Марко Пејчиноски – Kurir.mk

Агенцијата за млади и спорт вети дека ќе му помогне на младиот пливач Марко Пејчиноски

Магдалена Андонова — Mon, 05 Sep 2022 16:57:51 +0000

Агенцијата за млади и спорт е подготвена да ги помогне идните подвизи на младиот македонски пливач Марко Пејчиноски. Тоа го соопшти по денешната средба на директорот Наумче Мојсоски со охридскиот пливачки херој Пејчиноски. – АМС е подготвена да помогне во подготовките за следниот подвиг. На Марко му останува да постигнува резултати, а Агенцијата е тука да го поддржува. Мојсоски искажа подготвеност Агенцијата да ги помогне идните подвизи на овој млад спортист, а помошта ќе биде еднократна или на месечна основа, во зависност од потребите на Марко, стои во информацијата. За реализирање на годинашната цел да исплива 250 километри со 10 препливувања, Пејчиноски кажал дека со подготовки почнал на 15 октомври 2021 година, кога во период од три месеци неделно препливувал по 60 километри. Првата делница била Радожда – Охрид, по што следувале уште девет препливувања. Завршил со делницата Охрид – Струга каде од дозволени 10 минути Марко одморил четири минути, по што продолжил кон Свети Наум со пауза од шест минути и повторно се упатил кон Охрид, со ова Марко вкупно испливал 64 километри.

Иванов го прими младиот Марко кој го преплива Охридското Езеро: Ти си наша заедничка гордост

Катерина Бојаџиева — Thu, 30 Aug 2018 11:01:51 +0000

Претседателот Ѓорге Иванов и неговата сопруга Маја, денеска во Вила Билјана во Охрид, го примија Марко Пејчиноски кој го преплива Охридското Езеро. На средбата со младиот Марко претседателот Иванов, како што соопшти неговиот кабинет, рече дека овој негов херојски подвиг заслужува големо внимание и почит и претставува позитивен пример и мотив за сите млади и талентирани. -На свои дванаесет години Марко е европски и светски шампион кој покажа извонредна храброст, пожртвуваност и упорност својствени за врвните спортисти. Ти си наша заедничка гордост. Ти посакувам уште многу идни спортски успеси со кои ќе се гордее Република Македонија, рече претседателот Иванов. Марко се заблагодари за поддршката од македонскиот претседател и рече дека благодарејќи на вербата во Бога и поддршката од неговото семејството успеал да преплива 25 километри во лоши временски услови. Честитајќи за извонредното достигнување на Марко, претседателот Иванов порача дека треба сите безрезервно да го поддржиме и да помогнеме во неговиот натамошен спортски развој.

МАКЕДОНСКА ГОРДОСТ: 12-годишниот Марко го преплива Охридско езеро (ВИДЕО)

Ивана Ефремовски — Tue, 28 Aug 2018 17:03:31 +0000

12-годишниот охриѓанец Марко Пејчиноски направи голем подвиг препливувајќи ја маратонската патека во должина од 30 километри од Свети Наум до охриското пристаниште. Пејчиноски денеска пливаше во тешки услови и по немирни води, но тоа не му пречеше да ја оствари својата цел. Ако се знае дека имал како дете инфаркт на долните екстремитети, овој подвиг на младиот охриѓанец е навистина за почит.