македонија2025 – Kurir.mk

Македонија2025 во соработка со Ivey Business School од Онтарио

Ивона Петрова — Mon, 29 May 2023 12:54:12 +0000

Македонија2025 во соработка со Ivey Business School од Онтарио, Канада го организираше 15-то издание на ЛИДЕР Проектот, програма која е насочена кон младите претприемачи и развој на нивните бизниси и бизнис идеи. Обуката се состоеше од десетдневна интензивна бизнис програма дизајнирана според програмата за специјалистички и магистерски студии (МБА) на универзитетот „Western University” од Канада. Обуката вклучува пренесување на широк распон на знаења како подготовка и оценување на изводливост на бизнис план, развивање стратегии, брендирање на производ, маркетинг, финансирање, управување со човечки ресурси итн. Истатa се изведува практично, преку интерактивна анализа на уникатни студии на случај и развој на сопствени бизнис планови, со можност за дополнително индивидуално менторство. На обуката, Македонија2025 обезбеди и предавачи од својата мрежа, кои дополнително ја збогатија програмата и пренесоа свои искуства од областите на нивното работење (Виктор Мизо – член на Одборот на директори на Македонија2025 и извршен директор во КОСТАЛ; и Александар Целески, член на Клубот на амбасадори на Македонија2025 и извршен директор на ДУЕЛ консалтинг). Оваа година, 26 лица учествуваа на обуката која, традиционално, завршува со натпревар и претставување на бизнис идеите на последниот ден од обуката пред жири комисија која е составена од различни профили на професионалци, меѓу кои претставници кои претходно ја поминале ЛИДЕР обуката, лица на високи менаџерски позиции, претставници од тренерите, од Македонија2025 итн. Оваа година, најдобра бизнис идеја имаше Тамара Димитрова, која ја презентираше Импала – платформа која е дизајнирана да им помогне на компаниите да го следат и да влијаат на однесувањето на купувачите и согласно наодите да ги развиваат своите решенија. За втора најдобра презентација беше избрана Катарина Тасевски, со бизнис идеја за дополнителен развој на „Тото дејли“ – франшиза која е помеѓу попознатите во Скопје, а која се бави со приготвување на свежа храна и кетеринг услуги. Третото место го поделија двајца учесници, Надица Ѓоргиева со “Chia Dia” – напитоци на база на чија семе, кои се први од овој вид во регионот; и Даниел Цуннингхам (Daniel Cunningham) со “eLearning Solutions” – консултативни услуги за насочена и стручна обука за развој и надградба на вештините на вработените во компании, согласно потребите и спецификите на дејноста. Победниците ќе добијат индивидуално менторство од страна на експерти од мрежата на Македонија2025. Секако, и останатите учесници, но и сите компании во Македонија, може да ја искористат платформата на Македонија2025 connect2mk, која има за цел да обезбеди менторство за македонските компании преку нивно поврзување со експерти од дијаспората.

Самит на Македонија 2025 – Просперитетни економии преку општествена трансформација, дигитализација и стратешко лидерство

Ивона Петрова — Thu, 30 Mar 2023 14:14:08 +0000

Дигитална трансформација, зајакнување на претприемничките капацитети, иновации во функција на поголема конкурентност, холистички пристап преку примена на ESG (environment, society, governance) стандардите, се дел од темите кои ќе бидат во фокусот на годинешниот Самит на Македонија 2025. На овој престижен регионален настан кој претставува платформа за споделување знаење, поврзување и поттикнување промени во регионот, ќе присуствуваат повеќе од 40 говорници, врвни експерти во својата област. На Самитот ќе се разговара за регионални и глобални теми, меѓу кои се и стратешкото лидерство и ChatGPT. Дел од панелите ќе бидат посветени и на значењето на СТЕМ образованието во процесот на градење на просперитетна економија која напредува со иновации и креативност, како и на трендовите за здрав живот и навики. Самитот ќе се одржи во Скопје на 26 и 27 април годинава и се очекуваат околу 400 учесници, кои освен што ќе ги слушнат излагањата на панелистите, ќе имаат и уникатна можност за вмрежување со исклучителни професионалци и остварување на нови партнерства и соработка со потенцијални инвеститори. Во насока на унапредување на овој сегмент, Македонија 2025 има подготвено платформа за просперитетна иднина, која нуди основа за обединување на сите засегнати страни и усогласеност на клучните приоритети за долгорочен развој и за подобра иднина на Македонија и на регионот. Дел од говорниците на Самитот ќе бидат: Димитар Ковачевски, претседател на Владата на Република С. Македонија, Роберт Доар, претседател на Американскиот институт за претпријатија, Кетеван Бочоришвили, поранешен заменик министер за економија и одржлив развој на Грузија и управен партнер на „Бизнис Грузија“, Кам Бакнер, претставник на државата Илиноис, поранешен кандидат за градоначалник на Чикаго, Тед Саудер, поранешен член на менаџментот на Google, Никола Јуришиќ, основач и управен партнер во Transfiguration Advisory, Иван Артуковиќ, извршен директор на Франк, Живко Мукаетов, извршен директор и претседател на Управниот одбор во Алкалоид, Вал Јусуфи, извршен директор на Институтот ЛЕОРОН, Бранко Станчев, главен комерцијален директор во Македонски Телеком АД, Гурудут Банавар, научен и технолошки иноватор, претприемач, инвеститор и хуманист, Сурав Синха, партнер и раководител за стратегија во Longevity Vision Fund, Никола Велковски, ко-основач и извршен директор на Howitzer и многу други истакнати личности во повеќе области. Повеќе информации за учество на Самитот се достапни на официјалната веб-страница: https://www.macedonia2025.com/summit/. Пред официјалниот почеток на Самитот, на 25 април 2023, Македонија 2025 ќе организира и неколку дополнителни активности во соработка со претседателот на Република С. Македонија и Стопанската Комора на Северна Македонија. Самитот на Македонија 2025 годинава се одржува по 12-ти пат, а го организира меѓународната невладина организација Македонија 2025, чија главна мисија е креирање и унапредување на динамична платформа за споделување на знаења од областа на бизнисот, економијата, технологијата, лидерството и иновациите, во насока на поттикнување на економски развој и одржливост.

Македонија2025 објави именување на три нови членови на Одборот на директори

Ивана Ефремовски — Mon, 15 Aug 2022 12:10:58 +0000

Македонија2025 денеска објави именување на три нови членови на Oдборот на директори, со што бројот на членови се зголеми на осумнаесет. Одборот на директори на Македонија2025 им посака добредојде на: Aсс. Проф. Венера Крлиу Ханџиски, заменик извршен директор, главен оперативен директор, Потпретседател на Одборот на директори и Проректор за образование на Универзитетот Американ Колеџ Скопје. Г-дин Ѓорѓе Војновиќ, извршен директор на Триглав Осигурување АД, Скопје, Претседател на Здружението на финансиски организации при Стопанската комора, поранешен професионален кошаркар. Г-дин Радош Вукиќевиќ, генерален директор на винаријата Тиквеш. „Овие импресивни лидери ја прошируваат широчината и длабочината на нашата способност и знаење како организација и знам дека секој од нив лично ќе придонесе за да помогне во остварувањето на нашата мисија и влијание“, рече Мајкл Чкламовски, Претседавач на Одборот на директори на Македонија2025.

Самит Македонија2025: Дигитализацијата, регионалната соработка и вложувањето во иновации клучни за закрепнување на економијата

Тале Кристо — Wed, 18 May 2022 17:43:15 +0000

Забрзана дигитална трансформација, регионалната соработка и иновациите се фокусот на годинешниот самит Македонија2025. Денес, во рамките на 11-то издание на овој Самит, претставници на бизнис заедницата, од земјата и регионот, претставници на влади и институции, како и интернационални организации дискутираа за дигитализацијата низ призма на администрацијата, компаниите и човечките ресурси. Покрај тоа, беа споделени успешни примери и искуства за дигитална трансформација. Лидерите од бизнисот и спортот во земјава ги пренесоа визиите за успех и развој. -Годинешниот Самит покрива неколку главни теми кои се вкрстени преку призмата на дигитализацијата и напредните технологии. Зборуваме за тројството администрација - компании - работна сила. Разменуваме и анализираме примери на успешни компании од различна големина и успешни лидери од различни области. Посебен фокус е ставен на жените и развојот на нивните кариери. Во ера на глобализација сите имаат шанса ако се посветени. Се покажа дека малите земји можат да водат и да бидат лидери во иновациите и во технолошкиот развој кој ќе придонесе до брз раст. Важно е да го забрзаме напредокот во реформите и да придонесеме кон повисок животен стандард со засилена акција, изјави во своето поздравно обраќање извршната директорка на Македонија 2025 Никица Мојсоска Блажевска. На важноста за заеднички придонес во развојот на општеството се осврна и еден од основачите на Македонија 2025, Џон Битов: “Македонија 2025 е посветена на поддржување на заедничките интереси и ги промовира обединувачките идеи преку развојот на економијата, со можности за обуки и пренос на знаења, притоа истакнувајќи ја важноста на владеењето на правото. Нашата мисија е да го поддржиме напредокот на општествата во регионот.” Регионалната соработка како механизам за надминување на економските предизвици кои влијаат врз развојот на државите, како и врз бизнисите беше една од централните теми на првиот ден на Самитот. Мајк Зафировски како основач и член на Одборот на директори на Македонија 2025 ги истакна заклучоците од извештајот на Светска Банка во кои за Западниот Балкан е нотирано дека закрепнување на економиите може да се случи преку структурни реформи, отчетност на институциите, рационално трошење на јавните средства и вложување во дигитализацијата, што е можно преку поголема регионална соработка. На официјалното отворање на Самитот Македонија 2025, македонскиот премиер Димитар Ковачевски, и српската премиерка Ана Брнабиќ ја потенцираа важноста на регионалната соработка за надминување на економските и геополитички предизвици, како и неопходноста од градење партнерства со следење на позитивните примери за развој на регионот. Дел од темите на кои дискутираа двајцата премиери беа и дигитализацијата, инвестирањето во иновациите и технолошкиот развој кои придонесуваат кон одржлив економски раст. Македонија 2025 ја иницираше и Платформата за просперитетна иднина, која се базира врз 7 клучни области - образование и човечки капитал, конкурентност и водење бизнис, владеење на правото и борба против корупцијата, демократско општество, животна средина, јавно управување, дигитализација и дигитални вештини. Оваа платформа нуди и алатка за мерење на напредокот на земјата во овие области со цел напредок во економскиот раст и развој. На првиот ден на самитот говорниците, дискутираа на неколку значајни теми како, дигитализација и трансформација на бизнисите и промовирање на успешни лидери во бизнисот и спортот. Во текот на утрешниот ден, акцент на самитот ќе биде ставен на женското претприемништво и „блок-чејн“ технологиите. Македонија 2025 е посветена на промовирање успех и интегритет, поддршка на младите, поддршка на бизнисите и поттикнување на економскиот раст. Од основањето, па досега, Македонија 2025 имплементираше програми за економски развој во вредност од 3,5 милиони долари. Дополнително на тоа, во сегментот на образование и лидерство, донирани се 1,6 милиони долари, а во овие програми досега беа вклучени над 650 менаџери, претприемачи и млади таленти од Македонија. Самитот Македонија 2025 ги обединува водечките компании, бизнис лидери, општествени чинители и институции во промовирање на успешни примери кои придонесуваат кон одржливи иницијативи и раст и развој. Инаку, Македонија2025 е меѓународна, независна, непартиска, непрофитна организација. Остануваме посветени на нашата мисија да помогнеме во создавањето на просперитетна економска клима во земјата и „посилна нација”, која ќе ги подобри можностите за граѓаните, компаниите и странските инвеститори. Промовираме одржлив економски раст преку поттикнување на конкурентноста, претприемништвото, иновациите и лидерството базирано на вредности.

Самит на Македонија2025 во Скопје

Ивона Петрова — Wed, 18 May 2022 05:19:22 +0000

Невладината „Македонија2025“ денеска и утре во Скопје ќе го одржи 11-тиот Самит на кој ќе се обратат околу 40 говорници меѓу кои и премиерот Димитар Ковачевски и неговата српска колешка Ана Брнабиќ кои ќе учествуваат на панелот „Градење на просперитетна иднина: Улогата на регионалната соработка“. Според организаторот, фокусот на Самитот ќе биде кон се она што може да се направи за да се избегнат кризите и да станеме попродуктивни и со тоа да се подобри животниот стандард на граѓаните и деловното опкружување за бизнисите. -Самитот почнува со економски теми и со разгледување на тековните проблеми и она што се случува во Западен Балкан, а потоа ќе поминеме на темите за кои мислиме дека ќе донесат подобра иднина. Сакаме да покажеме и успешни приказни од бизниси од Македонија и од регионот. Очекуваме околу 40 говорници и околу 400 гости. Главната тема на самитот е поврзана со дигитализацијата и технологиите и како тие носат кон компании, работна сила и администрација на иднината, односно како може да помогнат да станеме поефикасни и попродуктивни и да се подобри животниот стандард, изјави Никица Мојсоска Блажевски, главен извршен директор на „Македонија2025“. И годинава, на самитот ќе учествуваат креатори на политики, лидери на компании, членови на дипломатскиот кор и на меѓународни организации и претставници на академската и граѓанската заедница. Ќе доминираат говорници од Западен Балкан и Југоисточна Европа, како и претставници од македонската дијаспора, главно од САД и Канада. На Самитот ќе се дискутираат актуелни теми, како што се дигитализацијата, развојот на технологијата, важноста на лидерството, градењето на глобални брендови, дигиталните општества, работните места и човечкиот капитал, како и „блок-чеин“ технологиите.

Почнува 8. самит „Македонија 2025“

Ивона Петрова — Wed, 13 Nov 2019 06:34:47 +0000

Во Скопје од денеска до петок ќе се одржи осмото издание на самитот „Македонија 2025“, водечка регионална платформа за споделување знаења, поврзување бизниси и инспирирање промена во Југоисточна Европа. На тридневната програма на самитот се 10 панел-дискусии и засебни тематски сесии, на кои се најавени 50-тина говорници од државава и странство. Во фокусот на самитот се иновациите и нивното влијание во заштитата на животната средина, иднината на работните места и вештините. Најавени се дискусии и за глобалните економски и геополитички трендови, можностите за финансирање мали и средни претпријатија, семејните бизниси, успешните македонски дигитални платформ-компании…