Македонската филхармонија – Kurir.mk

Контрабасистот Рено Гарсија Фонс ќе настапи како солист со оркестарот на Филхармонијата

Ивона Петрова — Thu, 24 Oct 2019 05:43:34 +0000

Францускиот контрабасист Рено Гарсија Фонс вечер во 20 часот ќе настапи како солист со оркестарот на Филхармонијата. Пред македонската публика овој исклучителен басист ќе се претстави со свои композиции. На програмата на овој концерт се и Суитите 1 и 2 од балетот „Дафнис и Клое“ од Морис Равел. Со оркестарот на Филхармонија ќе диригира Џијан Емин. По работата во врвни француски симфониски оркестри, Рено Гарсија Фонс во 90-тите години на минатиот век се одлучува за солистичка кариера. Тој разви свој музички јазик и стил со кој на автентичен начин го еманципира инструментот на кој свири. Контрабасот во рацете на Фонс звучи како шпанска гитара, африканска бас лаута, како виола или персиска виолина. Станува збор за врвен инструменталист со каталонско потекло и од таму всушност потекнува неговиот интерес кон шпанската и ориенталната култура, посочуваат од Филхармонијата.

„Три писма од Сараево“ на Горан Бреговиќ во ВИП Арена

Ивана Ефремовски — Fri, 22 Mar 2019 07:09:50 +0000

Во ВИП Арената во Скопје вечер ќе биде изведен проектот – виолински концерт „Три писма од Сараево“ на Горан Бреговиќ со Македонската филхармонија и со неговиот „Оркестар за свадби и погреби“. Концертот е компониран за класична, ориентална и клезмер виолина, со настап на тројца солисти од Србија, Тунис и Израел. Со него Бреговиќ нуди сопствена уметничка визија на нов, помирен, толерантен, мултикултурен и мултиконфесионален свет. Проектот премиерно беше претставен во Париз во 2016 година. -„Three letters from Sarajevo“ е најпродаван еthno world албум во светот во 2018 година, вклучувајќи ја и Америка. Бреговиќ за него доби и можеби најдобри рецензии од сите соло албуми што ги има издадено во последнава декада, а се најде и во престижниот британски весник „Гардијан“, соопшти Авалон-продукција која го организира вечерашниот концерт во Скопје. Продукцијата соопшти дека познатиот музичар на концертот ќе изведе и некои од неговите познати хитови.