медитерански игри – Kurir.mk

Косово ја доби организацијата на Медитеранските игри 2030

Ивана Ефремовски — Sat, 09 Sep 2023 08:25:40 +0000

Генералното собрание на Меѓународниот комитет на Медитеранските игри (МКМИ), што се одржа синоќа во Ираклион, Грција, одлучи да му ја додели на Косово организацијата на Медитеранските игри во 2030 година. Како што јавуваат косовските медиуми, кандидатурата на Косово, поточно Приштина, ја претставија премиерот Албин Курти, претседателот на Косовскиот олимписки комитет (КОК), Исмет Красниќи и генералниот секретар на КОК, Бесим Алити, а на седницата на Собранието на МКМИ беа присутни и други високи владини претставници, меѓу кои и тројца министри. Кандидатурата на Косово доби поддршка и од Албанија, каде што ќе се одржат дел од настаните. Позитивна оценка за кандидатурата даде и комисија на МКМИ, која престојуваше во Косово пред една недела. Претходно, Собранието на МКМИ ја смени регулативата со која на земјите без излез на море не им се даваше можност да ги организираат Медитеранските игри, со што се отвори патот за организирање на меѓународниот спортски настан во главниот град на Косово. Во гласањето учествуваа 66 делегати на Меѓународниот комитет на Медитеранските игри. За кандидатурата на Приштина гласаа 55 од нив, осум беа против, а тројца воздржани. На Медитеранските игри учествуваат спортисти од 26 земји. Десет од овие земји не го признаваат Косово. Се очекува Косово да инвестира над 250 милиони евра за организација на овој голем спортски настан. „Приштина 2030“ ќе биде 21. издание на Медитеранските игри. Според медиумските извештаи од Грција, на вчерашното Собание имало обиди на претставници на Србија да ја блокираат кандидатурата на Косово, но тоа не им успеало. Откако кандидатурата на Приштина беше прогласена за победничка, со делегатите разговараше и премиерот на Косово, Албин Курти, кој рече дека ова е одлична одлука за Косово и неговите граѓани. - Одлични вести за Косово и за сите нас. Благодарност до сите што ја поддржаа кандидатурата. Ја цениме можноста што ни е дадена да ги обединиме 26-те членки на Медитеранските игри во нашата земја... Ова достигнување е резултат на голема работа. Не се работи само за медали, туку и за поттикнување на пријателството. Овие игри ќе бидат одличен доказ за големината на Косово и медитеранскиот регион, рече Курти Во 2026 година Медитеранските игри ќе се одржат во Таранто, Италија, а последните се одржаа во Оран, Алжир минатата година. На игрите во Оран учествуваа 3.298 спортисти, а се очекува дека над три илјади спортисти ќе учествуваат и на игрите во Приштина. Косовските спортисти веќе учествуваа на две изданија на Медитеранските игри, на кои, благодарение на џудистите, имаат освоено неколку медали. (МИА)

Ивановски со нов македонски рекорд на 5.000 метри до осмо место на МИ

Бошко Тасиќ — Sun, 03 Jul 2022 19:33:48 +0000

Најдобриот македонски атлетичар Дарио Ивановски имаше добар настап на Медитеранските игри (МИ) во Оран, каде што го освои осмото место на трката на 5.000 метри. Ивановски со време 13:54.58 стигна до осмата позиција во конкуренција на 14 учесници на трката, а притоа постави нов македонски рекорд, додека прв заврши Софијан Букантар со време 13:36.12. Македонскиот атлетичар го подобри времето за две секунди, па така новиот рекорд изнесува 13:54.58.

Таеквондистот Георгиевски во полуфинале на Медитеранските игри

Ивона Петрова — Sun, 03 Jul 2022 13:56:43 +0000

Македонскиот таеквондист Дејан Георгиевски се пласира во полуфиналето на Медитерански игри во Алжир. Медалистот од последната Олимпијада, денес во четвртфиналната борба на Игрите во Оран, во категоријата +80 кг помеѓу го победи Ахмад Мохамад од Египет со 20:18. Македонецот против себе имаше одличен противник кој по две рунди имаше водство (14:12). Георгиевски во последната рунда влезе самоуверено и одлучно да стигне до победата и успеа во својата намера. Претходно во текот на денот, македонската таеквондистка Сања Поповска загуби од Ашракат Дарвиш (Египет) во категоријата -57 кг. во 1/16финалето.

БРАВО – Македонија ќе игра полуфинале на Медитеранските игри

Бошко Тасиќ — Sat, 02 Jul 2022 20:04:29 +0000

Машката ракометна репрезентација на Македонија обезбеди полуфинале на Медитеранските игри во Алжир. По убедливиот триумф на Шпанија над Алжир со 31-19, стана јасно дека домаќинот нема шанси да напредува од третото место во групата.Македонија со две победи, едно реми и еден пораз, како и со подобра гол-разлика од Алжир, го освои второто место со пет бода и се пласира во полуфиналето. Ривал на нашата селекција ќе биде Египет, додека во второто полуфинале ќе се сретнат Шпанија и Србија. Мечот меѓу Македонија и Египет ќе се игра на 4 јули од 14:00 часот.

МИ: Женската ракометна репрезентација поразена од Србија

Бошко Тасиќ — Fri, 01 Jul 2022 16:40:23 +0000

Женската репрезентација на Македонија која на Медитеранските игри во Алжир настапува со состав од кадетско-младински микс, беше поразена на вториот натпревар од поискусната репрезентација на Србија со 18:26 (8:10). Ракометарките на Србија победата ја обезбедија во второто полувреме кога при нерешен резултат од 16:16 направија серија од 8:0 и рутински ја завршија задачата во денешниот дуел. Во првиот натпревар, Македонија беше поразена од Турција. Најефикасни во репрезентацијата на Македонија беа Јована Кипријановска и Теодора Дукоска со по пет погодоци, додека Ивана Арсенивска и Андреа Седлоска постигнаа по три гола во противничката мрежа. Репрезентацијата на Португалија е последниот противник на Македонија во првата фаза на Медитеранските игри. Натпреварот против Португалија е закажан за 2 јули, со почеток од 15:15 часот.

Ислами остана без финале на Медитеранските игри

Ивона Петрова — Fri, 01 Jul 2022 08:27:04 +0000

Македонската атлетичарка Дрита Ислами не успеа да се пласира во финалната трка на 400 метри со пречки на Медитерански игри во Оран, завршувајќи како деветопласирана во квалификациите. Дрита, која во квалификациите оствари време од 59.16 секунди, е првата од четворицата македонски атлетичари, кои се пријавени за настап на Игрите во алжирскиот град Оран. Според програмата, денеска во квалификациите на 400 метри ќе настапи Јован Стојоски, додека, в недела Дарио Ивановски ќе се појави на патеката во трката на 5 000 метри. Андреас Трајковски, пак, го очекува настапот во скок во далечина.

Ракометарите поразени од Шпанија

Бошко Тасиќ — Thu, 30 Jun 2022 17:40:19 +0000

Македонската ракометна репрезентација загуби од Шпанија со убедливи 22-31 во рамкиte на 3.коло од групата Б на Медитеранските игри во Оран,Алжир. „Црвената фурија“ беше преголем залак за избраниците на селекторот Кирил Лазаров, кои беа во резултатски егал само во почетните 10 минути. Со една серија од 5-0, противник во финишот на првиот дел направи предност од 7-13, а на полувремето беше 8-14. Шпанија ги казнуваше сите загубени топки на Македонија и секој нереализиран напад. Повторно имаше серија од 5-0, кога дојде до најубедливите 13-25. Нашите ракометари малку се консолидираа во финишот и го ублажија поразот за конечни 22-31. Мартин Серафимов со осум голови беше најефикасен во нашиот табор, а интересно е тоа што сите играчи се запишаа во листата на стрелците совен Кристијан Симоноски. Утре од 19 часот се среќаваме со Турција во рамки на 4.коло. Досега на турнирот од три натпревари имаме победа против Грција, реми со домаќинот Алжир и денеска пораз од Шпанија.

Ракометарките со пораз го почнаа настапот на Медитеранските игри

Бошко Тасиќ — Thu, 30 Jun 2022 17:35:31 +0000

Македонската женска ракометна репрезентација го загуби првиот натпревар на Медитеранските игри во Алжир откако денеска бевме поразени од Турција со убедливи 34-27. Избраничките на Љубомир Савевски беа добри на стартот од мечот, резултатот беше 9-9 кога Турчинките почнаа да се одлепуваат, на одморот противникот имаше предност од 19-16. Во вторите 30 минути сликата беше иста, Турција ја зголеми предноста и на крајот го доби мечот со 34-27. Најефикасна во нашиот состав беше Кипријановска со шест голови, Џатевска постигна пет. Следниот натпревар на Македонија е против Србија.

ЗЛАТЕН МЕДАЛ ЗА НУРОВ НА МЕДИТЕРАНСКИТЕ ИГРИ

Бошко Тасиќ — Tue, 28 Jun 2022 20:47:38 +0000

Македонскиот борец Магомегаџи Нуров славеше против Турчинот Фејзулах Ататурк со 4-3 во категоријата до 97 килограми слободен стил и го освои златниот медал за Македонија на Медитеранските игри во Алжир. Ататурк имаше водство од 3-0, но Нуров се врати и успеа најпрво да намали на 2-3, а последниот удар го имаше во последните секунди, кога освои дополнителни два бода за златен медал. Ова е втор медал на Медитеранските игри за Македонија, откако претходно Владимир Егоров во репасажот во категоријата до 69 килограми стигна до бронзата.

Егоров и донесе бронзен медал на Македонија од Медитеранските игри

Бошко Тасиќ — Tue, 28 Jun 2022 19:13:26 +0000

Македонскиот борач Владимир Егоров го освои бронзениот медал на Медитеранските игри во Алжир. Тој вечерва во репасажот го победи Абделхак Кербаче со 7:2. Егоров поведе со 1:0, домашниот борач направи пресврт и дојде во водство со 2:1, а потоа следуваа шест врзани победи за македонскиот борач за конечни 7:2. Македонското борење вечерва ќе освои уште еден медал, а дали ќе биде златен или сребрен зависи од исходот на борбата на Магомедгаџи Нуров со Фејзулах Актурк од Турција.