линда томас гринфилд – Kurir.mk

Американската амбасадорка го повика Советот за безбедност на ОН да одобри повеќе пристапни пунктови за помош за Сирија

Тале Кристо — Mon, 13 Feb 2023 06:55:56 +0000

Амбасадорката на САД во Обединетите нации Линда Томас-Гринфилд го повика Советот за безбедност на ОН да одобри два дополнителни пристапни пунктови за испорака на помош за деловите од Сирија погодени од смртоносниот земјотрес минатата недела. - Луѓето во погодените области сметаат на нас. Тие апелираат до нашата заедничка хуманост да помогне во нивниот момент на потреба, се вели во соопштението на Томас-Гринфилд. - Не можеме да ги изневериме – мораме веднаш да гласаме за резолуција за да го послушаме повикот на ОН за овластување на дополнителни гранични премини за испорака на хуманитарна помош. Имаме моќ да дејствуваме. Време е да се движиме со итност и цел, нагласи таа. Испораката на итна помош во областите во северна Сирија погодени од земјотресот се соочува со проблеми поради долготрајната граѓанска војна меѓу опозициските сили и сириската влада, предводена од претседателот Башар ал Асад, кој е обвинет за убиство на сопствениот народ.

Томас – Гринфилд: Ќе ја поддржуваме Украина сè дури не се повлечат Русите

Тале Кристо — Tue, 08 Nov 2022 12:37:00 +0000

Американската амбасадорка во ОН, Линда Томас – Гринфилд денеска изјави дека поддршката на САД за Украина е „непоколеблива“ и оти ќе продолжи „сè до украинската победа во војната“. – Ние сме обединети од првиот ден и не видовме никакви пукнатини во тоа единство, нагласи Томас – Гринфилд. Таа денеска ненајавено го посети Киев. – Европа е обединета. НАТО е обединет. Во САД, двете главни партии ја поддржуваат поддршката за Украина, појасни американската амбасадорка. Таа додаде дека нивната поддршка е непоколеблива. – Ќе останеме обединети сè додека Украина не победи во оваа војна, а Русија не ги повлече нејзините сили од Украина, подвлече Томас – Гринфилд. Таа беше прашана за коментар околу текстот на Вашингтон пост, за украински претставници кои ја убедуваат Украина да сигнализира оти е отворена за преговори со Русија. – Бевме јасни. Нема преговори каде Украина не е на местото на возачот. Нема преговори за Украина без Украина, додаде таа. Според неа, „меѓународната заедница сака правда за украинскиот народ“. – Какви било преговори во главна улога мора да ја имаат Украина. Тие мора да одлучат кога се подготвени за преговори, со поддршка на меѓународната заедница, по Повелбата на ОН што Русија ја прекрши, смета Томас – Гринфилд.

Томас-Гринфилд: САД на Украина ќе и испратат само одбранбено оружје

Ивана Ефремовски — Tue, 31 May 2022 20:06:14 +0000

Американската амбасадорка во ОН Линда Томас-Гринфилд денеска изјави дека американската администрација на претседателот Џо Бајден уште од првиот ден на војната во Украина јасно стави до знаење дека на оваа земја ќе и обезбеди само оружје за одбрана од руските напади. -Не даваме никакво оружје што ќе им овозможи на Украинците да ја нападнат Русија од Украина. Претседателот Бајден, исто така, беше многу јасен во врска со ова прашање, дека ние не сме и нема да станеме страна во војната, но ќе ги поддржиме напорите на Украина да ги брани нејзиниот суверенитет и територијален интегритет, рече Томас Гринфилд на брифинг за медиумите во ОН, пренесе Си-Ен-Ен. Советникот на украинскиот претседател, Алексеј Арестович, претходно за истиот американски медиум изјави дека воената победа против Русија е „ малку веројатна“ доколку САД ја прекинат испораката за Киев на артилеријата со долг дострел. (МИА)

Томас-Гринфилд: Суспензијата на Русија е историски ден

Ивана Ефремовски — Thu, 07 Apr 2022 18:10:06 +0000

Амбасадорката на САД во ОН, Линда Томас-Гринфилд, по повод суспензијата на Русија од Советот за човекови права на ОН, на Твитер напиша дека ова е важен и историски ден. „Земјите ширум светот гласаа за суспензија на Русија од Советот за човекови права на ОН“, објави таа. „Колективно, испративме јасна порака дека Русија ќе сноси одговорност“, напиша Томас -Гринфилд. (МИА)

Томас-Гринфилд: Нови мерки против Русија доколку употреби хемиско оружје

Тале Кристо — Sun, 20 Mar 2022 16:43:55 +0000

Русија ќе се соочи со дополнителни мерки од САД доколку употреби хемиско оружје при нападите врз Украина, предупреди денеска американската амбасадорка во Обединетите нации, Линда Томас-Гринфилд. – Русите се тие кои употребувале хемиско оружје и ние сме загрижени дека би можеле да го употребат истото оружје и во Украина. Бевме јасни дека ако ескалираат на тоа ниво, агресивно ќе одговориме на она што го прават. Ги видовте досегашните последици од нашите акции против Русија и Путин и тие ги чувствуваат тие последици. И уште повеќе ќе ги почувствуваат доколу ја донесат таа несреќна одлука да употребат хемиско оружје, истакна Томас-Гринфилд за Си-Ен-Ен. Претходно овој месец, американскиот претседател Џозеф Бајден, исто така, предупреди дека Русија ќе плати висока цена доколку употреби хемиско оружје во Украина.

Aмериканската амбасадорка во ОН: Светот за влакно избегна нуклеарна катастрофа

Магдалена Андонова — Fri, 04 Mar 2022 18:36:19 +0000

Светот за влакно избегна нуклеарна катастрофа, кога избувна пожар за време на рускиот напад врз нуклеарната централа Запорожје во Украина, изјави денеска американската амбасадорка во ОН, Линда Томас-Гринфилд. Таа побара гаранција од Москва дека таков напад нема да се повтори. Обраќајќи се на вонредниот состанок на Советот за безбедност на ОН, Томас-Гринфилд истакна дека нападот укажува на „опасна нова ескалација“ на руската агресија против Украина и предупреди дека „непосредна опасност“ сè уште постои, наведувајќи дека руските војници се оддалечени 32 километри од вториот по големина нуклеарен објект во Украина. Воените операции околу нуклеарните локации се неприфатливи и неодговорни, истакна заменик-генералниот секретар на ОН за политички и мировни прашања Розмари ДиКарло на седницата на Советот за безбедност на ОН. – Нападите врз нуклеарни постројки се спротивни на меѓународното хуманитарно право. Треба да се направат сите напори за да се избегне катастрофален нуклеарен инцидент, порача ДиКарло на вонредниот состанок на Советот за безбедност на ОН, откако руските сили во Украина ја нападнаа и зазедоа нуклеарната централа во Запорожје. (МИА)