Луис Инасио Лула да Силва – Kurir.mk

Силва незадоволен поради што не се сретна со Зеленски

Тале Кристо — Mon, 22 May 2023 09:20:07 +0000

Претседателот на Бразил, Луис Инасио Лула да Силва изрази незадоволство бидејќи немаше одвоена средба со украинскиот колега Володимир Зеленски на Самитот на Г7 во Јапонија, како што беше планирано. Средбата не била остварена поради преоптоварената агенда на Силва и Зеленски. - Не бев задоволен, бидејќи би сакал да се сретнеме и да разговараме .Зеленски е возрасен и знае што прави, истакна Силва. Тој истакна дека ниту Зеленски ниту рускиот претседател Владимир Путин не сакаат мир. - Засега и двајцата се убедени дека ќе ја добијат војната, посочи Силва. Бразил, кој не воведе економски санкции кон Русија и не се согласи да го снабдува Киев со муниција, и се обидува да се позиционира како Кина и Индонезија како посредник. Зеленски на Самитот на Г7 во Хирошима доби нови ветувања за воена опрема, како и дипломатска поддршка од земјите-членки на Г7.

САД го обвинија бразилскиот претседател Лула за ширење руска и кинеска пропаганда

Катерина Бојаџиева — Tue, 18 Apr 2023 09:25:03 +0000

Белата куќа остро го критикуваше бразилскиот претседател Луис Инасио Лула да Силва за обвинувањето дека САД ја „охрабруваат војната во Украина“. Лула по посетата на Кина за време на викендот рече дека САД треба да почнат да зборуваат за мир во Украина. Портпаролот на Советот за национална безбедност на САД, Џон Кирби, го обвини Лула дека „како папагал ја повторува руската и кинеската пропаганда“. Лула, кој се претстави како посредник во мировните преговори за ставање крај на конфликтот, во текот на викендот изјави дека „САД треба да престанат да поттикнуваат војна и да почнат да зборуваат за мир“. Неговите коментари уследија по состанокот со кинескиот претседател Си Џинпинг.

Лула предлага Украина да се откаже од Крим

Ивона Петрова — Fri, 07 Apr 2023 06:02:21 +0000

Бразилскиот претседател Луис Инасио Лула да Силва предложи Украина да и го отстапи полуостровот Крим на Русија за да стави крај на војната, нагласувајќи дека украинскиот претседател Володимир Зеленски „не може да бара сè“. - Шефот на руската држава Владимир Путин не може да ја заземе територијата на Украина. Веројатно може да се разговара за прашањето за Крим, тој треба да ги преиспита работите. Ниту Зеленски не може да бара сè … На светот му треба смиреност … Мора да најдеме решение, истакна Лула. На крајот на јануари Лула излезе со сè уште нејасен предлог за посредување во конфликтот во Украина од страна на група земји. Следната недела бразилскиот претседател треба да му го претстави својот проект на кинескиот колега Си Џинпинг во Пекинг. Шефот на бразилската држава изјави дека е „уверен“ во шансите за успех на овој проект и се надева дека оваа група на земји ќе се формира по неговото враќање од Кина. Главниот советник за надворешна политика на Лула, Селсо Аморим, на крајот на март во Москва се состана со Владимир Путин и министерот за надворешни работи Сергеј Лавров, кој се очекува да пристигне во Бразил на 17 април.

Бразилскиот претседател Лула нема да оди ниту во Русија, ниту во Украина

Ивона Петрова — Wed, 15 Mar 2023 07:16:04 +0000

Бразилскиот претседател Луис Инасио Лула да Силва изјави дека нема да ги посети Русија или Украина поради тековната војна, но дека сепак се залага за мирно решение на конфликтот. Левичарскиот лидер на настан во главниот град Бразилија рече дека конфликтот предизвикан од руската инвазија на Украина денес би требало да биде незамислив. - Во 21 век не треба да биде ни можно да имаме војна за мали нешта, изјави тој. Лула ова го изјави откако преку видео-врска разговараше со неговиот украински колега Володимир Зеленски, кој го покани да го посети Киев. Зеленски се обидува да добие меѓународна поддршка од почетокот на инвазијата во февруари 2022 година, вклучително и посети од различни шефови на држави, како што е американскиот претседател Џо Бајден. Лула претходно се залагаше за создавање група земји кои ќе посредуваат во изнаоѓање мирно решение за конфликтот.

Лула да Силва: Болсонаро е „мозокот“ на нападот на владините згради на 8 јануари

Ивона Петрова — Fri, 03 Feb 2023 07:38:08 +0000

Бразилскиот претседател Луис Инасио Лула да Силва изјави дека е сигурен дека неговиот претходник Жаир Болсонаро е „мозокот“ на нападот на владините згради на 8 јануари во главниот град на Бразил. Лула да Силва додаде дека на овој начин Болсонаро сакал да изврши државен удар. „Денес сфаќам и го кажувам јасно и гласно: овој граѓанин (поранешниот претседател Болсонаро) го подготви државниот удар“, изјави актуелниот бразилски претседател во интервју за бразилската телевизија „Рете ТВ“. На 8 јануари, илјадници поддржувачи на Болсонаро, незадоволни од победата на Лула да Силва на претседателските избори изгубени од лидерот на екстремната десница, упаднаа во владините згради во Бразил, во претседателството, Врховниот суд и Конгресот и предизвикаа материјална штета. Бразилскиот судија одлучи да го вклучи поранешниот лидер, кој на крајот на декември од Бразил замина на Флорида, во истрагата која има за цел да открие кој стои зад овие дејствија. „Сигурен сум дека Болсонаро е активно вклучен во ова и се обидува сè уште да биде вклучен“. Тие сакаа да го направат овој хаос уште на 1-ви јануари, но сфатија дека нема да можат да го направат тоа бидејќи имаше многу полиција и многу луѓе на улиците“, рече Лула да Силва.

Бразилскиот претседател се врати во главниот град

Ивона Петрова — Mon, 09 Jan 2023 07:50:52 +0000

Бразилскиот претседател, Луис Инасио Лула да Силва, се врати во Бразилија и ги посети претседателската палата и Врховниот суд, во кои претходно упаднаа приврзаници на поранешниот шеф на државата Жаир Болсонаро, објави утринава телевизијата „Глобо“. Претседателот, кој е на функцијата само една недела, синоќа од Сао Паоло изјави дека неговиот претходник од екстремната десница „ги охрабрувал фашистичките вандали“ да ги нападнат властите во Бразилија. Лула донесе одлука за „полициска интервенција“ со вклучување полициски сили од целата земја за враќање на контролата и безбедноста во главниот град. Стотици приврзаници на Болсонаро синоќа упаднаа во зградите на главните институции на власта во Бразилија – Конгресот, Врховниот суд и претседателската палата.

Лула пуштен од болница по отстранување на полипи на гласните жици

Ивана Ефремовски — Tue, 22 Nov 2022 09:44:17 +0000

Бразилскиот претседател Луис Инасио Лула да Силва денеска е пуштен од болница, откако му беше направена операција за отстранување на потенцијално преканцерозните израстоци на гласните жици. Лекарите од болницата „Сирио Либанес“ во Сао Паоло, каде пред 11 години Лула беше лекуван од рак на грлото, изјавија дека израстоците може повторно да се појават со иритации или при постојана изложеност на чад од тутун или алкохол. Таквите појави ретко се развиваат во рак. Лекарите на Лула појаснија оти не откриле неоплазма или знаци на абнормален раст на клетките.

Луис Инасио Лула да Силва избран за нов претседател на Бразил

Ивона Петрова — Mon, 31 Oct 2022 06:31:45 +0000

Изборната администрација на Бразил соопшти дека Луис Инасио Лула да Силва од левичарската Работничка партија го победи актуелниот претседател Жаир Болсонаро и стана нов претседател на државата. По пребројувањето на 98,8 отсто од гласовите, тој освои 50,8 отсто, а Болсонаро 49,2 отсто. Изборните власти објавија дека победата на Силва е математички сигурна. Да Силва, поранешен претседател на земјата од 2003 до 2010 година, вети дека ќе го врати попросперитетното минато на земјата, но се соочува со пречки во поларизираното општество. Тоа е неверојатно враќање на власт за 77-годишниот Да Силва, бидејќи неговата затворска казна во 2018 година поради корупциски скандал му забрани да се кандидира на изборите таа година и го отвори патот за победата на тогашниот кандидат Болсонаро и четиригодишната екстремно десничарска политика

Лула де Силва официјално ќе се кандидира за претседателските избори во Бразил

Катерина Бојаџиева — Sat, 07 May 2022 19:13:04 +0000

Поранешниот бразилски претседател Луис Инасио Лула да Силва од Работничката партија (ПТ) денеска и официјално соопшти дека ќе се кандидира на претседателските избори на 2 октомври, јави ДПА. -Нашиот суверенитет и демократија постојано се напаѓани од неодговорната и криминална политика на актуелната власт, рече Лула денеска на настан во Сао Паоло,, на кој се собраа политичките лидери и поддржувачи за официјално да ја лансираат коалицијата предводена од Лула, а во која Џералдо Алкмин ќе трча како негов потпретседател. Алкмин, од Бразилската социјалистичка партија (ПСБ), потрсетува германската агенција, е поранешен гувернер на државата Сао Паоло, кој во 2006 година загуби на претседателските избори токму од Лула, а тогаш беше кандидат на конзервативната партија ПСДБ. -Бразил ќе има можност да одлучи што ќе биде во следните неколку години. Земјаа на демократијата или на авторитаризмот, на знаење и толеранција или на замрачување и насилство, рече Лула де Силва. Тој беше на функцијата претседател на Бразил од 2003 до 2010 година, извлекувајќи милиони луѓе од тешката сиромаштија со социјални програми. За време на неговиот мандат, Бразил забележа големи економски придобивки. Меѓутоа, неговата влада, исто така, беше поткопана од корупцијата, која процвета под неговото претседателство. Во 2018 година, Лула беше осуден на 12 години затвор за корупција и перење пари и не можеше да се кандидира против десничарскиот претседател Жаир Болсонаро. Казната, меѓутоа, Врховниот суд му ја укина минатата година и на Лула му беа вратени политичките права. Последните анкети покажуваат дека Лула води со 44 отсто од гласовите, наспроти Болсонаро со 31 отсто. Ова, сепак, не би било доволно за да се обезбеди победа во првиот круг, бидејќи на кандидатот му требаат најмалку 50 отсто од гласовите. Вториот круг е закажан за 30 октомври.

Бразил донесе пресуда со која можат да се ослободат 5.000 затвореници, меѓу кои и Да Силва

Ивона Петрова — Fri, 08 Nov 2019 08:32:55 +0000

Врховниот суд во Бразил донесе пресуда со која може да дојде до ослободување на речиси 5.000 затвореници кои сè уште ги обжалуваат своите пресуди, меѓу кои и поранешниот претседател Луис Инасио Лула да Силва и други моќни уапсени лица за време на истрагата за корупција. Судот одлучи дека лицата можат да бидат затворени дури откако ќе бидат поминати сите жалби до повисоките судови. Одлуката оди во корист на Да Силва, чии адвокати рекоа дека денеска ќе побараат негово ослободување. Овој потег првично ќе зависи од судијата со седиште во градот Куритиба, каде е затворен поранешниот претседател. Пресудата вклучува и други осудени лица во случаи што произлегуваат од таканаречената истрага „Автопералница“, меѓу кои десетици политичари и бизнисмени во Латинска Америка. Тие сега можат да бараат ослободување.