медиумска писменост – Kurir.mk

Конференција „Медиумска писменост во дигиталните простори“

Ивана Ефремовски — Tue, 24 Oct 2023 06:11:20 +0000

Со конференцијата „Медиумска писменост во дигиталните простори“ која денеска ќе се одржи Скопје, Мрежата за медиумска писменост го отвора петотто издание на Деновите на медиумска писменост (2023). Конференцијата е во организација на Агенцијата за аудио и аудиовизуелни медиумски услуги, Фондацијата Метаморфозис, Македонскиот институт за медиуми и ИРЕКС и ќе се состои од два панели и една работилница. Деновите на медиумската писменост е национален настан кој има за цел мобилизирање на граѓаните, образовните установи, граѓанските организации, медиумите и државните институции и за подигнување на свеста за напредокот постигнат во медиумската и информациската писменост. Оваа година темата на ДМП е: „Медиумска писменост во дигиталните простори“ и е произлезена од темата на Глобалната недела. Сите заинтересирани кои сакаат да учествуваат на настаните што ќе се одржуваат во живо, хибридно или онлајн, како и медиумските содржини кои ќе се прикажуваат во рамки на Деновите на медиумска писменост 2023, може да ги следат на Мрежата за медиумска писменост на Facebook, Instagram и Youtube, како и на веб страниците https://mediumskapismenost.mk/ и https://avmu.mk/ (МИА) Фото: МИА архива

Панел-дискусија за вклучување на медиумската писменост во основното образование

Ивана Ефремовски — Mon, 02 Oct 2023 06:00:38 +0000

Панел-дискусија „Вклучување на медиумската писменост во основното образование – искуства и предизвици“ ќе се одржи денеска во Скопје. На панел-дискусијата ќе се обратат министерот за образование и наука Јетон Шаќири и директорката на канцеларијата за општ развој на УСАИД Дон Кармин. На настанот ќе биде претставена Рамката за медиумска писменост во основното образование, подготвена од работната група составена од претставници на Бирото за развој на образованието, ИРЕКС и МИМ. - Овој документ ги содржи наставните програми за одделни предмети од прво до девето одделение во кои медиумската писменост е вклучена како посебна тема со дефинирани резултати од учењето, содржини и стандарди за оценување, информираат од МИМ. За искуствата од досегашното вклучување на медиумската писменост во наставниот процес ќе говорат неколку наставници од основните училишта вклучени во програмата. Овој настан се организира во рамки на Проектот на УСАИД за медиумска писменост „Младите размислуваат“, што го спроведуваат ИРЕКС и локалните партнери Македонскиот институт за медиуми, Институтот за комуникациски студии и Младинскиот образовен форум, со соработка со Министерството за образование и наука и Бирото за развој на образованието. (МИА)

Конференција за медиумската писменост во образованието

Ивона Петрова — Tue, 18 Dec 2018 07:02:50 +0000

Во Скопје денеска ќе се одржи завршна конференција насловена „Медиумската писменост во образованието – предуслов за учество на младите во општествените и политичките процеси во Македонија“. На конференцијата ќе се презентираат наодите од истражувањето што Високата школа за новинарство и за односи со јавноста ги реализираше во соработка со Бирото за развој на образованието при Министерството за образование и наука. Истражувањето ја анализира состојбата во основното образование во однос на присутноста на медиумската писменост во наставата, резултатите од фокусните групи со наставниците, а претставена е и компаративната анализа на образовниот систем во Словенија и медиумско описменување на учениците. Најавено е присуство на истражувачи и професори од Хелсинки, Единбург и Лондон кои ќе ги пренесат моделите на медиумско образование во своите држави, а ќе се дискутира и за медиумската и информациската писменост низ перспективите на УНЕСКО. Со конференцијата завршува тригодишниот проект „Медиумска писменост во ера на наплив на информации: Коалиција за медиумска писменост“ што Високата школа за новинарство и за односи со јавноста го реализираше во соработка со дневниот весник „Нова Македонија“ и Институтот за различности во медиумите од Лондон. Проектот го финансира Европската Унија. МИА