мапас – Kurir.mk

МАПАС: Намалување на месечниот надомест што го наплаќа Агенцијата од пензиските друштва за 2023-та година

Ивана Ефремовски — Mon, 28 Nov 2022 14:27:39 +0000

Агенцијата за супервизија на капитално финансирано пензиско осигурување – МАПАС информира дека е добиена согласност од Собранието на Република Македонија, за намалување на висината на месечниот надомест, што го наплаќа Агенцијата од пензиските друштва, за 2023 година на 0,7 отсто од уплатените придонеси во секој пензиски фонд со кој управуваат друштвата. -Согласно член 56 став (3) од Законот за задолжително капитално финансирано пензиско осигурување е пропишано дека Агенцијата наплатува месечен надомест на товар на пензиските друштва најмногу до 0,8 проценти од секој уплатен придонес во претходниот месец во пензиските фондови со кои управуваат. Пресметките на Агенцијата покажаа дека месечниот надомест за 2023 година, треба да изнесува 0,7 отсто од уплатените придонеси во секој пензиски фонд со кој управуваат друштвата. За очекуваниот прилив на придонеси беа користени проценки за прилив на придонеси во задолжителните и во доброволните пензиски фондови во 2023 година, појаснија од МАПАС. Со овој чекор, како што се наведува во соопштението, се потврдува стабилноста и сигурноста на пензискиот систем и претставува можност за развој на пензискиот систем, како и повеќе можности во интерес на членовите на пензиските фондови. (МИА)

МАПАС: Младите да се информираат навремено за доброволните пензиски фондови

Катерина Бојаџиева — Wed, 07 Sep 2022 08:17:28 +0000

Особено е важно младите навремено да се информираат за правата, обврските и придобивките на членовите на задолжителните и доброволните пензиски фондови, веднаш по започнувањето на работниот однос, потенцираат од Агенција за супервизија на капитално финансирано пензиско осигурување (МАПАС) по повод Недела на пензиската свесност, која оваа година е од 7 до 15 септември. Денот за пензиска свесност, пак, e на 15 септември, почнувајќи од 2014 година, и има за цел да ја истакне важноста на пензиското штедење. Од МАПАС најавија дека во рамки на својата мисија да ги заштитат интересите на членовите на пензиските фондови и да го поттикнат развојот на капитално финансираното пензиско осигурување заради посигурни пензионерски денови, Денот за пензиска свесност ќе го одбележат со низа активности користејќи ги електронските комуникациски алатки и социјалните медиуми. Како што посочуваат, едукативните активности се организираат со цел да се подигне свеста на граѓаните за значењето на пензиското осигурување и да се зголеми информираноста за пензискиот систем. -Со тоа, сегашните и идни осигуреници и членови добиваат значајна основа за да можат да ја испланираат и да ја осигураат својата пензиска иднина, се наведува во соопштението на МАПАС.

МАПАС: Истекува рокот за поднесување на Изјава за членовите со бенифициран стаж

Катерина Бојаџиева — Mon, 13 Jun 2022 10:49:11 +0000

Агенцијата за супервизија на капитално финансирано пензиско осигурување (МАПАС), ја известува пошироката јавност дека на 1 јули истекува рокот за поднесување на Изјава за продолжување на членството во задолжителен пензиски фонд од страна на лицата кои имаат бенифициран стаж. -Согласно закон членовите на задолжителните пензиски фондови кои навршиле стаж со кој се остварува намалување на старосната граница за пензионирање за најмалку една година согласно член 118 став (3) од Законот за пензиското и инвалидското осигурување, почнувајќи од 01 април 2022 година имаат право да изберат дали ќе го продолжат членството во задолжителен пензиски фонд, најдоцна до 01 јули 2022 година, се вели во соопштението од МАПАС. Изборот се врши со писмена изјава за продолжување на членство, а доколку членовите до 01 јули 2022 година не достават изјава, членството во задолжителниот пензиски фонд ќе им престане. По престанување на членството во задолжителниот пензиски фонд, пензиското друштво го пренесува вкупниот износ на средствата од индивидуалните сметките на овие членови во Фондот на пензиското и инвалидското осигурување на Северна Македонија (Фондот на ПИОСМ). -Членовите кои нема да дадат изјава за продолжување на членство остануваат осигуреници само во тековно финансираното пензиско осигурување засновано на генерациска солидарност (Фондот на ПИОСМ) од каде што ќе го остварат правото на пензија, потенцираат од МАПАС.

Која е важноста на работењето на пензиските друштва во вториот пензиски столб?

Ивона Петрова — Thu, 06 Dec 2018 10:30:17 +0000

Реформираниот пензиски систем во Македонија е веќе во својата втора деценија. Главните цели на оваа реформа се да се намали товарот врз буџетот на државата за покривање на пензиите од првиот столб и обезбедување стабилна и сигурна пензија. Од пензиските друштва потенцираат дека за секој осигуреник е од особена важност да биде запознаен со својата пензиска заштеда, како и да се едуцира за работата на своето пензиско друштво. „Промените на пензискиот систем се евидентни. Со воведениот нов систем, кој е комбинација на тековно и капитално финансирање, се изгради систем со бенефиции за поединецот и дополнителни ефекти за целата економија. Поединецот е посигурен, бидејќи финансирањето на пензијата ќе се врши од повеќе извори, ризикот се диверзифицира, а нашата транспарентност останува еден од основните принципи во работењето и комуницирањето со членовите. Сепак, познавањето и заинтересираноста на членовите за пензиското осигурување и за состојбата на нивните пензиски сметки е мала, иако се работи за нивни лични пензиски заштеди“, велат од пензиските друштва. Една од главните придобивки во вториот задолжителен пензиски столб се инвестициите што ги прават приватните пензиски друштва, КБ Прво пензиско друштво АД Скопјеи Сава пензиско друштвоАД Скопје, кои имаат за цел остварување приноси, кои понатаму рамномерно се распределуваат на индивидуалните сметки на секој осигуреник. Приватните пензиски друштва, под надзор на Агенцијата за супервизија за капитално финансирано пензиско осигурување (МАПАС), ги инвестираат средствата од вториот столб во разни финансиски инструменти, како и во акции на профитабилни домашни и светски компании, меѓу кои и познатите Apple, Microsoft, BMW, Siemens, Airbus, Алкалоид, Прилепска пиварница и др. Како резултат на добрите инвестициски одлуки на пензиските друштва, средствата назадолжителните фондови,од почетокот со работењето до 30.9.2018 година, имаат просечен годишен пораст на вредноста на сметководствената единица од 5,64%*. За повеќе детали во врска со работата на пензиските друштва, погледнете го видеото во прилог и посетете ја веб-страницатаwww.penzija.mk *извор: Агенцијазасупервизијанакапиталнофинансиранопензискоосигурување: www.mapas.mk Супервизор на капитално финансирано пензиско осигурување е Агенцијата за супервизија на капитално финансирано пензиско осигурување (МАПАС) (02) 3224 229, www.mapas.mk

Фокусирај се на важното – Започна едукативната кампања на пензиските друштва

Предраг Кукиќ — Thu, 01 Nov 2018 11:37:15 +0000

Пензиските друштва Сава пензиско друштво АД Скопје и КБ Прво пензиско друштво АД Скопје, во соработка со Агенцијата за супервизија за капитално финансирано пензиско осигурување (МАПАС), започнаа со информативно-едукативната кампања за функцијата на пензиските столбови – „ФОКУСИРАЈ СЕ НА ВАЖНОТО!“ Целта на оваа кампања е подигнување на свесноста и информираноста кај населението за работата на пензиските друштва, како и предностите од направената пензиска реформа, фокусирајќи се на работата на вториот задолжителен пензиски столб. Со направената реформа во 2006 година, дел од придонесите за пензиско и инвалидско осигурување се акумулираат во еден од двата задолжителни пензиски фонда од вториот столб и истите се инвестираат со цел остварување принос и капитализација на парите на идните пензионери, при што ќе се намали товарот врз Буџетот на Државата за покривање на пензиите од првиот столб. Како резултат на добрите инвестиции и остварените добивки на пензиските друштва, КБ Прво пензиско друштво и Сава пензиско друштво во периодот од почетокот со работењето до 30.9.2018 година, сметководствената единица на задолжителните пензиски фондови (втор столб) имаше просечен годишен раст од 5,64 %*. Пензиските друштва преку кампањата повикуваат на зголемување на интересот на сите граѓани за нивните лични пензиски заштеди, ажурирање на личните податоци и користење на можноста за редовна проверка на состојбата на нивната пензиска сметка. Истражувањата на пензиските друштва покажуваат дека бројот на членови што редовно си ја следат состојбата на пензиската заштеда преку интернет-страните на пензиските друштва или кои повремено бараат дополнителни извештаи за пензиска заштеда е мал и наспроти очекувањата, расте многу бавно. Пораката на пензиските друштва, пренесена во оваа кампања, е да се поттикне членството во фокусот на вниманието да вклучи еден особено важен сегмент од животот и планирањето на иднината, информацијата за состојбата и движењето на пензиската заштеда. Проверете ја состојбата на вашата пензиска сметка и дознајте повеќе за вашата пензиска заштеда на penzija.mk.