македонски ракометари – Kurir.mk

ЕВЕ ВАКА СЕ ПЕЕ ХИМНАТА НА МАКЕДОНИЈА: Македонските ракометни надежи освоија злато, па ги пуштија грлата на „најјако“ (ВИДЕО)

Магдалена Андонова — Sun, 14 Aug 2022 17:38:29 +0000

На завршувањето на ЕХФ Шампиантот, на кој македонските ракометни надежи го освоија златото, на свечената церемонија организаторот ја пушти можеби најкратката верзија на македонската химна. Но, тоа не ги поколеба црвено-жолтите кои и без музика (акапела) ја испеаја македонската химна, онака како што им лежи на срцето, но пред се онака гордо, како што што прочем го носеа и се бореа во националниот дрес на Македонија. Видеото можете да го видите на Сител.ком.мк

Македонските ракометари по вторпат подобри од Чиле

Дарко Андоновски — Sun, 10 Jan 2021 19:50:35 +0000

Македонската ракометна репрезентација го победи Чиле со 28:24 во вториот пријатески натпревар одигран денес во СЦ „Јане Сандански“. Во воведните минути од натпреварот се играше изедначено, а како се развиваше мечот така избраниците на селекторот Данило Брестовац ја преземаа иницијативата и на полувреме заминаа со предност 16:12. Чилеанците успеаја да се доближат на гол негатива (19:18) во второто полувреме, но потоа следеше сигурна игра во одбраната и во нападот за на крај натпреварот да заврши со 28:24. Најефикасни ракометари во домашниот состав беа Филип Кузмановски и Мартин Поповски со по четири погодоци.

Еден бараж двомеч за македонските ракометари за СП 2021-та

Ивана Ефремовски — Fri, 24 Jan 2020 15:29:47 +0000

Македонските ракометари ги дели само еден бараж двомеч за пласман на Светското првенство во Египет во 2021 година. Европската ракометна федерација (ЕХФ) попледнево го објави квалификацискиот формат за мундијалот што оди во полза на „црвено-жолтите“. Квалификациите ќе почнат во април во четири бараж двојки што ќе бидат формирани со жрепка. Во нив ќе учествуваат Русија, БиХ, Летонија и Полска како најслабо пласирани селекции од ЕП 2020 и Романија, Турција, Израел и Литванија кои успешно ги минаа претквалификациите. Подобрите од четирите пресметки ќе продолжат во јуни на финално одмерување на силите за СП 2021. (МИА)

Мукаетов вети премија за ракометарите ако обезбедат пласман на ЕП 2020- еве за која сума се работи

Дарко Андоновски — Thu, 09 May 2019 14:46:11 +0000

Претседателот на РФМ, Живко Мукаетов денеска изјави дека машката ракометна репрезентација на Македонија ќе добие премија од 40.000 евра доколку се пласира на првото место во групата, а 30.000 евра доколку избраниците на Данило Брестовац бидат втори. Македонија е на добар пат да обезбеди пласман на ЕП 2020 година, а на сениорите им требаат две победи за освојување на првото место. Последен предизвик за репрезентативците ќе бидат средбите против Турција на гостински терен и против Грција во Скопје на 12, односно 16 јуни.

Македонските ракометари ќе одиграат пријателски натпревари со Србија

Дарко Андоновски — Mon, 24 Dec 2018 13:32:05 +0000

Македонската ракометна репрезентација ќе се одигра пријателски натпревари со Србија во рамки на подготвителниот период за Светското првенство во Германија и Данска. Натпреварите ќе се одиграат на 4 и 5 јануари во спортскиот центар „Борис Трајковски“ во Скопје. Првиот е закажан за во 20 часот и ќе биде од отворен тип со слободен влез. Вториот натпревар ќе биде од затворен тип. -Ракометната Федерација на Македонија ги поканува сите љубители на македонскиот ракомет да бидат дел од овој подготвителен период на Македонија и да дадеме поддршка за претстојното СП 2019, стои во апелот на РФМ.

Македонија денес го чека противникот за баражот за СП 2019- еве кои ни се потенцијални ривали

Катерина Бојаџиева — Sat, 27 Jan 2018 08:12:33 +0000

„Црвено-жолтите“ го освоија 11 место на Европското првенство во Хрватска, а веќе фокусот е насочен на тоа да се продолжи континуитетот на големите натпреварувања. Денеска во 16 часот во Загреб, Македонија ќе го добие својот противник во бараж дуелот за пласман на Светското првенство, кое следната година ќе се игра во Данска и Германија. Македонските ракометари се во улога на фаворити и ќе бидат во барабанот каде што ќе бидат селекциите што се носители на ждрепката. Покрај нашата селекција тука ќе бидат и Шведска или Шпанија, бидејќи една ќе биде директен учесник, потоа Хрватска, Чешка, Словенија, Белорусија, Норвешка, Србија и Исланд. Тоа се ривалите кои не може да ни бидат противници. Потенцијални ривали ни се Црна Гора, Австрија, Литванија, Унгарија, Португалија, Холандија, Романија, Русија, Швајцарија и Босна и Херцеговина. Директен пласман на завршницата на Мундијалот кој следната година ќе се игра од 9 до 27 јануари, имаат обезбедено домаќините Данска и Германија, како и актуелниот светски првак Франција. Место на завршницата ќе има и тимот кој ќе го освои европското злато во Хрватска.

Македонија ја стартува втората фаза, Шпанија прва пречка кон полуфинале

Ивона Петрова — Sun, 21 Jan 2018 08:37:25 +0000

Македонската ракомeтна репрезентација вечерва, 20:30 часот, ќе го одигра првиот натпревар во втората фаза. Пред „црвено-жолтите“ ќе стои Шпанија, со двајца за нашата јавност добро познати играчи актуелниот и екс членот на Вардар, Жоан Канељас и Алекс Душебаев. Македонија во Групата 2 влезе со три бода, најмногу од сите репрезентации, а Шпанците пренесоа бод помалку. Во меѓувреме две средби, во петокот, ја отворија оваа фаза во групата во Вараждин, Германија ја победи Чешка 22:19, а Данска Словенија 31:28. -Шпанија е една од топ 6 репрезентации во светот. Мислам дека имаме шанси да направиме позитивен резултат, ќе биде психолошки тежок натпревар, но ќе направиме се да се фокусираме да пружиме еден добар натпревар и имаме големи шанси да направиме позитивен резултат, изјави по вчерашниот тренинг капитенот Кирил Лазаров. На спротивната страна еден од најзаслужните за европската титула на Вардар во минатата сезона, Алекс Душебаев, смета дека неговиот сонародник Раул Гонзалес била алката која во минатото и недостигала на Македонија да направи посериозни резултати. -Македонските репрезентативци имаат неверојатна доверба во него, а тој им возвраќа со досегашните резултати. Раул е елементот кој ми се чини дека во минатото понекогаш и недостасуваше на македонската репрезентација и сега таа е многу поопасен противник, рекол Душеваев. Натпреварот со Шпанија ќе го судат Белорусите Андреј Гуско и Серхеј Репкин.

Еве колку пари ќе добијат македонските ракометари за успехот во првата фаза

Катерина Бојаџиева — Thu, 18 Jan 2018 17:54:44 +0000

Македонските ракометари кои без пораз ја минаа првата фаза од Европскиот шампионат во Хрватска, повеќе од сигурно е дека ја заслужија и првата ветена премија од страна на Ракометната федерација на Македонија. Пласманот во втората фаза на првенството значи и награда од 30.000 евра која ја вети РФМ, по одлуката на Управниот одбор донесена пред патувањето за Хрватска. По прикажаното во првите три меча, но и позицијата број 1 од која ќе го почнат вториот дел од шампионатот, реално ветува и висок пласман, па така доколку на крајот црвено-жолтите завршат меѓу шесте најдобро пласирани, ќе поделат уште дополнителни 30.000 евра. Целата македонска јавност се надева дека РФМ ќе ја исплати и премијата од 100.000 евра, која им беше ветена како награда за евентуален пласман во полуфиналето. Втората фаза од првенството Македонија ќе ја почне во недела, со дуелот против Шпанија.

Почнува ракометното лудило во Хрватска, Македонија се надева на добар пласман

Катерина Бојаџиева — Fri, 12 Jan 2018 09:08:47 +0000

Со четири натпревари кои ќе се играат попладнево во Сплит и Пореч, ќе започне 13-то Европското првенство за ракометари кое ќе заврши на 28 јануари во Хрватска. Титулата ја брани репрезентацијата на Германија. На шампионатот, на кој ќе учествуваат шеснаесет репрезентации, ќе настапи и селекцијата на Македонија, која своите средби од првата фаза ќе ги игра во Загреб, каде за противници редоследно ќе ги има Словенија, Црна Гора и Германија. Ова е петто учесто на најдобите македонски ракометари на континенталните натрпеварувања. Најдобар успех е оној од шампионатот во Србија во 2012 година кога го освоивме 5. место. Избраниците на Раул Гонзалес се надеваат на добар пласман на ЕП. Веруваат во своите квалитети, но ја очекуваат и поддршката од македонските навивачи кои за нив се „ветер во грб“ на овие големи натпреварувања. Токму во загребска „Арена“ пред девет години Македонија се врати на големите натпреварувања, откако на тогашното Светско првенство на кое Хрватска беше домаќин, го освои 11. место. Во мечот со Ј. Кореја и со голот на Столе Стоилов, по асистенција на капитенот Кире Лазаров, Македонија ја победи Ј. Кореја и го освои 11. место на Мундијалот, што во тоа време беше голем успех, со оглед на апсистенцијата од големите натпреварања. Ракометот стана национален спорт број еден, а сите деца сакаа да бидат Кире Лазаров. Таа година еден од најдобрите светски десни бекови стана најдобар стрелец на шампионатот на сите времиња, а неговиот рекорд се уште не е соборен (92) . Селекциите се поделени во четири групи, од кои само најслабо пласираните нема да минат во главната фаза. На програмата денеска се дуелите во А и Б конкуренција, а двојките се: А група (Сплит): Шведска – Исланд (од 18:15 часот) и Хрватска – Србија (20:30 часот) Б група (Пореч): Белорусија – Австрија (од 18:15 часот) и Франција – Норвешка (20:30 часот). Средбите од 1.коло во Ц и Д групите на програмата се утре.

Завршна фаза од подготовките на македонските ракометари за ЕП во Хрватска

Катерина Бојаџиева — Mon, 08 Jan 2018 10:47:43 +0000

Машката ракометна репрезентаија на Македонија по дводневната пауза за Божиќните празници денеска ги започнува завршните подготовки за претстојното Европско првенство што на 12 јануари стартува во Хрватска.

По двата контролни натпревaри во Белград против Саудиска Арабија и Србија кои црвено-жолтите ги решија во своја полза, избраниците на селекторот Раул Гонзалез, од денеска до четврток ќе ги одработат завршните подготовки, на кои најголемо внимание шпанскиот стратег ќе обрне на тактички план.

Видлива беше позитивната енергија и новитетите во играта на македонската репрезентација на дуелите во Белград, на кои помладите ракометари беа во преден план, па сега Гонзалез ќе ја воигрува младоста со искуството на повеќемината играчи кои зад себе веќе имаат поголем број на настапи на големите натпреварувања.

Според програмата црвено-жолтите до четврток ќе осработуваат по два тренинга по што в петок заминуваат за Загреб, каде ќе се играат натпреварите од Ц групата.

Европското првенство репрезентацијата на Македонија ќе го отвори со дуелот - Словенија (13 јануари 2018), по која ќе следуваат натпреварите - Црна Гора (15 јануари), па актуелниот европски шампион Германија (17 јануари ).

Само најслабо рангираната селекција нема да се пласира во четвртфиналната група, во која ќе вкрстат со трите првопласирани селекции од Д групата во која играат: Шпанија, Данска, Чешка и Унгарија.