Ливерпул – Kurir.mk

Клоп за киднапирањето на родителите на Дијаз: Беше тешка ноќ за сите нас

Ивона Петрова — Sun, 29 Oct 2023 16:54:25 +0000

Тренерот на Ливерпул, Јирген Клоп зборуваше за ситуацијата со киднапирањето на родителите на фудбалерот Луис Дијаз. Дваесет и шестгодишниот крилен напаѓач не се најде во составот на тимот за натпреварот против Нотингем Форест во 10. коло од Премиер лигата. - Очигледно моравме да направиме доцни промени во тимот поради личната ситуација на Луис Дијаз. Беше тешка ноќ за сите нас. Ова никогаш претходно не се случило во моите тимови. Ова е ново искуство за кое никој не се радува, изјави Клоп за „BBC“. Претходно се дозна дека родителите на Дијаз биле киднапирани во Колумбија. Мајката на играчот била спасена речиси веднаш, а според локалните медиуми, таткото попладнево е ослободен по престрелката на полицијата со киднаперите.

Пеп и Сити подготвуваат удар за Клоп и Ливерпул

Бошко Тасиќ — Tue, 24 Oct 2023 03:57:18 +0000

Во Англија полека се подготвуваат за јануарскиот преоден рок, а се чини дека еден фудбалер би можел да биде во центарот на вниманието. Тоа е 20-годишниот играч за врска на Баерн, Џамал Мусиала. Веќе се знае дека Мусиала е голема желба на Јирген Клоп. Тој го сака младиот ас на „Енфилд“, но Баерн ги одби понудите ова лето. Сепак, Баварците би можеле да бидат под добар притисок оваа зима не само од Ливерпул. Во целата приказна се вклучи и Манчестер Сити, бидејќи и Пеп Гвардиола го сака овој млад фудбалер во своите редови. Така, Гвардиола би можел да му зададе уште еден удар на Клоп, но секако и Баерн мора да се праша. Медиумите од Англија пишуваат дека Сити е подготвен да понуди повеќе од моменталната вредност на Мусиала, која изнесува 110 милиони евра. Баерн има добра заштита, бидејќи Мусиала има договор со Баварците до летото 2026 година. Затоа, кој го сака германскиот репрезентативец во своите редови, ќе мора добро да ја отвори касата.

Позната е казната на судиите кои го оштетија Ливерпул

Бошко Тасиќ — Thu, 05 Oct 2023 04:06:07 +0000

Големи контроверзи предизвика премиерлигашкиот натпревар помеѓу Тотенхем и Ливерпул, на кој “црвените“ загубија со 2-1, но откако им беше поништен регуларен погодок на 0-0 во 34-тата минута. Луис Диас биеше прецизно, но главниот судија со соработка со ВАР го поништија голот поради наводен офсајд, но на крајот се покажа дека фудбалерот на Ливерпул бил во дозволена позиција. Најголема вина му се препишува на ВАР судијата Дарен Ингланд, кој заработи казна со забрана да му суди на Ливерпул до крајот на сезоната. Ова е најмалку што можеше да направи судиската организација, но навивачите на “црвените“ се разочарани бидејќи очекуваа отказ за судијата. Во Ливерпул се уште се разгледува идејата за поднесување на официјална жалба и евентуално преигрување на натпреварот, бидејќи тоа го дозволуваат правилата во Англија.

Клоп бара да се преигра натпреварот со Тотенхем

Ивона Петрова — Wed, 04 Oct 2023 18:18:14 +0000

Тренерот на премиерлигашот Ливерпул, Јирген Клоп, побара денеска да се преигра натпреварот против Тотенхем, откако ВАР судиите изминатиот викенд му поништија регуларен гол на неговиот тим. Раководното тело на англиските судии (ПГМОЛ) ја призна грешката кога голот на Луис Дијаз беше поништен поради наводен офсајд и најави измени на правилото со цел да се избегне повторување на грешката во иднина. „Би требало да постои решение. Мислам дека натпреварот треба да се повтори. Навикнав на грешки и тешки одлуки, но вакво нешто никогаш не се случило и затоа мислам дека вистинската работа е натпреварот да се преигра“, рече Клоп. Ливерпул во неделата издаде соопштение во кое наведе дека ќе ги „истражи сите можни опции имајќи ја предвид јасната потреба за решавање на проблемот“.

Санкционирани ВАР судиите кои го оштетија Ливерпул

Дарко Андоновски — Sun, 01 Oct 2023 16:01:32 +0000

Суспензија од два натпревари им е изречена на англиските судии кои од ВАР собата со погрешна одлука придонесоа за поразот на Ливерпул од Тотенхем (1-2) во саботното дерби во Премиер лигата. Тотенхем победи со гол во судиското продолжение, а судиите претходно во првото полувреме погрешно му поништија гол на Ливерпул кој го постигна Луис Дијаз. Судиското тело подоцна призна дека одлуката за поништување на голот на Дијаз била погрешна, тврдејќи дека станува збор за човечка грешка и оти погодокот требало да биде потврден пред ВАР интервенција, „Судијата Дарен Ингланд и неговиот помошник Дан Кук, кои беа во ВАР собата на дуелот меѓу Тотенхем и Ливерпул се заменети за денешниот натпревар меѓу Нотингем Форест и Брентфорд и утрешниот меѓу Фулам и Челзи“, соопшти Судиското тело.

Ливерпул најде наследник за Мохамед Салах

Бошко Тасиќ — Sun, 01 Oct 2023 06:56:34 +0000

Мохамед Салах ова лето беше пред излезни врати од Ливерпул, откако доби примамлива понуда од Саудиска Арабија, но на крајот реши да остане на „Енфилд“. Салах размислуваше за заминување и тоа го налути тренерот Јирген Клоп, кој почнал потрага по замена за Египќанецот. „Билд“ пишува дека Ливерпул решил да го купи Дониел Мален од Борусија Дортмунд, кој чини околу 60 милиони евра. Мален пристигна во Дортмунд во 2021 година од ПСВ Ајндховен за 30 милиони евра, но немаше добри настапи сè до сезонава. Тој на седум настапи постигна четири гола и две асистенции за „милионерите“.

Сопствениците на Ливерпул продадоа дел од акциите

Ивона Петрова — Fri, 29 Sep 2023 09:14:48 +0000

Американската инвестициска групација „Фенвеј Спорт Груп“ (ФСГ) во чија сопственост од 2010 година е Ливерпул, објавија синоќа дека продала малцински удел од акциите на американскиот фонд „Дајнести Еквити“. Приходот од оваа продажба ќе се искористи за намалување на долгот кој настана во текот на кризата предизвикана од Ковид – 19, за финансирање на инфраструктурни проекти, вклучувајќи и реконструкцијата на стадионот „Енфилд“ и јакнење на клупската позиција на фудбалскиот пазар. Ливерпул не го соопшти износот на трансакцијата, но дел од англиските медиуми јавија дека станува збор за износ меѓу 100 и 200 милиони долари. Сопственикот на ФСГ, Џон Хенри, ги уверуваше навивачите минатиот февруари дека клубот не е на продажба, но рече дека отворен за „нови инвеститори доколку тоа е во интерес на клубот од Ливерпул“.

Клоп нема да биде германски селектор

Ивана Ефремовски — Wed, 13 Sep 2023 12:08:41 +0000

Тренерот на Ливерпул, Јирген Клоп, нема да седне на селекторската клупа на Германија, јавија денеска германските медиуми пренесувајќи изјава на менаџерот на 56-годишниот стратег. Клоп беше меѓу кандидатите за наследник на Ханси Флик, кој беше отпуштен од селекторската должност минатата недела по поразот од Јапонија (1-4) во пријателски натпревар. „Јирген има долгорочен договор со Ливерпул и не е достапен за позицијата селектор на репрезентацијата“, посочи неговиот менаџер Марк Косицке во изјава за „Спортсхау“. Германија ќе биде домаќин на Европското првенство идната година. (МИА)

ФА со дополнителна санкција за Ван Дајк

Бошко Тасиќ — Sat, 09 Sep 2023 05:08:34 +0000

Фудбалерот на Ливерпул, Вирџил Ван Дајк доби дополнителна санкција од ФА за неговото однесување на дерби средбата против Њукасл на „Сент Џејмс Парк“. Холанѓанецот заработи црвен картон на тој дуел, одлука која не му се допадна и имаше што да им каже на арбитарот за истата. Тој негов јазик му донесе проблеми и упатените зборови му донесоа дополнителна суспензија, плус парична казна. Тој веќе го скокна мечот со Астон Вила, но сега ќе мора да го пропушти и дуелот со Вулверхемптон закажан за 16 септември и воедно ќе извади од џебот 100.000 фунти. Дефанзивецот ја прифати казната и воедно порача дека веќе им се извинил на судиите за за своето однесување.

Гравенберх нов фудбалер на Ливерпул

Бошко Тасиќ — Fri, 01 Sep 2023 04:02:51 +0000

Како што јавија медиумите во Германија, „црвените“ се договорија со Баерн Минхен за потписот играчот од средниот ред Рајан Гравенберх. „Црвените“ беа во потрага по нов играч во средниот ред, откако дозволија Џејмс Милнер, Џордан Хендерсон, Алекс Окслејд-Чембрлен и Фабињо да си заминат ова лето. „Атлетик“ објави дека Ливерпул се согласил да му плати на Баерн 34 милиони фунти за Холанѓанецот, а дополнителни 4 милиони ќе бидат во форма на бонуси. Поранешниот играч на Ајакс ќе потпише долгорочен договор на „Енфилд“. 21-годишниот фудбалер вечерва е на пат за Ливерпул, а утре ќе ги помине медицинските прегледи.