локдаун – Kurir.mk

Кинескиот град Ченгду ставен во локдаун поради коронавирусот

Магдалена Андонова — Fri, 02 Sep 2022 10:25:04 +0000

Ченгду е меѓу најновите градови во Кина што е во локдаун, поради спроведување на контроверзната „нулта – ковид“ политика. Околу 21 милион жители ќе мора да останат во своите домови, а од домаќинствата дозволен е излез на само едно лице со цел да купи основни намирници. Во текот на вчерашниот ден во градот евидентирани се 157 новозаразени со 51 асимптоматичен случај. Надлежните во Пекинг се обидуваат да ја спроведат „нулта – ковид“ политиката, иако населението не се согласува со тоа, а влијае и врз економскиот раст на земјата. Наредните денови сите ќе бидат тестирани во Ченгду, а кога ќе бидат укинати ограничувањата сè уште не се знае. Во меѓувреме, забрането е луѓето да го напуштаат градот. На оние кои ќе покажат негативен тест на Ковид-19, ќе им биде дозволен излез доколку тоа е потребно. Според државни медиуми, почетокот на училишната година е одложен, а авионските летови откажани. Медицински официјални лица велат дека состојбата е исклучително сложена и тешка. За избивањето на заразата, тие ги обвинуваат масовните собири за време на топлите денови на неколку локации за пливање и забава. Ограничувања има и на други места во Кина. (МИА)

Кина воведе локдаун за 1,7 милиони жители поради 300 нови случаи на коронавирус

Тале Кристо — Mon, 04 Jul 2022 14:56:54 +0000

Кина воведе мерки за заклучување за 1,7 милиони жители на источната провинција Анхуи, каде денеска беа пријавени околу 300 нови случаи на инфекција со Ковид-19, во време кога епидемијата повторно се шири во некои области. Кина презеде строг пристап кон вирусот со масивни кампањи за тестирање, задолжителни карантини и заклучување кога ќе се појават само неколку случаи. Повторната епидемија во Анхуи доаѓа во време кога кинеската економија полека се опоравува од заклучувањето на Шангај, кое беше укинато на почетокот на јули по неколку месеци. Двата кантони Сиксианг и провинцијата Лингби објавија заклучување што опфаќа повеќе од 1,7 милиони жители. Ним им е забрането да ги напуштаат своите домови освен да одат на тестирање. Јавниот радиодифузер CCTV објави снимка од празни улици во Сиксианг овој викенд и луѓе кои чекаат на ред да го направат својот шести ПЦР тест за неколку дена. Кинеското Министерство за здравство денеска објави 287 нови инфекции во Анхуи, со што вкупниот број во провинцијата во последните денови достигна повеќе од илјада.

Шангај повторно се затвора: Над 15 милиони луѓе ќе бидат во строг карантин

Магдалена Андонова — Fri, 10 Jun 2022 20:36:50 +0000

Само една недела по завршувањето на двомесечниот карантин, Шангај најави нови ограничувања и програми за масовно тестирање. Мерките воведени вчера за областа Минханг од денеска ќе важат за уште седум градски области. Единаесет новозаразени со Ковид-19 биле откриени вчера, што доведе до одлука за повторно воведување ограничувања. Во текот на викендот ќе се спроведе масовно тестирање во осум населби, а 15 милиони луѓе повторно ќе бидат во строг карантин. По масовното тестирање, новите ограничувања ќе бидат воведени само во оние населби каде ќе бидат потврдени случаите на Ковид-19. Долгото и контроверзно заклучување за Шангај беше укинато дури вчера, по два месеци рестрикции што ги нарушија синџирите на снабдување, погодувајќи ги земјите ширум светот.

Полицијата во Британија казни уште 50 лица за забавата во локдаун каде што бил присутен и Џонсон

Магдалена Андонова — Thu, 12 May 2022 13:54:52 +0000

Британската полиција издаде повеќе од 50 нови казни за прекршување на антиковид правилата во Даунинг стрит и други владини згради. Овие казни се дополнување на повеќе од 50 изречени минатиот месец, вклучително и на премиерот Борис Џонсон, неговата сопруга Кери Џонсон и министерот за финансии Риши Сунак, јави Би-Би-Си. Британскиот премиер Борис Џонсон се извини минатиот месец кога му беше изречена казната за кршење на правилата на „локдаун“ кога во неговата канцеларија била организирана прослава за неговиот роденден, но одби да поднесе оставка поради тоа. Најновите казни се однесуваат на божиќна забава во декември 2020 година, на која Џонсон не присуствувал. Полицијата истражува 12 собири, од кои се знае дека Џонсон присуствувал на најмалку три. Додека пристигнуваше на специјален состанок на кабинетот во Стафордшир, Џонсон беше прашан дали е „шокиран“ од размерите на кршење на законот во Даунинг стрит 10. – Ќе имаме многу да кажеме за тоа кога ќе заврши работата“ одговори тој. Во соопштението, британската полиција најави дека истрагата продолжува. Се очекува да следат дополнителни казни, н о не е даден временски рок. (МИА)

Откако ги потврди првите случаи на коронавирусот, Северна Кореја воведува локдаун!

Магдалена Андонова — Thu, 12 May 2022 09:25:49 +0000

Северна Кореја воведе блокада низ целата земја откако ги потврди првите случаи на Ковид -19 од почетокот на пандемијата. Инфекциите предизвикани од подваријантата БА.2 на високо преносливиот вид Омикрон се откриени во главниот град Пјонгјанг на 8 мај, објавија денеска државните медиуми. Според Корејската централна новинска агенција (КЦНА), властите не го прецизираа бројот на случаи, но ја опишаа епидемијата како „тешка ситуација“. На состанокот на владата, со кој претседаваше севернокорејскиот лидер Ким Џонг Ун, се препорачани „најитни“ контролни мерки „за справување со кризата за да се спречи епидемијата“. Епидемијата предизвикува загриженост за земјата, една од ретките што нема пријавено ниту еден случај на инфекција од почетокот на пандемијата. Превентивната стратегија на Северна Кореја се потпира на целосно затворање на границите од јануари 2020 година. Светската здравствена организација нема податоци за вакцини против Ковид-19 во земјата со 25 милиони жители, откако Пјонгјанг постојано одбиваше снабдување со вакцини од меѓународната заедница. (МИА)

Омикрон затвори кинески град со 9 милиони жители

Ивона Петрова — Tue, 22 Mar 2022 09:06:11 +0000

Кина прекуноќ затвори индустриски град со девет милиони жители, информирајќи денеска за над 4.000 случаи позитивни на коронавирус. Кинеската стратегија „нулта-Ковид“ се соочува со бран на варијантата омикрон, јавија локални медиуми. Со нови 4.770 инфекции ширум земјата, синоќа се донесе одлука, градот Шенјанг да биде под „локдаун“. Во Шенјанг, индустриски град на фабрики како производителот на автомобили – BMW, регистрирани се 47 нови случаи на вирусот. Сега на жителите им е забрането да излегуваат без 48-часовен негативен резултат на Ковид тест. Покрај „локдаун“, Кина во борбата со вирусот користи и масовно тестирање и затворања на посебни области во градови. Во саботата, беше соопштено дека во земјата се евидентирани два смртни случаја со Ковид-19, за првпат по повеќе од година дена. Градови како Шангај избегнаа целосно затворање, со „локдаун“ на посебни згради.

Австрија го укинува локдаунот и за невакцинираните за време на празниците

Магдалена Андонова — Fri, 17 Dec 2021 10:07:36 +0000

Австриската влада одлучи да го укине локдаунот за невакцинираните граѓани за време на божиќните и новогодишните празници. Во празничниот период ќе биде дозволено собирање до максимално 10 луѓе без „2Г“ сертификати, соопшти австрискиот министер за здравство, Волфганг Микштајн. За собирање со максимум 25 лица повторно важи „2Г“ правилото, а тоа е да може да присуствуваат само вакцинирани или оздравени, изјави министерот на конференција за медиумите. За Нова Година ќе се укине и ковид ограничувањето на работното време во гастрономијата. Микштајн изјави дека со општиот локдаун се доби простор кој овозможува отварање и за невакцинирани. Поради тоа тој вели дека ќе биде овозможено одредено отклучување за празниците. Меѓутоа, Микштајн предупредува дека треба граѓаните да бидат внимателни поради омикрон сојот кој што неконтролирано се шири. - Божиќ треба да покаже колку е важен контактот со нашите најблиски. За време на Божиќ треба да собереме сили и да се подготвиме за следните недели - рече тој, порачувајќи дека тие денови нема да има ограничувања на слободата на движење. Микштајн најави построги правила за влез во земјава, особено од Велика Британија и рече дека се работи на соодветна регулатива.

Џонсон пријавен во полиција, одел на забави за време на „локдаун“

Магдалена Андонова — Sat, 04 Dec 2021 12:43:51 +0000

Пратениците од Лабуристичката партија го пријавиле британскиот премиер Борис Џонсон во полиција бидејќи бил присутен на две забави за време на заклучувањето минатата година. Нил Којл, пратеник од Лабуристичката партија, и пишал на Комесарката на лондонската полиција Кресиди Дик, барајќи од неа да ги испита извештаите дека премиерот се обратил на забава во ноември и дозволил божиќна забава за персоналот во декември, објави британски Гардијан. Во тоа време имаше ограничувања кои го спречуваа дружењето. Откако го испратил писмото, Којл рекол дека верува оти има прекршување на законот. - Повеќето од моите гласачи ги следеа правилата; оние кои не беа казнети. Џонсон не е над законот, и покрај фактот што верува дека заслужува посебен третман, посочи тој. Бери Гардинер, поранешниот секретар за меѓународна трговија во сенка, исто така побара од лондонската полиција да спроведе истрага, додавајќи дека ако овие настани се случиле, тоа имплицира дека има едно правило за владата, а друго за сите останати. Џонсон експлицитно не негираше дека забавите се одржале, но Даунинг стрит инсистираше да се почитуваат сите правила на Ковид. Лондонската полиција вчера соопшти дека се уште не добиле поплаки за одржување на забавите. Од своја страна, поранешниот главен регионален обвинител Назир Афзал повика на јавна истрага за пандемијата за да се истражат наводните прекршувања на карантинот на две забави на Даунинг стрит минатата година, како и патувањето на Доминик Камингс во североисточниот дел на земјата кога тој беше советник на Борис Џонсон.

Словачка од утре под целосен „локдаун“

Тале Кристо — Wed, 24 Nov 2021 18:35:14 +0000

Словачката Влада одлучи од утре земјата да е затворена во следните две недели поради зголемениот број на новозаразени лица со Ковид-19. – Од четврток, 25 ноември, во Словачка ќе биде воведен „локдаун“ низ целата држава, изјави вицепремиерот Рихард Сулик. Затворањето вчера го најави претседателката на Словачка, Зузана Чапутова, која истакна дека земјата ја губи битката против Ковид-19 и оти е потребно заклучување за сите граѓани.

Историска одлука: Австрија воведува локдаун за невакцинираните

Магдалена Андонова — Sun, 14 Nov 2021 12:32:00 +0000

Австрискиот канцелар Александар Шаленберг денеска најави дека од понеделник ќе се воведе карантин за невакцинираните граѓани. - Треба да ја зголемиме стапката на вакцинација. Срамно е ниска - рече канцеларката. Шаленберг во петокот објави дека воведува блокада во два региони, Горна Австрија и Салцбург, и двете меѓу најпогодените места од последиците на луѓето кои решиле да не ја примат вакцината. Според претходните извештаи, на луѓето ќе им биде дозволено да ги напуштат своите домови само за одредени цели, како одење на лекар или купување намирници.