување известување до Владата, на седница да ги известат сите надлежни органи во постапките за лифтови доколку се појави таа фирма. Од ДКСК нагласуваат дека не смеат да го објават името на фирмата, но изразуваат надеж дека за овој случај ЈО ќе постапи експресно. Оваа фирма била поврзана уште со две други фирми од Скопје, кои работат исто така на монтажа, сервисирање и одржување лифтови, од причина што управителот на оваа фирма е вистински сопственик на овие два други трговски субјекта. Како што појасни Георгиев предметот во ДКСК е по пријава за наводи за сомнежи за користење фалсификувани ИСО сертификати од стана на фирма за сервисирање, ремонт и монтирање лифтови, со цел да се добие тендер во ЈЗУ Општа Градска болница во Скопје. Според Софка Пејовска Дојчиновска, член на ДКСК се работи за класичен криминал и делување и доколку овие субјекти дејствувале подолг временски период ќе се открие дека тие работеле не само кај јавни јавни субјекти, туку сигурно во станбени згради. Таа укажа дека таа група која функционирала ја знаела слабоста на актуелниот Закон. – Замислете која е опасноста, со лажни сертификати за лифтови, животи се во прашање, потенцира таа. Катица Николовска, член на ДКСК, е загрижена од фактот што конечни корисници се државните институции и има дилема на кој начин Антикорупција може да ја запре оваа фирма да учествува во јавни набавки со цел да не предизвикува натамошна штета и да се случи нешто со несакани последици. Георгиев појасни дека Градската Општа болница објавила тендер, а Комисијата за јавни набавки во болницата ја проверила валидноста на ИСО сертификатите кај самиот издавач на сертификатите – фирма од Хрватска, од каде добиле одговор дека сертификатите се фалсификувани. Комисијата не ја прифатила понудата од наведената фирма, а непостоечката фирма вложила жалба до државната комисија за жалби по јавни набавки, од каде е одбиена како неоснована. – Во електронската кореспонденција може да се констатира дека фалсификувањето на овие ИСО сертификати е направеон така што физичко лице од земјава претставувајќи се како главен управител на фирма застапник на фирмата за сертифицирање од Хрватска, од свој домејн во врска со објавениот тендер, до електронските пошти до економскиот оператор што ги поднел фалсификуваните сертификати и до Комисијата за јавни набавки, доставил лажна информација дека овој непостоечеки трговски субјект е официјален застапник на хрватската фирма за сертифицирање. Овој трговски субјект нема евиденција во Централниот регистар во Република Северна Македонија. Ги прикачил лажните сертификати, како и фалсификувана потврда, за извршена сертификација од хрватската фирма, како и фалсификуван потпис од лице од Хрватска во својство на директор на фирмата за сертифицирање, појаснува Георгиев. Меѓу другите информации и контакти остварени од страна на Антикорупција, Георгиев остварил контакт и со директорот на хрватската фирма овластена за сертификати, од каде било потврдено дека сите ИСО сертификати кои биле користени при учеството на тендерот објавен од Општата Градска болница, се фалсификувани. Бил наведен и податок дека и други субјекти се пожалиле од таа фирма за акредитација од Хрватска оти такви сертификати буле повеќекратно употребувани од оваа фирма од нашата држава. Во текот на работата, истакна Георгиев, постои системска слабост во системот за јавни набавки односно Комисијата за јавни набавки кај кој било државен орган нема обврска да ја проверува автентичноста односон валидноста на ИСО сертификатите. Тој смета дека токму оваа слабост била искористена од страна на оваа фирма. (МИА)

Лифтовите потенцијални жаришта на Ковид-19, предупредуваат експертите

Ивона Петрова — Fri, 26 Jun 2020 08:33:06 +0000

Медицинските експерти постојано советуваат дека затворените простории треба секојдневно да се проветруваат, но останува отворено прашањето како тоа да го сториме во лифтовите. И покрај тоа што во нив е вградена соодветна вентилација, со самиот факт дека илјадници луѓе мора да користат лифт за да стигнат од и до домот или работното место, постои голема веројатност самите лифтови да бидат жариште на коронавирусот. – Германската компанија МИКРОДЕЛ, основана од Македонецот, Димче Поповски, соочувајќи се со коронавирусот, го повика својот тим експерти да создадат иновативен и револуционерен концепт за чисти и безбедни лифтови. УВ-гермицидал е систем конципиран со софистицирана технологија, ефективно елиминира 99 проценти од бактериите и вирусите во воздухот во лифтот, со што го прави целосно чист и безбеден. Тој е креиран да ги блокира предизвикувачите на заразни болести кои ги има во воздухот, на принцип на тотална стерилизација, и е прочистувач на загаден воздух, појаснуваат од компанијата. Експертите, исто така советуваат дека не е доволно само дезинфицирање на лифтовите на класичен начин еднаш дневно, потребни се интелигентни решенија кои ќе бидат активни нон-стоп. Според нив, токму лифтовите во работните простории, болниците итн., што се пофреквентни и од оние дома се постојан извор на зараза и пред појавата на Ковид-19. Во државава овој софистициран систем за заштита од коронавирусот веќе го имплементира компанијата за лифтови „Дака“. – Потребна е високософистицирана технологија со високи перформанси на молекуларно ниво со препарати и технологија одобрени од Светска здравствена организација. Државните и приватните институции, станбени и деловни објекти, како и сите останати објекти кои имаат лифтови и проток на луѓе, потребно е да вградат постојана заштита од бактерии и вируси, пред се во моментот, заштита од коронавирусот, а тоа ќе го сторат кога во своите лифтови ќе инсталираат таканаречени УВ системи кои ќе препознаваат, стерилизираат и прочистуваат загаден воздух, појаснува прим. д-р Данчо Балаловски. Во земјава бројките на заразени од коронавирусот се високи, така што граѓаните треба да бидат заштитени и додека се возат во лифтовите, почитувајќи ги безбедносните мерки од надлежните.

Пожарникари во Кочани дезинфицираат влезови и лифтови во колективните згради

Тале Кристо — Mon, 23 Mar 2020 14:49:37 +0000

Екипи од Територијалната противпожарна единица од Кочани се вклучија во акцијата за дезинфекција на влезовите и лифтовите во колективните објекти за живеење, како и во јавните институции. Рачно се распрскува дезинфициенс со антисептичен раствор како дел од превентивните мерки против ширење на коронавирусот, а што ги донесе општинскиот Штаб за заштита и спасување. – Нашите екипи во текот ан целиот ден се излезени на терен и со моторни пумпи се врши дезинфекција во станбените згради, но и во влезовите на јавните институции, банки, пошта и други објекти. Со ова активност ќе продолжиме и во наредните денови сè додека не добиеме поинакви упатства од Кризниот штаб, така што иако сме ограничени со персонал, успешно се справуваме и со интервенциите при пожари и слични ситуации, истакна Благој Паунов, командир на Територијалната противпожарна единица. Градоначалникот на Кочани, Николчо Илијев кој раководи со Штабот за заштита и спасување, на прес конференција рече дека во моментот мерката за самоизолација важи за 148 граѓани и во најголем дел таа се почитува. Илијев информираше дека наредната седница на Советот на Општината ќе се одржи во услови што ги налага актуелната состојба. Притоа, ги повика граѓаните да користат проверени и потврдени информации, а на локалните медиуми им порача да продолжат да помагаат со одговорно и професионално известување.

Три лифтови расипани во хирургија во „Мајка Тереза“, единствениот исправен го користат пациенти и лекари

Ивана Ефремовски — Wed, 31 Jul 2019 13:39:01 +0000

Во Клиничкиот центар „Мајка Тереза“ на хирургија во Скопје распани се три лифтови, два од нив се за граѓаните, а пак едниот е за лекарите. Според вработените во оваа установа, лифтовите за граѓаните не работат веќе еден месец, а пак пред една недела едниот лифт наменет за лекари и пациенти е расипан исто така, објави ТВ21. Во овој објект кој има шест спрата функционираа само еден лифт. Директорката на службата на Клиничкиот центар Шкодране Дардишта, за ТВ21 изјави за проблемот е известена фирмата „Сезал“ која ги одржува овие лифтовите. Таа додава дека се нарачани делови за поправка на лифтовите. Како што информира телевизијата, таа вети дека за три дена лифтовите ќе се санираат и ќе бидат во функција.

Лифтовите во катните гаражи на Паркинзи-Скопје не се функционални повеќе од 10 месеци (ФОТО)

Ивана Ефремовски — Tue, 15 Jan 2019 11:43:43 +0000

Лифтовите во катната гаража „Тодор Александров” во центарот на Скопје спроти Министерството за финансии, не функционираат повеќе од 10 месеци. Граѓаните се гневни поради неодговорноста на институцијата, ако се земе во предвид дека оваа катна гаража е една од најпрометните и најскапите по цена на билет во центарот на градот. Револтирани граѓани кои ја користат катната гаража велат дека веќе околу 10 месеци се принудени да се симнуваат пеш од најгорните спратови, па се до долу. Една од работите кои им ја забележуваат граѓаните на вработените од катната гаража на ЈП Паркинзи – Скопје е тоа што атрактивните паркинг места од првите спратови ги блокираат со “чунови” или со ланци, чувајќи ги за нивни блиски луѓе, а притоа седат празни. Особено е лоша состојбата за лицата кои се со посебни потреби, тие не можат да одат кон погорните спратови бидејќи лифтовите се нефункционални. ВИП билетите кои што ги имаат постојаните корисници на катната гаража исто така не секогаш функционираат иако се платени, поради повремени недостатоци кои се јавуваат во софтверот на рампите. Граѓаните се видно револтирани и за нехигиената и хаотичната состојба во која се наоѓа катната гаража, како и за лошиот однос од страна на вработените кон корисниците на гаражата. Како што велат, ниту некој се грижи за овој објект кој е еден од најатрактивните за паркирање во центарот на градот, ниту пак се обидува нешто да направи. Катната гаража е пуштена во употреба пред 3 години, има капацитет од 604 паркинг места, од кои функционални околу 400, додека пак има и оспособени паркинг места за лица со посебни потреби. Оттогаш навака, во последните 10 месеци, објектот константно пропаѓа и предмет на негрижа и уништување.