лубеници – Kurir.mk

Дали е здраво да јадеме семки од лубеница: Студија официјално ни го открива одговорот

Ристе Здравков — Fri, 15 Sep 2023 07:43:24 +0000

Сите сме сретнале приказна дека ако јадете семки од лубеница, лубеница ќе почне да ви расте во стомакот. Иако тоа не е точно, се отворија многу прашања дали е навистина здраво да се јадат овие црни семки. Истражувањата покажуваат дека лубеницата нуди многу здравствени придобивки. Една студија се фокусираше на потенцијалното намалување на болката во мускулите, како и на тоа дека семките ја прават кожата поздрава. Додека друга се зафати со големо прашање и наведува дека овие семиња дури и го намалуваат ризикот од малигни тумори. Експертите, вклучително и диететичарот Лорен Манакер, велат дека не само што семките се безбедни, туку и се преполни со хранливи материи. – Семките од лубеницата се природен извор на манган, фосфор, калиум, протеини, фолати, есенцијални масни киселини, железо и цинк. Овие различни хранливи материи, како што е манганот, му помагаат на мозокот и нервниот систем да функционираат правилно, додека фосфорот помага во здраво формирање на коските и го подобрува варењето – вели Манакер. Семките од црна лубеница се полни и зрели семиња кои можат да се садат. Здрави се за јадење, но имаат слаб вкус и многу потешко се џвакаат од незрелите бели семки. – Иако и двете се безбедни за јадење, повеќето луѓе ги плукаат црните семки бидејќи тешко се џвакаат и го прават непријатно јадењето месо од лубеница – вели нутриционистот Тами Лакатос Шамс. И белите и црните семки од лубеница содржат растителни влакна, а се смета дека никнатите семки од лубеница даваат уште повеќе хранливи придобивки. Кога се печени, семките од лубеница личат на семки од тиква и се здрава ужинка. Магнезиумот во семките игра клучна улога во производството на енергија, функцијата на нервите и одржувањето на стабилен крвен притисок, пренесува „Dailymail.co.uk“.

Земјоделците прашуваат: Дали вреди трудот ако полна тракторска приколка бостан чини 1.000 денари

Магдалена Андонова — Sun, 17 Jul 2022 15:46:55 +0000

Слаб интерес за струмичкиот бостан оваа сезона. Производителите се жалат на лош пласман и цени кои се под секоја пазарна логика. На пазарот на големо во Колешино лубениците се продаваат по цена од 1 до 2 денари за килограм. За една тракторска приколка, во зависност од големината, трговците нуделе од 1000 до 5000 денари. сума која според земјоделците е доволна само за два вреќи вештачко ѓубре. Разочарани од ваквата состојба, производителите размислуваат од идната година целосно да се откажат од земјоделието. Ниските цени и лошиот пласман не се единствените проблеми со кои се соочија производителите на бостан оваа година. Пред околу месец половина тие претрпеа и дополнителни штети од невремето со град што го зафати овој регион во кое најмногу страдаше токму производството со бостан.

Необична атракција во Истанбул: Иранец продавал лубеници од багажникот на неговото виолетово Ламборџини

Магдалена Андонова — Fri, 11 Sep 2020 17:14:43 +0000

Пред автомобилите да станат вообичаен дел од 20-от век, уличните продавачи овошјето и зеленчукот го продаваат од шарени автомобили кои ги влечеле коњи. Тоа било повеќе од вообичаена слика во бројни делови од светот. Сепак, еден човек од Турција дал навистина модерен пресврт на целата приказна, кога продавал лубеници од багажникот на едно Ламборџини. Господинот, кој на почетокот се претставил дека има арапско потекло, продавал лубеници за пет лири од багажникот на неговото виолетово Ламборџини Авентадор. Овој, т.н. 'инцидент' се случил на најфреквентната улица во Истанбул, а малку е да се каже дека господинот продавач станал сензација за само неколку минути. Според турската новинска агенција „T24“, продавачот брзо привлекол голема маса која сакала од него да купи овошје. Кога репортерите стигнале на лице место, мистериозниот сопственик влегол во својот суперавтомобил и побегнал. Тој исто така ги исфрлил лубениците од багажникот на тротоар пред да исчезне од местото, без да го открие својот идентитет. По кратко пребарување на неговите регистарски таблички, откриено е дека Ламборџинито е регистрирано во Анталија. Никој не знае кој е мотивот за продажбата на лубеници од ваков скапоцен автомобил, па многу лесно може да биде само обид за прославување преку ноќ. Сепак, знаеме дека Ламборџини брендот нема да биде среќен поради сето ова, бидејќи тие генерално не реагираат добро на ваков тип на публицитет. Како што било откриено подоцна, автомобилот му припаѓал на човек од Иран, кој секако ги забавувал минувачите, но не и локалната полиција. Поради оваа случка, казнет е со околу 156 долари, бидејќи го користел возилото на начин на кој не е предвиден во неговата регистрација. Покрај тоа, добил и забрана за возење од 15 дена.

Александра Младеновиќ ги покажа лубениците (ФОТО)

Ивана Ефремовски — Tue, 28 Jul 2020 09:23:27 +0000

Младата пејачка Александра Младеновиќ беше домаќин на екипата на емисијата „Премиера - специјален викенд“ во нејзината родна Житораџа. Таа ги покажа насадите со лубеница, кои им припаѓаат на нејзините родители, а пејачката откри дека многу често им помага. Нејзиното семејство одгледува лубеници и заработува од нивната продажба. -Јас навистина не се разбирам, тоа го работат моите родители. Им помагав кога бев помала. Јас секогаш се нудам за помош кога им треба, изјави таа.

Трипуновски: Со СДСМ на власт извозот на лубеници е петкратно намален од 11.000 тони во 2016, на 2500 тона

Матеја Петровски — Mon, 09 Jul 2018 14:58:21 +0000

Од ВМРО-ДПМНЕ обвинуваат дека СДСМ е катастрофа за земјоделието. Членот на Извршниот комитет на партијата, Цветан Трипуновски вели дека власта ја претвори државата од земја извозник во земја увозник на земјоделски производи, дека во првите шест месеци од 2018 година државата има трговски дисбаланс во поглед на земјоделските производи. -Република Македонија повеќе увезува отколку што извезува. Токму затоа и откупот е слаб, а откупните цени очајно ниски. Македонија која во изминатиов период важеше за земја извозник на лубеница во првите шест месеци од 2018 година има увезено двојно повеќе лубеници отколку што има извезено. Имено увозот изнесува 6.000 тони додека извозот е само 2500 тони на лубеници. И додека увезуваме од странство родот на нашите земјоделци скапува по нивите или се продава по цена од 2 до 3 денари за килограм. Извозот никогаш не бил послаб. Ова се должи на неспособноста на власта да обезбеди пласман и пазар за македонските лубеници, изјави Трипуновски. Тој вели деак СДСМ од опозиција ветуваше сигурен пласман и сигурни откупни цени, а сега гледаме дека не само што откупот е намален, туку и цените се помали од било кога. Извозот на лубеница откако СДСМ е на власт е паднат драстично. Од 11.000 тони на извезени лубеници во 2016 година, на овогодинешните 2.500 тони. -Поради неспособноста на власта домашните земјоделци беа приморани добар дел од родот да го остават да скапе на нивите или воопшто да го даваат без пари. Наместо профит за илјадници земјоделски фамилии, политиките на СДСМ носат профит на мала група трговци. Оваа влада не води сметка за интересот на земјоделците, туку за интересот на неколку трговци. При тоа не му нанесоа удар само на земјоделството туку и на многу стопанските гранки кои се тесно поврзани со него, како што се трговија, транспортот, хемиска индустрија, преработувачка индустрија итн, изјави Трипуновски. Според него министерот Николовски кажува розови прикаски секојдневно со некакви ЌЕ ветувања, но за негова несреќа бројките се конкретни,а за него и за владината политика немилосрдни. -Истовремено покажувајќи ја нивната неспособност и алчност за лесна заработка на поединци блиски до власта не водејќи сметка за стратешките интереси, а во конкретниов случај интересите на македонските земјоделци. Затоа ВМРО-ДПМНЕ јасно укажува на оваа состојба која ги разоткрива нивните матни шпекулантски планови за остварување на профит на грбот на македонскиот земјоделец. Оваа власт мора да си замине веднаш додека не е доцна,секој ден нивно опстојување за Македонија има несогледиви последици, изјави Трипуновски.

Производителите на лубеници со блокади бараат повисоки откупни цени

Ивона Петрова — Fri, 06 Jul 2018 12:01:10 +0000

Производители на лубеници од неколку села од подбеласичкиот регион денеска со двочасовна блокада на клучката за селото Смоларе, на магистралниот пат Ново Село-македонскобугарска граница, го искажаа својот револт од ниските откупни цени. Тие бараат средба со министерот за земјоделество, шумарство и водостопанство Љупчо Николовски, како и повисоки откупни цени. Велат дека има откуп, но цената е многу ниска Додаваат дека тракторска приколка со 4,5 тони лубеници трговците ја откупуваат за 2 - 3.000 денари, а внатре има околу 450 парчиња лубеници. - Државата да ни даде отштета, како што беше лани и затоа сме многу благодарни. Лани добивме по два денара за килограм предадени лубеници. Исто така, бараме надлежните да го разгледаат и нашето барање за решавање на проблемите што ги имаме со тие од кои ги земаме нивите под закуп. Дел од вистинските сопственици се починати или не се тука и затоа бараме тоа да реши за да можеме да добиеме субвенции, рече Панче Тилев производител на лубеници од село Колешино. На откупниот пункт во истоименото село откупот тече нормално, а началникот на Подрачната единица на Министерството заземјоделство, шумарство и водостопанство, Васил Коцев повика да не се манипулира со земјоделците и дека откуп има секојдневно. - Откупот нормално тече и досега има откупено 800 тони лубеници, а во наредните денови ќе се откупат уште 300 тони со што треба да се реши проблемот со вишок на лубеници, рече Коцев. Додаде дека во одснос на земјоделците кои не се сопственици на нивите и земаат под наем површини за садење, во собраниска постапка е измената на законот за земјоделство и рурален развој токму за таа област. Со законските измени, посочува, субвениците нема да ги зема сопственикот на нивите, туку тој што на неа одгледува одредена култура.

Маж почина во сообраќајка предизвикана од лубеници

Ивана Ефремовски — Wed, 02 May 2018 09:31:53 +0000

Лубениците што се превезувани во преполна приколка паднале на патот во Филаделфија, при што е предизвикана сообраќајна незгода. Во сообраќајката загинало едно лице на возраст од 61 година. Лубениците удриле во автомобилот при што возачот ја загубил контролата и излетал од патот. Возачот кој ги превезувал лубениците не е сериозно повреден.