луганск – Kurir.mk

Четирите окупирани украински региони денеска ќе бидат припоени кон Руската Федерација

Ивона Петрова — Fri, 30 Sep 2022 06:23:10 +0000

Рускиот претседател Владимир Путин денеска во 14 часот по средноевроспко време, на церемонија во Големата сала во Кремљ, ќе ги припои кон Русија четирите окупирани украински региони-Доњецк, Луганск, Херсон и Запорожје. Портпаролот на Кремљ, Дмитриј Песков, вчера најави дека Путин ќе ги потпише документите за анексија во присуство на лидерите на четирите региони кои се назначени од Москва, а потоа ќе одржи и говор, додека за вечерва е планиран концерт на Црвениот плоштад. Путин синоќа ги потпиша указите за признавањето на Херсон и Запорожје како независни држави, што е предуслов регионите да поднесат барање за приклучување кон Руската Федерација. Регионите Луганск и Доњецк веќе се признати од него како независни држави уште во февруари годинава, кога Русија ја почна својата инвазија на Украина. Руските окупаторски власти во регионите Луганск, Доњецк, Запорожје и Херсон минатата недела одржаа референдуми за напуштање на Украина и приклучување кон Русија. Имаше извештаи дека граѓаните биле принудувани да гласаат, понекогаш и под закана со пиштол. Украина и западните сили го осудија петдневното гласање што заврши во вторникот, соопштувајќи дека нивниот резултат од повеќе од 99 отсто поддршка за отцепување никогаш нема да биде меѓународно признат. Рускиот лидер минатата недела изјави дека Москва ќе ги смета украинските напади врз припоените региони како напади врз самата Русија и дека ќе ги искористи сите средства за да ги одбрани – продлабочувајќи ја загриженоста дека Русија може да го употреби своето нуклеарно оружје.

Украинската армија го уништи седиштето на Вагнер во Луганск

Ивана Ефремовски — Mon, 15 Aug 2022 13:12:30 +0000

Рускиот новинар Јуриј Котенок на Телеграм објави дека украинската армија го уништила седиштето на руската приватна паравоена организација Вагнер во Поспана. Тој тврди дека седиштето на Вагнер во Луганск е погодено со ракетниот систем ХИМАРС. Во нападот наводно е убиен и Јевгениј Пригожин, еден од клучните луѓе на Вагнер, познат како готвачот на Путин. Но, за тоа нема потврда од независни извори. (МИА)

Путин нареди продолжување на руската офанзива по заземањето на регионот Луганск

Тале Кристо — Mon, 04 Jul 2022 13:20:57 +0000

Рускиот претседател Владимир Путин денеска им нареди на своите сили да ја продолжат офанзивата во источна Украина по заземањето на целиот регион Луганск. Руските сили „треба да ја извршат својата мисија до крај според веќе одобрените планови“, рече Путин во телевизиски разговор со неговиот министер за одбрана Сергеј Шојгу. „Се надевам дека сè ќе се случи во нивните сектори како што се случи во Луганск“, додаде Путин. Тие изјави тој ги даде еден ден по најавата за повлекување на украинските сили од стратешкиот град Лисичанск, со чие заземање руските и проруските сепаратистички сили ја презедоа контролата врз целата територија на Луганск. Регионот Луганск и соседниот Доњецк го формираат Донбас, индустриски басен во источна Украина, што руските сили имаат намера да го освојат во целост. Министерот за одбрана Шојгу денеска изјави дека руските сили го деминираат градот Лисичанск.

Француски новинар загина при гранатирање во регионот Луганск

Тале Кристо — Mon, 30 May 2022 13:49:11 +0000

Напорите за евакуација на цивилите во областа Луганск во источна Украина денеска беа прекинати откако оклопно возило беше погодено од шрапнел од руска граната, при што загина француски новинар, изјави регионалниот гувернер Сергеј Гајдаи. Гајдаи напиша на Телеграм дека шрапнелите го пробиле оклопот на автомобилот во кој патувал акредитираниот француски новинар.

Стравувања за 60 мртви во руски воздушен напад врз училиште во регионот Луганск

Катерина Бојаџиева — Sun, 08 May 2022 08:33:28 +0000

Се стравува дека 60 лица загинале во воздушен напад врз училиште во областа Луганск, кое служело како засолниште за цивили, јави ДПА. -Во училиштето засолниште од нападите побараа околу 90 лица, изјави Сегеј Хаидаи, шеф на регионалната воена управа на Луганск, додавајќи дека 30 лица се извлечени од под урнатините, а седум од нив биле повредени. Во урнатините досега се пронајдени две тела, изјави утрово Хаидаи, додавајќи дека „веројатно е дека сите останати 60 лица се мртви“. Руски авион, соопшти синоќа Хаидаи, фрлил бомба врз училиштето во селото Билохоривка, кое е на околу 11 километри од бојното поле. Во подрумот на училиштето, рече тој, „имаше речиси цело село“. На пожарникарите им требале повеќе од четири часа да го изгаснат пожарот, што избувнал по воздушниот напад врз училиштето.

Најмалку петмина цивили загинаа при руското гранатирање во Луганск

Тале Кристо — Thu, 05 May 2022 06:48:36 +0000

Загинаа петмина цивили во руско гранатирање изминатото деноноќие, изјави гувернерот на Луганск, Серхиј Гајдај. Како што појасни гувернерот, нападите биле фокусирани на Сијеродоњецк и Попасна, Хирске и Лисичанск. Русија изминатите недели ги пренасочи своите напади на исток и на југ, откако претходно се обиде да го опколи и заземе главниот град на Украина, Киев.

Гувернерот на Луганск вели дека Русија контролира 80 отсто од регионот

Тале Кристо — Thu, 21 Apr 2022 13:23:45 +0000

Гувернерот на Луганск, Сергеј Хајдај соопшти дека руските сили сега контролираат 80 отсто од украинскиот регион. Хајдај вели дека руските трупи успеале да остварат контрола врз поголем дел од регионот, како и дека по заземањето на малиот град Кремина сега се пред градовите Рубижне и Попасна. Пред руската извазија украинските власти контролираа 60 проценти од регионот Луганск – една од двете области што го сочинуваат Донбас. „Окупаторот контролира само делови од тие градови, неможејќи да се пробие до централните градски подрачја“, соопшти Хајдај преку објавата на апликацијата „Телеграм“. Аналитичарите проценуваат дека офанзивата во источниот дел на Украина би можела да стане исцрпувачка оттаму што руската армија таму е соочена со најискусните трупи на Украина кои осум години се борат со промосковските сепаратисти во Донбас.

Гувернерот на регионот Луганск информира дека се уништени сите магацини за храна во Северодоњецк

Тале Кристо — Thu, 21 Apr 2022 07:00:08 +0000

Гувернерот на Луганската област, Сергеј Гајдај изјавил дека сите магацини со храна во Северодоњецк се уништени и жителите можат да добијат храна само преку хуманитарна помош, објави Киев Индипендент. Весникот пренесува и дека Гајдај, исто така, рекол оти руските сили уништиле неколку станбени згради во Рубижне и Новодружск во Луганската област.

Жителите на Луганск повикани на итна евакуација

Ивона Петрова — Mon, 18 Apr 2022 05:47:25 +0000

Украинската новинска агенција УНИАН објави дека граѓаните од областа Луганск биле повикани на итна евакуација, пренесува Си-Ен-Ен. – Следната недела ќе биде тешка. Ова е можеби последна шанса да ве спасиме, рече Сергеј Гаидаи, локалниот гувернер. Украина очекува жесток руски напад врз Луганск и Донбас, особено откако руските сили го напуштија северот на земјата.

Гувернерот на Луганск: Евакуирајте се додека можете, изберете го животот

Катерина Бојаџиева — Fri, 15 Apr 2022 08:55:50 +0000

Гувернерот на украинскиот регион Луганск, Серхиј Гајдај ги повика жителите да се евакуираат. На Телеграм, тој апелираше на евакуација и да се „избере живот“. Медиуми јавуваат дека ваквиот апел следува откако едно лице беше убиено, а петмина беа ранети, за време на руското гранатирање во градот Кремина. Евакуирани се 32.000 жители со возови и автобуси, додаде Гајдај, повикувајќи ги и останатите да го сторат истото. – Не двоумете се и одете додека сè уште постои таа можност, истакна гувернерот.