македонска женска ракометна репрезентација – Kurir.mk

Македонските ракометарки го прегазија Азербејџан

Бошко Тасиќ — Thu, 12 Oct 2023 04:20:33 +0000

Македонската женска ракометна репрезентација со 40-17 славеше против Азербејџан на почетокот на квалификациите за Европското првенство (ЕП). Нашите ракометарки играа одлично на теренот и првиот гол го примија дури во деветтата минута (1-9), по што до полувреме стигнаа до убедливи 23-10. Во второто полувреме селекторот Кристијан Грчевски им даде шанса на сите ракометарки, а водството достигна до 40-17. Најефикасни беа Јована Саздовска и Андреа Седлоска со по седум гола. Македонија во следното коло игра против Литванија в недела.

Селекторот Грчевски го објави поширокиот список за евро-квалификациите (ФОТО)

Бошко Тасиќ — Thu, 28 Sep 2023 17:02:44 +0000

Селекторот на женската репрезентација, Кристијан Грчевски, го објави поширокиот список на ракометарки кои ќе бидат на располагање за квалификациите за пласман на Европското првенство во 2024 година. Следниот континентален собир ќе се одржи во Австрија, Унгарија и Швајцарија, а нашите ракометарки се наоѓаат во петтата квалификациска група, заедно со Шпанија, Азербејџан и Литванија.

Репрезентацијата во ракомет на плажа замина на ЕП во Португалија

Бошко Тасиќ — Wed, 24 May 2023 06:57:51 +0000

Женската ракометна репрезентација на Македонија во ракомет на плажа замина за Португалија, каде почнува со настапи на Европското првенство. Девојките предводени од селекторот Златко Мојсоски ги очекуваат првите возбудувања во рамките на групата „Б“ каде за ривали ги имаме домашната селекција на Португалија, како и репрезентациите на Холандија и Украина. Првиот меч за нашите девојки го играат против селекцијата на Украина во 11 часот, а подоцна во текот на денот ќе го одиграме и вториот меч во групата против Холандија. Во четврток ќе го имаме и последниот меч од 3. коло против домаќинот на првенството, Португалија.

Македонија од вториот шешир ќе ги чека ривалите за квалификациите за ЕП 2024

Бошко Тасиќ — Fri, 14 Apr 2023 15:41:28 +0000

Европската ракометна федерација (ЕХФ) ги откри шеширите по кои ќе се одвива ждрепката за квалификациите за следното Европско првенство во ракомет за жени во 2024 година. Репрезентацијата на Македонија ждрепката ќе ја пречека од вториот шешир, каде уште се и селекциите на Романија, Србија, Словенија, Полска, Чешка, Словачка и Исланд. Фаворитска улога, односно место во првиот шешир имаше за најдобрите европски селекции, додека во третиот има незгодни селекции како Украина, Португалија, Грција, Турција. Место на Европското првенство ќе обезбедат првите две селекции од секоја група, како и четири најдобри третопласирани селекции. Ждрепката за квалификациските групи е закажана за на 20 април во Цирих со почеток во 17:00 часот.

Ништо од ракометен мундијал: Украинките подобри од Македонија

Бошко Тасиќ — Tue, 11 Apr 2023 19:30:42 +0000

Најсилната женска ракометна репрезентација претрпе и втор пораз од селекцијта на Украина, а овој денеска во Унгарија беше далеку поубедлив со 31-22 и само јасно стави до знаење дека во моментов немаме сили за да настапуваме на Светско првенство. По поразот на домашен терен кој го ублаживме со извонредно второ полувреме, Љубомир Савевски веруваше дека неговите ракометарки ќе повторат таква игра во сите 60 минути во Кишварда, но мечот на неутрален терен уште на самиот старт најави црно сценарио за нашите најдобри репрезентативки. Техничките грешки повторно беа пресудни за лош старт на натпреварот, а тоа беше пресудно за големо одлепување на Украинките, кои на крајот остварија и убедлива и лесна победа. Гичевска со девет голови беше најефикасна во редовите на нашата селекција со девет голови, а на спротивната страна седум погодоци беа дело на Глибко.

Савевски: Ќе преземам одговорност ако не направиме напредок

Бошко Тасиќ — Sun, 09 Apr 2023 05:35:32 +0000

Сите категории на женскиот ракомет веќе некое време се комплетно водени од координатор-тренерот Љубомир Савевски, по поразот од Украина посочи дека ќе преземе одговорност и нема да го продолжува договорот доколку не види напредок во најсилната репрезентација. Македонија загуби на домашен терен од Украина со резултат 22:24 во првиот бараж за настап на Светското првенство, па иако Савевски се надева на подобро издание во Унгарија и надополнување на негативата од два гола, не пропушти да нагласи дека е подготвен да преземе одговорност. – Што да ви кажам, разговараме година и пол за ова. Истото ни се случи против Словенија, Црна Гора. Премногу сме импресионирани кога играме на домашен терен и играме подобро на гости. Во првиот дел, изгледаше како да не сме работеле ништо во овој изминат период. Второто полувреме беше сосема поразлично, некои млади ракометарки покажаа дека можат многу повеќе.Се надевам дека во Унгарија ќе покажеме многу подобра игра и целосно издание во двете полувремиња. Два разлика не е голема негатива, Украинките не се како другите големи екипи од Европа и прават доста грешки, мислам дека имаа девет технички грешки во вториот дел. Со овие играчи, ако бидеме мотивирани, ќе одиме да изненадиме на неутрален терен, нема друго што да правиме. Загубивме дома, се надевавме на четири-пет разлика за нас, но во многу ситуации не ни помогнаа ниту судиите. Ни останува да се поправиме и да видиме на кое место сме. Мојот договор е до септември, ако не успеам да направам напредок, ќе поднесам одговорност, – изјави Савевски.

Ѓоргиевска: Изгубивме од ривал кој не е поквалитетен од нас

Бошко Тасиќ — Sun, 09 Apr 2023 05:32:45 +0000

Македонската женска ракометна репрезентација вчера беше поразена од Украина со 24-22 во првиот бараж меч за пласман на СП за ракометарки. Причината за поразот беше лошата игра во првото полувреме по која не успеавме во целост да се вратиме.По првите 30 минути имавме негатива од шест голови разлика (8:14), а во вториот дел дојдовме и до изедначување, но сепак на крајот си замина со победа од Скопје. Една од најискусните во нашите редови, Елена Ѓоргиевска не е задоволна од резултатот бидејќи смета дека сме поквалитетна селекција од Украина „Искрено не сум задоволна, затоа што се подготвувавме да бидеме дисциплинирани, затоа што изгубивме од еден ривал кој не е поквалитетен од нас. Можеби еуфорија, преголема желба, придонеса да направивме многу грешки во првото полувреме. Се надевам ќе го поправиме до следниот меч, односно да не се изгубиме како во првиот дел“.Ако одиграме како што го одигравме второто полувреме. Имаме минус, не искористивме на домашен терен да направиме разлика. Но не се предаваме, и ќе го дадеме максимумот за да одиме понатаму. На полувремето се договоривме да бидеме поконцентрирани и да не правиме толку грешки. Дисциплинирано влеговме во вториот дел и направивме се што можеме да го вратиме резултатот во нормала“, изјави Ѓоргиевска. Во вторник Македонија ја очекува реваншот против Украина по кој ќе биде познато која репрезентација ќе оди на Светското првенство.

Ракометарките поразени од Украина во првиот бараж меч

Бошко Тасиќ — Sat, 08 Apr 2023 18:53:58 +0000

Женската ракометна репрезентација не успеа да направи голем чекор во првиот бараж меч за пласман на Светското првенство. Избраничките на Љубомир Савевски на реваншот во Кишварда ќе патуваат со негатива од гола, откако на домашен терен беа поразени од Украина со 22-24. Сара Ристовска со осум гола беше наш прв стрелец, Јанеска и Саздовска запишаа по три гола, Мицевска имаше шест одбрани, две од седум метри. Украина по 12. минути игра имаше предноста од седум гола (2-9), со тоа што Македонија во првите десет минути заработи три исклучувања, па тешко беше да се справи со брзата транзиција на противникот, дел од головите ги примија на празна мрежа. Покрај ова од 6. до 13 минута, „црвено-жолтите“ беа без погодок. Единствениот блесок го имаа пред крајот на првото полувреме кога по одбрана на Мицевска при 5-13 направија серија од 3-0 и намалија на 8-13. Негативата на одморот беше 8-14, се чинеше дека тука е крајот. Но, сликата се промени. Како на теренот да излезе нов тим. Мицевска повлече, одбрани еден удар од седум метри и уште еден напад на противникот. Ретко, кој очекуваше, но ракометарките направија серија од 8-2 и изедначија на 16-16 во 43 минута. Се разигра Ристовска, Ѓоргиевска, Коцева..нивото на одбраната беше подигнато, а во нападот избраничките на Савевски делуваа посигурно. Три минути подоцна, Украина успеа да зголеми на плус три (16-19). Ристовска не држеше во чекор до посакуваниот пресврт, со два контранапади, не му дозволи на противникот повторно лесно да се одлепи резултатски. Во 49. минута беше 19-20, не рализираа за ново реми. Македонија беше на негатива од еден до два гола. Во 55. минута, Македонија остана без најефикасната, Ристовска, која заработи црвен картон, откако при изведување на пенал ја погоди противничката голманка во глава. На три минути до крајот, нашата репрезентација заработи исклучување, Јанеска промаши важен седмерец при 21-23, на другата страна стигна казна (21-24). На крајот Украина славеше со 22-24, негатива која ветува. Реваншот се игра за три дена, Савевски и неговите девојки ќе мора да бидат многу подобри доколку сакаат да се најдат на Мундијалот.

Гичевска: Клучот за победа против Украина ќе биде одбраната

Бошко Тасиќ — Fri, 07 Apr 2023 05:01:01 +0000

Женската ракометна репрезентација на Македонија ја очекува бараж двомечот проти Украина за пласман на Светското првенство кое на крајот на годината ќе се игра во Данска, Норвешка и Шведска. Една од најдобрите македонски ракометарки Леонида Гичевска пред двомечот вели дека клучот за победа ќе биде играта во одбрана.

„Атмосферата во репрезентацијата е работна како за пред квалификациски натпревари. Нормално дека сите ние сакаме и очекуваме да победиме бидејќи и самите посакувавме противник како Украина, па затоа треба тоа да го искористиме. Пред се за да победиш било кој противник треба да бидеш барем просечен во одбраната, а најдобро е да бидеме одлични. Да ги спречиме нивните најопасни играчи и со тоа да помогнеме за добар ден на голманите. Од тука ќе можеме да извлечеме и брзи контри за крилата и добри полуконтри за нас бековите. Во нападот мора да играме смирено и организирано и нашите завршници да бидат преку нивните најслаби одбранбени играчи. Репрезентацијата на Украина не е за потценување, напротив имаа квалитетни ракометарки кои играат во силните првенства. Но, ако ние играма како што знаеме можеме да се пласираме на Светско првенство за кое сонуваме, а со тоа и да го прекинеме постот кој трае од 2007 година“, изјави Гичевска.

Македонија првиот натпревар против Украина го игра на 8. април (сабота) во СЦ „Борис Трајковски“ во Скопје, додека реваншот кој ќе се игра на неутрален терен во Унгарија е закажан за 11. април.

Мицевска: Со поддршка од трибините до победа против Украина

Бошко Тасиќ — Thu, 06 Apr 2023 04:21:06 +0000

Македонската женска ракометна репрезентација в сабота во Скопје го игра првиот натпревар од баражот за пласман на Светското првенство. Нашата селекција по учеството на континенталниот шампионат има можност да почне една нова традиција и да ја продолжи низата на настапи на големите натпреварувања. Оваа нова, млада генерација покажа дека може да биде рамноправна и со селекции од самиот врв на европскиот ракомет и со право се надева на успех во двете соочувања со Украина. “Од моментот кога ја добивме Украина за противник во баражот за Светското првенство, ние се фокусираме на овој дуел. Сметам дека имавме доволно за да се подготвиме и сега ни останува само да ги одржиме завршните тренинзи и се надевам дека ќе успееме во обидот да обезбедиме пласман на Светското првенство”, изјави нашата голманка Јована Мицевска.