македонија – Kurir.mk

Пуштена во промет пругата од македонско-косовската граница до Косово Поле

Дарко Андоновски — Sat, 04 Nov 2023 19:15:10 +0000

Железничката линија од Генерал Јанковиќ, на косовската страна на границата со Северна Македонија, до Косово Поле, во близина на косовската престолнина, денеска беше отворена по подолго време, откако беа пуштени во употреба два тунели на трасата, јави дописникот на МИА од Приштина. На денешната церемонија по повод отворањето на пругата, косовскиот премиер Албин Курти го опиша настанот како еден од најважните за косовската инфраструктура и за поврзувањето на земјата со регионот. Двата тунели, кои беа срушени во косовската војна од 1998-99 година, се долги, едниот 262 метри, а другиот 122. Според Курти, со целокупниот проект за ревитализација на косовските железници се предвидуваат 13 нови мостови и седум тунели, „реконструирани според највисоките европски стандарди за железнички транспорт“. Во соопштението на Владата на Косово се наведува дека вредноста на работите во овој сегмент, од границата на Северна Македонија до Косово Поле, е над 164 милиони евра, додека над 200 милиони евра е планираната вредност за преостанатиот сегмент до Митровица и од Митровица до северната граница на Косово. Курти изрази благодарност до Европската унија, Европската инвестициска банка и Европската банка за обнова и развој, за поддршката на финансирањето и рехабилитацијата на оваа железничка пруга, „која граѓаните на Косово уште повеќе ќе ги доближи до Европската унија“. - Овој проект со години се соочуваше со многу предизвици и пречки. Тие се надминуваат благодарение на решителноста на раководителите, инженерите и работниците на Косовските железници – јавното претпријатие Инфракос, нашето Министерство за животна средина, просторно планирање и инфраструктура, Министерството за економија… и Министерството за финансии, труд и трансфери, изјави Курти. Тој додаде дека „железницата е многу важна инфраструктура која го поврзува Косово со регионот и со Европа и го отвора патот на раст и развој“. Министерката за економија, Артане Ризваноли рече дека штотуку отворената пруга нуди подобри можности за граѓаните и бизнисите, поевтин и побрз транспорт, додека министерот за животна средина, просторно планирање и инфраструктура Либурн Алиу изјави дека со оваа пруга Приштина се поврзува директно со Скопје и Солун.

Македонија и Грција одиграа нерешено

Тале Кристо — Fri, 03 Nov 2023 20:01:36 +0000

Македонската машка ракометна репрезентација ремизираше вечерва против Грција 29-29 (15-12), во првиот од двата контролни натпревари меѓу двете селекции закажани за денеска и утре во Солун. Избраниците на селекторот Кирил Лазаров влегоа во натпреварот со серија од 3-0 и го контролираа резултатот во првиот дел. Постојано беа во водство кое достигна највисоки +5 (11-6) во 19 минута, а на полувреме заминаа со предност од 15-12. Вториот дел донесе неизвесна завршница во која грчките ракометари влегоа во финишот со предност од 29-27, но Филип Кузмановски намали на гол негатива, а на три секунди пред последниот судиски свиреж прецизен беше и Никола Костески за конечни 29-29. Кумановски и Жарко Пешевски со по пет голови беа најефикасни во македонската репрезентација. Контролните натпревари во Солун се во рамки на подготовките за претстојното Европско првенство во јануари на кое пласман обезбедија и двете репрезентации.

НАЈМЛАДИОТ МИЛИОНЕР ЛАНИ ВО МАКЕДОНИЈА ИМАЛ САМО 9 ГОДИНИ – а еве во која дејност е земена најголемата плата на годишно ниво во износ од 195 илјади евра!

Дарко Андоновски — Tue, 31 Oct 2023 09:39:40 +0000

Најмладиот милионер во земјава има 9 години со еден милион денари од закупнина, додека највозрасниот има 97 години и лани остварил доход од 1,2 милиони денари, по однос на пензија и доход од извршена работа, информира денеска директорката на УЈП, Сања Лукаревска на прес-конференцијата на тема: „Годишна даночна пријава – Највисок доход во 2022 година“. Околу најмладото лице милионер во земјава, Лукаревска вели дека се работи по основ на некакво наследство и оттаму ги влече тие приходи. Лукаревската исто така обелодени дека најголемата месечна бруто плата во 2022 година била во дејноста трговија на големо со тутун и изнесувала 195.000 евра или околу 16.250 евра месечна бруто плата. Директорката на УЈП говореше и за полициската акција „Синџир“, при што повеќе бизнисмени се приведени. -За вакво кривично дело алармиравме заедно со МВР пред околу 2-3 месеци за одредена група даночни обврзници. Имаме соодветни дејствија преземено. За вчерашната акција за злосторничкото здружување на новоформирани компании кои сметководствено евидентирале фиктивен поврат, па со соодветни компензации го изиграле системот, станува збор за други даночни обврзници. Доставени се документи кои беа побарани од Управата за финансиска полиција. Ист е основот на некој начин. Во координација сме со институциите, рече Лукаревска.

На територија на Македонија за брзо возење казнети 198 лица

Тале Кристо — Fri, 27 Oct 2023 09:00:27 +0000

Во текот на вчерашниот ден (26.10.2023) Министерството за внатрешни работи спроведе засилена акциска контрола на територијата на Република Северна Македонија за санкционирање на возила кои се движат со брзина поголема од дозволената, при што санкционирани се 198 возачи. Од нив три возила се движеле со брзина над 50 километри на час повеќе од дозволеното. Притоа 109 возила ја пречекориле брзината во населено место, а 89 надвор од населено место. Сообраќајните контроли продолжуваат и во наредните денови. Апелираме до сите учесници во сообраќајот да ги почитуваат сообраќајните правила и прописи и заеднички да придонесеме за побезбедни патишта.

Постигната конечна инвестициска одлука за изградба на интерконекторот меѓу Грција и Македонија

Тале Кристо — Wed, 25 Oct 2023 11:46:59 +0000

Компаниите НОМАГАС од Северна Македонија и ДЕСФА од Грција постигнале конечна инвестициска одлука за интерконекторот за природен гас меѓу двете земји, а изградбата се очекува да започне на почетокот на следната година, соопшти извршната директорка на ДЕСФА Мариа Рита Гали, јави дописничката на МИА од Атина. Гали, говорејќи на конференцијата на Економист што се одржува во Грција, рече дека „меѓу важните проекти на компанијата е и новата рута за извоз со Северна Македонија“. -Вчера со нашиот партнер НОМАГАС постигнавме конечна инвестициска одлука, па така проектот сега и официјално подготвен и ќе ја започнеме изградбата на почетокот на следната година, откри извршната директорка на ДЕСФА и паралелно им се заблагодари на грчките институции и на амбасадата на САД во Грција за поддршката и напорите. Минатиот месец НОМАГАС и ДЕСФА потпишаа договорот за вршење на надзор над изградбата, а финансирањето на надзорот и административната поддршка за реализација на проектот е обезбедено преку програмата WBIF, со Договор за инвестициски грант потпишан со ЕИБ во висина од 2.475.00 евра. Од НОМАГАС тогаш соопштија дека тоа беше значаен чекор за побрзо започнување на изградбата на интерконекторот, со оглед дека изборот на надзор над градбата е услов за избор на изведувач. Интерконекторот за природен гас меѓу Северна Македонија и Грција предвидено е да биде во должина од 123 километри и да се протега од Неа Месимвриа кон Неготино преку Гевгелија и да ги поврзува двата национални системи за пренос на природен гас. Почетниот капацитет ќе биде 1,5 милијарди кубни метри годишно, со можност за проширување до 3 милијарди кубни метри годишно, а се спроведени и студии со цел гасоводот да има соодветни спецификации за транспорт на водород. Во октомври 2016 година беше потпишан Меморандумот за разбирање меѓу Националните енергетски ресурси (НЕР) на Северна Македонија и Националниот оператор за пренос на гас на Грција (ДЕСФА). Нешто помалку од пет години подоцна двете земји потпишаа договор на политичко ниво, а во октомври 2021 година извршните директори на двете компании го потпишаа договорот за соработка за развој и изградба на интерконекторот за природен гас меѓу двете земји. Проектот предвидено е да биде финализиран на средината на 2025 година.

Почна чистење на трасата на гасоводот Лесковац-Врање, кој треба да обезбеди интерконекција со Македонија

Тале Кристо — Wed, 25 Oct 2023 06:38:05 +0000

Фирмата „Милениум тим“ започна со истражни работи на проектот - чистење од експлозивни остатоци од војната на трасата на гасоводот Лесковац-Врање, кој треба да обезбеди интерконекција со гасоводниот систем на Северна Македонија, јави дописникот на МИА од Белград. Официјалниот проект го подготви Центарот за деминирање на Република Србија, чии претставници ќе ги контролираат сите работи на реализација на проектот, а во текот на истражното работење нема да биде причинета штета на сопствениците на парцелите соопшти Југпрес. Планот е да се изгради гасовод за јужна Србија, од Дољевац до македонската граница, кој ќе биде долг 146 километри и кој ќе обезбеди интерконекција со гасоводниот систем на Северна Македонија и предуслови за гасификација на градовите и општините во јужна Поморавље во Србија.

ЦУК: Во последното деноноќие имало 10 пожари на отворено

Тале Кристо — Sat, 21 Oct 2023 10:32:11 +0000

Во текот на вчерашниот ден, според извештаите во Секторот за операции и координација во Центарот за управување со кризи (ЦУК), во државата во последното деноноќие имало регистрирано вкупно 10 пожари на отворено, до утрово како активен се уште се води само еден. – Активен се води се уште пожарот што изби од 13:00 часот помеѓу селата Римница и Бибај, во месноста „Рибничка Планина“ во Општина Маврово – Ростуше, со којшто се зафатени високи пасишта, смреки, папрат, поедини стебла од бука, ела и шума.Заради напристпаноста за возилапожарникарите од ТППЕ Гостивар не интервенирале. Во можност биле само од Националниот парк „Маврово“ да интервенираат со 5 вработени. Пожарот е локализиран, но се уште има чад во внатрешноста. Лицата кои интервенирале се повлекле од терен во после 18:40 часот. Во утринските часови повторно екипите од националниот парк е планирано да извидат и да интервенираат на истиот тешкопристапен терен, информираат од ЦУК. Изгаснати биле девет пожари на отворено, во: – Општина Новаци, два пожара, во период од 14:00 до 14:40 часот, со едно ПП возило и три пожарникари интервенирале на запалена ниска вегетација во атарот на селата Лознани и Тополчани и од 15:15 до 18:55 часот, со едно ПП возило и три пожарникари интервенирале на запалена слама во с.Далбеговци; – Општина Могила, во период од 22:30 до 00:10 часот, со едно ПП возило и два пожарникара интервенирале на запалена ниска вегетација и стрниште во с.Ношпал; – Општина Прилеп, два пожара, од 14:35 до 15:15 часот, со четири пожарникари и две ПП возила интервенрале на запалена ниска вегетација на патот кон с.Селце и во период од 15:15 до 16:15 часот, со едно ПП возило и три пожарникари интервенирале на запалена ниска вегетација во атарот на с.Ерековци; – Општина Тетово, два пожара, 16:47 до 17:15 часот, со три пожарникари и едно ПП возило интервенирале на запалена ниска вегетација во нас.Малеадри и од 13:22 до 14:22 часот, со едно ПП возило и два пожарникара интервенирале на запалена ниска вегетација покарај ул. „Илинденска“; – Општина Велес, во период од 19:30 до 21:20 часот, со едно ПП возило и три пожарникари интервенирале на запалена ниска вегетација и стрниште на површина од два хектара во атарот на с.Мустафино; – Општина Дојран, пожарникарите од ТППЕ Гевгелија дека во период од 12:20 до 14:00 часот, со едно ПП возило и три пожарниакри заедно со Доброволно ПП друштво „Дојран“ со едно ПП возило и три пожарникари интервенирале на запалена ниска вегетација на површина од половина хектар во с.Фурка и во – Општина Гази Баба, пожарникарите од БППЗ на Град Скопје во период 19:15 до 21:00 часот, со едно ПП возило и три пожарникари интервенирале на запалени отпадоци на површина од половина хектар во с.Страчинци.

ВМРО-ДПМНЕ: ММФ прогнозира двоцифрена инфлација за Македонија, а Ковачевски дополнително зголемува цени

Тале Кристо — Thu, 19 Oct 2023 06:33:59 +0000

ММФ прогнозира двоцифрена инфлација за Македонија, а Ковачевски дополнително зголемува цени, велат во партиското соопштение од ВМРО-ДПМНЕ. Проекциите на ММФ се дека Македонија ќе ја заврши 2023 година со двоцифрена инфлација. Во моментот Македонија има за 50% поголема инфлација од Еврозоната. Бројките и фактите покаажуваат дека инфлацијата не е увезена, туку дека е во целост производ на неспособноста и криминогеноста на Ковачевски и Ахмети. И наместо власта да презема мерки за намалување на инфлацијата, Ковачевски го зголемува ДДВ за 1000 производи, а со тоа и цените на најголем број од основните прехранбени продукти, стои во соопштението на партијата.

Германски ФАЦ со насловна за Македонија: Корупција на Владата во име на ЕУ

Ивона Петрова — Thu, 19 Oct 2023 06:20:49 +0000

Познатиот германски весник „Франкфуртер алгемајне цајтунг“ за скандалот на Клиниката за Онкологија во статија пишува дека луѓето во Северна Македонија се навикнати на фактот дека корупцијата е постојано зло во нивната земја. -Но, она што скопскиот неделник „Фокус“ го откри во две опсежни извештаи во август беше скандалозно дури и за стандарди кои важат во државата. Според откритијата на магазинот, кои сега ги истражува судството, од најважната клиника за онкологија во земјава во Скопје очигледно систематски биле крадени скапи лекови за рак и биле продавани на црниот пазар. За таа цел биле измислени фиктивни пациенти преку кои се наплаќало лекувањето. Вистинските пациенти на државната клиника делумно се лекуваа со плацебо, а многумина умреа. Во други случаи, семејствата морале да купуваат лекови на црниот пазар иако според осигурителниот надоместок и планот за лекување би требало да се бесплатни за нив. Засега официјално пред се е осомничена медицинска сестра, каја ги прошверцувала медикаментите од болница. Но, таа не можела сама да делува. Сега земјата се прашува до каде нагоре стигнал синџирот на соучесници, макар и само преку информираност. Во времето кога се вели дека се случила гнасната измама, министерот за здравство бил близок политички доверлив човек на поранешниот премиер Зоран Заев, социјалдемократ кој во меѓувреме ја напушти политичката сцена и делува од позадина, пишува весникот. Во статијата се додава дека министерот за здравство поднел оставка заедно со Заев - пред јавно да се дознае за наводната измама. -Најновите откритија во Северна Македонија веројатно ќе го засилат трендот што веќе беше забележан претходно: оние кои треба да поминат важна медицинска процедура, би посегнале дури и кон своите последни заштеди или кредит за да се лекуваат во странство, отколку да го сторат тоа во домашниот здравствен систем. Не е невообичаено што медиумите, а не судството, ги собираа доказите за последниот скандал. На Балканот, критичкото новинарство се повеќе делува како замена или двигател на судството кое не сака или не е способно да ја казни корупцијата. Сè уште не е сигурно дали откритијата на неделникот се цврсти за пред суд. И тогаш не е сигурно дали ќе има обвиненија и пред се осуди во завршна инстанца, бидејќи политичкото влијание е силно во македонското судство. Освен овој конкретен случај, генерално може да се каже: дека ветувањето во 2017 година на македонските социјалдемократи кога ја презедоа власта дека ќе преземат решителна акција против корупцијата не се одржа. Во тоа време имаше чувство на оптимизам. Заев вети дека ќе го расчисти корумпираното наследство на Груевски, кој побегна. Сепак, тешко дека ќе најдете луѓе во Северна Македонија кои сметаат дека ова ветување е исполнето. Социјалдемократите, кои оттогаш се на власт, и нивниот коалициски партнер, кој е поддржан од албанското население во земјата, се преставуваат „проевропски“ и наводно ја потчинуваат својата политика целосно на целта за членство во ЕУ. Ова се случи неодамна во септември, кога владиното мнозинство истурка законски измени во парламентот со кои се намалија казните за злоупотреба на службената положба и се скратија роковите на застареност. Сомнителните измени беа досени преку итна постапка во парламентот затоа што тие биле наводно неопходни за приближување на земјата кон ЕУ. Претседателот Стево Пендаровски можеше да стави вето на законот, но веднаш ги потпиша законите. ЕУ се спротивстави да биде користена од Владата и претседателот во Северна Македонија како изговор за домашни политички махинации кои претставуваат чекор наназад во борбата против корупцијата. Портпаролката на Комисијата рече дека тие се „загрижени“ за влијанието на последните одлуки врз борбата против корупцијата, критикувајќи ги не само намалените казни, туку и скратениот рок на застареност, што влијае на многу тековни постапки. Портпаролката го критикуваше и фактот што законите се донесени набрзина без сеопфатна консултација и координација со ЕУ, повикувајќи се наводно поради потреба од усогласување со европските стандарди. Корупција во име на ЕУ – вака би можела да се сумира политиката на македонскиот премиер Димитар Ковачевски и неговиот тим. Поранешниот шеф на македонската дипломатија Никола Димитров, истакнува: “Сегашната влада го вее европското знаме за да го стори истото“, стои во текстот на „Франкфуртер алгемајне цајтунг“.

Погледнете ги македонските убавини низ детските очи: Анастасија ја претставува Македонија пред светот на најубавиот можен начин (ВИДЕО)

Ивана Ефремовски — Wed, 18 Oct 2023 13:31:12 +0000

Анастасија Анастасова со своето семејство живее во Хамбург, Германија. Но, Македонија живее во нејзиното срце. Ова девојче, кое следниот месец ќе наполни 11 години, имаше прекрасна идеја, за чија реализација се вложи максимално и затоа со гордост може да каже дека успеа. Нејзина мотивација се љубовта кон родната земја и убавините кои Македонија ги поседува. Не мислеше дека е доволно за тие убавини да знае само таа, па сакаше да ги сподели со светот. Бесценето е да ги погледнете македонските богатства низ детските очи бидејќи нема нешто поискрено од детските емоции. Токму тоа стана успехот на Анастасија. Оваа Македонка има свој канал на Јутјуб, кој го води на два јазика – германски и македонски. За да допре до срцата на сите, видеата имаат и англиски превод. Семејството е нејзина најголема поддршка, па тие заедно работат снимање и монтажа, вложуваат свои средства, но пред сè – многу љубов. Скопје, Прилеп, Струмица, Кавадарци, Кратово, Охрид се само дел од локациите каде Анастасија направи свои мини документарци. Пред снимање се подготвува со информации кои од срце им ги пренесува на сите што ја гледаат. Снима интервјуа со славни личности од Македонија, кои наидуваат на голем интерес од страна на публиката. КУРИР стапи во контакт со неа, поразговаравме за идејата која успешно ја реализира, за згоди и незгоди на снимањето, за идните планови... Кој работи – тој и греши, а Анастасија ни откри две слатки случки од приказните кои секое видео ги носи со себе. -До сега сум имала многу случки и грешки што се случувале на снимање. Нешто што можам да одвојам тоа е на Цоцев Камен со зборот “опсерваторија“ каде што ми требаше неколку пати да го извежбам и сепак не го погодив точно. Во градот Кавадарци кога снимавме, цело време го кажував град Кратово и мораше повторно и повторно да се снима. Секое видео си има своја приказна позади себе интересна, ни кажа таа. Иако живее далеку, со мислите често е тука. Спомените за делови од Македонија биле избледени бидејќи кога за прв пат ги видела тие убавини, била уште мала. Затоа ја носи одлуката да се врати на тие места, па не само тоа, туку таму да направи видео кое секогаш ќе биде добар потсетник и промоција. -Нешто што најмногу сум горда е тоа што сите желби и идеи што сме ги замислиле со моите родители и сме се договарале ни се исполниле. Можеби имаме еден/два проекта што не ни се исполниле и реализирале. Најмногу се радувам на тоа што Македонија ја шетаме и запознаваме од почеток бидејќи кога ме шетале моите родители порано јас бев многу мала и не се сеќавам, вели Анастасија. Малиот професионалец веќе прави идни планови за проекти. Има желба да снима низ Аеродром, а следна цел е промоција на волшебното место - Свети Јован Бигорски. -Имав една идеја, но не ми е реализирана ќе видиме како ќе одговорат на мојата желба. Тоа е да се сретнам со нашиот Bürgermeister во превод градоначалник на мојата населба Аеродром каде што живеев. Мојата идеја е да прошетаме низ Детската улица каде што проодев, да ја видиме мојата градинка „Буба Мара“ каде што имам се уште убави спомени од таму и да се прошетаме низ паркот со авиончето. Сакам сите мои другарчиња од Германија да го видат моето детство како изгледало. Но ќе видиме за тоа. Инаку следен проект е да го посетиме Свети Јован Бигорски и ќе ја имам честа да снимиме едно прекрасно видео, истакна таа. Има и една порака до сите: „Ве замолувам сите да го заследите којот Youtube канал, тоа е бесплатно, а со тоа ми ја давате вашата поддршка да продолжам понатака“. Ова дете со неговата љубов кон Македонија може да биде пример и за возрасните. Во продолжение уживајте во дел од прекрасните видеа: