Мартин Скорсезе – Kurir.mk

Зошто Ди Каприо е меѓу омилените глумци на Скорсезе?

Ивона Петрова — Thu, 18 May 2023 07:49:50 +0000

Американскиот режисер Мартин Скорсезе во интервју за „Дедлајн“ (Deadline) открива зошто го користи Леонардо ди Каприо во повеќето, т.е. наизглед сите негови филмови од 21. век. Ди Каприо и Скорсезе досега имаат работено на шест долгометражен и еден краткометражен филм: „Бандите на Њујорк“ од 2002 година, „Авијатичарот“ (2004), „оскароскиот“ „Покојните“ (2006), „Островот Шатер“ (2010), „Волкот од Волстрит“ од 2013 година, потоа - кусиот филм „Аудиција“ (2015) и конечно - „Убијци на цветната месечина“ (Killers of the Flower Moon) којшто своето прикажување ќе го има во декеември оваа, 2023 година. - Она што е фантастично за Лео и зошто толку често соработуваме е тоа што тој често талка како глумец во оние тешки сложени места коишто се речиси неразбирливи за другите актери на крајот сѐ тоа излегува толку кристално јасно со него. Обично можеш да го видиш тоа во неговиот израз, во лицето, очите... Тоа секогаш му го кажувам!, изјави Скорсезе. Според него, Ди Каприо е природен на сцената. - Би можел да го снимам одблиску, тој може да не размислува за ништо, а јас да ставам што било во таа сцена, и луѓето повторно ќе речат дека е одличен. Тоа е нешто како „Кулешовиот ефект“. Може да го направиш тоа со Ди Каприо. Има нешто во неговото лице кога камерата ќе застане на него. Во неговите очи. Дури и кога се движи за милиметар, ние го гледаме тоа. Многу е занимливо она што се случува со него на сцената, заклучи Скорсезе. Режисерот се осврна и на неговата соработка со Роберт де Ниро, со кого исто така снимил доста филмови. Имено, Де Ниро бил тој што му го посочил Ди Каприо на „оскаровецот“ зад камерата.

„Неразредена љубов кон филмот“: Мартин Скорсезе го пофали својот помлад колега Тај Вест

Ивана Ефремовски — Thu, 22 Sep 2022 08:53:22 +0000

Филмот „Бисер“ (Pearl), вториот филм од трилогијата во режија на Тај Вест, има тешка задача – да ги исполни високите очекувања, по успехот на првиот дел „Х“. Сепак, судејќи според првите критики, овој хорор може и да го надмине својот претходник. Меѓу оние со најсилен впечаток од свежиот, имагинативен пристап кон темата, која со години делуваше целосно исцрпена, е и познатиот режисер Мартин Скорсезе. Оскаровецот вели дека бил толку згрозен, но воодушевен од хоророт, што решил и јавно да го напише своето видување на сѐ тоа. „Филмовите на Тај Вест имаат енергија, толку ретка деновиве, поттикната од чистата, неразредена љубов кон филмот. Ја чувствувате во секој кадар. Како претпродолжение на „Х“, направен во дијаметрално спротивниот филмски стил (како мелодрама од 50-тите), ‘Бисер’ нуди диви, хипнотизирачки и длабоко, длабоко вознемирувачки 102 минути. Вест и неговата муза и креативна партнерка Мија Гот навистина знаат како да си играат со својата публика, пред да го заријат ножот во нашите гради и да го завртат. Бев вџашен, шокиран, па исто толку и вознемирен, а потоа не можев да заспијам. Но, не можев ниту да престанам да гледам“, напиша Скорсезе во својот осврт. Последниот дел од трилогијата – „Максин” (MaXXXine) е веќе најавен и двојката веќе работи на него. „Бисер“ беше премиерно прикажан на Венецискиот филмски фестивал и сега се прикажува во кино. (МИА)

Мартин Скорсезе ќе снима нов филм со Ди Каприо

Ивона Петрова — Wed, 03 Aug 2022 12:03:33 +0000

Американскиот режисер Мартин Скорсезе и Леонардо ди Каприо планираат нова соработка, по филмовите „Бандите на Њујорк“ (Gangs of New York), „Авијатичарот“ (The Aviator), оскаровскиот „Покојните“ (The Departed), „Островот Шатер“ (Shutter Island) и „Волкот од Волстрит“ (The Wolf of Wall Street). Следниот проект на дуото е историска драма за опстанокот, сместена на брегот на Јужна Америка, во средината на 18. век. Приказната раскажува за британски воен брод кој ќе се насука на осамен остров близу на Чиле, каде што во суровата борба за живот, екипажот гладува, па се случуваат убиства и бунтови… Правата за филмот ѝ припаѓаат на стрим-платформата „Епл“. Филмот е заснован на книгата „Облогот: Приказна за еден бродолом, бунт и убиство“ (The Wager: A Tale of Shipwreck, Mutiny and Murder), од американскиот писател Дејвид Гран. Претходно, идната 2023 година, Ди Каприо и Скорсезе ќе бидат актуелни со филмот „Убијците на Цветната Месечина“ (Killers of the Flower Moon), исто така заснован на книга на Гран.

Мартин Скорсезе снима нов филм

Ивона Петрова — Wed, 21 Apr 2021 07:30:28 +0000

Американскиот режисер Мартин Скорсезе го почна снимањето на новиот филм „Убијците на цветната Месечина“ (Killers of the Flower Moon), заснован на истоимениот роман од 2017 година од Дејвид Грен. Снимањето започна во американската сојузна држава Оклахома. – Возбудени сме што конечно ќе започнеме со снимањето на филмот „Убијци на цветната Месечини“ во Оклахома. Можноста да ја раскажеме оваа приказна на местото каде што се одвивала, е прилично важна за да се опише времето и луѓето, рече Скорсезе. Романот на Грен е напишан во 1920-тите и говори за Оклахома, каде што припадници на домородното племе Ниуконска биле убиени затоа што нашле нафта на нивна територија… Претходно се очекуваше дека главната улога во филмот ќе ја има оскаровецот Леонардо ди Каприо, но последните податоци говорат дека тој нема да глуми и е заменет со Џеси Племонс, познат по сериите „На лош пат“ (Breaking Bad) и „Фарго“. Познато е дека во филмот ќе глумат и Роберт де Ниро, Лили Гледстон, Танту Кардинал, Кара Џејд Мајерс, Џејн Колинс, Луис Канселми и други. Датумот на прикажување на филмот сè уште не е објавен.

Скорсезе ќе режира филм за турнејата на Боб Дилан во 1975 година

Ивона Петрова — Fri, 11 Jan 2019 12:37:17 +0000

Она што неколку години се сметаше само за гласина, дека Мартин Скорсезе ќе режира документарен филм за славната турнеја на Боб Дилан во 1975 година, сега е и официјално потврдено. Се работи за турнејата „Rolling Thunder Revue”. Документарецот под наслов „Rolling Thunder Revue: A Bob Dylan Story by Martin Scorsese” ќе биде прикажан оваа година на Нетфликс, но датумот на премиерата не е прецизиран. Соработката со самиот Дилан, е исто така потврдена, наведува „Варајети“. Филмот на најсликовит начин ќе ги прикаже концертите, еуфоријата и целата таа атмосфера во 1975 година. МИА