мека – Kurir.mk

Во Мека денеска почнува аџилакот, еден од петте столба на исламот

Катерина Бојаџиева — Sun, 25 Jun 2023 08:16:13 +0000

Во Мека денеска почнува годинашниот аџилак, еден од петте столбови на исламот, и на него се очекува да присуствуваат повеќе од два милиони муслимани од целиот свет. Тоа ќе биде најголемиот аџилак откако пандемијата на коронавирусот ги принуди саудиските власти драматично да го намалат настанот, пренесува Хина. Повеќе од 926.000 аџии учествуваа во 2022 година, во споредба со само 59.000 претходната година, покажуваат официјалните податоци. Во 2019 година, на аџилакот се собраа околу 2,5 милиони муслимани. По целосното укинување на ограничувњата поврзани со Ковид-19 и старосната граница, Кралството Саудиска Арабија очекува да се врати на нивоата пред пандемијата, што значи пристигнување на повеќе од два милиони луѓе. Од сите муслимани се очекува барем еднаш во живото да го извршат аџилакот (хаџот) во Мека, се разбира, доколку имаат средства за тоа и се здрави. Верниците се собираат во светиот град на неколкудневни ритуали во кои го следат патот на последниот аџилак на пророкот Мухамед.

Завршија подготовките за аџилак, над 2.000 верници од земјава ќе заминат во Мека

Тале Кристо — Sat, 10 Jun 2023 12:17:40 +0000

Годинава на аџилак и во посета на светите муслимански места од земјава ќе заминат над 2.000 верници, што претставува рекорден број и подготовките поминаа во најдобар ред, изјави поглаварот на Исламската верска заедница, реисот хаџи Хафиз Шаќир Ефенди Фетаи на информативната средба со верниците во Гостивар. - Од нашата земја оваа година на аџилак ќе заминат 2030 верници, кои ќе им се придружат на околу четири милиони верници од целиот свет. Оваа година бројот на аџии од Северна Македонија е поголем од која било друга земја на Балканот, рече Фетаи. Тој на верниците кои се собраа на традиционалниот информативен собир им посака добро здравје и да се придржуваат до препораките на верските лидери и лекарскиот тим. Рекорден број на верници, годинава ќе заминат од Гостиварско и сите подготовки поврзани со визи, авионски билети, вакцини се завршени и како што рече гостиварскиот муфтија Сабахудин Зендели, верниците може да заминат за Саудиска Арабија и да го исполнат петтиот услов на исламот. Собирот беше можност верниците да се запознаат со нивните водачи и да слушнат совети и предавања поврзани со престојот во светите места. Муфтијата Зендели напомена дека од гостиварско на аџилак годинава ќе одат 451 аџии кои ќе бидат придружувани верски лица и медицински тим со тројца лекари. Најстариот верник кој ќе замина Хаџот 2023 има 80 години, а најмладиот 26. Покрај советите и благословот, верниците денес ги добија и пакетите во кои се наоѓа традиционалната наметка ирхам. Првата и втората група ќе тргне на 16 јуни, односно 17 јуни со по 180 верници, а последната со 85 ќе отпатува на 18 јуни. ИВЗ го организираше патот, сместувањето и храна за време на 28 дневниот престој.

Милион муслимански верници на аџилак во Мека

Ивона Петрова — Wed, 06 Jul 2022 11:21:56 +0000

Милион муслимански верници се собраа денеска во светиот град Мека во Саудиска Арабија, со цел да учествуваат во аџилакот. Пандемијата од коронавирусот изминатите две години значајно го ограничи пристапот до едно од најголемите муслимански светилишта. Министерството за аџилак на Саудиска Арабија издаде дозволи за еден милион аџии од земјата и од странство да извршат аџилак, што почнува денеска. Станува збор за бројка помала од 2,5 милиони муслимани кои за таа намена допатуваа во 2019 година. Од Министерството соопштија дека годинава аџилакот е за лица помлади од 65 години, целосно вакцинирани. Муслимански верници кои доаѓаат од странство мора да ги почитуваат сите здравствени мерки на претпазливост и да имаат негативен резултат од ПЦР тест. Лицата се избрани меѓу милиони пријавени низ систем на лотарија на интернет. Само илјада верници можеа да извршат аџилак летото во 2020 година. Аџилакот во Мека е еден од петте столбови на исламот. Секој муслиман е должен барем еднаш во животот да отиде на аџолак. Аџилакот се состои од патување во Мека, пристигнување и чествување на аџилакот, што вклучува девет основни обреди.

Само вакцинирани или со стекнат имунитет од Ковид-19 на мал аџилак во Мека

Катерина Бојаџиева — Mon, 05 Apr 2021 18:47:26 +0000

Само луѓето кои биле вакцинирани или со стекнат имунитет од Ковид-19 ќе можат да одат да вршат омра, мал аџилак во Мека за време на муслиманскиот месец на постот Рамазан, што почнува во средината на април, соопштија саудиските власти. Министерството за аџилак објави дека „само на лицата имунизирани од коронавирусот“ ќе им биде дозволено да вршат аџилак или молитви во Големата џамија во Мека на почетокот на Рамазан. „Тие луѓе спаѓаат во три категории, оние кои примиле две дози вакцина, оние кои примиле само една доза 14 дена порано и оние кои биле излекувани од коронавирусот“, соопштија властите. За време на Рамазан во Мека обично има голем број верници од Саудиска Арабија и други муслимански земји. Мал аџилак, или омра, може да се изведува во текот на целата година за разлика од аџилакот што е еднаш годишно. Малиот аџилак беше прекинат во март 2020 година поради пандемијата, а на почетокот на октомври полека почна да се враќа со мерки на претпазливост.

Аџиите почнаа да пристигнуваат во Мека

Магдалена Андонова — Mon, 27 Jul 2020 12:25:46 +0000

Муслиманските верници денеска почна да пристигнуваат во Мека на аџилак, но во драстично помал број поради пандемијата со новиот коронавирус. Аџилакот почнува в среда и обично Мека во текот на петдневниот верски обред ја посетуваат околу 2,5 милиони луѓе од разни краеви на светот. Министерството за аџилак на Саудиска Арабија соопшти дека годинава ќе можат да учествуваат од илјада до 10.000 луѓе, кои веќе престојуваат во земјата, од кои две-третини се жители кои имаат странско државјанство. Саудиската Влада годинава ќе ги покрие трошоците на аџиите, вклучително овброците, хотелското сместување, транспортот и здравственото осигурување. Саудиска Арабија од аџилакот секоја година има една милијарда долари приход, Кралството е една од најзагрозените земји од епидемијата со Ковид-19 на Блиски Исток, со повеќе од 266.000 инфицирани лица и 2.733 смртни случаи. (МИА)

За повеќе од два милиона верници денеска почна аџилакот во Мека

Дарко Андоновски — Fri, 09 Aug 2019 10:36:35 +0000

Повеќе од два милиона муслимани денеска го почнуваат аџилакот во Мека, во Саудиска Арабија, а тамошните власти предупредуваат дека нема да толерираат никакви обиди за политизација на овој верски собир во време на тензии во Персискиот залив. Вкупно 2,5 милиона верници од странство и Саудиска Арабија се пријавиле за годинешниот аџилак. -Верниците од цел свет добија над 1,8 милиона визи преку интернет, изјави еден од организаторите. Аџилакот е еден од петте столба на исламот и секој муслимански верник треба да го направи барем еднаш во својот живот, доколку има средства за него. Годинава аџилакот се паѓа во време на големи тензии во Заливот, каде во претходниот период имаше напади врз танкери со нафта, уривање беспилотни летала и запленети танкери. Иранската агенција Тасним пренесува дека 88.550 ирански верници годинава учествуваат во аџилакот и покрај тоа што Иран и Саудиска Арабија ги прекинаа дипломатските односи.

ФОТО: Инвазија на скакулци во Мека

Ивона Петрова — Sat, 12 Jan 2019 14:49:29 +0000

Најсветото место на муслиманите, Мека, го погоди инвазија од црни скакулци. Иназијата почна кон почетокот на неделата, а властите во Саудиска Арабија ангажираа 22 тимови од вкупно 138 лица да се „борат против инсектите“, наведе „Њузвик“. Тимовите се фокусирани на гнездата и местата каде се собираат црните скакулци, околу водата и водоводните цекви. Иако црните скакулци се големи штеточинци не пренесуваат зарази. Од Универзитетот „Крал Сауд“ посочија дека во Мека моментално има околу 30.000 скакулци, предупредувајќи дека можно е да се има уште една инвазија со илјадници инсекти. МИА

Од Западен Балкан на аџилак во Мека ќе заминат 4.212 верници

Матеја Петровски — Mon, 06 Aug 2018 13:10:27 +0000

Од земјите од Западен Балкан на аџилак во светите муслимански места Мека и Медина ќе заминат 4.212 верници, од коиј најголем број се од Босна и Херцеговина и Косово. Годинава од Македонија на аџилак во Саудиска Арабија ќе патуваат 672 верници, од Албанија 470, од Косово 1.080, од Босна и Херцеговина 1.680, од Србија 235, од Црна Гора 60 и од Хрватска 15 верници. Првата група од Албанија тргнува утре, а од Косово на 9 август. Верниците од Македонија, како што потврдуваат од ИВЗ, ќе патуваат со четири авионски чартер летови од 11 до 15 август. (Миа)