македонска машка одбојкарска репрезентација – Kurir.mk

Владо Милев: Нема што да загубиме со Италија, ќе уживаме во тој историски момент

Бошко Тасиќ — Fri, 08 Sep 2023 05:17:10 +0000

Македонската машка одбојкарска репрезентација по пристигнувањето во Бари ја очекуваат два дена подготовка пред осминафиналниот натпревар со домаќинот Италија на Европското првенство 2023. Македонија ја исполна целта со пласманот меѓу најдобрите 16 селекции на Стариот континент, но одбојкарите велат дека имаат мотив во себе да го прикажат најдоброто во еден спектакл во Бари во сабота од 18 часот.

„Се уште сме навистина возбудени со пласманот во елиминациската фаза на Европското првенство. За нас секако е успех местото во 16 најдобри во Европа. Сега не чека осминафиналето со Италија која е една од најдобрите светски селекции, го чекаме мечот со нетрпение затоа што овој натпревар треба да биде круна на нашите репрезентативни кариери“ изјави Владо Милев по пристигнувањето во Бари, и дополнува:

„Мислам дека не може којзнае што да очекуваме од мечот со Италија кој е и најголемиот фаворит за освојување на европската титула. Но, и нема што да загубиме. Затоа наше е да излеземе на терен, мотивацијата да биде на највисоко ниво кога се игра против еден ваков противник и да уживаме во мечот“.

Македонските одбојкари пристигнаа во Бари

Бошко Тасиќ — Thu, 07 Sep 2023 17:38:10 +0000

Македонските одбојкари пристигнаа во Бари, каде в недела против Италија не очекува историското осминафинале на европските првенства. По победите над Данска и Црна Гора во Скопје и освоеното 4. место во групата „Ц“, нашите најдобри одбојкари сега ги очекува најголемиот предизвик на ова ЕП, дуел со актуелниот светски и европски шампион и тоа на гостински терен. Одбојкарите по неколку часовен лет пристигнаа во Бари, каде веќе утре ќе ги имаат официјалните тренинзи пред саботниот дуел со „аѕурите“ закажан од 18 часот.

Миленковски: Без Ѓорѓиев во составот е исто како без Лазаров во ракомет

Бошко Тасиќ — Tue, 05 Sep 2023 17:27:55 +0000

Селекторот на Македонија, Јошко Миленковски, по натпреварот против Холандија и поразот од 0-3 во сетови говореше за играта на „црвено-жолтите“ и дуелот со еден од фаворитите во нашата група на ЕП 2023. Предводникот на најдобрата селекција по вториот пораз на континенталниот собир кажа дека повредата на капитенот Никола Ѓорѓиев го разнишала тимот и дека недостасувале неговите поени на дуелот со „лалињата“. „Штета што немавме време малку да ја вежбаме оваа формација, но повредата на Никола дојде изненадувачки. Самодовербата ни беше разнишана, ненадоместиво е вакво неиграње. Ако на холандскиот состав не им е Нимир, ќе им биде тешко. Денес одигра цел натпревар против нас, а претходно редовно беше ротиран. Не сакам да го форсираме Никола, ако не може - нема да игра и со Чешка. Треба да го сочуваme за натпреварот во Бари. Околу нокаут-фазата, Италија или Србија нема голема разлика во елиминационата фаза. Италијанската репрезентација пред 10.000 гледачи е голем предизвик. Ако играме со европскиот и светскиот првак задоволство ќе биде да се игра. И против Србија е слично, тие се поранешни шампиони и имаат неспорен квалитет. Да им се извиниме на гледачите, но играме против најдобрите селекции во светот и Полска и Холандија не се исто како Данска и Црна Гора. Денес и Лука Костиќ и Стојан Илиев добија свои минути. Го имаме најмладиот одбојкар на првенството, Тоше Ефремов, кој е „бисер“ и кој верувам ќе биде лидер на нашата селекција во иднина. Денес пробавме да играме без Никола, утре имаме уште еден тренинг и пак ќе ги пробаме ротациите. Нашиот спорт е специфичен, не е лесно да се игра на туѓа позиција. Мора да имаме шема како треба да стојат одбојкарите за да не ги нарушат правилата на играта. Тоа гледачите не можат да го забележат, но без тоа внимание можеме да направиме техничка грешка и судиите да ни изречат казна. Најдобра варијанта е Никола Ѓорѓиев да е здрав и да игра. Неговите поени не се малку, тоа е како да фали Кире Лазаров на нашата репрезентација во ракомет“, изјави Јошко Миленковски. Одлучувачкиот натпревар за подобар пласман е дуелот против Чешка утре од 20:00 часот.

Прв пораз на македонските одбојкари на ЕП

Бошко Тасиќ — Sun, 03 Sep 2023 19:50:46 +0000

Уште пред да почне мечот се знаеше кој е кој во овој дуел, Полјаците се апсолутен фаворит, а нашата цел беше да им парираме колку што можеме подобро. Во првиот сет не успеавме, беше 9-9 кога нашите одбојкари се укочија, Полска почна да доминира, и го доби сетот со неверојатни 25-12. Вториот сет беше многу поинаков, се држевме до самиот крај беше 21-21. Полска имаше подобар финиш на сетот, ги освои следните четири поени и го доби сетот со 25-21. Третиот сет беше сличен на првиот, се држевме до 9-9, потоа Полска се одлепи и на крајот го доби сетот со 25-14. Најдобар поентер во нашиот табор и на овој меч беше капитенот Никола Ѓоргиев со 12 поени. Ова беше очекуван пораз на македонската репрезентација, следниот натпревар е во вторник кога играме против Холандија со почеток од 17 часот.

Македонските одбојкари со лекција за Црногорците и чекор поблиску до осминафиналето на ЕП

Бошко Тасиќ — Sat, 02 Sep 2023 19:36:00 +0000

Македонските одбојкари ја забележаа и втората победа на својот втор меч на Европското првенство во Скопје, лесно и убедливо декласирајќи ја Црна Гора со максимални 3-0. Растоварени без притисокот од оној прв меч против Данска, нашите репрезентативци одиграа одличен меч, максимално тактички подготвени од селекторот Миленкоски и во ниту еден момент не му дозволија на противникот да се понадева на изненадување во Скопје. Двете победи на стартот (со 3-1 и 3-0 во сетови) значат и речиси математички пласман во следната фаза од европскиот шампионат, прв ваков подвиг на Македонија на третото учество на одбојкарските ЕП. Први два натпревара и две победи, над Данска и над Црна Гора, за извонреден старт на шампионатот пред дуелите со Полска, Холандија и со Чешка, со кои ќе се бориме за што подобро место во групата во пресрет на нокаут фазата во Бари. Брилијантен меч имаше Филип Савовски кој имаше дури девет блока, мечот го заврши со 12 поени. Најефикасен беше Никола Ѓорѓиев со 20 поени, Љафтов имаше 13. Македонија во рамките од третото коло утре со почеток во 20 часот ќе се сретне со фаворитот во групата, селекцијата на Полска.

Миленкоски: Црна Гора е добро простудирана, само да реализираме на терен!

Бошко Тасиќ — Fri, 01 Sep 2023 17:17:10 +0000

Селекторот на машката одбојкарска репрезентација Јошко Миленкоски изјави дека триумфот над Данска ја подобрил атмосферата и на терен и надвор од него, па и подготвувањето оди подобро. Сега овој меч е најважен за нас, бидејќи може и математички да го расчисти патот кон осминафиналето. „Присутно е задоволството од првиот натпревар и постигнатата победа. Тоа ни дава некоја атмосфера и на тренинзите и во хотел. Важна беше таа победа, но беше само прв чекор, ние се подготвуваме за вториот, натпревар кој ќе ни ги отвори вратите на вториот круг. Меѓутоа се гледа и од денешниот меч Данска - Чешка дека е неизвесно и сигурно дека ќе има неизвесни мечеви до крајот на групната фаза. Она што е сигурно дека ние сме на вистинскиот пат. Очекуваме полна поддршка и на натпреварот со Црна Гора, тука ќе биде клучот, се надевам дека и по тој натпревар ќе бидеме добро расположени, па да се подготвуваме растоварено за тие врвни екипи кои не очекуваат“, вели Миленкоски. Црна Гора е познат противник, нашиот стручен штаб имаше можност да ја скенира и вчера, при поразот од Холандија, па не е ставена во прашање тактичката подготовка. „Имаме добра стратегија, добро ги анализираме сите противници. Мислам дека сме многу искусни во тој дел, имаме добри аналитичари и не е спорно дека добро ќе го подготвиме натпреварот, останува само тоа да се реализира на терен. Играчите се навистина искусни, ова им е трето ЕП, интернационалци се, во најзрелите години, секој си ја знае својата задача. Во тој дел сме перфектни“, додава Миленкоски.

Миленковски: Еуфоријата може да биде погубна, со ладни глави да ја дочекаме средбата со Црна Гора

Бошко Тасиќ — Thu, 31 Aug 2023 04:01:20 +0000

По победата над Данска, селекторот на машаката однојкарска репрезентација Јошко Миленковски беше задоволен од прикажаното. Тој посочи на грешки, меѓутоа ги повика играчите да не бидат еуфорични и да се спуштат на земја. „Ова беше еден возбудлив натпревар. Ги молам сите без еуфорија, не очекува тешка борба на сите следни мечеви. Вакви дуели се играат тешко, во Европските лиги и Купови, тешко е да се надмине возбудата. Секој поен беше за инфаркт, беше навистина тешко да се издржи. И покрај големото искуство, треперев бидејќи имаме мисија да се пласираме во втор круг. Сите сме професионалци, на добар пат сме, ова беше пресуден натпревар. Со Црна Гора ќе биде исто така тешко. Треба добра анализа и подготовка. Ако дојдеме до ситуација да ја победиме, до крајот на турнирот ќе можеме да играме растеретено против големите репрезентации. Денес правевме невообичаени грешки, а тоа беше поради притисокот. Изгубивме лесни поени, но потполно ги разбирам играчите. Навистина ова беше натпревар со големи емоции. Против Црна Гора можеме да ја добиеме оваа селекција, тоа е селекција на нивото на Данска. Се работи за подмладена репрезентација, полетна која сака да се претстави најдобро. Не смее да завладее еуфорија кај нас. Мора да се спуштиме на земја и чекор по чекор со ладни глави да одиме понатаму во следните предизвици“, изјави Миленковски. Следен ривал во групата е Црна Гора, натпревар кој е закажан за в сабота. foto: gol.mk

Ѓоргиев: Трпението не однесе до голема победа

Бошко Тасиќ — Thu, 31 Aug 2023 03:57:01 +0000

Никола Ѓоргиев е вистински капитен и лидер на репрезентацијата доле на теренот, па како предводник на „спартанците“ беше првиот кој се огласи по големиот и историскиит триумф на Европското првенство кое се игра во Скопје.Македонија ја надигра Данска и со пресврт славеше со 3:1, што е прв голем исчекор кон остварување на целта, а тоа е пласман во нокаут фазата на континенталниот турнир.

– Голема благодарност до сите, овие момци денеска покажаа од што се направени и колку вредат. Беше тешко, но уште кога го загубивме првиот сет, побарав од играчите да останат мирни. Денеска победивме поради тоа што бевме трпеливи во најважните моменти. Благодарен сум на навивачите кои дојдоа да не бодрат и се надевам дека на наредниот ќе има уште повеќе, – изјави капитенот.

Македонија во второто коло има ривал по мерка, бидејќи втор предизвик за „спартанците“ ќе биде селекцијата на Црна Гора, против која влегуваме како фаворити за победа. – Имавме тежок натпревар, не беше лесно и се исцрпивме на физички и психички план. Сега најважно е да одмориме, а потоа ќе мислиме за Црна Гора. Да бидам искрен, не знам ништо за Црна Гора, од утре ќе анализираме и ќе имаме добра подготовка за тој дуел, – дополни капитенот. foto: ekipa.mk

Љафтов: Одлучи душата, одлучи желбата

Бошко Тасиќ — Thu, 31 Aug 2023 03:54:00 +0000

Љафтов не ги криеше емоциите, тој нагласи дека одличната атмосфера, решителноста на тимот и химната која му ги насолзила очите, биле само дополнителен мотив од оној натпреварувачкиот. „Натпреварот го реши душата, срцето и Македонија. Решителноста ја краси оваа репрезентација отсекогаш, па статистиката е во втор план. Одлучи душата, атмосферата во салата и химната од која ми се насолзија очите. Одиме на ист начин против Црна Гора. Можеме подобро, имавме денес и грешки во повеќе сегменти. Мора да ги надминеме негативните страни, меѓутоа, ете, нека имаме и повеќе грешки, ама да ги победиме Црногорците. Сега е потребно емоциите да слегнат, бидејќи в сабота ни следи уште еден навистина тежок натпревар“, изјави Љафтов. Избраниците на Јошко Миленковски се слободни в четврток и петок, а веќе в сабота следи уште еден клучен меч, со Црна Гора. foto: gol.mk

Одбојкарите ги почнуваат финалните подготовки за Европското првенство

Бошко Тасиќ — Wed, 23 Aug 2023 04:18:44 +0000

Македонската машка одбојкарска репрезентација по еднодневната пауза по учеството на Меморијалот „Чајка“ од стартуваат со финалните подготовки во СЦ „Борис Трајковски“ за настапот на Европското првенство кое од 30. август стартува во Скопје. За избраниците на селекторот Јошко Миленкоски следи фналната подготвителна фаза по одигрувањето на тест натпреварите.

„Може да искажам задоволство од досегашниот тек на подготовките. Го реализиравме тоа што го планиравме, секако утврдени се одредени недостатоци кои ќе мора да ги корегираме. Имаме доволно време до почетокот на шампионатот, и мислам дека максимално подготвени ќе го дочекаме Европското првенство“ изјави селекторот Миленковски.

На тренинзите од денеска се враќа и повредениот Филип Маџинков кој ја санираше повредата на коленото. Првиот натпревар на Европското првенство Македонија го игра против Данска на 30. август. Данците наредниве денови ќе одиграат четири контролни натпревари на турнир во Хрватска.