Мануел Лопез Обрадор – Kurir.mk

Обрадор најави меѓународна борба против цензурата на социјалните мрежи

Тале Кристо — Fri, 15 Jan 2021 06:30:38 +0000

Претседателот на Мексико, Андрес Мануел Лопез Обрадор вети меѓународна борба против цензурата на социјалните мрежите, кои ги блокираа или суспендираа профилите на американскиот претседател Доиналд Трамп. – Можам да Ви кажам дека на првиот состанок на Г-20 што ќе го имаме, ќе го покренам тоа прашање. Да, социјалните медиуми не би требало да се користат за поттикнување на насилство и сето тоа, но тоа може да се користи како изговор за суспендирање на слободата на изразување, посочи Обрадор. Тој истакна дека една компанија не може да се однесува како се моќна, „како некој вид на шпанска инквизиција“. Мексиканскиот министер за надворешни работи Марсело Ебрард истакна дека Мексико ќе покрене меѓународна кампања против цензурата на социјалните мрежи. – Откако се огласи нашиот претседател веднаш стапивме во контакт со другите лидери кои мислат исто, посочи Ебрард, додавајќи дека контактирале со претставниците на Франција, Германија, Европска Унија, Африка, Јужна Америка и од Југоисточна Азија.

Мексиканскиот претседател сака меѓу првите да ја прими руската вакцина

Ивона Петрова — Tue, 18 Aug 2020 06:04:03 +0000

Мексиканскиот претседател Мануел Лопез Обрадор изјави дека доброволно ќе се пријави да биде меѓу првите кои ќе ја примат руската вакцина против коронавирусот, доколку таа се покаже за ефикасна. Одлуката на Москва да одобри производство на вакцини по само два месеци тестирања врз човекот го разбранува светот и предизвика загриженост во некои научни кругови, кои тврдат дека само 10 проценти од клиничките испитувања на руската вакцина се покажале за успешни, пренесуваат британските медиуми. Многумина тврдат дека Русија на прво место го стави глобалниот престиж наместо безбедноста. Мексико и Аргентина ја финансираа компанијата Астра Зенека Плц, која е вклучена во глобалната трка за пронаоѓање на вакцина против коронавирусот.

Обрадор: Ќе ставам маска кога ќе исчезна корупцијата

Магдалена Андонова — Sat, 01 Aug 2020 15:57:01 +0000

Мексиканскиот претседател Мануел Лопез Обрадор денеска изјави дека ќе носи заштитна маска само откако целосно ќе се искорени корупцијата во земјата. -Знаете кога ќе ставам маска? Кога нема да има корупција. Тогаш ќе ставам маска и ќе престанам да зборувам, рече Обрадор на прес-конференција, во момент кога неговата земја стигна на третото место во светот по бројот на смртни случаи од Ковид-19, јави Би-Би-Си. Корупцијата одамна е болна точка во мексиканскиот политички систем и земјата се наоѓа на 130 место на најновиот список на Транспаренси Интернешнл според индексот на корупција во светот. Обрадор, кој е скептичен за носење маски, е цел на критики поради неговата реакција на пандемијата, затоа што се верува дека тој ги вовел рестриктивните мерки доцна, а потоа нагло ги укинал. (MИА)

Обрадор избран за претседател на Мексико

Ивона Петрова — Mon, 02 Jul 2018 05:50:16 +0000

Во својот трет обид, левичарскиот кандидат Мануел Лопез Обрадор (64) победи на изборите во Мексико со 53 проценти од гласовите, далеку над конзервативните кандидати. Противкандидатот Хозе Антонио Меад му честиташе на Обрадор на победата, а честитка упати и американскиот претседател Доналд Трамп. - Со задоволство очекувам да соработувам со него. Можеме многу да сториме од полза како за Соединетите Американски Држави, така и за Мексико, напиша Трамп во коментар на Твитер. И самиот Обрадор вети дека ќе соработува во САД, иако во текот на предизборната кампања и тој и сите други кандидати упатуваа остри критики кон Трамп, поради неговата најава дека ќе изгради ѕид на границата со Мексико. Обрадор вети дека ќе ги зголеми платите во јавната администрација, а ќе ја намали претседателската плата и ќе го продаде службениот авион. Обрадор учествуваше на претседателските избори во 2006 и во 2012 година, губејќи ги изборите со мала разлика. Мексиканците вчера гласаа за избор на новиот Конгрес, како и за 1.500 градоначалнички места. Над 130 кандидати беа убиени од минатата есен, и во текот на изборната кампања. МИА