Магдалена Андерсон – Kurir.mk

Шведската премиерка Магдалена Андерсон поднесе оставка

Магдалена Андонова — Thu, 15 Sep 2022 10:29:33 +0000

Шведската социјалдемократска премиерка Магдалена Андерсон денеска поднесе оставка по поразот на парламентарните избори, на кои десничарскиот блок освои тесно мнозинство. Андерсон се состана со Андреас Норлен, претседател на шведскиот Парламент –Риксад, што брои 349 членови, за официјално да му ја предаде оставката. (МИА)

Андерсон: Нема да дозволам Шведска да стане засолниште за терористи

Катерина Бојаџиева — Mon, 27 Jun 2022 18:12:23 +0000

Шведската премиерка Магдалена Андерсон изјави дека нема да дозволи нејзината земја да стане засолниште за терористи. Нејзината изјава уследи по средбата со генералниот секретар на НАТО, Јенс Столтенберг во Брисел и пред почетокот на Самитот на Алијансата во Мадрид, со цел да добие поддршка од Турција за членството на Шведска. – Нашиот став за Курдската работничка партија (ПКК) е сосема јасен. За ЕУ групата е терористичка организација, со што се согласува и Шведска. Шведска не е и нема да биде засолниште за терористите. Властите интензивно ќе работат на протерување на оние кои би можеле да бидат закана за безбедноста, а веќе има значителен број случаи што во моментов се процесуираат, наведе Андерсон. Турција го блокира влезот на Шведска и на Финска во НАТО со образложение дека им пружаат засолниште на курдски екстремисти.

Андерсон: Шведска не финансира или вооружува „терористички организации“

Катерина Бојаџиева — Wed, 25 May 2022 14:09:27 +0000

Шведска не финансира или вооружува терористички организации, изјави денеска премиерката Магдалена Андерсон, отфрлајќи ги турските тврдења и противењето на кандидатурата за членство во НАТО поради поддршка за курдските милитантни групи. – Ние не испраќаме пари за терористички организации, се разбира, ниту оружје, истакна Андерсон на прес-конференција во Стокхолм. Нејзините забелешки доаѓаат откако финската и шведската делегација започнаа денеска разговори со Анкара. Според неа, разговорите ќе обезбедат можност да се расчисти „конфузијата“ што кружи во врска со шведската поддршка за различни групи. Турција се спротивстави на апликациите на Шведска и соседна Финска, особено Шведска, во врска со она што го смета за попустливост кон курдските милитантни групи во нордиските земји. Стокхолм и Хелсинки ги поднесоа своите кандидатури за приклучување кон НАТО минатата недела, откако политичката и јавната поддршка за членство се зголеми по руската инвазија врз Украина. Турција, сепак, ги обвини Шведска и Финска дека дејствуваат како жаришта за терористички групи, а претседателот Реџеп Тајип Ердоган инсистираше на тоа дека Анкара нема да ги одобри кандидатурите на двете земји.

Бајден во четврток ќе ги прими шведската премиерка и финскиот претседател

Тале Кристо — Tue, 17 May 2022 15:12:49 +0000

Американскиот претседател Џо Бајден в четврток во Белата куќа ќе ги прими шведската премиерка Магдалена Андерсон и финскиот претседател Саули Ниинисто, изјави денеска портпаролката на Бајден, Карин Жан-Пјер. Двете земји се подготвуваат за влез во НАТО, откако политичките раководства се изјаснија за брз прием во Алијансата . -Тие ќе разговараат за кандидатурите на Финска и Шведска за членство во НАТО и европска безбедност, како и за поддршката за Украина која е нападната од Русија, изјави Жан-Пјер. Финскиот парламент денеска гласаше за влез во НАТО со огромно мнозинство од повеќе од 95 отсто од гласовите, дозволувајќи му на Хелсинки да испрати формална апликација за членство до седиштето на Алијансата. Шведската министерка за надворешни работи Ен Линде денеска ја потпиша апликацијата на нејзината земја за членство во НАТО. Со приемот на лидерите на двете нордиски земји, Бајден сака да покаже дека силно го поддржува нивниот прием во Северноатлантската алијанса. Иако Финска и Шведска се историски неутрални, руската инвазија на Украина радикално го промени јавното мислење за приклучување кон воен сојуз. Со исклучок на Анкара, другите членки на НАТО ја поддржуваат кандидатурата на двете земји. Жан-Пјер додаде дека администрацијата на Бајден верува дека НАТО ќе постигне консензус за прием на Финска и Шведска.

Андерсон: Шведска за неколку дена ќе поднесе апликација за членство во НАТО

Ристе Здравков — Sun, 15 May 2022 16:07:48 +0000

Шведските владејачки социјалдемократи најавија поддршка за влезот на земјата во НАТО. Премиерката Магдалена Андерсон најави дека „сега е сосема сигурна дека за неколку дена ќе започне официјална апликација“. Шведската министерка за надворешни работи Ен Линде одлуката ја нарече „историска“. „Руската инвазија на Украина ја влоши безбедносната состојба за Шведска и Европа во целина“, додаде таа. Финскиот претседател Саули Ниинисто денеска официјално објави дека неговата земја аплицира за членство во НАТО, што е историска промена во неутралната надворешно политичка ориентација на земјата, поттикната од руската инвазија на Украина. „Денеска претседателот и владиниот комитет за надворешни работи заедно одлучија Финска да аплицира за членство во НАТО“, изјави Ниинисто во Претседателската палата во Хелсинки. Тој рече дека овој потег ќе ја максимизира безбедноста на земјата.

Шведската премиерка отфрли референдум за можно членство во НАТО

Тале Кристо — Thu, 28 Apr 2022 14:53:47 +0000

Владата на Шведска не планира да одржи референдум доколку Парламентот одлучи да продолжи со барањето за членство во НАТО, изјави премиерката Магдалена Андерсон. Руската инвазија на Украина ги принуди и Шведска и Финска да ги преиспитаат долгогодишните верувања дека воената неутралност е најдоброто средство за обезбедување национална безбедност, при што се очекува двете земји да донесат одлука во следните неколку недели. За Андерсон референдумот е „лоша идеја“. „Не мислам дека тоа е прашање што е погодно за референдум“, изјави таа на прес конференција „Има многу информации за националната безбедност што се доверливи, така што има важни прашања на еден ваков референдум за кои не може да се разговара и важни факти што не можат да се стават на маса“. Шведскиот Парламент ќе ја разгледува безбедносната политика со извештај што се очекува во средината на мај.

Само неколку часа по назначувањето, новата шведска премиерка си поднесе оставка

Тале Кристо — Wed, 24 Nov 2021 18:54:51 +0000

Нoвата шведска премиерка поднесе оставка по падот на владата – само неколку часа по назначувањето. Буквално неколку часа по нејзиниот избор, идната премиерка на Шведска – и првата жена лидер на нацијата – Магдалена Андерсон поднесе оставка откако тензичното гласање за буџетот ја турна шведската влада во криза. Партијата на зелените ја напушти владата откако беше изгласан буџетот на опозицијата.

Шведска за првпат има жена премиер

Катерина Бојаџиева — Wed, 24 Nov 2021 09:53:57 +0000

Шведскиот Парламент денеска ја избра лидерката на Социјалдемократската партија и актуелна министерка за финансии Магдалена Андерсон за прва жена премиер на земјата, откако таа постигна договор во последен момент кој и обезбеди клучна поддршка. Андерсон ќе го наследи актуелниот премиер Стефан Ловен, откако вкупно 117 пратеници гласаа „за“ неа, 57 беа воздржани и 174 гласаа против. Според шведскиот систем, на кандидатот за премиер не му треба поддршка од мнозинството во парламентот, туку само против него да нема мнозинство. Според шведскиот Устав, премиерите можат да управуваат се додека парламентарното мнозинство – минимум 175 пратеници – не е против нив.