Ломбардија – Kurir.mk

Ломбардија делумно затворена, земјата поделена на три зони

Магдалена Андонова — Wed, 04 Nov 2020 21:20:02 +0000

Најновите ограничувања во обид да се спречи ширењето на коронавирусот во Италија вклучуваат делумно затворање на најбогатиот и најнаселен регион на Ломбардија околу финансиската престолнина Милано, изјави денеска премиерот Џузепе Конте. Владата претходно објави нов пакет мерки што ги заострува националните ограничувања и ја дели земјата на три зони – црвена, портокалова и жолта, во согласност со интензитетот на епидемијата. Зонирањето зависи од голем број фактори, вклучително и стапки на локална зараза и пополнетост на болницата, а ограничувањата ќе бидат воведени во согласност со тоа. Во критично погодените црвени зони, на луѓето ќе им биде дозволено да ги напуштат своите домови само заради работа, поради здравствени причини или итни случаи, а баровите, рестораните и повеќето продавници ќе бидат затворени. За разлика од националната блокада пролетта, сега сите фабрики ќе бидат отворени. (МИА)

Лекарите во Ломбардија бараат целосен карантин

Ивона Петрова — Tue, 03 Nov 2020 09:44:06 +0000

Во италијанската северна покраина Ломбардија расте бројот на заразени со новиот коронавирус, а лекарите тврдат дека ситуацијата во медицинските институции е неподнослива и оти е неопходно веднаш да се воведе целосен карантин. Во апелот до регионалните власти лекарите наведува дека немаат неопходна опрема и материјали. Во Ломбардија во изминатите 24 часа регистрирани се 5.200 нови случаи и 46 смртни случаи. Додека на национално ниво, во Италија во изминатото деноноќие пријавени се помалку новозаболени во споредба со претходниот ден, вкупно 22.000, но тестирани се речиси 50.000 лица помалку.

Ломбардија предлага воведување дополнителни ограничувања

Ивона Петрова — Tue, 20 Oct 2020 05:36:58 +0000

Италијанската Влада се согласи на барањето од регионот Ломбардија, кој беше силно погоден од епидемијата на Ковид-19, да воведе дополнителни ограничувања за борба против новиот бран зараза, изјави портпаролот на Министерството за здравство. Во Ломбардија, чиј центар е италијанската финансиска престолнина Милано, регистрирани се околу 128.400 од над 423.500 случаи на коронавирус откриени во Италија од почетокот на епидемијата во февруари. Регионот Ломбардија соопшти дека ќе предложи Владата да ги запре несуштинските економски активности и движењето на луѓето од 23 до 5 часот наутро од 22 октомври, додавајќи дека исто така ќе побара затворање на сите големи продавници во сабота и недела.

Австрија го укинува предупредувањето за патување во Ломбардија

Тале Кристо — Wed, 15 Jul 2020 09:11:50 +0000

Австрија од полноќ го укинува највисокото предупредување за патување во италијанската провинција Ломбардија, соопшти Министерството за надворешни работи. Од четврток, Австријците ќе можат повторно да патуваат во Ломбардија, без карантин по враќањето во земјата. „Епидемиолошката состојба во Ломбардија и дозволи на Австрија да го преземе овој чекор“, се наведува во соопштението на Министерството. Во исто време, во Италија останува на сила предупредувањето за ниво 4, што овозможува слобода на патување. Сепак, ништо не е променето кога станува збор за предупредувањето од највисоко ниво за патување – ниво 5 и 6, кое подразбира две недели карантин или негативен ПЦР тест при враќање од 32 земји низ целиот свет. Меѓу овие земји се сите од Западен Балкан. (МИА)

Сала: Ако се распадне Милано, ќе се урне цел здравствен систем на Ломбардија

Ивона Петрова — Fri, 03 Apr 2020 05:25:41 +0000

Сега преминуваме од здравствена на економско-социјална криза. Граѓаните ја чувствуваат и навистина се загрижени, изјави градоначалникот на Милано, Џузепе Сала, предупредувајќи дека целиот здравствен систем на Ломбардија ќе се распадне, доколку се распадне Милано. Тој истакна дека во Милано и околината моментно има околу 10.000 заразени лица со коронавирус, а само во градот се околу 4.000. – Помалку страдавме од Бергамо и Бреша. Ако се распадне Милано, тогаш ќе се урне целиот здравствен систем на Ломбардија, нагласи Сала, додавајќи оти нема знаци за влошување на ситуацијата во градот, бидејќи луѓето сфатија дека мораат да останат дома. Сала, сепак, оцени дека Милано го чека „долг и тежок период“ и се уште е многу рано за заживување. – Немаме датум за целосно отворање на Милано. Она што го правиме е дека се подготвуваме повторно да заживееме, ни треба план, полека ќе се отвора сектор по сектор. Размислуваме како ќе работи јавниот превоз и метрото кога ќе има повеќе луѓе на улиците. Дигиталната мрежа? Како ќе ги користиме стадионите, кино салите, театрите? Како ќе и помогнеме на економијата на Милано, објаснува Сала.

„Бројот на заразени со коронавирус во Ломбардија се зголеми за околу 2.500“

Тале Кристо — Thu, 26 Mar 2020 15:52:55 +0000

Милано, 26 март 2020 (МИА) – Бројот заразени со коронавирусот во северниот дел на Италија, Ломбардија, во кој се наоѓа финансиски центар Милано, денеска е зголемен за околу 2.500, соопшти регионалниот гувернер Атилио Фонтана. – За жал, денешните бројки не се добри. Постои нагло зголемување од претходните денови, изјави Фонтана и додаде дека прелиминарните бројки покажуваат оти вкупниот број на случаи во областа се зголемил за околу 2.500 за еден ден. Бројот на заразени во Ломбардија вчера се зголеми за 1.643 на 32.346.

Најбогатиот и најнаселен регион во Италија и уште 14 провинции во карантин поради новиот коронавирус

Катерина Бојаџиева — Sun, 08 Mar 2020 09:44:23 +0000

Италијанскиот премиер Џузепе Конте утрово потпиша наредба со која до 3 април се во карантин Ломбардија и уште 14 провинции, во кои живеат повеќе од 15 милиони луѓе. Ломбардија, чија финансиска престолнина е Милано е најбогатиот и најнаселен регион во Италија. Новите правила вклучуваат луѓето да не можат да патуваат од и во Ломбардија, каде живеат околу 10 милиони луѓе. Мерките ќе важат и за уште 14 италијански провинции. Сите музеи, вежбалници, културни центри, скијалишта и базени ќе бидат затворени. Мерките беше предвидено да стапат во сила вчера, но локалните политичари побараа повеќе време за разгледување на рестрикциите. Италијанската Влада вчера донесе одлука за дополнително вработување на околу 20.000 здравствени работници, како и зголемување на бројот на кревети во болничките одделенија за интензивна нега да го зголеми од 5.000 на 7.500. Планирано е вработување на 5.000 лекари специјалисти, 10.000 медицински сестри и 5.000 негуватели. Владата планира и привремено вработување на пензионирани лекари. Новите мерки предвидуваат и претворање, по потреба, на некои хотели во приемни центри за лица во карантин. Во Италија со новиот коронавирус се регистрирани 5.883 лица, од кои 233 починале, од кои 50 во последните 24 часа, а 589 оздравеле. Додека во Бугарија, Молдавија и Аргентина се регистрирани првите пациенти од новиот коронавирус. Досега над 100 држави пријавија пациенти инфицирани со новиот коронавирус. Во Бугарија регистрирани се првите два случаи на Ковид-19. Една жена и еден маж се инфицирани со новиот коронавирус. Тие изјавија дека не патувале во странство. И Молдавија го пријави првиот пациент инфициран со Ковид-19. Додека во Јужна Америка односно во Аргентина е регистриран првиот смртен случај. Почина 60-годишен маж кој неодамна престојувал во Европа. Во Австрија според најновите податоци, новиот коронавирус е потврден кај 104 луѓе, а само за еден ден имало 17 нови заразени лица. Според последните извештаи, повеќе од 106.190 луѓе се инфицирани со Ковид-19 ширум светот, од кои најголемиот број се во Кина. Бројот на смртни случаи се искачи на 3.600, додека повеќе од 60.190 луѓе оздравеа од новиот коронавирус.

ВИДЕО: Во карантин гувернерот на италијанскиот регион Ломбардија, негов помошник позитивен на Ковид-19

Ивона Петрова — Thu, 27 Feb 2020 09:06:38 +0000

Гувернерот на италијанскиот регион Ломбардија, Италија, Атилио Фонтана, изјави дека ќе биде ставен во карантин две недели откако е утврдено дека неговиот помошник е позитивен на новиот коронавирус. Фонтана ова го објави во видео порака на Фејсбук. Ломбардија е жариште на ширењето на коронавирусот во Италија. Во земјата се пријавени 400 случаи на Ковид-19, што е најголем број на заразени во Европа.