Љуљзим Баша – Kurir.mk

Љуљзим Баша повторно лидер на албанските опозициски демократи

Ивана Ефремовски — Sun, 30 Jul 2023 07:31:24 +0000

Најголемата албанска опозициска Демократска партија на вчерашното гласање по принципот „еден член, еден глас“ за лидер на Партијата го избра Љуљзим Баша. Тој освои 16.196 наспроти неговиот против кандидат Ѓерѓ Хани кој освои 1657 гласови. Баша (49) оставка од функцијата поднесе во септември пред две години, по големите недоразбирања со историскиот лидер на демократите Сали Бериша, кого на оваа функција Баша го наследи во 2013 година. Во претходните влади на Бериша тој беше шеф на дипломатијата и министер за транспорт. -Демократската партија не сопственост на ниту еден поединец, туку заедничка инвестиција на демократите, кои ја заштитуваа во тешките денови и по секој предизвик успеаја да ја направат уште посилна. Убеден сум дека тоа ќе се повтори, бидејќи тоа го очекуваат повеќето Албанци од нас, рече Баша. Оцени дека она што е битно за денес и иднината на ДП е непоколебливиот став за националниот интерес и евроатлантските стандарди на демократијата, еднаквоста пред законот и фер конкуренција во политиката, економијата и секаде. Демократската партија ја преживува најдлабоката криза. Фракцијата на Бериша „За обнова на ДП“ е многу побројна, таа насилно го зазеде партиското седиште, но судот за лидер го призна Баша кој потоа го ополномошти генералниот секретар Газменд Барди, кој го поседува и печатот на партијата. Соопштувајќи резултатите претседателот на изборната комисија Јемин Ѓана синоќа рече дека на списокот за гласање биле 25 илјади членови, при што гласале 18.052 или 71 отсто од нив. Неважечки биле 199 гласачки ливчиња. Членството на ДП претходно броеше 75 илјади, што значи дека поголемиот број членови се во фракцијата на Бериша. (МИА)

Албанија: Сè почести гласините за Баша за иден шеф на државата

Ивона Петрова — Thu, 07 Apr 2022 11:18:28 +0000

На сè почестите гласини дека доскорешниот лидер на опозициските демократи Љуљзим Баша, ќе биде кандидат за нов претседател на Албанија, се чини им стави крај Еди Рама, лидер на владејачките социјалисти и актуелен премиер. По седницата на партиското Собрание, Рама пред новинарите ги коментираше гласините за новиот претседател, велејќи дека Љуљзим Баша со гласовите на ова мнозинство може да стане претседател на Републиката колку што Сали Бериша може да ја добие наградата Оскар. -Љуљзим Баша може да стане претседател на Републиката со гласовите на ова мнозинство, толку многу, колку што, Сали Бериша, може да ја добие наградата Оскар, рече тој. Реакција дојде и од Сали Бериша. На новинарско прашање дали ќе гласа за Баша за претседател на државата, тој со замолница до новинарите „дали може да не се шегуваат повеќе“. Последните денови се почесто се споменува името на Баша како кандидат за нов претседател на државата, пред сè поради големата поддршка, како политичар, што ја ужива од американската амбасада. Дел од аналитичарите сепак сметаат дека оваа вест ја пласирал лично тој или неговите поддржувачи, но не ја отфрлаат можноста тој сепак да биде кандидат. Парламентот процедурата за избор на нов претседател, официјално треба да ја почне на 24 мај и во рок од седум дена треба да се одржи гласањето. Мандатот на актуелниот претседател Илир Мета завршува на 24 јули.

Лидерот на најголемата опозициска партија во Албанија си поднесе оставка

Магдалена Андонова — Mon, 21 Mar 2022 18:15:49 +0000

Лидерот на најголема албанска опозициска партија Демократската (ПД) Љуљзим Баша, поднесе оставка на функцијата, на која дојде во 2013 година. Соопштувајќи ја одлуката тој рече дека „прави чекор назад за да даде можност ПД да се издигне по тешката криза во која се наоѓа“. -Не сакам да се задржувам на тоа што и како се случи, кој беше во право, а кој не. За жал, обидот да се задржи ПД обединета не успеа. Демократите и јас се соочивме со бројни обвиненија и денес ПД доживува длабока криза. Поради оваа причина и за да и помогнам на ПД да ги остави настрана поделбите, свесен за тежината што ја добив, поднесувам оставка од функцијата претседател. Го правам овој чекор за дадам можност ПД да се издигне по тешката криза во која се наоѓа, рече Баша. Додаде дека ќе „продолжи непрекинато и без двоумење да работи со крв и месо за заживување на Демократската партија“. И во оваа прилика тој вината за изборните порази на партијата ги нарече последица на „изборни манипулации и кражби“. Четириесет и осумгодишниот Баша на чело на партијата дојде по поразот на парламентарните избори на партијата во 2013 година, кога се повлече Сали Бериша. На двата последователни парламентарни изборни циклуси, 2017 и 2021 година партијата претрпе пораз, а во 2019 година предводејќи ја обеднетата опозиција ги бојотираше локалните избори. На вонредните делумни избори за градоначалноци на шест општини, што се одржаа на 6 март, повторно кандидатите на ПД не освоија ниту едно место. Место нив едно градачалничко место освои кандидатот на крилото што го предводи Сали Бериша, кој се отцепи од партијата откако Баша го исклучи од сите партиски структури по прогласувањето за песона нон грата од страна на САД. Делумните избори се чини ја прелеаа чашата на незадоволство, па оставка од него почнаа да бараат и неговите најблиски соработници, кои еден по еден се отажуваа од партиските функции, а поголем број од пратениците најавија дека ќе делуваат како независни кандидати. Имајќи ги во превид досегашните изјави на Бериша, тој ќе се обиде повторно да застане на чело на партијата. (МИА)

Љуљзим Баша разрешен од прв човек на Демократската партија на Албанија

Тале Кристо — Sat, 11 Dec 2021 21:10:48 +0000

На денешното Национално собрание на албанската опозициска Демократска партија, свикано од историскиот партиски лидер Сали Бериша, очекувано, разрешен е актуелниот лидер Љуљзим Баша. -Од 4.934 делегати, колку што учествуваа на Собранието, на тајното гласање учествуваа 4491 при што за разрешување на Баша гласаа 4.446 од нив, информираше Беленд Келечи, кој е еден од повеќето пратеници кои се на страната на Бериша. По соопштување на резултатот од гласањето, Бериша истакна дека од денеска почнува борбата за враќање на достоинството на партијата. – Седиштето на партијата ќе го преземеме кога за тоа ќе одлучиме, нагласи Бериша. Поради најави за можни судири меѓу двете страни и насилно заземање на седиштето, големи полициски сили и цистерни со вода се наоѓаат во близина на седиштето, претходно и околу стадионот „Ер Албанија“ каде што се одржа собирот. Баша, пак, за вечерва најави состанок на Претседателството, а за 18 декември Национално собрание. Недоразбирањата и расколот во партијата се случија откако Баша го исклучи Бериша од пратеничката група, по барање на американската амбададорка, Јури Ким, откако САД го прогласија за „персона нон грата“.

Рама и Баша со сочувство за настраданите во сообраќајната несреќа

Катерина Бојаџиева — Tue, 23 Nov 2021 09:32:10 +0000

Албанскиот премиер Еди Рама изрази искрено и длабоко сочувство за настраданите во сообраќајната несреќа во која 46 лица, главно македонски државјани го загубија животот. Во објава на Фејсбук, Рама овој трагичен настан го опишува како „огромна болка“ и вели дека нема збор за трагедијата каде животот го загубија речиси сите патници. – Нема зборови на утеха за трагедијата на автобусот од Северна Македонија во Бугарија, каде што животот го загубија речиси сите патници. Огромна болка, напиша Рама. И лидерот на опозициската Демократска партија, Љуљзим Баша, изрази длабоко сочувство до семејствата на настраданите, а на повредените им посака побрзо закрепнување. – Шокиран сум од страшната трагедија во Бугарија која предизвика загуба на толку многу животи на патници, меѓу кои и многу наши сонародници, меѓу кои и многу малолетници. Длабоко и искрено сочувство до семејствата на загинатите. Господ да им даде сила да се соочат со оваа страшна болка, пишува Баша.

Баша го обини Рама за изборен масакр и најави продолжување на битката до победа

Катерина Бојаџиева — Tue, 27 Apr 2021 19:31:37 +0000

Во своето прво обраќање по поразот на неделните парламентарни избори во Албанија, лидерот на Демократската партија Љуљзим Баша рече дека изборите на 25 април биле изборен масакр, обвинувајќи го Еди Рама, за употреба на валкани пари за кампањата. Баша од пред седиштето на партијата порача дека се „поодлучни од кога и да е да ја продолжат битката“. -Станавме посилни. Ние сме поодлучни од кога било. Секој што мисли дека ќе се предадеме –не нè познава добро. Ќе ја продолжиме битката со сите сили. Ние ќе продолжиме да се бориме со сè што имаме за демократијата. Ќе продолжиме да се бориме до победа, бидејќи нашата мисија е поголема од сите нас, рече Баша. Тој обвини дека изборите немале никаква поврзаност со демократијата, дека верувал во победа со која ќе ја врател демократијата во Албанја, но оти нивната битка не била доволна. – Овие избори немаа никаква врска со демократијата. Во оваа битка влеговме не со политички противник, туку со режим кој стори сé за да ја уништи фер изборната трка. Тие ги сменија уставот и изборниот законик со кршење на сите правила. Десетици илјади неважечки гласови, најголем број досега и двојно повеќе отколку разликата помеѓу двете партии. Милиони евра фрлени за да се реализира најголемото купување на гласови што предизвикува најголемо нарушување на волјата на гласачкото тело. Користеа милиони од корупциските концесии, крадеа лични податоци на албански граѓани, користеа криминалци и банди, им се закануваа и уценуваа на гласачите, администрацијата, новинарите и медиумите, правејќи го изборниот масакр уште поголем, обвини Баша. Обвинувањата ги дополни со тоа дека Рама соработувал и продолжува отворено да соработува со претставници на криминалот. -Еди Рама соработуваше и продолжува да соработува отворено со претставници на криминал како што е Том Доши, против кого е целиот демократски свет. Тој повторно ги кандидраше претставниците на криминалот на неговите изборни листи. И покрај сето ова – ние донесовме големо достигнување за демократијата во Албанија, рече Баша. Том Доши, кого го споменува Баша е лидер на Социјалдемократската партија, која, на изборите обезеди три пратенички мандати или два повеќе од минататите избори.Тој уште во неделата се откажа од пратеничкиот мандат и и понуди на ПС соработка во формирањето на новата влада. Тој е на „црната листа“ на САД поради што американската амбасадорка Јури Ким бараше да не се прифати неговата кандидатура за пратеник од страна на ЦИК. Таа во повеќе наврати апелираше во кандидатските листи да бидат само лица со интегритет.

Баша: Штетата за Албанија од меѓународните арбитражи е 450 милиони евра

Тале Кристо — Fri, 19 Mar 2021 11:07:20 +0000

Лидерот на албанската опозициска Демократска партија, Љуљзим Баша објави, како што наведува, дел од неуспесите на владата на премиерот Еди Рама во последните 8 години владеење. Според Баша, еден од нив е износот на средства што треба да се исплатат на изгубени случаи на арбитражниот суд, поради што албанските даночни обврзници ризикуваат да платат 450 милиони евра. -Која е сумата што албанските даночни обврзници ризикуваат да ја платат на меѓународните арбитражи? Одговорот е 450 милиони евра. Потенцијалната штета од арбитражите е 450 милиони евра, напиша Баша на социјалните мрежи. Последователен неуспех на владата на Рама, додава Баша, е безнадежноста на младите кои масовно ја напуштаат земјата, посебно посочувајќи го податокот дека 94 отсто од младите кои студираат надвор од земјата не сакаат да се вратат во Албанија. -Колкав е процентот на млади луѓе кои студираат во странство и не сакаат да се вратат во Албанија? Одговорот е 94 проценти. Одливот на мозоци е голема загриженост, бидејќи земјата ја губи највиталната сила на општеството и економијата, напиша Баша. Тој уште и со обвинување дека Албанија има најниска минимална плата во Европа, што го „потврдува и Евростат“.

Баша: Секој трет албански граѓанин не може да ја обезбеди неопходната храна за да преживее

Ивана Ефремовски — Sat, 17 Oct 2020 13:49:49 +0000

Лидерот на најголемата албанска опозициска политичка сила, Демократската партија, Љуљзим Баша, изјави дека секој трет албански граѓанин не може да ја обезбеди потребната количина на храна. -Ситуацијата е влошена, многу граѓани останаа без работа. Секој трет албански граѓанин не може да ја обезбеди потребната количина на храна за да преживее. Бизнисите се на работ на банкрот. Нема да се заморувам да повторувам дека албанската држава мора да ја исполни својата обврска кон даночните обврзници и да ги стави на располагање фондовите, рече Баша во директна комуникација со граѓани. Во видеозаписот што го објави, сопственик на фурна за леб и бели печива, вели дека обемот на работа е многу намален а давачките кон државата се високи. -На луѓето им е потребна поддршка денес. Нашиот план му помага на секој Албанец во тешкотија. Времето не чека, порача Баша. Во врска со состојбата со пандемијата со Ковид-19, тој обвинува дека граѓаните немаат пари за да се тестираат и додава дека „пари државата има но се крадат“. -Стотици граѓани не можат да си дозволат да се тестираат иако тоа им е потребно зашто немаат финансиски средства. Поддршката за здравствениот систем во нашата земја е најмала во Европа. Пари има, но се крадат наместо да одат за тестови и заштита на здравјето на граѓаните. Бројот на нови случаи со Ковид-19 рапидно расте а бројот на направените тестови опаѓа, обвинува Баша. (МИА)

Баша: Почнуваме со национални антивладини протести

Дарко Андоновски — Sun, 17 May 2020 16:41:45 +0000

Обединетата албанска опозиција, предводена од Демократската партија (ДП) најави секојдневни сенационални протести против Владата на премиерот Еди Рама. Одлуката за тоа ја соопшти лидерот на Демократите, Љуљзим Баша по средбата со претставниците на другите партии, кои ја сочинуваат обединетата опозиција. – Денеска е уште еден лош пример дека земјата ја води опасен криминалец и крадец. Тој ја зграпчи како заложник државата на Албанците, институциите, лебот од устата на Албанците, нивната душа и култура. Веќе седум години ДП и опозицијата се борат против ова зло и авторот на ова зло, а тоа е Еди Рама. Тоа зло мора да си замени, затоа ги повикувам сите граѓани на масовните национални протести, со почитување на мерките за заштита од Ковид-19, изјави Баша. Тој спомнувајќи го договорт со Рама постигнат пред три години пред парламентарните избори, истиот го нарече „грешка што нема никогаш да ја повтори“. – Пред три години седнав со него за доброто на земјата, но времето покажа дека не сум бил во право. Им гарантирам на Албанците дека оваа грешка никогаш повеќе нема да се повтори. Ние ќе преземеме чекори за да се ослободиме од злото – Еди Рама, додаде Баша. И тој и Моника Круемади, лидерка на третата по големина политичка партија во земјата, Социјалиситчкото движење за интеграција, се уште се на плоштад заедно со голема група граѓани,главно млади луѓе. Таа ги повика сите граѓани и политички партии да се „придружат на отпорот кој почнал од денеска“. Зборувајќи за насилството што полицијата го применила врз демонстрантите, таа додаде дека насилно се однесувала полицијата и кон неа, но дека не била приведена. Според полицијата пак приведени се 37 лица меѓу нив има и актери и новинари.

Баша: Ова не е војна со луѓето, туку со вирусот

Дарко Андоновски — Thu, 16 Apr 2020 19:13:58 +0000

Лидерот на најголемата албанска опозициска Демократската партија, Љуљзим Баша оцени дека преземените мерки од страна на Владата не се доволни. Тој коментирајќи ги измените во кривичниот законик, што денеска беа изгласани од Парламентот, а со кои се предвидени затворски казни за непочитување на мерки во вонредна состојба, рече дека се чини како Владата да не е во војна со вирусот, туку со народот. Баша додаде дека на земјата и е потребна стратегија за излез од оваа состојба, повикувајќи го премиерот да ја зголеми финансиската помош за народот и да изврши измени во буџетот. – Битката е со вирусот, а не со луѓето. Со вирусот се бориш, а на луѓето им се помага. Владата се чини дека се бори против народот. Предлозите се спорадични, недоволни, а ефектот за спречување на падот на економијата е речиси невидлив. Овие мерки се низа мерки, а не план за излез од кризата, истакна Баша. Тој посочи дека не се знае дали Владата има план за излез од кризата и карантинот и го повикува премиерот доколку има план да го објави јавно. – Транспарентноста останува главен проблем, бидејќи не се кажува вистината. Постои страв од вистината. На земјата и треба план и стратегија за да се врати во нормала. Без вистинскиот план луѓето ќе се најдат во оваа ситуација и нашата кревка економија ќе потоне. Го повикувам премиерот итно да ја зголеми финансиската помош за народот. Да направи измени во буџетот, да го зголеми фондот за итни случаи, затоа што не сме ниту на ниво на Косово, затоа што времето не чека, порача Баша. Тој уште еднаш го повтори барањето на опозицијата дека треба масовно тестирање за Ковид -19 во земјата.