лилија чолакова дервишова – Kurir.mk

Велешани пет месеци немаат кожен доктор, дефицит на кадар има и за други здравствени услуги

Ивона Петрова — Thu, 01 Dec 2022 06:52:35 +0000

Велешани веќе пет месеци не можат да остварат здравствена заштита од кожен доктор во Општата болница во Велес. Единствената докторка е неколку месеци на боледување, а пациентите се упатуваат на специјалист во Скопје. Портпаролот на Општата болница д-р Елена Левкова Ќулумова во изјава за МИА информира дека докторката по кожни болести од боледување ќе се врати во јануари следната година. Покрај недостиг на кадар за кожни болести, жителите на Велес немаат специјалисти и за други здравствени услуги. Во изјава за МИА, д-р Лилија Чолакова Дервишова матичен доктор и доктор по семејна медицина, воедно и претседател на Здружението на приватни лекари на Македонија (ЗПЛРМ), оценува дека состојбата со немањето на специјалистички кадар во велешката Болница е многу сериозна. Жителите на Велес, покрај тоа што немаат можност за преглед од кожен лекар, немаат ниту ушен доктор со „Мој термин“, а има само по еден очен доктор и еден трансфузиолог. За град како Велес, во кој е вклучен целиот поширок велешки регион, д-р Чолакова-Дервишова вели дека е повеќе од сериозно и алармантно. Предупредува дека ваква состојба со немање на специјалисти има во поголем дел од болниците во земјава, како Берово, Ресен, Дебар и речиси сите помали градови во земјава. – Ова е многу сериозна ситуација за сите граѓани коишто редовно плаќале и плаќаат здравствено осигурување и очекуваат да имаат достапност до здравствени услуги во местото на живеење, појаснува д-р Чолакова Дервишова. Со пензионирањето на лекарите и специјалистите и без прилив на нов кадар во Општата болница во Велес, но и во другите градови, таа вели дека специјалистичките кадри остануваат празни. Д-р Чолакова Дервишова предупредува дека единствениот доктор пнеумофизиолог од велешката Општа болница за еден месец ќе оди во пензија. Појаснува дека со неговото заминување, матичните лекари ќе мора да ги преупатуваат сите граѓани со тешки белодробни болести кои редовно примаат медицинска терапија, да добијат рецепт во Специјализираната болница во Јасеново или во Скопје, со што овие пациенти ќе бидат изложени на дополнителни трошоци. Таа потсетува дека Велес претходно со години имаше Анти-туберкулозен диспанзер (АТД) каде имаше доволно специјалистички кадар за лекување на овие пациенти со туберкулоза и други белодробни заболувања. Со рушење на зградата на АТД, диспанзерот беше префрлен на Интерното одделение при велешката Болница. – Проблемот е што двете докторки пред година во време на пандемијата заминаа во пензија и сега нема нов кадар за лекување на овие пациенти од Велес, поширокиот велешки регион и од градовите од Повардарието кои се лекуваа на Интерно одделение во велешката Општа болница, вели д-р Чолакова Дервишова. Решението за овој проблем д-р Чолакова-Дервишова вели дека е пренасочување на лекарите специјалисти од Скопје во другите градови низ земјава. – Итно мора надлежните во јавното здравство во земјава да направат префрлање на големиот број на лекари специјалист од клиниките и болниците во Скопје да се пратат по региони во земјава со цел граѓаните од внатрешноста да не се шетаат и изложуваат на трошоци до Скопје. Овие доктори да се прераспределат регионално и болниците во земјава да се пополнат со ваков специјалистички кадар, во интерес на граѓаните, потенцира д-р Чолакова Дервишова. Таа посочува дека немањето на специјалистички кадар во болниците во градовите е последица на тоа што со години наназад лекарите по специјализацијата не се обврзани да се вратат во својата болница, туку, голем дел од нив остануваат во здравствените установи во Скопје. – Државата мора да си го смени законот, правилата и правилниците со тоа што ако некој лекар добил специјализација, по специјализацијата, ќе мора да се врати во својата болница во градот од каде што е. Со тоа и болниците во внатрешноста ќе имаат свои специјалисти. Не може сите лекари да се преселат во Скопје, а народот во останатите градови да ги оставиме без специјалисти, подвлекува д-р Чолакова Дервишова. Потсетува дека имаме Закон за здравствена заштита во кој се вели дека пристапноста и сеопфатноста треба да бидат еднакви за сите граѓани, но, за жал, вели тоа е само на хартија. – Државата мора под итно да направи регионализација и децентрализација на здравството, така што да имаме неколку региони во земјава каде што ќе има голем број на неопходен специјалистички кадар. Сега за жал имаме болница и операциона сала, а немаме анестезиолог или обратно има анестезиолог, а нема хирург, вели д-р Чолакова-Дервишова. МИА

Чолакова Дервишова: Сведоци бевме на воено профитерство, не може да не се менува ништо суштинско и да профитираат само приватните болници

Катерина Бојаџиева — Wed, 07 Jul 2021 18:29:10 +0000

Фондот за здравство мора да сфати треба да работи во интерес на народот и во интерес на докторите кои се носители на целото здравство. И мора да се подигне свеста на тие кои ги креираат законите, не може да не се менува ништо суштинско, да има одлив на кадар, а да профитираат само приватните болници, изјави Лилија Чолакова Дервишова претседател на здружение на приватни лекари за „Што не е јасно“ на Алфа. Таа истакна дека мора да се менуваат нештата бидејќи бевме сведоци на воено профитерство. - Се земаа 4.000 денари за ПЦР тест, цените на маските и скафандерите пораснаа, дезифициенси, лекови, а 40% се качи данокот за лекови и никој не го спомна тоа, рече Чолакова Дервишова. Таа посочи дека проблемите се јавуваат затоа што тие кои ги носат одлуките одозгора ги гледаат работите и не се на терен и затоа голем дел на одлуки се погрешни. - Потребна ни е национална стратегија за здравство, план во кој град што недостига. Еднаш свеста да достигне до тоа ниво да се сфати дека здравството е приоритет и дека ако имаме задоволни здравствени работници ќе имаме и задоволни пациенти. Мора да има сигурни плати, мора да има ладен погон, каде докторот во Виница ќе биде квалитетен доктор со добра опрема и амбуланта како и судијата што е добро платен и во малите места и во Скопје, рече Чолакова Дервишова.

Чолакова Дервишова: Се земаа кредити за да се спасат животи на своите блиски- граѓаните не смее да наидат на затворени врати во здравствениот систем

Катерина Бојаџиева — Wed, 07 Jul 2021 18:09:32 +0000

Не смее пациентот да прашува зошто плаќа здравство кога платата ја дава во приватни болници. Пациентите земаа кредити за да спасат човечки живот за своите блиски. Тоа се недостатоци на здравствениот систем. Здравствениот денар мора да го следи пациентот, изјави за „Што не е јасно“ на Алфа, Лилија Чолакова Дервишова претседател на здружение на приватни лекари. Таа истакна дека повеќе не смее да се случува граѓаните да наидат на затворени врати во здравствениот систем, како што беше за време на пандемијата. -Мора да има термини, треба да се работи во интерес на здравјето на граѓаните бидејќи на крај тие плаќаат од својата плата за да може да има здравствен систем кој ќе функционира. Целокупното здравство мора да работи, не смее да има прекин за прегледи за кардиоваскуларни заболувања, не смее да има прекин за ехо на дојка, простата, здравството во кризни ситуации мора брзо да реагира, бидејќи тука имаше застој и не смее да има затворање на врати како што се случи за време на пандемијата, рече Чолакова Дервишова. Во однос на телефонското здравство кое стана тренд дури и кога бројките паднаа таа вели дека тоа е лош пример бидејќи докторот не може навремено да направи дијагноза како што треба ако не го види физички пациентот. - Мојот став за телефонското здравство е негативен и повеќе пати излегов да кажам дека доктор е доктор ако стави стетоскоп, слушалка, ако го ислуша пациентот. Владата апелираше телефонски граѓаните да се обратат до матичен, но тука се направи проблем. Многу луѓе се појавија касно со развиена бронхопневмонија. Нашата држава се уште има доволна бројка на матични доктори да може да работат физички со пациентите и треба да заврши тоа телефонско работење, потенцира Чолакова Дервишова.

Чолакова Дервишова: Огромен број на починати пациенти се на список за приоритетна вакцинација

Магдалена Андонова — Thu, 11 Feb 2021 10:15:18 +0000

Претседателот на комората на приватни лекари во Република Македонија, Лилија Чолакова Дервисова упати оста критика кон листата за приоритена вакцинација најавена од министерот за здравство Венко Филипче. Имено, таа на својот Фејсбук профил сподели статус во кој пишува дека огромен број на починати пациенти се на список за приоритена вакцинација.