мигрант – Kurir.mk

Тројца мртви, еден ранет мигрант во пукотниците кај Хоргош

Ивана Ефремовски — Fri, 27 Oct 2023 09:33:45 +0000

Тројца мигранти рано утринава загинале, а еден е ранет во меѓусебна престрелка во напуштените објекти на поранешниот земјоделски имот „Бачка“ кај населеното место Хоргош, односно во пограничниот појас на Србија со Унгарија, потврдија во Полициската управа во Кикинда, јави дописникот на МИА од Белград. Престрелката се случила надвор од населениот град Хоргош, но граѓаните на таа населба се вознемирени и од рано утрово на социјалните мрежи пријавуваат за долготрајната пукотница која се слуша од пограничната зона. Пукотниците се слушале и во блискиот град Суботица. Според жителите на Суботица, пукањето траело околу 25 минути, а звуците станувале се погласни, како вооружените мигранти да се приближуваат до градот. Граѓаните посочуваат дека рафалните пукотници се слушале во близина на куќите. Силни полициски сили на МВР на Србија се на терен. Истрагата е во тек. (МИА)

Мигрант загина од струен удар во Градско

Ивона Петрова — Sun, 10 Sep 2023 10:41:18 +0000

Мигрант загина од струен удар во Градско откако се качил на покривот на вагоните на воз, што сообраќал на релација Гевгелија - Скопје. Преку единствениот број за итни повици Е-112 во ЦУК е добиена информација дека мигрант дошол во допир со кабел на електрична енергија при што лицето добило струен удар. -Случајот е пријавен во МВР и Итна медицинска помош. Според информациите добиени од МВР лицето не давало знаци на живот, а потоа и од Итната медицинска помош било констатирано истото. Настраданото лице е од машки пол на возраст од околу 30 години, информира ЦУК.

Се качил на вагон и го удрила струја, тешко повреден мигрант во Македонија

Ивана Ефремовски — Thu, 17 Aug 2023 14:37:58 +0000

На 16.08.2023 во 10:20 часот во Полициската станица Драчево, вработен во Железничка станица Драчево пријавил дека на покрив на еден вагон, машко лице мигрант се здобило со повреди при струен удар. Лицето било пренесено во Градската општа болница „Св.Наум Охридски“ каде му била укажана лекарска помош и биле констатирани тешки телесни повреди. За настанот бил известен јавен обвинител, а увид на местото извршила екипа од СВР Скопје.

Децата во Франција ги избодел мигрант: Во Шведска добил статус на бегалец, две момчиња се во тешка состојба

Ристе Здравков — Thu, 08 Jun 2023 10:21:32 +0000

Француската полиција уапси маж со сириско потекло, кој е осомничен дека денеска во парк во Анеси избодел осум деца на возраст од три години и едно постаро лице. Две деца се во критична состојба, а на местото на злосторството има бројни полициски патроли и екипи на итната помош. Според француските медиуми, кај осомничениот за нападот била пронајдена сириска лична карта. Во текот на истрагата било утврдено, дека тој во ноември минатата година, поднел барање за азил во Франција, а статусот на бегалец во Шведска го добил на крајот на април годинава. Во овој момент не е познат мотивот за нападот, ниту пак степенот на повредите на останатите деца кои беа избодени со нож во паркот.

Во кумановската болница почина мигрант кој бил прободен со остар предмет

Ивона Петрова — Tue, 30 May 2023 16:27:01 +0000

Во кумановската болница утрово почина мигрант откако претходно бил повреден со остар предмет. Како што информираат од Министерство за внатрешни работи, лицето утрово било пронајдено во атарот на кумновското село Речица со повреди од остар предмет. Лицето било пренесено во Општа болница Куманово, каде во 07:45 часот починало. - Полициски службеници на СВР Куманово извршиле увид и по преземените мерки и извршени разговори било констатирано дека настанала физичка пресметка помеѓу повеќе лица мигранти, при што починатиот мигрант бил прободен со остар предмет. Се преземаат мерки за расчистување на случајот, соопштуваат од МВР.

Трагедија во Македонија: Почина мигрант, полицаец пукал во него откако се обиделе да му го земат пиштолот

Ивана Ефремовски — Wed, 19 Apr 2023 10:58:42 +0000

Утрово околу 06:20 часот во Гевгелија, кај Касарната, бил застрелан мигрант откако полицаец пукал по обидот на еден од криумчарите на мигрантите да му го одземе пиштолот. Веста за МИА ја потврди портпаролката на СВР Струмица, Александра Трајанова. -Од страна на полициски службеници биле забележани патничко моторно возило „мерцедес“, управувано од К. Ј. (26) и патничко моторно возило „форд фокус“, управувано од С.Б. (51), двајцата од Скопје, во кои илегално се превезувале мигранти. Возилата биле запрени од страна на полициски службеници, по што возачите и мигрантите се обиделе да избегаат, а при тоа К.Ј. физички нападнал полициски службеник, обидувајќи се да му го одземе пиштолот. Притоа, полицискиот службеник испукал од службениот пиштол и погодил еден од мигрантите, кој веднаш бил пренесен со полициско возило во објектот на Итна медицинска помош за укажување лекарска помош каде починал, информираше Трајанова. За настанот бил известен јавен обвинител и Одделот за внатрешна контрола, криминалистички истраги и професионални стандарди за расчистување на случајот. На местото бил извршен увид од ОЈО Гевгелија и по расчистување на случајот ќе бидат поднесени соодветни поднесоци.

Мигрантот кој беше прегазен кај Блаце немал лични документи, не е вистина оти бил обезглавен

Ристе Здравков — Fri, 31 Mar 2023 10:49:06 +0000

Мигрантот кој беше пронајден прегазен од автомобил и починат на магистралниот пат Скопје-Граничен премин Долно Блаце немал со себе лични документи, дознава „Макфакс“. Лицето не било обезглавено, како што објавија дел од медиумите, но има тешки повреди на главата. На улицата се видливи силни траги од кочење, а полицијата собира фотодокуметација од местото на несреќата. „Макфакс“ претходно објави дека мртвото тело на мигрантот лежело на магистралниот пат Скопје-Граничен премин Долно Блаце и се работи на утврдување на идентитетот на лицето. Засега не се знае кој го управувал возилото и го прегазил човекот. Извршен е увид од Јавен обвинител, а по наредба на Јавен обвинител телото на починатиот било предадено за обдукција.

Се слушнал силен звук проследен со јака светлина, починато лице пронајдено на Железничката станица Илинден

Ивона Петрова — Mon, 21 Nov 2022 11:32:58 +0000

На 20.11.2022 во 19.06 часот во Полициското одделение Петровец било пријавено дека при преглед на товарен воз на Железничката станица Илинден, кој сообраќал на релација Гевгелија-Табановце, од страна на полициски службеници, во еден момент се чул силен звук проследен со јака светлина, информира МВР. Како што велат од полицијата, откако била исклучена струјата било забележано починато лице, најверојатно мигрант кој немал документи за идентификација, а кој кога сакал да се симне го допрел струјниот вод. Смрт констатирал лекар од итна медицинска помош, а по наредба на Јавен обвинител телото на починатиот било дадено на обдукција. Увид бил извршен.

Товарен воз усмрти мигрант кој лежел на пругата кај Миравци

Ивона Петрова — Sun, 06 Nov 2022 11:50:12 +0000

На 06.11.2022 во 01.07 часот било пријавено дека околу 00.15 часот товарен воз кој сообраќал на релација Гевгелија–Скопје, во близина на с.Миравци, удрил во лице кое лежело на пругата. -Од страна на полициски службеници било излезено на местото и било утврдено дека станува збор за 30-годишно лице мигрант. Лекар констатирал смрт, а увид извршила увидна екипа од Полициската станица Гевгелија, информира МВР. По наредба на Јавен обвинител телото е предадено за обдукција.

Гостиварец слушал звуци во камионска приколка, полицијата открила мигрант

Ивона Петрова — Sat, 13 Aug 2022 16:45:32 +0000

Денеска (13.08.2022) во 08.40 часот во СВР Велес К.А.(33) од Гостивар, кој управувал товарно возило „ман“, со гостиварски регистарски ознаки, пријавил дека во товарната приколка од камионот слушнал звуци. -Полициски службеници од СВР Велес заедно со претставници од Царинската управа веднаш излегле на лице место и во приколката пронашле едно лице мигрант од Мароко, информира МВР. Лицето е спроведено во Приватно-транзитен центар Винојуг за понатамошна постапка.