мали сипаници – Kurir.mk

Институт Батут: Се шири епидемијата на мали сипаници во Смедерево

Тале Кристо — Mon, 23 Jan 2023 11:11:14 +0000

Српскиот Институт за јавно здравје „Д-р Милан Јовановиќ Батут“ денеска соопшти дека кај 14 лица во Смедерево се потврдена мали сипаници. Станува збор за десет невакцинирани лица (под две години) и четири возрасни лица со непознат и нецелосен статус на вакцинација (вработени во здравствена установа, трудници). Кај две заболени деца има компликации во форма на пневмонија, хоспитализирани се две лица. Примените во болница и тие кои се во домашна изолација се во стабилна состојба, се наведува во соопштението од Институтот. Епидемијата на мали сипаници во Смедерево беше пријавена на 12 јануари годинава.

Србија: Потврдени први случаи на мали сипаници

Ивона Петрова — Thu, 12 Jan 2023 11:51:49 +0000

Во српскиот град Смедерево потврдени се првите случаи на заразени со мали сипаници. Болеста е откриена кај три деца на возраст до 1,5 години и кај едно возрасно лице. Нивната здравствена состојба засега е добра. – Во референтната лабораторија на Институтот за вирусологија, вакцини и серуми „Торлак“ е потврдено присуство на морбили кај четири лица од територијата на Смедерево. Станува збор за три невакцинирани лица и едно лице со непознат статус на вакцинација. Епидемиолошката служба на Заводот за јавно здравје во Пожаревац спроведува епидемиолошка истрага на потврдени случаи, соопшти Институтот за јавно здравје на Србија „Д-р Милан Јовановиќ Батут“. Институтот препорачува да се врши построг епидемиолошки надзор, како и да се евидентираат вакцинираните и невакцинираните лица и да се спроведе вакцинација. На територијата каде што се потврдени случаи на мали сипаници потребно е да се вакцинираат сите невакцинирани и да се ревакцинираат сите на возраст од 12 месеци до 18 години согласно Правилникот за програмата за задолжителна имунизација.

ИЈЗ: До 3 декември пристигнати 2.215 пријави за мали сипаници

Катерина Бојаџиева — Wed, 11 Dec 2019 09:51:36 +0000

Во периодот од 19 октомври до 6 декември година, односно по пријавување на последниот лабораториски потврден случај на мали сипаници, пријавени се два сомнителни случаи на мали сипаници, кои по направеното епидемиолошко и лабораториско истражување се отфрлени, информираат од Институтот за јавно здравје. Заклучно со 3 декември до Институтот за јавно здравје се пристигнати 2.215 пријави за мали сипаници. Вкупниот број случаи пријавени од декември 2018 заклучно со 6 декември, а кои ја исполнуваат дефиницијата на случај и се вбројуваат во вкупниот број заболени во епидемијата, изнесува 1.901, со стапка на заболување од 91,9 на 100.000 жители. Според место на постојано живеење, случаи на мали сипаници се регистрирани во 24 градови, од кои највисока инциденца на 100.000 жители се регистрира во Струга 165,1 на 100.000 (112 случаи), Куманово 162,6 на 100.000 (232) и Скопје 161,6 на 100.000 (998). Во однос на дистрибуцијата по пол, регистрирани се 977 лица од машки пол и 924 лица од женски пол или сооднос машки –женски 1,1:1. Специфичниот морбидитет по пол кај машките е 94,3 на 100.000 жители, додека кај женските изнесува 89,5 на 100.000 жители Возраста на заболените се движи од еден месец до 63 години. Најголем број заболени се на возраст над 30 години – 852 (44,8 отсто), а највисока инциденца од 1.399,1 на 100.000 жители се регистрира кај децата на возраст под една година (327случаи, 17,2 отсто),а кај децата на возраст од една до четири години се регистрира инциденца од 307 на 100.000 жители (285 случаи, 15 отсто) Според вакциналниот статус,1.530 или 80,5 отсто од заболените се невакцинирани, некомплетно вакцинирани или со непознат вакцинален статус. Од нив, 327 (21,4 отсто) се на возраст под 12 месеци и не подлежат на вакцинација, согласно Календарот за имунизација. Од пријавените случаи, 852 или 44,8 отсто биле хоспитализирани, а кај 302 (15,9 отсто) се регистрирани компликации. Докажан е генотипот B3 Dublin кој циркулира и во соседните држави. Вкупниот број вакцинирани лица со МРП вакцина на возраст до 14 години, од почетокот на епидемијата до крајот на анализираниот период во државава изнесува 44.497.

Епидемијата никако да исчезне: Невакцинирано дете заболено од мали сипаници, регистрирани вкупно 1.901 случај

Дарко Андоновски — Tue, 05 Nov 2019 11:36:57 +0000

Нов случај на мали сипаници е регистриран изминатите две недели. Станува збор за невакцинирано дете на возраст до четири години од Скопје. Случајот е лабораториски потврден. Заклучно со 1 ноември во државава се регистрирани 1.901 случај на мали сипаници со стапка на заболување од 91,9 на 100.000 жители. Сé уште е во тек епидемија на мали сипаници, стои во извештајот што на својата веб страница го објави Институтот за јавно здравје. Според резултатите од примероците испратени во референтната лабораторија за мали сипаници во Луксембург, циркулира генотипот B3 Dublin, кој го има и во соседните држави. Во текот на 42. и 43. недела во државата вакцинирани се 1.123 деца (од предучилишна и училишна возраст). Вкупниот број вакцинирани лица на возраст до 14 години со МРП вакцина од почетокот на епидемијата изнесува 42.746 (во прикажаниот вкупен број вакцинирани се вклучени и пропуштените и редовно вакцинираните деца со МРП вакцина), се посочува во извештајот на Институтот за јавно здравје. Од почетокот на епидемијата, па досега, во центрите за јавно здравје дополнително се аплицирани 6.295 дози на вакцина, од нив повеќе од 60 отсто кај здравствени работници, студенти и ученици во средните медицински училишта, а останатите се лица на возраст над 14 години.

Нема новорегистрирани случаи со мали сипаници, се уште е во тек епидемија

Ивона Петрова — Thu, 24 Oct 2019 08:08:16 +0000

Од 11 октомври до 18 октомври не се регистрирани нови случаи со мали сипаници. Се уште е во тек епидемија на мали сипаници на цела територија на државава. Вкупниот број регистрирани случаи изнесува 1.900, со стапка на заболување од 91,8 на 100.000 жители, се наведува во извештајот што на својата веб страница го објави Институтот за јавно здравје. Според резултатите од примероците испратени во референтната лабораторија за мали сипаници во Луксембург, циркулира генотипот B3 Dublin, кој циркулира и во соседните држави. Во 41-вата недела во државава се вакцинирани 610 деца (од предучилишна и училишна возраст). Вкупниот број вакцинирани лица на возраст до 14 години со МРП вакцина од почетокот на епидемијата изнесува 41.623 (во вкупниот број на вакцинирани се вклучени и пропуштените и редовно вакцинираните деца со МРП вакцина). Од почетокот на епидемијата, досега, во центрите за јавно здравје дополнително се аплицирани 6.291 дози на вакцина, од нив повеќе од 60 отсто се здравствени работници, студенти и ученици во средните медицински училишта, а останатите се лица на возраст над 14 години, стои во извештајот на Институтот за јавно здравје.

ИЈЗ: Регистриран сомнителен случај на мали сипаници

Ивона Петрова — Tue, 15 Oct 2019 07:29:53 +0000

Сомнителен случај за мали сипаници е регистриран изминатата недела. За време на инкубација лицето престојувало во странство и припаѓа на возрасната група од 20 до 29 години. Во тек се лабораториски испитувања. Заклучно со денеска вкупниот број регистрирани случаи на мали сипаници во државава изнесува 1.900, со стапка на заболување од 91,8 на 100.000 жители. Се уште е во тек е епидемија на мали сипаници на територијата на цела држава, стои во извештајот што на својата веб страница го објави Институтот за јавно здравје. Според место на постојано живеење, случаи на мали сипаници се регистрирани во 24 градови. Најголем број се регистрирани во Скопје – 997, а највисока инциденца се регистрира во Струга – 165,1 на 100.000 жители. Возраста на заболените се движи од еден месец до 63 години. Најголем број заболени се на возраст над 30 години – 852 (44,9 отсто), а највисока инциденца од 1.399,1 на 100.000 жители се регистрира кај децата на возраст под една година. Според вакциналниот статус, 1.529 (80,5 отсто) од заболените се невакцинирани, некомплетно вакцинирани или со непознат вакцинален статус. Според резултатите од примероците испратени во референтната лабораторија за мали сипаници во Луксембург, циркулира генотипот B3 Dublin кој циркулира и во соседните држави. Во 40-та недела во државата вакцинирани се вкупно 1.580 деца (предучилишна и училишна возраст). Вкупниот број вакцинирани лица на возраст до 14 години со МРП вакцина од почетокот на епидемијата во целата држава изнесува 41.013 (во вкупниот број на вакцинирани се вклучени пропуштените и редовно вакцинираните деца со МРП вакцина). Од почетокот на епидемијата досега, во центрите за јавно здравје, дополнително се аплицирани 6.288 дози на вакцина, од нив повеќе од 60 отсто се здравствени работници, студенти и ученици во средните медицински училишта, а останатите се лица на возраст од над 14 години.

Изминатата недела 110 случаи со мали сипаници, 18.880 деца се уште невакцинирани

Катерина Бојаџиева — Fri, 10 May 2019 12:27:42 +0000

Во текот на изминатата недела до Институтот за јавно здравје пристигнаа 116 пријави за сомнителни случаи од кои 110 (43 од Скопје и 67 од другите градови) се потврдени како случаи со мали сипаници кои се на возраст од една година до над 40 години. Најголем број од случаите (57) се на возраст од над 30 години, а 21 дете се на возраст под една година. За повеќе од 50 лица била потребна и хоспитализација. Ова денеска го изјави д-р Владимир Микиќ од Институтот за јавно здравје, кој рече дека досега се вакцинирани 23.978 деца, меѓутоа остануваат уште 18.880 деца кои се уште не се вакцинирани, што претставува ризик за натамошно одржување и ширење на епидемијата во градовите каде се уште нема заболени. – Остануваат уште 12.400 претшколски невакцинирани деца каде е најголемиот проблем, бидејќи тие понатаму ја шират епидемијата и на повозрасните групи. На возраст до 14 години во Скопје невакцинирани се 2.670 деца, а во другите градови тој број изнесува 3.800. Фокусот е на претшколските деца надвор од Скопје. Од сите регистрирани случаи досега 45 отсто биле хоспитализирани, а 16 проценти имале компликации, рече д-р Микиќ и додаде дека идната недела ќе се спроведат засилени увиди во сите центри за јавно здравје за да се процени кои се причините за бавното одвивање на вакцинацијата надвор од Скопје. Посочи дека од почетокот на епидемијата во декември, досега, се регистрирани 1.399 случаи на мали сипаници од кои наголем број се од Скопје – 837, а висока бројка има во Куманово – 160, во Тетово – 118, во Струга – 80 случаи. Вкупно во 21 град се регистрирани мали сипаници. Најголема стапка на заболување, појасни тој, има кај децата на возраст под една година, чиј вкупен број изнесува 237, а висока стапка на заболување има кај возрасната група од 30 до 39 години, чиј број изнесува 412. – Според вакциналниот статус досега 75 проценти од сите регистрирани случаи се невакцинирани при што кај децата стапката на невакцинирани е 90 проценти, а кај повозрасните над 65 проценти. Во однос на мерките за вакцинација, во текот на минатата недела се вакцинирани 1.054 деца на возраст до 14 години, од кои 309 на територија на град Скопје, а останатите 743 се во другите градови. Досега се вакцинирани 1.113 лица на возраст над 14 години од кои повеќе од 60 проценти се вработени во здравствени институции. Од почетокот на епидемијата досега има четири починати деца од мали сипаници на возраст од пет ипол до 13 месеци кои не биле вакцинирани, рече д-р Микиќ. Потсети на мерката дека градинките може да ги посетуваат само вакцинирани деца и на владината одлука дека при запишување во прво одделение ќе се бара да се приложи вакцинален статус.

Хоспитализирани 33 лица заразени од морбили: Четворица се во критична состојба

Катерина Бојаџиева — Wed, 08 May 2019 14:57:19 +0000

На Инфективната клиника се хоспитализирани 33 лица заразени од морбили, од кои четворица се во критична состојба. -Вчера имаше пет нови прегледани пациенти со морбили, а двајца се примени на болничко лекување. Во животозагрозувачка состојба е 16- годишната пациентка со церебрална парализа и масивна пневмонија. Во потешка состојба на одделите има тројца возрасни, информираат од Клиниката за инфективни болести и фебрилни состојби. На Детска клиника бројките се малку подобри. Десет доенчиња се лекуваат болнички, но ниту едно не е во критична состојба, потврдија од клиниката.

Прогласена епидемија на мали сипаници на територијата на цела држава

Катерина Бојаџиева — Tue, 16 Apr 2019 09:25:32 +0000

Комисијата за заразни болести донесе заклучок да биде прогласена епидемија на мали сипаници на територија на целата држава, изјави денеска доктор Владимир Микиќ од Институтот за јавно здравје. Посочи дека прогласувањето на епидемијата е со цел да се спроведат дополнителни мерки за да се спречи натамошното ширење, да се намали бројот на нови инфекции и да се спречат тешките форми на ова заболување. – Една од мерките е забраната за посета на градинките, втората мерка која е предложена е да се намали возраста за вакцинирање од 12 месеци на шест месеци, бидејќи голем дел речиси 100 деца се на возраст под една година и тие се највулнерабилна група за тешки форми на заболувањето. Дополнително бидејќи имаме заболени меѓу повозрасните лица кои по редовниот календар не подлежат на вакцинација, Комисијата донесе одлука да се зголеми возраста за вакцинација, така што секое лице постаро од 14 години ќе може слободно да се вакцинира во центрите за јавно здравје односно на возраст од 14 до 60 години, рече доктор Микиќ. Тој рече дека другиот сет мерки, што е предложен, е сите здравствени работници на територија на цела држава да мора да се вакцинирани со две дози на МРП вакцина. Нагласи дека се забрануваат посетите на болниците и таа мерка мора да се почитува со цел да се намали можноста за внес на нова инфекција во болнички услови, анегувателкитево градинките ќе бидат задолжително проверени за нивниот вакцинален статус и ќе треба да бидат уредно вакцинирани. -Повеќе од 70 деца со мали сипаници се хоспитализирани, од кои 55 се на Клиниката за инфективни болести, а 15 на Клиниката за детски болести. Од нив повеќе од седум се во потешка состојба, но сите се хоспитализирани бидејќи имале компликации од мали сипаници, додаде доктор Микиќ. Ваквиот заклучок бил донесен бидејќи веќе се пријавени 961 случај со морбили. Во последната недела повеќе од 60 отсто од пријавените случаи кои се највисоки на неделно ниво биле надвор од Скопје, веќе шест центри за јавно здравје имаат прогласено епидемија на мали сипаници со вкупно население кое е повеќе од половина односно 55 отсто од територијата на државата. Вкупно 20 градови имаат регистрирано случаи на мали сипаници.

Епидемијата наместо да стивне, зема замав: За шест дена 126 нови случаи, вкупно 961 заболени од морбили

Ивана Ефремовски — Fri, 12 Apr 2019 13:12:02 +0000

Од 6 април до денеска во државава се регистрирани 126 случаи на мали сипаници (лабораториски потврдени или поврзани со епидемиолошка врска), се наведува во извештајот што денеска на својата веб страница го објави Институтот за јавно здравје. Од вкупниот број новозаболени лица, 57 случаи се од Скопје, а 70 отсто од нив се непотполно вакцинирани, невакцинирани или со непознат вакцинален статус. Од останатите 69 заболени, 22 се од Куманово, 15 од Кичево, 12 од Струга, 10 од Тетово, по три од Велес и Прилеп, а по еден има од Гостивар, Крива Паланка, Струмица и Охрид. Од почетокот на епидемијата во Скопје во декември 2018 година заклучно со 12 април се регистрирани 961 случаи на мали сипаници, од нив 682 се епидемиолошки поврзани и пријавени во епидемијата во Скопје. Активни епидемии на мали сипаници во моментот има во шест здравствени региони и тоа во Скопје, Тетово, Куманово, Гевгелија, Кичево и Струга. Најголем број на случаите се од возрасната група над 30 години, 412 или 42,9 отсто од вкупниот број. Висок процент на заболени се регистрира и кај возрасната група до четири години со 34,4 отсто од вкупниот број заболени. Од вкупно 166 заболени деца на возраст од една до четири години, 150 или 90,4 отсто се невакцинирани или со непознат вакцинален статус, а од 545 заболени кај лицата над 20-годишна возраст, 67,5 отсто (368) се невакцинирани, непотполно вакцинирани или со непознат вакцинален статус. Од почетокот на епидемијата, во Скопје, вкупниот број вакцинирани на возраст до 14 години кои подлежат на вакцинација со прва или втора доза, изнесува 11.919. Во останатиот дел од државава, од почетокот на епидемијата, вкупниот број вакцинирани на возраст до 14 години со прва или втора доза, изнесува 7.542. Вкупниот број вакцинирани на возраст до 14 години со МРП вакцина од почетокот на епидемијата во државава изнесува 19.461. (МИА)