мекларен – Kurir.mk

Оскар Пијастри уште три години во Мекларен

Бошко Тасиќ — Thu, 21 Sep 2023 04:37:01 +0000

Австралискиот возач во Формула 1 шампионатот Оскар Пијастри останува дел од Мекларен и во следните три сезони откако денеска беше официјалнизирано продолжување на соработката која оваа сезона бележи голем успех. Поранешниот освојувач на Формула 2 и Формула 3 шампионатот досега освои 42 поени во сезоната, а едно место го делеше од пиедесталот на Големата награда на Велика Британија.

„Воодушевен сум што ја продолжувам соработката со Мекларен. Сакам да се борам за највисок пласман во овој болид. Возбуден сум за визијата и основата која е поставена со цел поголем успех во иднина“, изјави 22-годишникот.

„McLaren“ од кој застанува здивот (ВИДЕО)

Ристе Здравков — Thu, 18 May 2023 09:54:00 +0000

Ландо Норис, возач на „McLaren“ во Формула 1, се пофали со својот нов автомобил. „McLaren“ пред речиси две години го претстави моделот „765LT Spider“, а новиот сопственик на возилото, Ландо Норис, стана и возач на Ф1 тимот на оваа компанија. Како што наведува „Klix.ba“, станува збор за само еден од 765 примероци кои ќе бидат произведени со уникатни детали од одделението на „McLaren Special Operations“, но и многу карбонски влакна. Видеото кое на „Youtube“ го објави „Mclaren Automotive“ го прикажува 23-годишниот Норис како патува во Вокинг и го презема автомобилот лакиран во карбон сина боја. За оние кои се прашуваат зошто „765LT Spider“ е произведен со управувач на левата страна, одговорот е едноставен. Британецот повеќе не живее во својата земја, бидејќи се пресели во Монако пред неколку години. Контраст на сината боја и прават жолтите детали на каросеријата и потсетуваат на кацигата на Норис, додека четирите линии се однесуваат на неговиот број. На наслоните за глава стојат иницијалите ЛН, а тука е и специјализираната плочка кај јасно укажува дека автомобилот е специјално направен за Норис. Многу специјални детали се со потпис на неколку луѓе кои работеле на возилото, а меѓу нив е и директорот на „McLaren Racing“ Зак Браун. Новиот „миленик“ на Ландо работи на 4.0-литарски твинтурбо V8 мотор кој развива 755 коњски сили 870 Nm вртежен момент, а кој е поврзан со седумстепенски автоматски менувач со двојно квачило. „McLaren 765LT“ од 0 до 100 км/ч забрзува за само 2,8 секунди, а до 200 км/ч за 7,2 секунди, додека максималната брзина изнесува 330 км/ч.

Мекларен ги продаде историските болиди на Бахреин

Бошко Тасиќ — Sat, 03 Dec 2022 06:13:53 +0000

Британската компанија Мекларен беше принудена да продаде дел од својата колекција на историски возила на бахреинската државна фонација „Мумталакат“ за да го финансира новиот хибриден моел на автомобили „Артура“. „Мумталакат“, кои поседуваат 60 отсто од Мекларн, платиле 100 милиони фунти за историските болиди и тркачки автомобили, откако Мекларен прикажа загуба од 203 милиони фунти во првите девет месеци во 2022 година. Според портпаролот на Мекларен, со трансакцијата се обезбедува инфузија на кеш во компанијата, но не даде детали колку од 54-те Ф1 болиди и супер-автомобили од историската компанја се продадени. Одложувањето на промоцијата на моделот „Артура“ претходно во септември ги натера газдите и саудискиот државен фонд (ПИФ, инаку газди на Њукасл јунајтед), да издадат 125 милиони фунти во нови акции.

Мекларен ги смета Фетел и Албон меѓу претендентите за местото на Рикардо

Тале Кристо — Tue, 12 Jul 2022 12:26:12 +0000

Мекларен ги истражува опциите доколку Даниел Рикардо замине на крајот на 2022 година. Договорот на Австралиецот е со важност до крајот на 2023 година, но сезоната е крајно неуспешна за него. Според „Би-би-си“, Мекларен истражува кој да го замени Рикиардо доколку реши да го напушти тимот на крајот на оваа година. Меѓу претендентите се возачот на Вилијамс, Алекс Албон и четирикратниот шампион во Формула 1, Себастијан Фетел од Астон Мартин. Фетел тврдеше дека се уште не одлучил дали ќе ја продолжи кариерата – тоа ќе зависи од перспективите на британскиот тим. Себастијан има намера да се бори за високи позиции, што во моментов е невозможно со оглед на брзината на болидот. Договорот на Фетел со Астон Мартин истекува на крајот на годината. Претходно, во врска со можна транзиција во Мекларен, беа споменати возачите од Индикар серијата, Пато О’Вард и Колтон Херта (последниот врши тестови на болидот Ф-1 од 2021 година и е под договор со Андрети до крајот на 2023 година), како и резервистот на Алпин, Оскар Пјастри.

Фото: Полиција запленила златен „McLaren“ автомобил од познат инфлуенсер

Ристе Здравков — Mon, 14 Mar 2022 12:43:50 +0000

Понекогаш само купувањето на сјаен, златен суперавтомобил не е доволно, мора истиот да го осигурате. Оваа ѕвезда на социјалните мрежи, Пујан Моктари, тоа го научила на потежок начин. Господин Моктари, 31-годишниот инфлуенсер, пејач, извршен директор на бренд облека и основач на компанијата за произведување кавијар за која се верува дека вреди 10 милиони фунти, планирал да го испрати своето возило во Милано, но „не можел“ да го среди осигурувањето кога го запрела полицијата. Возилото било запрено во близина на тунел под Ламанш. Полицајците не можеле да веруваат дека заплениле автомобил вреден седум цифри кој не бил осигуран. „McLaren“ не можел физички да се смести на камионот за пренесување возила, па бил однесен во локалната полициска станица, а потоа до депонијата во Кент каде стоел повеќе од две седмици. Моктари во неделата испратил камион да го преземе автомобилот, па истиот бил испратен во Париз. Инфлуенсерот веднаш се фотографирал со возилото пред Ајфеловата кула и на неговиот Инстаграм профил објавени се фотографии од гордиот сопственик кој стои покрај неговиот имот вреден 1,3 милиони долари - „McLaren Senna“. Мораме да признаеме дека одвај ја забележавме Ајфеловата кула која се наоѓа во заднина, додека блескавите тркала на автомобилот ја крадат цела светлина. Исто така инфлуенсерот објавил фотографии со своите пријатели на улиците на Париз и јасно е дека овој немил настан не можел да не го вознемири богатиот ирански милионер.

Ауди ја купи групацијата Мекларен и Формула 1 тимот

Тале Кристо — Mon, 15 Nov 2021 13:30:29 +0000

Компанијата „Ауди“ склучи договор за купување на групацијата Мекларен, соопшти „Autocar“. Ауди ќе ја преземе контролата врз целата компанија, вклучувајќи го и тимот на Мекларен кој се натпреварува во Формула 1 шампионатот. За потсетување, претходно Мекларен Груп делумно продаде дел од Ф1 тимот на „MSP Sports Capital“ кој стекна 15 проценти од акциите, а до крајот на 2022 година уделот ќе порасне на 33 проценти. Тимот на Мекларен е вториот најстар учесник во Формула 1 и вториот најтрофеен по Ферари. зс/

Ф1: Верстапен и Мекларен најомилени

Катерина Бојаџиева — Fri, 22 Oct 2021 15:56:56 +0000

Холандскиот возач Макс Верстапен и екипата Мекларен се најомилени во Формула 1, покажуваат резултатите од обемно истражување на јавното мислење, објавено спроти трката за Големата награда на САД. Анкетирани биле дури 167.000 луѓе од 187 држави, кои како најомилени патеки во Ф1 ги издвоиле Монца, Спа-Франкошампс, Силверстон и Монте Карло. Истражувањето го нарача „Formula One and Motorsport Network“, нагласувајќи дека станува збор за анкета, која никогаш порано не е направена во овој спорт. Возачот на Ред Бул, Верстапен, води со шест бодови повеќе од Луис Хамилтон во генералниот пласман на шест трки до крајот на актуелната сезона.

Мекларен се спаси од банкротот со заем од 150 милиони фунти

Тале Кристо — Tue, 30 Jun 2020 13:45:53 +0000

Тимот на Мекларен во Формула 1 ќе избегне банкрот оваа година, откако обезбеди заем од Националната банка на Бахреин. Тие ќе издвојат 150 милиони фунти, со кои легендарниот британски тим ќе мора да се справи со последиците од пандемијата од коронавирус уште од март. Компанијата забележа загуби од 122 милиони фунти за првиот квартал од годината и отпушти вкупно 1.200 вработени, од кои 70 од тимот што се натпреварува во Формула 1. Тимскиот шеф Зек Браун се надева дека финансиската инјекција ќе му помогне на Мекларен да се стабилизира, сè додека економијата не се опорави и пазарите повторно не започнат да работат нормално.

Рикардо потпиша за Мекларен

Дарко Андоновски — Thu, 14 May 2020 07:05:55 +0000

Пилотот на Рено, Даниел Рикардо, ќе ја продолжи кариерата во Мекларен. Според „Мотоспорт- Тотал“ повикувајќи се на свои извори, Рикардо потпиша договор со британскиот тим од Формула 1 шампионатот и ќе го замени Карлос Саинц во 2021 година. Неколку извори претходно објавија за наводен трансфер на Себастијан Фетел во Мекларен, но овие информации, најверојатно не биле вистинити. Според германското издание, вчера претпладне, Рикардо го известил раководството на Рено дека нема да го обнови договорот со тимот, кој истекува на крајот на оваа година. Се очекува трансферот во Мекларен да биде официјално објавен во текот на денешниот ден.

Фетел може да ја продолжи кариерата во Мекларен

Дарко Андоновски — Wed, 29 Apr 2020 09:30:17 +0000

Пилотот во Формула 1, Себастијан Фетел од Ферари може да ја продолжи кариерата во Мекларен, изјави новинарот на „Скај Германија“, Саша Рос. – Фетел доби непријатна понуда од Ферари со сериозно намалување на платата. Очигледно, Себастијан не се смета за број 1 во тимот. Веројатно, му бил понуден договор, кој нема да го потпише. Во овој случај, неговото место во Ферари ќе биде испразнето за Карлос Саинц од Мекларен. Фетел може да оди во спротивна насока. Себастијан добро се знае со шефот на Мекларен Андреас Сеидл, тие работеа заедно во BMW. Во ситуацијата со Фетел, не станува збор за пари. Тој е заинтересиран за статус и силен, успешен автомобил. Мекларен сега ќе има мотор на Мерцедес, што не е лошо и би можело да стане привлечна опција за Себастијан, вели Рос. Договорот на Фетел со Ферари важи до крајот на 2020 година.