Марко Срдановиќ – Kurir.mk

Марко Срдановиќ блесна и веднаш доби нов долгогодишен договор со Вардар!

Ристе Здравков — Tue, 31 Oct 2023 13:26:45 +0000

Двократниот европски ракометен првак Вардар 1961 покажа дека размислува и за иднината, па иако сезоната не е ниту до половината, го „врза“ еден од новајлиите во тимот. Станува збор за Марко Срдановиќ, 25-годишното српско крило кое се покажа како вистински избор за крилната позиција. Србинот блеска во Вардар, игра на завидно ниво и освен од крилна позиција, редовно сигурно реализира и пенали. Срдановиќ имаше договор до јуни 2024 година и стави потпис на нов двегодишен договор со „црвено-црните“, иако тоа не е честа ракометна пракса. Самиот ракометар е пресреќен за тоа што игра во Вардар. Срдановиќ призна дека тоа бил неговиот најдобар потег во кариерата и е задоволен од сите сегменти. „Доаѓањето во Вардар ми беше најдобриот потег во кариерата. Одлично се снајдов во Скопје, клубот и играчите ме прифатија како семејство, и таа хемија носи резултат. Вардар создава тим што во иднина ќе биде не само квалитетен, туку и доминантен. Затоа сметам дека останувањето во Скопје е уште еден вистински потег. Имам одлични соиграчи, управа и пред се навивачи. Тоа секогаш носи резултат“, изјави Срдановиќ. Вардарци работат на стабилизирање на проектот и поставување на здрави темели за иднината. Ова лето беа доведени квалитетни млади играчи кои надополнети со неколкуте поискусни се вклопија одлично Досега Вардар е лидер во групата Б во регуларниот дел од сезоната и веројатно со максимален број бодови ќе оди во плеј-офот.

Марко Срдановиќ е нов ракометар на Вардар

Бошко Тасиќ — Sun, 23 Jul 2023 06:47:52 +0000

Ракометниот клуб Вардар го промовираше Марко Срдановиќ во ново засилување. 25-годишниот ракометар стави потпис на двегодишен договор со клубот. Срдановиќ кој веќе е дел од подготовките на Вардар, денеска и официјално е промовиран за нов играч на црвено-црните. „Левото крило, Марко Срдановиќ (25) потпиша двегодишен договор со Вардар, со можност за уште една сезона доколку клубот е задоволен од неговите игри. Тој доаѓа од тимот на Металопластика од Шабац со кој оваа сезона го освои Купот на Србија“, стои во соопштението на РК Вардар.

РК Вардар го договори првото засилување за наредната сезона

Бошко Тасиќ — Sat, 29 Apr 2023 06:30:15 +0000

Македонскиот ракометен шампион Вардар веќе го договори и првото засилување за наредната сезона, откако реши да го ангажира српскиот ракометар Марко Срдановиќ, јавува српскиот весник „Спортски Журнал“. Станува збор за 25-годишен играч кој настапува на позицијата лево крило и кој веќе потпишал договор на „една плус една година“ со македонскиот првак. Во ситуација кога Талески е на излезна врата кон Бенфика, се најавува дека и Дејан Манасков летово ќе го напушти Вардар и ќе се реши за нов ангажман во странство. Срдановиќ најверојатно ќе го заземе местото токму на Манасков. Срдановиќ доаѓа од Металопластика и извесно време помина на калење во тимот на Леотар од Требиње, по што пред три години се врати назад во Шабац и оттогаш е стандарден во таборот на својот тим.