Мајк Помпео – Kurir.mk

Претставници на ЕУ одбија да се сретнат со Помпео, откажана посетата на Европа

Дарко Андоновски — Wed, 13 Jan 2021 09:18:53 +0000

Американскиот државен секретар, Мајкл Помпео, во последен момент го откажа патувањето за Европа откако шефот на луксембуршката дипломатија и високи претставници на ЕУ одбија да се состанат со него, јавија британските медиуми, повикувајќи се на дипломати запознати со ситуацијата. Во соопштението на американскиот Стејт департмент претходно беше наведено дека патувањето е откажано поради ангажамнот на Помпео околу трансферот на власта пред инаугурацијата на Џо Бајден на претседателската функција, на 20 јануари. Министерството за надворешни работи на Луксембург потврди дека посетата е откажана, додека институциите на ЕУ одбиваат да коментираат, пренесе Радио Слободна Европа. Предвидено беше за време на посетата Помпео, на приватна вечера во Брисел, да се сретне и со генералниот секретар на НАТО, Јенс Столтенберг.

Помпео: Хутите во Јемен се терортистичка организација

Магдалена Андонова — Mon, 11 Jan 2021 08:08:26 +0000

САД планираат Хутите, проиранското шиитско движење во Јемен, да го прогласат за странска терористичка организација, изјави американскиот државен секретар Мајк Помпео. Изјавата на Помпео, како што се верува во дипломатските и хуманитарни кругови, може да ги загрози мировните разговори и да ги комплицира напорите за надминување на најсериозната хуманитарна криза во светот. -Стејт департментот ќе го извести Конгресот за мојата намера да го прогласам движењето Ансар Алах, понекогаш наречено Хути, за меѓународна терористичка организација, најави Помпео во пресрет на преземањето на администрацијата на новиот претседател Џо Бајден, на 20 јануари, јавуваат британските медиуми. Американскиот државен секретар кажа дека планира да ги прогласи тројцата лидери на Хутите за специјално обележани глобални терористи, што аналитичарите го толкуваат како обид на соработниците на Трамп пред заминување да и отежнат на администрацијата на Бајден за рестарт на дијалогот со Иран и враќање на САД во рамките на меѓународниот нуклеарен договор. (МИА)

Помпео во карантин по средба со заразено лице

Магдалена Андонова — Wed, 16 Dec 2020 16:41:09 +0000

Американскиот државен секретар, Мајк Помпео, имал контакт со лице со позитивен тест за коронавирус и затоа оди во карантин, јави денеска портпарол на Стејт департментот. -Беше утврдено дека Помпео бил во контакт со некој кој се тестирал позитивно на Ковид. Поради лични причини, нема да го идентификуваме лицето. Државниот секретар направи тест и тој е негативен. Според препораките на ЦДЦ (државниот Центар за превенција на заболувањата), тој оди во карантин, изјавија од Стејт департментот. Се додава дека Помпео е постојано прегледуван од медицинскиот тим на департментот. (МИА)

Помпео: Во Венецуела се случува измама и илузија, а не избори

Ивона Петрова — Mon, 07 Dec 2020 06:43:20 +0000

Американскиот државен секретар, Мајк Помпео, парламентарните избори во Венецуела ги оцени за „измама и илузија“. „Изборната измама во Венецуела е веќе извршена. Резултатите објавени од нелегитимниот режим на Мадуро нема да ја одразуваат волјата на венецуелскиот народ“, напиша Помпео на Твитер. Тој додаде дека она што денес се случува во Венецуела е „измама и илузија, а не избори“. Да потсетиме, граѓаните на Венецуела денеска гласаат на парламентарните избори, што речиси сигурно ќе му овозможат на социјалистичкиот претседател Николас Мадуро да го контролира Конгресот, единствената преостаната независна институција во земјата. Изборите ги бојкотира опозициската коалиција предводена од сегашниот претседател на парламентот, Хуан Гуаидо, кој во јануари 2019 година се прогласи за привремен шеф на државата и доби поддршка од САД и бројни европски земји. Опозициското движење предводено од Гуаидо за неколку дена ќе организира референдум, на кој ќе ги праша граѓаните дали сакаат крај на владеењето на Мадуро и нови претседателски избори.

Помпео ја почнува од Париз евроазиската турнеја низ седум земји

Ивона Петрова — Sat, 14 Nov 2020 12:26:56 +0000

Американскиот државен секретар Мајк Помпео денеска во Париз ја почнува својата евроазиска турнеја низ седум земји, во деликатен момент откако сите лидери на државите кои ќе ги посети веќе му ја честитаа изборната победа на Џо Бајден. Тој, како и мнозинството од неговата Републиканска партија, не ги прифаќа резултатите од претседателските избори во САД, па тоа би можело да фрли сенка врз неговата евроазиска турнеја, при што ќе ги посети Франција, Турција, Грузија, Израел, ОАЕ, Катар и Саудиска Арабија. – Помпео е мој соговорник од американската Влада до 20 јануари 2021. Тој пристигнува во Париз и јас ќе го примам, изјави францускиот министер за надворешни работи Жан Ив ле Дријан, најавувајќи сериозни разговори околу прашања поврзани за тероризмот, Ирак, Иран, Блискиот Исток и Кина. Односите меѓу актуелниот претседател на САД, Доналд Трамп и шефот на француската држава Емануел Макрон се прилично тензични. Макрон разговараше пред четири денови со Бајден и му ја честиташе победата на изборите, но министерот Ле Дријан сепак сугерира дека францускиот претседател би можел да го прими Помпео за време на неговиот престој во Париз.

Помпео во посета на Хрватска

Ивона Петрова — Fri, 02 Oct 2020 05:25:36 +0000

Државниот секретар на САД, Мајк Помпео доаѓа во Дубровник како највисок официјален претставник на американската администрација во посета на Хрватска, откако Доналд Трамп е во Белата куќа. Се очекува да соопшти дека по 30 години на хрватските граѓани повеќе нема да им требаат визи за влез во САД. Како што е најавено, Помпео во Дубровник ќе разговара со премиерот и министер за надворешни работи, Андреј Пленковиќ и Гордан Грлиќ Радман, а во разговорите ќе учествува и министерот за одбрана Марио Баношиќ. Тој е највисок функционер на американската администрација што дошол во Хрватска откако Трамп победи на претседателските избори во 2016 година. Мандатот на оваа администрација е при крај, а изборите на кои сегашниот претседател ќе бара „уште четири години“ против поранешниот потпретседател Џо Бајден ќе се одржат на 3 ноември. Откако прашањето за визи за хрватските граѓани кои влегуваат во САД не е решено три децении, Помпео може да објави во Дубровник дека Хрватска го исполнила условот за нивно укинување, помалку од три проценти од одбиените апликации. Покрај Хрватска, единствените членки на ЕУ чии граѓани мора да имаат виза за САД се Романија, Бугарија и Кипар. Полска минатата година беше исклучена од тој режим. – Мислам дека можеме да очекуваме позитивна одлука во наредните месеци, изјави вчера хрватскиот министер за надворешни работи Гордан Грлиќ Радман за ХРТ. Хрватското раководство треба да разговара и за набавка на борбени авиони со Помпео, откако минатата година не успеа купувањето на користен израелски Ф-16 Барак, бидејќи Вашингтон не ја одобри нивната продажба на Хрватска на Израел. Хрватска купува 12 борбени авиони и доби четири понуди.

Помпео во посета на Грција, денеска на средба со Дендиас во Солун, утре на Крит со Мицотакис

Ивона Петрова — Mon, 28 Sep 2020 05:53:54 +0000

Американскиот државен секретар Мајк Помпео од денеска е во посета на Грција, во Солун ќе се сретне со министерот за надворешни работи Никос Дендиас, а утре на Крит со грчкиот премиер Кирјакос Мицотакис, јави дописничката на МИА од Атина. Како што соопштија од Стејт Департментот, посетата на Грција е за да се обноват заедничките заложби за унапредување на безбедноста, мирот и просперитетот во Источен Медитеран, но и за одбележување на најсилните американско – грчки односи во последните децении. На денешната средба со Никос Дендиас, според грчкото МНР, ќе разговараат за прашањата од билатерален, регионален и меѓународен интерес со акцентот ставен на стратешкиот дијалог Грција –САД, на одбранбената и енергетската соработка, како и на случувањата во поширокиот регион на Источниот Медитеран. Дополнително, американскиот државен секретар ќе потпише билатерален договор за наука и технологија, а со бизнис лидерите од енергетскиот сектор ќе разговара за потенцирање на диверзификација на енергијата и инфраструктурните проекти во Грција. Утре, Помпео и грчкиот премиер Кирјакос Мицотакис ќе ја посетат воената база во Суда на островот Крит, за, како што соопштија од Стејт Департментот, „да се нагласи силното безбедносно партнерство на САД со НАТО сојузникот –Грција“. Портпаролот на грчката Влада Стелиос Пецас во понеделникот рече дека од посетата на Помпео очекуваат „да се потврди она што повеќе пати беше кажано од американска страна во изминатиот период, односно практична поддршка на грчките позиции на сите нивоа, особено во однос на турски провокации во Источниот Медитеран“. Државниот секретар на САД Мајк Помпео до 2 октомври ќе ги посети Грција, Италија, Светата столица и Хрватска.

Помпео со критика до Кина поради ситуацијата во провинцијата Синџијанг

Магдалена Андонова — Thu, 24 Sep 2020 07:44:17 +0000

Во говор пред законодавците на сојузната држава Висконсин, американскиот државен секретар Мајк Помпео денеска предупреди за кинеското влијание врз политикита и изборите во САД и впери прст кон Пекинг за третманот на муслиманското малцинство во Кина. Откако беше прашан дали Вашингтон планира да изнесе официјален став за осуда поради жестокото однесување на власта со муслиманите, тој изјави дека САД размислуваат како да го формулираат описот на ситуацијата во кинескиот регион Синџијанг. Државниот секретар рече дека за тоа прашање треба внимателност и прецизност. -Ние размислуваме какви формулации да употребиме кога се посочува на таа ситуација. Кога говориме за злосторства против човештвото или за геноцид треба да бидеме многу внимателни и многу прецизни, затоа што тоа има голема значење, изјави Помпео на настап во Капитолот на сојузната држава Висконсин. (МИА)

Помпео најави обраќање на САД до ОН во следната недела за санкции кон Иран

Ивона Петрова — Thu, 17 Sep 2020 05:45:05 +0000

САД ќе се обратат до ОН со цел повторно да воведат санкции за Иран следната недела, а Вашингтон ќе стори се што е потребно за тие санкции да бидат спроведени, изјави американскиот државен секретар Мајкл Помпео. – САД ќе го сторат тоа што го прават секогаш. Ќе преземат свој дел од одговорноста … Ние повторно ќе се обратиме до ОН за да се воведат санкции, така што трајното ембарго за оружје да стапи на сила следната недела, изјави Помпео на заедничката прес-конференција во Вашингтон. со британскиот колега Доминик Раб. Помпео ја активираше постапката на 20 август, која треба да се спроведе еден месец подоцна, односно викендов, за воведување меѓународни санкции за Техеран. Тие санкции беа укинати во 2015 година, кога Иран склучи меѓународен договор со шест светски сили и се обврза да се откаже од својата програма за развој на атомско оружје во замена за укинување на санкциите.

Помпео в петок ќе го посети Бразил

Ивона Петрова — Wed, 16 Sep 2020 06:01:47 +0000

Државниот секретар на САД, Мајк Помпео, в петок ќе го посети Бразил, каде ќе одржи состанок со бразилскиот министер за надворешни работи Ернест Араужо. Тој исто така ќе замине во бразилскиот град Боа Виста близу границата со Венецуела, во посета на мигрантите од Венецуела, додека Вашингтон го засилува притисокот за соборување на претседателот Николас Мадуро. Помпео, исто така, ќе ги посети Колумбија, Суринам и Гвајана од 17 до 20 септември, за да се состане со лидерите на тие држави. Стејт департментот наведува дека посетата „ја нагласува посветеноста на САД за одбрана на демократијата“.