Малави – Kurir.mk

Од последиците на циклонот Фреди во Малави погинаа над 1.000 лица

Дарко Андоновски — Thu, 13 Apr 2023 06:04:04 +0000

Бројот на погинати од циклонот Фреди во Малави се зголеми на над 1.000 лица, а повеќе од половина милион се раселени, изјави претседателот на земјата, Лазарус Чаквера. -Циклонот погоди околу два милиона лица, додаде тој, пренесува Анадолија. Претседателот ги повика жителите на Малави да работат заедно додека земјата закрепнува од катастрофата што оштети 405 километри патна инфраструктура, 63 здравствени установи и 500 училишта. Циклонот Фреди во март протатни низ Мозамбик и Малави, два пати за еден месец, уништувајќи десетици илјади домови и предизвикувајќи огромни поплави. Во соседен Мозамбик беа уништени повеќе од 33.000 домови, а регистрирани беа уште 76 смртни случаи.

Над 400 загинати во циклонот „Фреди“ во Малави, Мозамбик и Мадагаскар

Ивона Петрова — Fri, 17 Mar 2023 07:23:15 +0000

Во налетот на циклонот „Фреди“ во Малави загинаа 326 лица, соопштија синоќа локалните власти за новиот биланс на жртви и додадоа дека од крајот на февруари од него загинале повеќе од 400 лица. -Бројот на загинати во катастрофата се зголеми од 225 на 326 жртви, бројот на раселени лица е повеќе од двојно зголемен, надминувајќи 183.000 во Малави, изјави претседателот Лазарус Чаквера, кој го посети југот на земјата што беше погоден од циклонот. Истовремено во Мозамбик загинаа 73 лица, додека во Мадагаскар уште 17 . Циконот „Фреди“, формиран на почетокот на февруари покрај брегот на Австралија, досега мина над 8.000 километри од исток кон запад во Индискиот Океан. Првпат удри на копното на 21 февруари на источниот брег на Мадагаскар. Тропските бури и циклони се редовна појава неколку пати годишно во југозападниот дел на Индискиот Океан, за време на сезоната на урагани, што трае од ноември до април.

Малави го бара Тајсон за промотор на локалната индустрија на канабис

Тале Кристо — Wed, 24 Nov 2021 16:45:35 +0000

Африканската држава Малави, во која одгледувањето и трговијата со канабис е легално, официјално побара од боксерската легенда Мајк Тајсон да биде промотор на нивната локална индустрија. Министерството за земјоделство соопшти дека „Малави има потреба од партнер во сложената индустрија на канабис“ и оти еден од најдобрите боксери на сите времиња би бил идеален за таа работна позиција. Американското списание „Форбс“ неодамна објави дека Тајсон е вклучен во индустријата со канабис и регистрирал фирма за продажба на производи врз база на канабис во Соединетите Американски Држави. На почетокот на 2020 година Малави се приклучи на листата африкански држави во кои користењето канабис во медицински цели е дозволено. На африканскиот континент канабисот понекогаш се нарекува и „малависко злато“ бидејќи неговото одгледување со години беше илегално.

Мадона за 60. роденден собира средства за децата од Малави

Даниел Василев — Mon, 30 Jul 2018 14:52:19 +0000

Мадона својот 60. роденден ќе го одбележи со акција за собирање на средства за децата од Малави, која започна денеска и ќе трае до 31-ви август, а ќе биде спроведена во соработка со Фејсбук. Заинтересираните ќе можат донациите да ги уплатат директно преку нејзината официјална страница на оваа социјална мрежа, а собраните средства ќе бидат наменети за фондацијата „Рајзинг Малави“.

- Посветена сум да им обезбедам дом на овие загрозени деца. За мојот роденден не можам да замислам подобар подарок, истакна Мадона која на 16-ти август ќе наполни 60 години.

Мадона посвои четири деца од Малави, а фондацијата „Рајзинг Малави“ ја основа во 2006 година. Средствата кои ќе бидат собрани за нејзиниот 60. роденден ќе бидат искористени за храна, училишна опрема и за здравствена заштита за загрозените деца од оваа африканска држава.