махатма ганди – Kurir.mk

Очилата на Махатма Ганди продадени на аукција за шест минути, цената неверојатно висока

Ивона Петрова — Sat, 22 Aug 2020 13:21:15 +0000

Очилата кои му припаѓале на еден од основачите на модерна Индија, Махатма Ганди се продадени на аукција во Бристол за 260.000 фунти. Проценката за очилата била 15.000 фунти, но цената почнала вртоглаво да расте за во шестата минута од аукцијата еден колекционер од САД да понуди 260.000 фунти. Сопственикот на аукциската куќа, Ендру Стов за Би-Би-Си изјавил дека ова бил најскапо продадениот предмет од негова страна. Претходниот сопственик на очилата бил стар човек од Манготсфилд, а во неговото семејство очилата биле од дваесетите години на минатиот век, кога негов роднина ги донел од Јужна Африка каде се запознал со Ганди. -Очилата седеа во фиока со децении, а сопственикот ми рече да се обидам да ги продадам, а ако не успеам да ги фрлам. Во петокот вечерта ги остави во обичен плик во нашето поштенско сандаче, а со половина се гледаа и можеше било кој да ги земе. Кога му реков дека би можеле да вредат 15.000 фунти за малку ќе му се слошеше, а сега доби паричен износ кој ќе му го смени животот, додава сопственикот на аукциската куќа.

Украдени дел од посмртните останки на Махатма Ганди

Ивона Петрова — Fri, 04 Oct 2019 06:35:55 +0000

Непознати сторители украле дел од посмртните останки на Махатма Ганди од меморијалниот центар Бапу Баван, соопшти индијската полиција. Пепелта, која е украдена на 150 годишнината од неговото раѓање, е чувана во меморијалниот центар од 1948 година. Крадците со зелена боја напишале „предавник“ преку фотографијата на Ганди. Полицијата потврдила дека ја истражува кражбата како „штета за националната интеграција“ и опасност за потенцијално нарушување на мирот. Чуварот во меморијалниот центар Бапу Баван, истакнал дека кражбата е срамна. -Ја отворив портата рано наутро бидејќи тој ден се одбележуваше роденденот на Ганди. Кога се вратив околу 23 часот видов дека недостасуваат неговите посмртни оставки, а фотографијата е целосно уништена, изјавил чуварот Тивари.

Индија одбележува 150 години од раѓањето на Махатма Ганди

Ивона Петрова — Wed, 02 Oct 2019 09:08:50 +0000

Индија денеска одбележува 150 години од раѓањето на Махатма Ганди, еден од најголемите лидери на 20. век и човек кој ја ослободи Индија од колонијалното ропство. Сепак, во Музејот на Ганди, изграден на местото каде беше убиен тој борец за слобода, има многу повеќе странци отколку Индијци. Тоа е случај поради, како што пренесува Хина, растечкиот хиндуистичкиот национализам, а со тоа и опаѓање на интересот за Ганди. – Индијците го познаваат Ганди единствено од банкнотите и улиците кои се по него наречени. Никој не се сеќава што тој направил и како се жртвувал, велат вработени во музејот. Индија стекна независност од Велика Британија во 1947 година пред се, благодарејќи на политиката на отпор на Ганди, која подразбираше граѓанска непослушност и ненасилство. Голем број индиски политичари ја доведуваат во прашање неговата идеологија, сметајќи ја за непрактична. Начелата на Ганди инспирираа луѓе и движења ширум светот, од Мартин Лутер Кинг, Нелсон Мандела и Вацлав Хавел до Аунг Сан Су Чи. Општествените научници и активисти ја нагласуваат важноста на вредностите на Ганди во одговорот на глобалните тензии и судири. Сепак, во Индија се повеќе расте хиндустичкиот национализам, злосторствата од омраза и поларизација меѓу хиндусите и муслиманите. Ганди беше убиен од хиндуистичкиот екстремист Натурам Годсе, кој го обвинуваше за слабеење на земјата бидејќи дозволил нејзина поделба на Индија и Пакистан.

Откриј ја љубовта и покажи му ја на целиот свет

Ристе Здравков — Mon, 26 Nov 2018 20:15:14 +0000

Земи ја насмевката и подари ја на човек кој никогаш не се насмеал. Земи еден сончев зрак и направи да одлета онаму каде што владее ноќта. Откриј го изворот и во него избањај го оној кој живее во кал. Земи една солза и стави ја на лицето на оној кој никогаш не плачел. Земи ја храброста и стави ја во душата на оној кој не се осмелува да се бори. Откриј го животот и за него проповедај на оние кои не можат да го разберат. Земи ја надежта и живеј во нејзиното светло. Земи ја добрината и дарувај ја на оној кој не знае да дарува. Откриј ја љубовта и покажи му ја на целиот свет! Махатма Ганди