македонски филм – Kurir.mk

Салковски до Костадиновска Стојчевска: Ниту еден македонски филм не е почнат со снимање оваа година!

Ивана Ефремовски — Fri, 22 Sep 2023 06:40:16 +0000

Ниту еден македонски филм не е почнат со снимање оваа година, а дури 17 играни филмови, малцински копродукции, документарни и анимирани филмови поддржани од Агенцијата за филм чекаат на Министерството за култура да бидат реализирани“, истакна филмскиот продуцент Томи Салковски во директно соочување со министерката за култура, Бисера Костадиновска Стојчевска, во вчерашната емисијата „Аргумент плус“ на телевизијата „24 Вести“. Салковски смета дека буџетските средства треба да бидат обезбедени во согласност со предвидената динамика на реализација на филмските проекти, а не дури во декември, како што најавува министерката за култура. „Продуцентите пред било што да почнат, треба да извадат банкарски гаранции кои изнесуваат 25 отсто од вкупната сума за снимање на филмот, за кои се потребни залог во имот или во парични средства, и плус банкарски провизии. Додека не се сигурни дека Агенција за филм ќе им префрли пари, тие не можат да почнат со работа. Парите им се потребни веднаш за да почнат со снимање, а не дури во декември“. Според Салковски, единствено филмската уметност во Македонија игра 100 проценти според европски правила. „Доколку уште утре да влеземе во ЕУ, ние нема што повеќе да искористиме, бидејќи веќе сега сме членки на сите релевантни европски организации. Станува збор за филмска уметност, специфична дејност, а не за обични производи на пазар. Не е како во другите дејности. Ако се скратат средства оваа година, тоа ќе се почувствува дури за три години. Кратењата за време на корона кризата во филмот дури сега ги чувствуваме“, нагласи Салковски.

ВИДЕО: Во петок македонска премиера на краткометражниот филм „Тале и Корона“

Тале Кристо — Fri, 02 Dec 2022 11:39:16 +0000

Краткиот филм „ Тале и Корона“ (“ Tale and Corona”, 2022 г., 23 мин. Ц/Б, колор, ДЦП) според сценарио и режија на Томислав Алексов, ќе има македонска премиера во петок ( 2 декември, 18 ч.) во Кинотека на Македонија. „Тале и Корона “ е приказна за издржливоста на човековиот дух во време на пандемија. Малиот Тале (8), голем вљубеник во филмската уметност, е заразен со коронавирус и се бори за својот живот. Користејќи ја силата на филмските ликови што ги обожувал во животот, собира сила и се спротивставува на болеста. Самовилата Корона му помага и станува негов пријател. Улогите ги толкуваат: Иринеј Ковчиќ, Весна Петрушевска, Мила Стојчевска, Сања Русеска Гораст Цветковски, Дубравка Киселички, Крсте Јовановски. Музика: Валентина Велковска- Трајановска, Директор на фотографија: Владимир Димоски Монтажер: Кузман Клековски, Дизајнер на звук: Владимир Аговски, 3Д Аниматор: Раде Дичоски. Филмот е финансиски поддржан од „ Агенцијата за филм на Р.С. Македонија “, а во продукција на „ Продукција МС“ од Скопје и продуцентот Кузман Клековски. „Тале и Корона “ ќе се прикажува и како дел од декемвриската програма на Кинотека на Македонија од 3 декември.

Премиера на „Снежана на крајот умира“ на фестивалот „Сламденс“ во САД

Катерина Бојаџиева — Wed, 15 Dec 2021 12:23:28 +0000

Македонскиот игран филм „Снежана на крајот умира“ по сценарио и во режија на Кристијан Ристески ќе има премиера на фестивалот „Сламденс“, кој со физичко присуство и онлајн ќе се одржува од 20 до 30 јануари во Парк Сити, САД. „Снежана на крајот умира“ е социјална драма – комедија на апсурд, која се занимава со тоа колку е ужасно тешко да се остане чесен и верен на своите вредности во морално корумпирана средина. Филмот е составен од три испреплетени приказни за три групи луѓе, една мува, едно прасе, една клозетска шолја и еден град, чии патишта се допираат и влијаат еден на друг. Главните улоги во филмот ги толкуваат Верица Недеска, Наташа Петровиќ, Сашко Коцев, Дениз Абдула, Ивица Димитријевиќ, Давид Јанакиев и Тино Костадиновски. Филмот е македонско-кипарска копродукција меѓу продукциските куќи Вертиго висуал од Северна Македонија и Карета филмс од Кипар, а финансиски е поддржан од нашата Агенција за филм и кипарскиот филмски фонд. Продуцент на филмот е Дарко Попов, кинематографери се Димо Попов и Севдије Кастрати, монтажер е Горан Вуќиќ, композитори се Александар Пејовски и Ставрос Макрис, сценограф е Сашо Блажевски, костимограф е Емилија Ивановска Атанасовска, дизајнер на звук е Грег Малканџи, маскер е Мојца Горогранц Петрушевска, кастинг директор е Мони Дамевски. „Сламденс“ е Оскар-квалифицирачки фестивал на дебитантски филмови со буџет до милион долари, чие мото е „од филмаџии за филмаџии“. Оваа година селекцијата на филмовите е направена од преку 8100 пријавени филмови. На овој фестивал своите светски премиери ги имале режисерските дебија на Кристофер Нолан (познат по „Tenet”, „Dunkirk“, „Inception“), Бонг Џун Хо (познат по „Parasite“, „Okja“, „Memoirs of a Murder“), Шон Бејкер (познат по „Red Rocket“, „The Florida Project“, „Tangerine“)…

ВИДЕО: Новиот македонски филм кој ќе ве расплаче

Ивана Ефремовски — Thu, 16 Jan 2020 20:53:33 +0000

„Дедо и Внук“ е нов македонски игран филм, кој од вечерва ќе биде на редовен кино репертоар во Cineplexx во рамките на Балканскиот филмски фестивал. Кратка содржина: После смртта на едно дете пациент, кое чека лекување во странство, настанува скандал и младиот доктор Никола за да го избегне притисокот е приморан оди на посета кај дедо му, каде што не бил повеќе од 10 години и таму се среќава со проблемите од неговото минато.

Силно пријателство на мајмунот Коко и чуварот: Погледнете го трејлерот за новата македонска комедија

Ивана Ефремовски — Thu, 19 Apr 2018 07:15:45 +0000

Необичното пријателство меѓу мајмунот Коко и чуварот на Зоолошката градина, Цобе, и нивниот живот во превртениот транзициски свет се центар на дејството на „Година на мајмунот“, новата комедија на реномираниот режисер Владимир Блажевски, автор на култниот македонски филм „Панкот не е мртов“. Мајмунот, кој од Зоолошката градина завршува на улиците на Скопје и продолжува да патува низ живописните предели на Македонија, како и низа карикатурни ликови, едно необично комбе, неколку протести и чудесна роденденска прослава, проследени со пиктурална фотографија и звуците на „О, соле мио“, се само дел од моментите што ги прикажува двеминутниот трејлер за оваа комедија на апсурдот. Филмот, кој денес, 19 април, ќе ја има својата премиера во рамките на 21. издание на Скопскиот филмски фестивал, е копродукција на Македонија, Србија, Словенија и Косово и е поддржан од „Еуримаж“. Се снимаше во 2016 година на 80-ина локации во Македонија. Главната улога ја игра Игор Ангелов, а во екипата се појавуваат актери од Македонија, Србија, Словенија и од Хрватска. По официјалната премиера, „Година на мајмунот“ ќе продолжи да се прикажува во киносалите на „Синеплекс“ почнувајќи од 20 април. Филмот ќе ја има својата светска премиера на 23 април на еден од најреномираните и најстари светски филмски фестивали – Московскиот меѓународен филмски фестивал.