марин бабиќ – Kurir.mk

Манифестацијата „Глумците пеат“ се враќа на сцената

Ивона Петрова — Sun, 05 Mar 2023 19:14:35 +0000

По повеќегодишна пауза, манифестацијата „Глумците Пеат„ се враќа на сцената и на глумците. Враќањето на овој исклучително популарен проект е во чест на неодамна починатиот актер Марин Бабиќ кому ова му беше животен проект. Зад враќањето на шоуто на сцената стојат неговите ќерки. -Со многу возбуда, емоции и ентузијазам, онака како што пред 31 година татко ми ја започна приказната наречена Глумците ПЕАТ, најавуваме враќање на ова шоу, што го празнува театарот и глумците. Во спомен на Марин Гермов Бабиќ, но и како желба на многумина кои ги паметат Глумците Пеат, со сестра ми Маја одлучивме да ги вратиме и да им дадеме повторно живот, објави Ира. -Никогаш не ми било потешко да напишам статус и да ги одделам емоциите од работата. Ни остави аманет и знаевме дека мора да го исполниме. Затоа што ТОЈ толку многу ги сакаше и копнееше да ги врати. И затоа, во чест на Марин ја враќаме на глумците, на театарот, на публиката. Оваа година ќе биде на 20 април, во Националната опера и балет, но од догодина ќе ги вратиме на денот на кој припаѓа - 26 март, во чест на 27 март, светскиот ден на театарот. Деновиве со Ира, пребарувајќи по старите архиви, сфативме дека за жал нема многу останато од претходните изданија. Неколку снимки, неколку фотографии и многу убави сеќавања. Време за нови спомени, за нови убави моменти, пишува неговата ќерка Маја. Режијата е на Дејан Пројковски, а се најавува многу добра музика и многу забава, онака како што само глумците знаат да направат. Билетите се веќе пуштени во продажба и може да ги набавите ТУКА.

Комеморација по повод смртта на Марин Бабиќ

Катерина Бојаџиева — Fri, 28 Oct 2022 05:11:26 +0000

Драмски театар Скопје денеска ќе одржи комеморација по повод смртта на актерот Марин Бабиќ. Комеморацијата ќе започне во 12:00 часот. Доајенот на македонското глумиште Марин Бабиќ почина на 16 октомври во Скопје, на возраст од 74 години. Драмски театар беше негова матична куќа во која го помина целиот работен

Комеморација за актерот Марин Бабиќ ќе се одржи во петок

Ивона Петрова — Wed, 26 Oct 2022 09:49:09 +0000

Драмски театар Скопје на 28 октомври ќе одржи комеморација по повод смртта на актерот Марин Бабиќ. Доајенот на македонското глумиште Марин Бабиќ почина на 16 октомври во Скопје, на возраст од 74 години. Драмски театар беше негова матична куќа во која го помина целиот работен век. Комеморацијата ќе започне во 12:00 часот, информираат од театарот.

Почина Марин Бабиќ

Ристе Здравков — Sun, 16 Oct 2022 07:05:50 +0000

Синоќа во Скопје, по кратко и тешко боледување на 74-годишна возраст почина доајенот на македонското глумиште, Марин Бабиќ (1947 – 2022). Во 1971 година дипломирал на Театарската академија во Софија и истата година станува дел од Драмски театар - Скопје, каде го поминува целиот свој работен век. Ќе остане запаметен по бројните и значајни улоги не само во својата матична куќа, туку и во други театри и проекти. Позначајни улоги има во претставите: „Болен Дојчин“, „Лиза, Лиза“, „Свадба“, „Учени жени“, „Собирен центар“, „Бура“, „Вообразениот болен“, „Злостори на срцето“, “Најголемиот подвиг на витезот Сукало“, „Ивона кнегиња бургундска“, „Солунски патрдии“; „Рибарски караници“, „Косанчиќев венец бр. 7“, „Хаос зад кулиси“, „Викенд на мртовци“, „Ноќ спроти Водици“, „Зојкиниот стан“, „Смртта на Дантон“, „Стапица“, „Сказна за времето“, „Сили во воздухот“, „Самоубиец“, „Балконот“, „Не сега драга…“, „Прости дарови“, „Амадеус“, „Дедо Мраз и Феферона“, „Заводникот од западниот свет“, „Словенскиот ковчег“, „Платонов“, „Ферхад и Ширин“, „Демонот од Дебар Маало“. Неговата актерска кариера ја одбележаа и бројни филмски и ТВ улоги: „Бушава Азбука“, „Наши години“, „Оловна бригада“, „Јад“, „Нели ти реков“, „Доротеј“, „Јужна патека“, „Тетовирани души“, „Претежно ведро“, „Училиште за кловнови“, „Збогум на 20 век“ и многу други. Во културната колективна меморија засекогаш ќе остане неговиот Јашар Бег во театарската претстава „Солунски патрдии“, но и по репликата која стана урбана фраза на многу луѓе – „Ово нема ни у Београду“, од претставата „Викенд на мртовци“. Повозрасните генерации сé уште со носталгија се сеќаваат на неговата култна Ноќна програма на Радио Скопје, кога со неговиот извонреден глас влегуваше во домовите на слушателите и беше нивниот „пријател во ноќта“. Радио кариерата ја заокружи со популарната радио-емисија за готвење во некогашниот Радио Равел. Марин Бабиќ ќе остане запаметен како идеен творец на култната манифестација „Глумците Пеат“ и по поетскиот серијал „Бебули“ и неговите маестрални интерпретации на современата поезија. Погребот ќе биде извршен на новите градски гробишта во Прилеп на 18 октомври (вторник).