мевлут чавушоглу – Kurir.mk

Чавушоглу: Сириските бегалци ќе се вратат во татковината согласно планот на турските власти

Тале Кристо — Sat, 27 May 2023 11:03:00 +0000

Турција според својот план ќе ги враќа сириските бегалци. Ова го изјави турскиот министер за надворешни работи Мевлут Чавушоглу за турската телевизија НТВ. Ќе ги вратиме бегалците во Сирија според нашиот план. Ова прашање беше на нашиот дневен ред пред изборите и продолжува да биде и сега. Некои од раселените лица се испратени во областите ослободени од терористите, а за другите се гради инфраструктура за да им се овозможи да се вратат во своите домови. Околу еден милион сириски бегалци ќе можат да се вратат таму кога ќе заврши изградбата на 240.000 куќи во северна Сирија. Земјите од Персискиот залив го поддржуваат овој процес, изјави доцна синоќа Чавушоглу. Според него, би било неточно да се зборува за враќање на сите 3,7 милиони сириски бегалци кои ги прифати Турција. Претседателскиот кандидат на опозициската Национална алијанса Кемал Кулчдароглу неодамна изјави дека доколку победи на изборите ќе ги врати во Сирија сите сириски бегалци кои сега се во Турција. Тој рече дека бројката е 10 милиони, но турските власти ги отфрлаат овие тврдења.

Чавушоглу: Анкара и Каиро се договорија за подигнување на дипломатските односи на највисоко ниво

Ивана Ефремовски — Thu, 13 Apr 2023 20:08:44 +0000

Анкара и Каиро се договорија за подобрување на билатералните односи и подигнување на дипломатските односи на највисоко ниво, изјави денеска турскиот министер за надворешни работи Мевлут Чавушоглу. „Новата страница што ја отворивме со Египет сакаме да ја исполниме со заеднички проекти и успешни приказни“, рече Чавушоглу на прес-конференцијата во Анкара со египетскиот колега Самех Шукри. (МИА)

Чавушоглу и Блинкен разговараа за кандидатурата на Шведска за членство во НАТО

Тале Кристо — Wed, 05 Apr 2023 12:51:29 +0000

Турскиот министер за надворешни работи Мевлут Чавушоглу изјави денеска дека на состанокот со американскиот државен секретар Ентони Блинкен разговарале за кандидатурата на Шведска за членство во НАТО, како и за намерата на Турција да набави борбени авиони Ф-16. Двајцата имале неформален разговор во Брисел, каде се одржал и состанок на шефовите на дипломатиите на земјите - членки на НАТО, на кој и посакале добредојде на Финска во тој воен блок. По разговорот со Блинкен, Чавушоглу истакна дека Шведска треба да преземе дополнителни чекори за Турција да ја ратификува нејзината кандидатура за членство во НАТО.

Чавушоглу: Нема зголемен прилив на бегалци од Сирија

Ивона Петрова — Mon, 13 Feb 2023 15:33:28 +0000

Турскиот министер за надворешни работи Мевлут Чавушоглу ги отфрли наводите за зголемен прилив на бегалци од Сирија во Турција, нагласувајќи дека некои гранични премини се отворени во еден правец за испраќање хуманитарна помош во Сирија. „Информациите дека бегалците се повеќе пристигнуваат од Сирија не се точни“, рече Чавушоглу. Одговарајќи на наводите за голем проток на бегалци во Турција, Чавушоглу нагласи дека контролните пунктови се отворени во една насока за да се обезбеди пристап до хуманитарна помош. „Во овие тешки денови низ кои минуваме, кога ни е најпотребна солидарност и соработка, многу ни е жал што трошиме енергија за да одговориме на ваквите дезинформации што се шират на социјалните мрежи и преку различни канали“, додаде тој. Министерот истакна дека иако критикувањето или противењето на владата на претседателот Реџеп Таип Ердоган е природно, „ширењето лажни информации за да се испровоцира јавноста веројатно не е добронамерен пристап“. Во исто време, Чавушоглу нагласи дека не може да стане збор за отворање контролни пунктови на териториите во Сирија што се под контрола на курдските бунтовници. Тој објасни дека некои точки на границата со Сирија се отворени за хуманитарна помош на ОН со години, додека други се отворени само во една насока заради испраќање хуманитарна помош. Шефот на турската дипломатија објави дека до денеска 9.400 странски спасувачи од 77 земји работат во Турција на расчистување на остатоците од урнатините од земјотресот.

Чавушоглу: Турција е попозитивна за влезот на Финска во НАТО

Тале Кристо — Tue, 31 Jan 2023 14:13:50 +0000

Турција попозитивно гледа на Финска за разлика од Шведска како кандидат за НАТО, изјави денеска во Будимпешта турскиот министер за надворешни работи Мевлут Чавушоглу. – Претходно рековме дека гледаме попозитивно на кандидатурата на Финска, но НАТО сака истовремено одобрување на пристапот на двете земји, посочи Чавушоглу на заедничката прес-конференција со шефот на унгарската дипломатија Петер Сијарто. Според Чавушоглу доколку има одлука одделно да се разгледуваат барањата за прием во НАТО, тогаш ставот на Турција во однос на Финска ќе биде попозитивен. Тој повтори дека Турција нема да се согласи за членство на Шведска и Финска во НАТО, сè додека не се исполнат барањата на Анкара напишани во трилатералниот меморандум. – Не можеме да кажеме да за нивното членство во НАТО додека не се исполнат нашите барања. Во сегашниот амбиент, Парламентот нема да го ратификува тој протокол, посочи Чавушоглу.

Чавушоглу: Бесмислено е да се одржи состанок со Шведска и Финска за нивните кандидатури за НАТО

Тале Кристо — Thu, 26 Jan 2023 13:43:03 +0000

Турскиот министер за надворешни работи Мевлут Чавушоглу изјави денеска дека е „бесмислено“ да се одржи трилатерален состанок со Шведска и Финска за да се разгледаат нивните кандидатури за НАТО по протестите овој месец во Стокхолм. На прес-конференција Чавушоглу рече дека нема предлог за одвоено разгледување на кандидатурите на Шведска и Финска. Шведскиот премиер Улф Кристершон рече дека неговата земја сака да го обнови дијалогот со Турција во рамките на НАТО, откако Анкара на неодредено време ги одложи трилатералните разговори со двете скандинавски земји за нивното членство. Кристершон изрази оптимизам за приклучување во НАТО во текот на летото и покрај тековниот спор со Турција. „Има шанси, без никакво сомнение“, изјави Кристерсон за шведската новинска агенција ТТ. Иако не постави конкретна временска рамка за ова, тој изрази надеж дека „тоа ќе се случи што е можно поскоро“. Претходно оваа недела, турскиот претседател Реџеп Таип Ердоган рече дека Шведска не може да смета на поддршката на неговата земја за влез во НАТО по демонстрациите со палење на Куранот во близина на турската амбасада во Стокхолм.

Чавушоглу: Шведска не е ниту на половина пат да ги исполни условите за поддршка на Анкара за влез во НАТО

Ивана Ефремовски — Thu, 22 Dec 2022 15:58:35 +0000

Турскиот министер за надворешни работи Мевлут Чавушоглу денеска изјави дека земјата ги поздравува чекорите што ги презема Шведска за добивање одобрение за влез во НАТО, но дека не е ниту на „половина“ од исполнувањето на списокот со обврски што ги презеде за да ја обезбеди поддршката на Анкара. Чавушоглу на конференцијата со неговиот шведски колега Тобијас Билстром рече дека одлуката на шведскиот суд да не екстрадира човек кој Турција го бара за наводна поврзаност со неуспешниот пуч во 2016 година ја „труе“ позитивната атмосфера во преговорите. Шведска и Финска ја напуштија својата долгогодишна политика на воена неутралност оваа година и решија да аплицираат за влез во НАТО по руската инвазија на Украина. За ова е потребно едногласно одобрување од 30 земји-членки, но Турција се уште не дава зелено светло, а како услов ја постави екстрадицијата на членовите на групите кои Анкара ги смета за терористички. Чавушоглу додаде дека турската Влада се уште чека „конкретен развој“ кога станува збор за екстрадициите и замрзнувањето на имотот. – Има документ, тој треба да се спроведе. Сè уште не сме ни на половина пат. Ние сме на почетокот, рече тој, мислејќи на меморандумот што Турција, Шведска и Финска го потпишаа во јуни. (МИА)

Чавушоглу: Ерменија да престане да го провоцира Азербејџан

Тале Кристо — Tue, 13 Sep 2022 09:42:57 +0000

Шефот на турската дипломатија Мевлут Чавушоглу денеска ја повика Ерменија да „престане да го провоцира“ Азербејџан. – Ерменија треба да престане со своите провокации и да се фокусира на мировните преговори и соработката со Баку, напиша Чавушоглу на Твитер. Азербејџанските сили утрово извршија напад на пет до шест места. Премиерот на Ерменија, Никол Пашинјан изјави дека најмалку 49 ерменски војници загинаа во судирите на границата со Азербејџан.

Чавушоглу: Турција поддржува политичко решение на сирискиот конфликт

Тале Кристо — Tue, 16 Aug 2022 11:31:35 +0000

Турција отсекогаш поддржувала политичко решение на сирискиот конфликт, изјави денеска шефот на турската дипломатија Мевлут Чавушоглу. Режимот (сирискиот) не верува во политичко решение, тој верува во воено решение. Трајното решение е политичкото, изјави Чавушоглу во Анкара на прес-конференција со неговиот латвиски колега Едгарс Ринкевич одржана во Анкара. Чавушоглу истакна дека Турција верува дека помирувањето е клучот за траен мир во Сирија, додавајќи дека Анкара силно го поддржува територијалниот интегритет и суверенитет на Сирија.

Чавушоглу понуди помош од Турција за намалување на тензиите меѓу Србија и Косово

Тале Кристо — Mon, 01 Aug 2022 06:26:00 +0000

Турскиот министер за надворешни работи Мевлут Чавушоглу разговараше со своите колеги од Србија и Косово, пред кои ја изрази подготвеноста на Турција да помогне во намалувањето на тензиите меѓу нив, јави турската приватна телевизија НТВ. Чавушоглу имаше одвоени телефонски разговори со шефот на српската дипломатија Никола Селаковиќ и косовската министерка за надворешни работи Доника Гервала во врска со тензиите на границата меѓу двете земји. Турскиот министер на своите соговорници им порача дека Турција отсекогаш им придавала значење на мирот и стабилноста на Балканот и дека не е во ничиј интерес да создава нови тензии. Чавушоглу додаде дека здравиот разум мора да надвладее, а Турција е подготвена да направи се што е можно за да ги намали тензиите.