Мајкл Помпео – Kurir.mk

Поранешниот американски државен секретар Мајкл Помпео денеска во Бугарија

Ивона Петрова — Wed, 31 Aug 2022 05:46:36 +0000

Поранешниот американски државен секретар Мајкл Помпео денеска пристигнува во посета на Бугарија, на покана на претседателот на Конфедерацијата на работодавачи и индустријалци во Бугарија Кирил Домусчиев. Како што јави дописникот на МИА од Софија, Помпео ќе одржи специјално предавање за геополитичкото значење на Бугарија. Главниот акцент во неговиот говор ќе биде на енергетската безбедност и состојбите на Балканот и во Црногорскиот регион. Помпео ќе зборува и за важноста на Бугарија во контекст на руската агресија во Украина и можностите што и ги дава на Бугарија да стане центар на енергетската независна политика во регионот и да биде негов лидер. Амбасадорот Џим О’Брајан, шеф на Канцеларијата за координација на санкции при Стејт департментот на САД, исто така се наоѓа во дводневна посета на Софија. Тој беше примен од претседателот на Бугарија Румен Радев. Бугарскиот претседател пред високо позиционираниот американски дипломат ја пофали поддршката што граѓанското општество во Бугарија ја доби според законот „Магнитски“ и ја истакна потребата од вистинска политичка волја за реформирање на правосудниот систем.Радев коментира дека бугарското обвинителство е тоа што треба да ги истражи санкционираните за корупција во Бугарија според законот Магнитски. -Реформата на правосудството во Бугарија ќе создаде квалитативно нова бизнис средина и ќе биде услов за привлекување стратешки инвестиции и ќе ја зајакне државноста, прокоментира Радев. О’Брајан ќе зборува на средба со Американската стопанска комора во Бугарија, како и со европскиот бизнис во земјата.

Помпео: Кина е поголема закана за САД од Русија

Ристе Здравков — Thu, 20 Sep 2018 09:40:18 +0000

Американскиот државен секретар Мајк Помпео смета дека Кина е поголема закана за САД од Русија. - Русија се однесува агресивно. Се обидува да се меша во нашите избори. Русија под раководство на Владимир Путин останува „силеџија“. Треба да и дадеме отпор и да ја задржиме каде и да стигнеме, изјави Помпео во интервју за телевизијата „Фокс њуз“, одговарајќи на прашањето од каде доаѓа најголемата закана, дали од Москва или од Пекинг. - Меѓутоа, во долгорочна перспектива, ако се гледаат заканите по начинот на живот на Американците, кои создаваат ризици за продолжување на економскиот раст на Америка, Кина е многу поголема закана, додаде државниот секретар. Претходно „Фокс Њуз“ јави дека Пентагон ги ставил Русија и Кина на списокот главни непријатели во својата стратегија за кибер безбедност. Според документот, САД се соочуваат со „неизбежни и неприфатливи закани штетни за кибер активноста" и се заглавени во „долгорочно стратешко ривалство со Кина и Русија".

Димитров на средба со Помпео во Стејт департментот

Ивана Ефремовски — Tue, 21 Aug 2018 07:11:08 +0000

Министерот за надворешни работи Никола Димитров денеска попладне во Стејт департментот на Соединетите Американски Држави ќе се сретне со американскиот државен секретар Мајкл Помпео. Средбата на Димитров со американскиот државен секретар Помпео е закажана за 14:00 по локално време. Димитров, како што соопшти МНР, покрај средбата со државниот секретар Помпео, предвидено е да се сретне и со високи претставници на американската администрација - Советот за национална безбедност, Стејт департментот, Конгресот, како и со претставници на невладини организации и други институции во Вашингтон. Шефот на македонската дипломатија синоќа оствари средби со претставници на Херитиџ Фондацијата и Школата за напредни меѓународни студии при Џонс Хопкинс Универзитетот. - „Искрен разговор во Херитиџ Фондацијата во Вашингтон и благодарност за нивната континуирана поддршка за членството на Македонија во НАТО“ и „Со мудри пријатели и чудата се возможни. Прекрасна средба со Мајкл Халцл, Ден Сервер и Едвард П. Џозеф. од Школата за напредни меѓународни студии при Џонс Хопкинс Универзитетот“, објави Димитров по средбите на својот Твитер профил. Димитров, од понеделникот до 22 август, престојува во работна посета на САД на покана на американскиот државен секретар Помпео. (МИА)

Димитров во Вашингтон на средба со Помпео

Ивона Петрова — Mon, 20 Aug 2018 08:31:43 +0000

Министерот за надворешни работи Никола Димитров, на покана на американскиот државен секретар Мајкл Помпео, од денеска до 22 август ќе престојува во работна посета на Соединетите Американски Држави.

Како што соопшти МНР, покрај средбата со државниот секретар Помпео, предвидени се средби на министерот Димитров со високи претставници на американската администрација - Советот за национална безбедност, Стејт департментот, Конгресот, како и со претставници на невладини организации и други институции во Вашингтон.