Матео Ренци – Kurir.mk

Рензи: Мелони ми е ривал, а дека сега во Италија постои ризик од фашизам е апсолутно лажна вест

Тале Кристо — Tue, 27 Sep 2022 14:05:36 +0000

Мелони ми е ривал, ние ќе продолжиме да се бориме меѓусебно, но, идејата дека сега во Италија постои ризик од фашизам е апсолутно лажна вест, рече поранешниот италијански премиер Матео Ренци. Лидерот на „Италија вива“ ова го изјави во интервју за Си-ен-ен од Токио, каде присуствуваше на погребот на поранешниот јапонски премиер Абе Шинѕо. – Ние во Италија, за жал, го менуваме премиерот речиси секоја година. Ние треба да ги смениме правилата за да обезбедиме стабилност. Јас бев против Џорџа Мелони, ние израснавме заедно во политиката, но сме, и секогаш ќе бидеме ривали. Истовремено, сметам дека таа не е опасност за италијанската демократија, додаде Рензи коментирајќи го исходот од изборите. Италијанската крајнодесничарска партија „Браќа на Италија“, предводена од Џорџа Мелони, освои 26 отсто од гласовите на изборите, а нејзината десничарска коалиција има убедливо мнозинство во Парламентот, покажаа конечните изборни резултати објавени денеска.

Матео Ренци ја предлага Ангела Меркел за посредник со Русија

Ивана Ефремовски — Sun, 06 Mar 2022 21:51:10 +0000

Поранешниот премиер на Италија, Матео Ренци и лидер на партијата Италија Вива предлага поранешната германска канцеларка Ангела Меркел да разговара со рускиот претседател Владимир Путин. Ренци за весникот „Република“ изјави дека „испраќањето оружје во Киев не помага да се победи војната, ниту пак воведените санкции кон Русија. Тој предлага дијалог со претседателот Путин преку Ангела Меркел, посочувајќи дека „НАТО и ЕУ мора да најдат заеднички одговор, во спротивно новиот светски геополитички поредок уште долго ќе не распарчува“. Ренци смета дека „Путин ја менува географијата на светот, поместувајќи го центарот на гравитација на исток. Ја предизвикува Европа бидејќи има пакт со Кина, Индија и многу африкански земји. Затоа реакцијата мора да биде политичка, рече Ренци. (МИА)

Матео Ренци обвинет за незаконско финансирање партија

Ивона Петрова — Thu, 10 Feb 2022 06:49:13 +0000

Обвинителите во Италија официјално го обвинија поранешниот премиер Матео Ренци за незаконско финансирање политичка партија. Обвинителите во Фиренца велат дека на Ренци треба да му се суди по истрагата за наводните нерегуларности во финансирањето на Опен, фондација која помогна да се издигне од градоначалник на Фиренца до премиер на земјата и лидер на левичарската Демократска партија, сега лидер на центристичката Италија Вива, пишува Политико. Како што се наведува, во рамки на истрагата обвинети се уште 10 лица, меѓу кои парламентарци, бизнисмени и поранешен претседател на фондацијата, а меѓу кривичните дела кои се товарат се незаконски финансирање партии, корупција, перење пари и вршење влијание. Во истрагата се вклучени и четири компании, меѓу кои и British American Tobacco Italia. Според обвинителите, „Опен“ се однесувал како да е дел од Демократската партија и добил 3,5 милиони евра средства кои биле потрошени за поддршка на политичките активности на Ренци и неговите сојузници. Подготвителчното рочиште ќе се одржи на 4 април кога истражниот судија ќе одлучи дали судењето ќе продолжи.

Родителите на Матео Ренци осудени за финансиски измами

Ивона Петрова — Tue, 08 Oct 2019 07:14:46 +0000

Италијански суд ги прогласи родителите на поранешниот премиер Матео Ренци за виновни за издавање лажни сметки и ги осуди условно на една година и девет месеци. Тициано Ренци и Лора Боволи, двајцата во 70-ти години, беа прогласени за виновни за издавање лажни сметки за вкупно 160.000 евра во 2015 година преку две мали компании. И двајцата ги негираа обвиненијата, а нивниот адвокат Федерико Багатини рече дека ќе ја обжали пресудата. Родителите на Ренци кратко време беа во куќен притвор во февруари во врска со посебна истрага за обвиненија за измама за лажен банкрот и издавање лажни фактури во име на трета компанија.

Поранешниот италијански премиер ќе формира нова партија

Предраг Кукиќ — Tue, 17 Sep 2019 11:07:42 +0000

Поранешниот италијански премиер Матео Ренци најави дека ја напушта центристичко-левчарската Демократска партија за да формира сопствена што може да ја дестабилизира новата владина коалиција, пренесува „Гардијан“. – Одлучив да ја напуштам Демократската партија за заедно со другите да формирам нова партија која поинаку ќе ја третира политиката – објави Ренци на Фејсбук само една недела откако Демократската партија влезе во владина коалиција со Движењето пет ѕвезди. Ренци не е дел од новата влада која беше формирана за да го спречи ултрадесничарскиот лидер и поранешен министер за внатрешни работи Матео Салвини да свика предвремени избори на кои ќе се кандидираше за премиер. Ренци, кого го сметаа за реформатор кога стана најмладиот италијански премиер во 2014 година, предизвикуваше поделби во редовите на Демократската партија, особено кај левицата која генерално му е лојална на партискиот лидер Николас Ѕингарети. Италијанските медиуми пренесуваат дека 30 пратеници можеби ќе му се приклучат на Ренци, но тој изјави дека ќе продолжи да ја поддржува владата на премиерот Џузепе Конте.

Политико: Матео Ренци се враќа во политиката

Ивана Ефремовски — Thu, 05 Sep 2019 06:33:04 +0000

По неколку жешки августовски недели на италијанската политичка сцена поранешниот италијански премиер Матео Ренци се враќа во политиката, излегувајќи од политичката сенка, а притоа „ранувајќи“ тројца свои најголеми ривали, забележува „Политико“ од својата европска редакција. Подавајќи му рака на својот поранешен непријател – Движењето „Пет звезди“, поранешниот градоначалник на Фиренца, познат во неговата земја како „ разурнувач“, го отвори патот за новата влада на политичкиот центар. Тоа му дава шанса на Рим да се врати на курсот по кој се движат Берлин, Париз и Брисел, и да не биде оставен на патот, следен од Будимпешта и Москва, коментира порталот. Откако во 2016 година ја загуби функцијата премиер, а минатата година и на лидер на левоцентристичката Демократска партија (ДП), Ренци изгледа беше оставен на заборавот, останувајќи обичен сенатор, кој ги напаѓа политичките противници со постови на социјалните мрежи. Неговото свртување кон Движењето „Пет звезди“ минатиот месец ги заинтригира неговите непријатели. Откако го блокира сојузот со партијата на минатогодишните општи избори, тој одеднаш објави дека е подготвен да се обедини со своите непријатели за да ја спречи крајнодесничарската партија на Матео Салвини – Лига, да се врати на власт со евентуална победа на избори во текот на есента. -За мене сојузот со Движењето „Пет звезди“ е огромна жртва. Ја правам само за Салвини да го испратам дома и да ја спасам италијанската економија, призна Ренци. „Ова е услуга која и ја правам на земјата и се обидувам да и подадам рака на Европа во момент кога се навестува катастрофален Брегзит, а германската економика е во застој“, дополни Ренци во интервју за „Политико“. (МИА)

Ренци е подготвен за соработка со Движењето „Пет ѕвезди“

Ивона Петрова — Wed, 21 Aug 2019 08:06:51 +0000

Поранешниот италијански премиер Матео Ренци изјави дека е подготвен за соработка со Движењето „Пет ѕвезди“, доколку таа соработа доведе до конструктивен став кон Европа. -Треба да се обидеме и да формираме влада, доколку е тоа можно, изјави Ренци за телевизијата Франс2. Ренци се појавува во јавноста само ден по оставката на италијанскиот премиер Џузепе Конте. Политичарите од Движењето „пет ѕвезди“ и Демократската партија на Ренци отворено разговараат за формирање коалиција која треба партијата Лига, на Матео Салвини, да ја испрати во опозиција, пренесуваат британските медиуми.