малезија – Kurir.mk

Авион се урнал среде автопат во Малезија, најмалку десет мртви

Ристе Здравков — Thu, 17 Aug 2023 14:21:09 +0000

Најмалку 10 лица загинале откако чартер авион се урнал на автопат северно од Куала Лумпур. Малиот авион се урнал во малезиската држава Селангор, а во него се наоѓале шест лица и двајца членови на екипажот, соопшти Управата за цивилно воздухопловство на Малезија. Авионот полетал од меѓународниот аеродром Лангкави и се упатил кон аеродромот Султан Абдул Азиз Шах, соопшти малезиската управа за цивилно воздухопловство. „Првиот контакт на авионот со кулата за контрола на летање Субанг беше во 14:47 часот по локално време, а дозволата за слетување беше дадена во 14:48 часот“, се вели во соопштението. Во 14 часот и 51 минути по локално време „контролната кула забележала чад што доаѓа од местото на несреќата, но авионот не повикал помош“, се додава во соопштението. Како што се наведува, акцијата за пребарување и спасување е во тек. Авионот Beechcraft Model 390 се урнал во близина на градот Елмин по полетувањето од островското одморалиште Лангкави, на пат кон главниот град Селангор, Шах Алам.

Шеснаесет кампери настрадаа во одрон на земја во Малезија, 17 лица се исчезнати

Ивана Ефремовски — Fri, 16 Dec 2022 07:53:11 +0000

Шеснаесет лиза загинаа, а 17 се водат за исчезнати во свлечиште што денеска погоди камп во Малезија. Во кампот во Батанг Кали, што се наоѓа на околу 50 километри северно од главниот град Куала Лумпур, во моментот на несреќата имало 94 Малезијци, изјави началникот на окружната полиција Суфијан Абдула. Одронот земја паднал од височина од околу 30 метри и зафатил површина од околу 1,2 хектари. Абдула кажа дека бројот на загинати се зголемил од првичните осум на 16, и дека меѓу настраданите има и петгодишно момче. Седум лица се пренесени во болница со повреди, а се трага по 17 лица кои се водат за исчезнати. Спасени се 53 лица кои не се повредени. Во спасувањето учествуваат повеќе од 400 луѓе со кучиња трагачи. Полицијата на местото на несреќата пристигнала половина час по повикот за помош, нешто пред 3 часот утринава. Некои семејства со мали деца, кои беа спасени, се засолниле во блиската полициска станица. Преживеаните тврдат дека слушнале силен звук, како гром, пред да се урне земјата. Кампот се наоѓа на фарма за производство на органска храна, недалеку од популарна туристичка дестинација со забавни паркови и казино. (МИА)

Најмалку осум кампери загинаа во свлечиште во Малезија

Ивона Петрова — Fri, 16 Dec 2022 06:40:27 +0000

Најмалку осум лица загинаа во лизгање на земјиште што денеска се случи во камп во Малезија. Малезиската агенција за управување со катастрофи на Твитер објави дека 53 лица биле спасени, а седум лица се повредени. Спасувачите веруваат дека околу 90 луѓе биле во кампот во Батанг Кали, околу 50 километри северно од Куала Лумпур, кога се случило свлечиштето, околу 3 часот наутро. Премиерот на Малезија Анвар Ибрахим денеска ќе отпатува на местото на несреќата.

Малезија доби нов премиер

Магдалена Андонова — Thu, 24 Nov 2022 08:18:39 +0000

Анвар Ибрахим е именуван за нов премиер на Малезија откако неговата коалиција Пакатан харапан (ПХ) освои најголем број мандати на изборите што се одржаа минатиот викенд. На изборите ниту една партија или коалиција не освои парламентарно мнозинство од 112 места потребни за формирање на влада. ПХ и ривалската конзервативна малезиско-муслиманска коалиција Перикатан насионал (ПН) на поранешниот премиер Мухидин Јасин, што е на второ место по освоените гласови, почнаа разговори за формирање влада, придобивајќи ги помалите коалиции во државите Сабах и Саравак на Борнео и Барисан насионал (БН), алијансата што доминираше во Малезија околу 60 години пред нејзиниот историски пораз на последните избори во 2018 година. Бидејќи ниту еден не успеа да постигне мнозинство, кралот султан Абдула Султан Ахмад Шах се состана со Анвар и Мухијдин, како и со новоизбраните членови на Парламентот, за да ги изложат нивните ставови за тоа кој треба да ја води новата влада. По вчерашниот состанок, кралот објави дека Анвар ќе биде премиер. (МИА)

Малезија од 1 април ги отвора границите, нема карантин

Дарко Андоновски — Tue, 08 Mar 2022 11:51:25 +0000

Малезија повторно ќе ги отвори границите на 1 април и ќе дозволи влез без карантин за посетителите вакцинирани против Ковид-19, изјави денеска мелезискиот премиер Исмаил Сабри Јакоб. „И оваа земја од Југоисточна Азија ќе влезе во фаза кога Ковид-19 ќе стане ендемска болест од следниот месец“, рече Исмаил Сабри во телевизиско обраќање, пренесува „Ројтерс“.

Зголемениот број на смртни случаи и сериозните случаи на коронавирус кај деца, малезиските здравствени власти загрижени

Тале Кристо — Fri, 04 Jun 2021 12:50:23 +0000

Малезиските здравствени власти изразија загриженост поради зголемениот број смртни случаи од коронавирус и сериозните случаи кај деца, откако драстичното зголемување на вкупните инфекции ја принудија оваа држава во југоисточна Азија на целосен карантин. Премиерот Мухидин Јасин прогласи „целосна блокада“ од 1 до 14 јуни, бидејќи дневните смртни случаи од коронавирусот достигнаа рекордни бројки, а Владата предупреди дека влошената епидемиолошка состојба е поврзана со заразните мутации на вирусот. Три деца на возраст под пет години починаа од коронавирус во првите пет месеци од годинава, а ист број е регистриран и во текот на 2020 година, изјави генералниот директор на малезиското Министерство за здравство, Нур Хишам Абдулах. Вкупно 27 деца, вклучително и 19 на возраст под пет години, морале да се лекуваат на интензивна нега во периодот меѓу јануари и мај откако биле заразени со Ковид-19, за разлика од осумте случаи минатата година. – Министерството за здравство се надева дека сите страни, особено родителите и старателите, ќе играат важна улога во заштитата од Ковид-19 на лицата со низок имунитет, како што се бебињата и децата, истакна Нур Хишам. Претходно, малезискиот министер за здравство Адхам Баба изјави дека вкупно 82.341 дете биле заразени со коронавирусот од јануари минатата година до 30 мај годинава.

Осум лица загинаа во поплави во Малезија, евакуирани речиси 50.000 луѓе

Магдалена Андонова — Fri, 08 Jan 2021 12:52:50 +0000

Повеќе од 48.000 луѓе се евакуирани поради поплави предизвикани од монсунските дождови во шест сојузни држави на Малезија, а осум лица загинаа. Малезиската единица за социјална помош соопшти дека поради монсунските дождови кои ги зафатија сојузните држави Паханг, Јохор, Келантан, Теренгану, Перак и Сабах, се евакуирани 48.108 луѓе. Во соопштението се наведува дека поради поплавите во Паханг се загорозени 27.073 лица, во Теренгану во опасност се 12.899 лица, во Келантан 6.319, во Перак 359, во Јахор 1.422 и во Сабах 36 жители. Во поплавите досега загинале осум лица, и тоа четири во Паханг, три во Јахор и едно лице во Келантан. Црвениот крст на Сингапур најави дека ќе донира 50.000 долари за населението кое е загрозено од лошите временски услови. (МИА)

Гран-при во Малезија може да ја замени трката во Кина оваа сезона

Тале Кристо — Thu, 23 Jul 2020 07:58:40 +0000

Гран-при во Малезија би можел да се врати во календарот во Формула 1 во 2020 година, ако конечно се откаже кинеското Гран-при, објави „Auto Motor und Sport“. Формула 1 продолжува да работи на формирање на календарот за втората половина од сезоната. Во моментов се потврдени вкупно десет трки. Последен пат кога се одржа Гран-при во Малезија на патеката „Сепанг“ беше во 2017 година, по што организаторите решија да не го обновуваат договорот.

Во Малезија приведени 269 бегалци Рохинџи

Ивона Петрова — Tue, 09 Jun 2020 10:25:41 +0000

Малезиската крајбрежна стража вчера приведе 53 лица кои се обиделе да допливаат до брегот, а уште 216 лица се приведени од брод, на кој беше пронајдено и безживотно тело. Сите приведени се Рохинџи, но се уште не е познато колку долго биле на море и од каде допатувале. Тие се сместени во привремени притвор, а телото е предадено на полицијата. Стотици илјади етнички муслимани Рохинџи го напуштија Мјанмар поради воените акции и живеат во бегалските кампови во Бангладеш. Малезија, каде мнозинството се муслимани, е вообичаена дестинација за криумчарите кои им ветуваат на бегалците подобар живот во странство. Малезиската Национална работна група соопшти дека до мај притворени се 396 луѓе кои илегално се обиделе да влезат во земјата, заедно со 108 сопственици на чамци и 11 осомничени криумчари. Малезија во април врати брод што превезуваше околу 200 бегалци Рохинџи, во главно деца, поради пандемијата со Ковид-19. Во Малезија има околу два милиона работници мигранти со легален статус и над два милиона со илегален статус, како и околу 180.000 бегалци и азиланти, од кои 101.000 Рохинџи.

Малезискиот премиер Махатир поднесе оставка

Ивона Петрова — Mon, 24 Feb 2020 07:32:29 +0000

Малезискиот премиер Махатир Мохамед денеска му ја понуди својата оставка на малезискиот крал Султан Абдула Султан Ахмад Сах, откако неговата партија ја напушти владејачката коалиција две години по формирањето. Во изјавата од Кабинетот на премиерот се наведува само времето кога била понудена оставката, но не и детали. Кралот сега може да даде поддршка на друг кандидат или да распише нови избори.