љубомир јовевски – Kurir.mk

ВМРО-ДПМНЕ: Абази, Јовески и Ковачевски слика имаат – тон немаат, молчат за скандалот од 2,6 милиони евра со Лотарија кој е школски пример за корупција

Ивана Ефремовски — Tue, 31 Oct 2023 07:45:00 +0000

Ислам Абази и Љубомир Јовевски молчат за скандалот со изнајмувањето на простор од страна на државната Лотарија од компанија ХЕЈ, формирана пред неколку месеци, под крајно сомнителни услови. Оваа компанија е тесно поврзана со Артан Груби и кланот Зајас. Причината за молкот на првите луѓе на институциите на прогонот е јасна, на едниот на глава му се качени пола раководство на ДУИ, а другиот е седнат во скутот на власта, обвинуваат од ВМРО-ДПМНЕ.

„Затоа при очи се прават слепи пред школскиот пример за корупција и криминал. Државната лотарија која е предводена од поранешниот шеф на кабинетот на Артан Груби, Прпарим Бајрами, изнајмила деловен простор по 21 илјада евра месечно или за десет години 2,6 милиони евра од компанија каде еден од членовите на УО на Државна Лотарија е ангажиран. Зад компанијата ХЕЈ којашто за 6 месеци се основа, купи имот и фати милионски тендер, е Армин Машовиќ од тимот партнери на Ерџан Сулкоски поврзан со семејните бизниси на кланот Зајас.

Груби и ДУИ се извор на коруптивни скандали. Но најстрашно од се е што органите на прогонот воопшто не ги ни истражуваат, а уште помалку ги санкционираат. Ниту премиерот има храброст да го истражи овој милионски скандал. Ковачевски, како и Абази и Јовески, има слика, тон нема. Ова мора да престане. Оваа корумпирана власт која се богати со народните пари мора да си замине, а потоа да одговара за секој проневерен денар“ - посочуваат од партијата.

Јовески тврди дека за случајот со пожарот во Модуларната болница во Тетово немало обид за влијание и притисоци

Дарко Андоновски — Wed, 04 Oct 2023 14:48:36 +0000

Јавниот обвинител Љубомир Јовески до Собранието по пошта го испратил одговорот за интерпелацијата што за неговото работење во случајот со пожарот во Модулараната болница во Тетово во кој загинаа 14 лица ја поднесоа пратеници од опозициските партии на Албанците - Беса, Алтернатива и Демократско движење. Јовески во дописот, како што наведува, најодговорно изјавува дека никогаш во ниту еден момент во текот на постапката за овој случај немало обид за влијание и притисоци. Во одговорот на барањето за интерпелација, јавниот обвинител наведува дека за овој трагичен настан, за дејствијата што ги преземаше Јавното обвинителство, јавноста во континуитет била известувана без да се наруши текот на постапката, која во еден дел веќе завршила со осудителна пресуда. -Меѓутоа, поднесената интерпелација за овој предмет уште еднаш потврди дека „Институцијата со која раководам постојано е изложена на неосновани напади и обиди за дискредитација, кои во крајна линија се една од основните причини за ниска јавна доверба во правосудните органи воопшто. Повод за оваа интерпелација се непроверени и неиздржани, наводи во новинарски текст, кој неодговорно манипулира со чувствата на засегнатите од оваа трагедија и кај пошироката јавност, но очигледно и кај дел од пратениците, креира погрешни перцепции за текот на овој предмет, пишува во одговорот од јавниот обвинител. Како што вели, во интерес на вистината, уште еднаш, детално и целосно ја објаснува постапката која од самиот почеток се водела „одговорно, непристрасно и согласно сите законски прописи“. Јовески наведува дека од самиот почеток, веднаш по настанот, цел обвинителски тим составен од сите јавни обвинители во Основното јавно обвинителство Тетово и двајца јавни обвинители од Основното јавно обвинителство Скопје кои биле дежурни во моментот на несреќата биле задолжени да извршат увид и да ги преземат сите дејствија неопходни за утврдување на причините. По спроведената претходна постапка, во рамки на која биле преземени многу истражни дејствија, Основното јавно обвинителство Тетово, како што пишува Јовевски, поднесело обвинение против три лица, од кои двајцата директори на болницата кои се товарат дека „иако биле должни да имаат соодветни уреди и инсталации за заштита од пожари и експлозии, друга противпожарна опрема, средства за гаснење на пожари и противпожарни апарати, на денот на пуштање во употреба на Модуларната болница во Тетово, па се до денот на настанување на пожарот во Модуларната болница, не поставиле соодветни уреди за заштита од пожар со што сториле „тешки дела против општата сигурност“ по чл.292 ст.4 в.в. со чл.288 ст.4 в.в. со ст.2 од Кривичниот законик, додека третообвинетиот како одговорно лице дозволил влез на членови на семејствата на болните од Ковид 19 со што се товари за кривично дело - непостапување според здравствените прописи за време на епидемија по чл.206 ст.1 од Кривичниот законик. Обвинението, потсетува Јовески, го опфаќаше и правното лице Клиничка болница Тетово. Јовески наведува дека обвинението се темели на обезбедените докази и извршени вештачења, кои вклучуваат - вешт наод на Одделот за криминалистичко-технички испитувања и вештачења при Министерството за внатрешни работи, Службена експертиза од Форензичкиот институт при Сојузната криминалистичка служба и лабораторија од Германија, вешт наод на стручно лице електроинжинер, вештачењето на Технолошко-металуршкиот факултет кој ја испитуваше брзината на согорување на сите материјали употребени за болницата, како и вештачење на Електротехничкиот Факултет Скопје во поглед на усогласеноста на изведената инсталација со законските прописи за ваков тип градби. Сите овие докази и вештачења се комплементарни, не се спротивставуваат и јасно ја утврдуваат причината за настанување на пожарот, но и одговорноста на службените лица, се вели во писмото. -По вака поднесеното обвинение, врз основа на сите презентирани докази, Основниот суд во Тетово донесе осудителна пресуда за двајцата директори, изрекувајќи условна осуда, додека за третиот обвинет е донесена ослободителна пресуда. Основното јавно обвинителство Тетово ја обжали пресудата и по основ на одредената санкција за двајцата обвинети и по основ на ослободителната пресуда за еден од обвинетите. Свои жалби вложија и осудените. Во тек е жалбена постапка. За тендерот за набавка на сите модуларни болници, во Основното јавно обвинителство за гонење на организиран криминал и корупција се води уште еден предмет, кој е во предистражна постапка и во кој интензивно се преземаат дејствија на проверки, се наведува во одговорот од јавниот обвинител. Во однос на прашањата за интерпелацијата за тоа кои се неправилностите во тендерската постапка за градење на модуларните болници и дали и зошто Обвинителството не ги смета како релевантни овие околности во самото обвинение, Јовески одговара дека „евентуалните неправилности во тендерската постапка се испитуваат во предметот во кој во предистражна постапка постапува Основното јавно обвинителство за гонење на организиран криминал корупција“. -И документацијата побарана и обезбедена во овој предмет е обемна и е поврзана со јавна набавка за изведба на повеќе објекти, под надзор и во рамките на посебен проект финансиран од Светската банка. Од тие причини, потребно е време за анализа на сите тие документи и утврдување на евентуални неправилности. Во рамки на постапката на Основното јавно обвинителство Тетово, која директно ги испитуваше причините за пожарот, тие причини беа недвосмислено утврдени со неколку вештачења и на ниту еден начин не беа поврзани со тендерски документи, посочува Јовевски. За тоа зошто е занемарен извештајот и наодите од германскиот тим од форензичари, кои го утврдиле главниот причинител на пожарот и другите причини за толкав интензитет на пожар, јавниот обвинител одговара дека „ова прашање е најдобра илустрација за дезинформациите и лажните наводи изнесени во новинарскиот текст, кои се повод за ваквата интерпелација“. -Имено, апсолутно невистинити се наводите дека вештачењето од германските експерти воопшто не било изложено како доказ во судската постапка, тврди Јовески. Нагласува дека од самиот почеток на истрагата, Обвинителството преку меѓународна правна соработка побарало правна помош од германските експерти кои ги истражуваа причините за пожарот. -Службената експертиза од Форензичкиот институт при Сојузната криминалистичка служба и лабораторија од Германија е составен дел од доказниот материјал. Тој уредно беше доставен до странките во постапката, приложен заедно со обвинението и во текот на судењето јавно беше изведен како доказ пред Судот. Судските рочишта за овој предмет беа отворени за јавноста, па оттаму изнесувањето на вакви невистини е целосно тенденциозно, пишува Јовески. Според него, неосновани се и информациите за наводна спротивставеност на вештачењата. -Имено, и вештиот наод на Одделот за криминалистичко- технички испитувања и вештачења при Министерството за внатрешни работи и она на германските експерти прецизно ги наведуваат истите причини за настанување и за ширење на пожарот. Врз основа на вака неспротивставени вештачења беше донесена првостепената пресуда на Основниот суд во Тетово. Дополнително, во емисијата воопшто не се наведени заклучоците од вештачењето на Технолошко-металуршкиот факултет кој ја испитуваше брзината на согорување на сите материјали употребени за болницата и со кое исто така јасно се посочува дека основна причина за брзото горење на модуларната болница е големата концентрација на кислород во објектот, наведува Јовески. За ваквата груба манипулација, потсетува тој, Јавното обвинителство уште веднаш по емисијата ја информираше целата јавност. -За да се спречи ширењето на невистини за овој трагичен настан, Јавниот обвинител на Република Северна Македонија им наложи на надлежните јавни обвинители во овој предмет да поднесат барање до Апелациониот суд за одржување на јавна седница по жалбите на која уште еднаш пред целата јавност ќе бидат изложени сите докази од првостепената постапка, пишува Јовески. На прашањето зошто обвинител кој ја води постапката за модуларните болници се иззема од таа функција и кои се наодите од постапката која е реализирана, Јовески тврди дека ниту еден јавен обвинител кој ја водел постапката не се изземал од функцијата туку наведува дека „една од јавните обвинителки во ОЈО Тетово кои во почетокот биле вклучени во овој предмет, била разрешена од функцијата со одлука на дисциплинската комисија на Јавното обвинителство, потврдена од Советот на јавните обвинители“. -Причината беше нестручно и несовесно работење, но во сосема друг предмет, односно повеќе други предмети, кои на ниту еден начин не беа поврзани со постапката за модуларната болница. Меѓутоа, новинарите на ИРЛ свесно одбегнуваат да и го презентираат на јавноста овој факт кој сериозно ја доведува во прашање кредибилноста на нивниот соговорник, и дозволуваат поранешната јавна обвинителка да дава неоснована и со ништо непоткрепена правна оценка за оваа тешка трагедија, иако по нејзиното разрешување таа нема никакви сознанија за предметот. Не може човек да не реагира кога со леснотија се изнесуваат оценки дека станува збор за убиство, истакнати и во самиот наслов на новинарскиот прилог, без притоа и најмалку да се покаже грижа за болката која со тоа се предизвикува кај семејствата на жртвите на оваа трагедија, пишува Јовески. Тврди дека во ниту еден момент немало обид за влијание и притисоци. -Најодговорно изјавувам дека никогаш во ниту еден момент во текот на оваа постапка немало обид за влијание и притисоци. Имајте предвид дека во текот на глобалната светска здравствена криза, во која на тест беа ставени здравствените системи на сите држави во светот, десетици вакви слични или потешки катастрофални несреќи со човечки жртви, од речиси идентични причини, се случија во повеќе европски и други земји. До овој момент, Република Северна Македонија е една од ретките земји, ако не и единствена, каде што за ваквиот настан беше поведена кривична постапка која веќе резултираше со првостепена осудителна пресуда. Тоа јасно ја покажува решеноста на јавното обвинителство за кривичен прогон, посочува Јовески. Зад секоја одлука во овој предмет стои тим од јавни обвинители, кои и покрај својата посветена работа,како што наведува, по објавата на наведениот новинарски текст, се директно изложени на напади и неосновани критики. Обраќајќи се до пратениците, Јовески тој бара тие со своето општествено и политичко влијание да поттикнат создавање клима во која јавните обвинители ќе можат непристрасно и одговорно да ja извршуваат својата должност. -Јавнообвинителската работа, па и работата на другите правосудни органи, е јавна и постојано оценувана од повеќе домашни и странски фактори, меѓутоа таа не смее да биде злоупотребувана за политички калкулации и пресметки. Секое обвинување за наводни пропусти и злоупотреби мора да биде поткрепено со сериозни докази, а не паушално и неиздржано. Во спротивно, и онака кревката доверба на јавноста во правосудниот сектор дополнително неосновано се нарушува, а тоа може да има несогледливи последици за целото општество, пишува Јовески. Во исто време, тој апелира на „внимателност со оглед на тоа што поставување на интерпелација за предмет во кој се води активна судска и предистражна постапка, отвора можност за нарушување на начелата на поделба на власта и независност на правосудните институции, но и за директно загрозување на постапки кои се во тек“.

Битолчанец испраќал закани до Рускоска, Јовески и до амбасада во Скопје – еве како “падна“ во рацете на полицијата

Ивана Ефремовски — Wed, 02 Feb 2022 11:07:51 +0000

Одделот за сузбивање на организиран и сериозен криминал до Основното јавно обвинителство Прилеп поднесе кривична пријава против С.З. (56) од Битола, за сторено кривично дело „загрозување на сигурноста“ предвидено и казниво по член 144 став 3 од Кривичниот законик. Имено, на 11 декември 2021 година пријавениот С.З., преку редовна пошта од АД Пошта на Македонија-подружница ЦРПС Прилеп, испратил едно писмо со заканувачка содржина до една амбасада во Скопје, додека на 20 и 22 декември 2021 година С.З. преку редовна пошта од АД Пошта на Македонија-подружница ЦРПС Прилеп, испратил писма со сериозни закани по животот на Јавен обвинител од ОЈО за ГОКК Вилма Рускоска. Исто така, на 17 јануари 2022 година преку редовна пошта од АД Пошта на Македонија-подружница ЦРПС Битола, пријавениот испратил писмо со сериозни закани по животот на Љубомир Јовески, Јавен обвинител на Република Македонија. Како испраќач на сите писма пријавениот навел лица со навистинити генералии. Веднаш по добиените пријави полициски службеници од Одделот за сузбивање на организиран и сериозен криминал и СВР Битола, во соработка со Агенцијата за национална безбедност преземаа мерки и активности за расчистување на случајот. Врз основа на издадени Наредби за претрес во дом и други простории од ОС Битола, на 21.01.2022 извршени се претреси на две локации на подрачјето на Битола, и тоа во домот на С.З. и во домот на неговата мајка Љ.З.. При извршените претреси се пронајдени и одземени мобилен телефон, лап-топ компјутер и предмети поврзани со кривичното дело. С.З. е лишен од слобода и во ПС ОН Битола е извршен разговор со него, а по извршено графолошко вештачење од страна на ОКТИВ утврдено е совпаѓање на обезбедениот рачен ракопис од Зика и рачниот ракопис во напишаните заканувачки писма. С.З. е приведен и со кривичната пријава ќе биде предаден на надлежното обвинителство.

Сопственикот на „Беса транс“ достапен за надлежните и сака да соработува, уверува Јовевски

Магдалена Андонова — Sun, 30 Jan 2022 10:55:56 +0000

Сопственикот на Беса транс Беким Хаџиу е достапен за Обвинителството и сака да соработува со надлежните органи за да се утврдат причините и околностите кои доведоа до оваа сообраќајна несреќа, вели државниот обинител Љубомир Јовески во интервју за РСЕ. Тој објаснува дека семејствата на загинатите патници можат да поднесат жалба до бугарското обвинителство и да побараат да ги разгледаат списите во случајот „Беса транс“. Бугарската национална истражна служба утврди дека за автобуската несреќа во Бугарија одговорен е возачот на „Беса транс“ бидејќи возел со брзина над дозволената. Македонското обвинителство отвори паралелна постапка и тука во Република Македонија. -Во оваа постапка издадени се повеќе наредби од страна на јавниот обвинител кој постапува по предметот и тоа до Министерството за внатрешни работи, до Царинската управа, потоа до Управата за јавни приходи, до Централниот регистер, Бирото за вработување, со намера целосно да го согледа работењето на фирмата којашто го организирала оваа патување и го вршела превозот, а особено во делот како автобусот ги поминувал границите на Република Македонија и границите на соседните земји во делот на техничката исправност на овој автобус и неговата регистрација и лиценци и други околности кои се од значење за донесување на јавно-обвинителска одлука, изјави Јовески.

Јовески: Осум лица сослушани, меѓу нив е и сопственикот на „Беса Транс“

Ристе Здравков — Sat, 27 Nov 2021 11:03:11 +0000

Досега биле сослушани осум лица, а меѓу нив бил и сопственикот на туристичката агенција „Беса Транс“, информираше јавниот обвинител Љубомир Јовески. Но, тој потенцираше дека во наредниот период ќе бидат испитани уште многу луѓе. „Осум записници од распит на сведоци се дадени на бугарските обвинители, со што би можело да се помогне во истрагата и расчистување на случајот. Во следните денови ќе распитуваме уште многу лица, записниците ќе бидат доставени исто така до бугарските колеги“, рече Јовески.

ЈО ги предаде материјалите за истрагата за автобуската несреќа

Ристе Здравков — Sat, 27 Nov 2021 10:42:19 +0000

Државниот јавен обвинител Љубомир Јовески денеска на прес конференција посочи дека на заменикот окружен јавен обвинител на Окружното јавно обвинителство Перник, Бисер Јорданов Михајлов и истражителот во Националната истражна служба на Република Бугарија, Младен Христов Петров им биле предадени материјалите поврзани со истрагата за автобуската несреќа во Бугарија. „На бугарските обвинители им ги предадовме ДНК анализите, записниците на 8-те сведоци, комплетните документи на Беса транс и комплетната документација што ја поседува МВР, тоа е во согласност со меѓународните стандарди, бидејќи несреќата се случила во Бугарија. а истрагата ја спроведуваат истражители бугарски“, изјави Љубомир Јовески.

„Јовевски е избор на Заев за Уставен суд, како награда за заштитата на криминалот на власта и селективната правда“

Магдалена Андонова — Thu, 08 Jul 2021 13:06:25 +0000

Најавата дека шефот на обвинителството Љубомир Јовевски го подготвуваат за уставен судија е уште еден показател на трас-трас судството на Заев. Јовевски беше и е главен политички егзекутор кој работи по диктат на Заев, кој како и во испробаниот метод со Добрила Кацарска, Заев го токми за уставен судија. Тоа е наградата за овие четири години селективно обвинителство кое го штитеше и заташкуваше криминалот на власта, а по нарачка на Заев отвораше политички процеси против неистомислениците на аболицираниот криминалец. Впрочем токму Јовевски беше шеф на обвинителството кога Заев беше ослободуван од очигледни криминали, кога не се отвораа предмети како снопчињата пари во чантата на Ден Дончев, случајот „Леонардо“, насилството на градоначалникот на Шуто Оризари и десетици други големи криминали, стои во соопштението на ВМРО-ДПМНЕ. - Доколку Јовевски стане уставен судија, тоа нема да биде поради неговата компетентност и авторитет, туку поради желбата на Заев од Уставниот суд да направи партиско дувло кое ќе му го штити криминалот и корупцијата која владее во секоја пора од неговото владеење. Заради ваквото обвинителство чиј шеф е Љубомир Јовевски Македонија е на дното во борбата против корупцијата во Европа и светот, и поради ваквото обвинителство чиј шеф е Јовевски Македонија е најкриминализираната држава во Европа, во која власта и криминалците се во синергија и коалиција, посочуваат ВМРО-ДПМНЕ. Од партијата велат дека со Заев и ликови како Јовевски нема правна држава, туку хибриден режим кој Македонија ја закова на дното по сите параметри во Европа.

Стоилковски: Јовески и Русковска судат луѓе за софтвер, ама не се блиски на Заев, за Рашковски нема предмет

Магдалена Андонова — Tue, 16 Mar 2021 12:07:17 +0000

Преочигледна е селективноста на ЈО на Љубомир Јовески и на ЈО за организиран криминал водено од Вилма Русковска. Македонија на сите мерења тоне во корупција и криминал, Македонија секојдневно ја тресат корупциски скандали со имиња на функционери на режимот, а Јовески и Русковска не отвораат ниту еден предмет за тоа, и притоа внимавајте повикуваат некој друг да им ја заврши работата, изјави на денешната прес конференција, Наум Стоилковски, портпарол на ВМРО-ДПМНЕ. - Нема крај на селективноста на Обвинителството и на судскиот систем затворени во пупката на Заев. Драги Рашковски, блискиот на Зоран Заев, измислува систем за снимање и автоматско казнување за прекумерна брзина во сообраќај. Рашковски прави набавка преку генералниот секретар каде се набавува софтвер со исти перформанси како неговиот пронајдок, ама несоодветен за МВР. МВР повеќе од осум месеци по добивањето на софтверот не го користи и прави свои набавки. Оштетен е државниот буџет, а ЈО не реагира, можеби само и само затоа што Драги Рашковски е и приватно и во владата близок на Зоран Заев, човек кој што наводно го реформираше судството и ги остави Јовески и Русковска да ги водат Јавните обвинителства, вели тој. Стоилковски посочува дека селективноста во нивната работа, а со тоа и злоупотребите на нивната положба и функција со нивното непостапување, е лесно да се докаже. Во Македонија набавка на софтвер којшто не се користи, односно не е навремено ставен во употреба или е несоодветен, се дела за кои што има пресуди, има и кривични пријави, по коишто се водат постапки. - Но луѓето за кои што се водат вакви постапки, не се блиски на Заев, не се дел од актуелниот режим, не се дел од пакетот „Висока корупција“. Јовески и Русковска судат луѓе за софтвер, ама не се блиски на Заев, за Рашковски нема предмет. Во јануари е поднесен кривична пријава против лице во МЕПСО, заради набавен софтвер во 2016-та година. Лани во декември заврши процес со обвинение поднесено од СЈО, исто за набавка на софтвер. И да не редам други случаи односно предмети со кривична одговорност за набавка на компјутерски програми коишто не биле соодветни, или не ги задоволувале потребите за кои што биле наменети, или купениот софтвер целосно не се интегрирал во системот. Или сето она кое што сега осум месеци по испорачувањето на софтверот на Рашковски се случува во МВР, случајот е јавно обелоденет, сите се заинтересирани за него, постои огромен јавен интерес, ама ЈО и ЈООК не реагираат и повикуваат некои „други институции“, прашува тој. - Едно е јасно, Зоран Заев се појави, во изјава го амнестираше Драги Рашковски и тој по којзнае кој пат минува без отворен предмет во Јавното обвинителство. Водејќи се веројатно по премисата „Ако можеше да се затворат предметот за „Леонардо“, зошто не би можело и ова“, Јовески и Русковска свесно ја кршат дадената заклетва и со непостапување прават злоупотреба на службената положба и овластување. А Драги Рашковски и по 100 скандали уште седи во Влада! Ако барате дефиниција и пример за Режим и заробена држава-ова е токму тоа, додаде Стоилковски.

Стоилковски: Рашковски нарачал софтвер кој што не функционира; Македонија тоне во корупција Јовески и Русковска не отвораат предмет

Магдалена Андонова — Mon, 15 Mar 2021 12:11:01 +0000

Молкот на петорката- Тендер, Рашковски, Заев, Јовески, Русковска, тактиката „молчи ќе потоне темата“ не смее да мине! Фрлени се пари во ветер во година на економска рецесија! Владата не купила готов софтвер, нефункционален за МВР, туку нарачала софтвер. Значи претходно дала спецификации како и што да работи тој софтвер. Ако го нарачале за МВР, зошто спецификациите кои што се дадени не одговараат со системот на МВР за Сејф Сити, безбеден град? Зошто не е направена набавка согласно спецификацијата на МВР, туку е набавено нешто кое што не се користи? Дали компанијата - добитник на тендер, основата само девет дена откако Рашковски иноваторот добива функција Генсек, не прашала за што и за која намена е софтверот, или добила целосна спецификација за работа, изјави на денешната прес конференција, Наум Стоилковски, портпарол на ВМРО-ДПМНЕ. - Дали тоа не води кон втора набавка наскоро - или на нов софтвер со потребните спецификации; Или за комплетна набавка на нов систем со нови апарати - камери? Дали на тоа не укажува изјавата на Зоран Заев при амнестирањето на Рашковски „не ни текнало нас така во владата ајде да направиме софтвер“ и понатаму зборува за „објектив којшто снима 360 степени“ исто како и апаратот на Рашковски да зборува, ама не и апаратите на МВР, прашува тој. - Фактите се следни: Драги Рашковски создал иновација систем од софтвер и хардвер токму како опишаниот од Заев, а е набавен софтвер кој што одговара на спецификацијата на измислениот од Драги Рашковски. Дали овие факти не водат кон нова набавка, дали некој како Драги Рашковски од тоа нема да има економски бенефит, дали само Рашковски би имал економски бенефит, ете за тоа треба одговори и да каже ЈО. Одиме понатаму: Драги Рашковски во првичната изјава за медиуми вели требало да се направат неколку законски мали измени за да се стави софтверот кој што е набавен од него погон во камерите во МВР, и дека затоа софтверот не се користи. Прашањата кои што чекаат одговор, од Рашковски, Заев или од ЈО се: Зошто тие законски измени не се направени до сега, ако тендерот е распишан во ноември 2019, софтверот е набавен, односно платен февруари, 2020, со рок на испорака јуни/јули 2020? Кога го нарачувале, знаеле што е потребно, значи најмалку ОСУМ месеци имале пред да стигне софтверот, а од тогаш до сега уште осум месеци за ваквите законски измени за кои што софтверот според Драги Рашковски стои неупотребуван во МВР година и пол? Имаа време за менување на Изборен Законик без опозиција во 5 минути пред избори, а за ова немале, рече Стоилковски. Тој посочи дека Рашковски нарачал софтвер кој што не функционира; Македонија тоне во корупција Јовески и Русковска не отвораат предмет. За овој предмет се заинтересираа медиуми кои што се спонзорирани и имаат голем одек кај меѓународната заедница, каде се рангира државата по корупција. - За овој предмет се заинтересираа и тимот на Фајненшл Тајмс. За овој предмет се заинтересираа сите, само не ЈО на Љубомир Јовески и ЈО за Организиран Криминал на Вилма Русковска. Двајцата со молкот и неповедувањето на истрага заради тоа што Рашковски е близок на Заев, а Заев отфрли секаков сомнеж, прават тешка злоупотреба на службената положба и ја кршат дадената заклетва. Македонија тоне во криминал и корупција, Македонија тоне во случаи на висока корупција - корупција и криминал од власта, Брисел четврта година по ред чека на резултат во справување со високата корупција, и за тоа ЈО и ЈО за организиран криминал имаат најголем удел. И по овој скандал за тендер Рашковски нема да е дел од предмет на ЈО. За да не биде дека гласот не допрел до нив, и материјалите од оваа прес конференција ќе им бидат испратени на меил адресите на ЈО и ЈО за организиран криминал, додаде Стоилковски.

Министерот за правда контра обвинителот Јовевски, вели може да има судски постапки онлајн

Ивана Ефремовски — Thu, 29 Oct 2020 15:56:11 +0000

И покрај тоа што судењето потешки казнени дела е доста комплицирано, а преку онлајн судење на ваквите дела се отвораат и можности за бројни злоупотреби, министерот за правда Бојан Маричиќ не сака да побара посоодветно решение и инсистира на измени во законот за кривична постапка кои се потребни за онлајн судење. На тоа дека во постапките за потешки казнени дела со онлајн судењето се отвораат многу прашања и простор за злоупотреба во процесот укажа и првиот човек на јавното обвинителство Љубомир Јовески во гостување на телевизија 24. -За високопрофилните судења, на пример. се поставува прашањето како ќе се обезбеди присуство на обвинетиот, како ќе бидеме сигурни дека сведокот е сам, дека нема некој во просторијата кога тоа е онлајн и не му сугерираат одговори и слично. Сега е сосема поинаку, има физичко обезбедување, се знае кој со кого комуницира, рече Јовевски. Но, Маричиќ од друга страна вели дека иако има и други начини да се реши тоа тој останува на идејата за онлајн судење и рече дека ако образованието и владата можат да функционираат онлајн, зошто да не се направи обид и судењата да бидат онлајн? -Има начини како сето ова да се реши, дали со специјални простории во судот кога станува збор за испрашување сведоци, дали друг начин, но целта е да не се собираат многу луѓе на мал простор. И останувам на идејата за онлајн судења и ќе ја тераме и во иднина. Ако цел образовен систем го префрламе да функционира онлајн, ако Владата работи онлајн, тогаш зошто да не се обидеме и судењата да бидат онлајн? праша министерот Маричиќ. Тој додаде и дека во моментот активно се работи на драфтирање на Законот за парична постапка, кој ќе биде наскоро во собраниска процедура. Додека за ЗКП, рече дека дебата ќе се отвори наредната година.