Микел Артета – Kurir.mk

Артета за победата над Манчестер сити: Знаевме дека треба да се бориме и го направивме тоа

Дарко Андоновски — Mon, 09 Oct 2023 07:15:44 +0000

Тренерот на Арсенал, Микел Артета ги пофали своите избраници за прикажаната борбеност на натпреварот од 8. коло на Премиер лигата против Манчестер сити (1:0). - Многу сум горд. Тоа се случи во вистинско време со вистинските луѓе и вистинските играчи. Знаевме дека треба да се бориме и го направивме тоа. Ова е голема победа. Второто полувреме го започнавме навистина добро и одигравме навистина агресивно. Ни помогнаа и замените. Сè околу шансите за гол беше на највисоко ниво. На нашите противници им направивме многу проблеми, исто како што и тие ни направија нас. Не беше лесно да се оди во напад. Потребен ви е вистинскиот тајминг, вистинското движење. Ми се допаѓа нашата храброст. Има тешки моменти против овој тим. Треба да бидете директни, да управувате со вашите емоции и да бидете сигурни дека нема да ве фатат правејќи грешка, изјави Артета за „Би-би-си“. Арсенал има 20 бодови и е на второто место во Премиер лигата. Во следното коло лондонци ќе играат на гости кај Челзи на 21 октомври, а истиот ден Сити му гостува на Брајтон.

Артета загрижен поради повредата на Сака

Ивона Петрова — Wed, 04 Oct 2023 16:19:26 +0000

Тренерот на премиерлигашот Арсенал, Микел Артета ја нарече „загрижувачка“ повредата на Букајо Сака, но додаде оти не жали што му даде шанса да игра во вчерашниот пораз од Ленс (1-2) во Лигата на шампиони. „Се радуваше дека ќе игра, како и секој друг играч. Тоа беше важен натпревар во Лигата на шампиони. Минатиот натпревар доби удар во стапалото, но се чувствуваше добро“, рече Артета. Сака му асистираше на Габриел Жезус при постигнувањето на голот на гостувањето во Ленс, но беше повлечен од игра во 34. минута поради повреда на мускулот. „(Повредата) не изгледа добро. Не знаеме повеќе детали, но доволно е што не можеше да го продолжи натпреварот и тоа не загрижува“, додаде стратегот на Арсенал.

Артета како засилување ангажираше лабрадор

Тале Кристо — Fri, 19 May 2023 15:22:09 +0000

Тренерот на премиерлигашот Арсенал, Микел Артета (41), ангажираш ново засилување во тимот – куче од расата лабрадор, јавија денеска англиските медиуми. Шефот на Арсенал смета дека кучето, кое играчите го нарекле Win (Победа), ќе го намали нивото на стрес кај своите фудбалери и ќе му помогне да го извлече најдоброто од својата екипа. Сопственикот на куче е член на клупскиот персонал, а лабрадорот доаѓа неколку пати неделно во тренинг центарот на Арсенал. Медиумите наведуваат дека Артета ја „засилил“ екипата со лабрадор, бидејќи е докажано дека кучињата можат да имаат позитивно влијание врз менталното здравје, да го подобрат расположението и да го намалат нивото на стрес. Шпанскиот фудбалски тренер е познат како стратег кој со бројни неконвенционални чекори се обидува да ја зајакне својата екипа и тимскиот дух.

Артета: Сити играше подобро, ние бевме далеку од нашето ниво

Ивона Петрова — Thu, 27 Apr 2023 06:29:58 +0000

Тренерот на Арсенал, Микел Артета призна дека неговиот тим синоќа во дербито со Манчестер сити беше надигран од домаќинот. „Граѓаните“ во натпреварот од 33. коло на шампионатот на Англија победија со 4:1. - Бевме победени од најдобриот тим, тоа е сигурно. Беа одлични и тешко е да се постигне ова ниво. Денеска не бевме на тоа ниво. Против вакви ривали неопходно е да се биде добар во физичките дуели. Ние не го направивме тоа во првото полувреме и бевме казнети. Сити беше подобар од нас и не можевме да му парираме, изјави Артета. Запрашан што значи овој пораз за шампионската трка, тој одговори: „Ова е многу тешка вечер за нас. Загубивме, но мора да станеме и пошироко да ја погледнеме ситуацијата. Фактот дека сме во директна борба со неверојатен тим како Сити. Ни претстојат пет натпревари и се може да се случи. Низ годините видов колку многу може да се случи во оваа лига“. Арсенал е лидер во Премиер лигата со 75 бода од 33 натпревари, Манчестер сити е втор со 73 бода од 31 натпревар.

Артета знае како да го запре Халанд

Ивона Петрова — Wed, 26 Apr 2023 10:46:55 +0000

Тренерот на Арсенал, Микел Артета пред натпреварот од 33. коло на Премиер лигата со Манчестер сити го сподели своето мислење за напаѓачот на „граѓаните“ Ерлинг Халанд. - Најдобриот план да се запре Халанд е да се спречи додавањето на топката кон него. Ова е веројатно единствениот начин, изјави Артета за „Sky Sports“. Големото дерби кое може да биде решавачкото за шампионската титула ќе се игра вечер од 21 часот на теренот на Манчестер сити. Пред средбата, Арсенал води во Премиер лигата со 75 бодови, пет повеќе од Манчестер сити, но „граѓаните“ имаат два натпревара помалку.

Артета со нетрпение го очекува натпреварот против Манчестер сити

Тале Кристо — Sat, 22 Apr 2023 08:36:24 +0000

Тренерот на Арсенал, Микел Артета, призна дека со нетрпение го очекува натпреварот против Манчестер сити. Арсенал синоќа одигра 3:3 со Саутемптон во натпреварот од 32. коло на шампионатот на Англија. - Едвај чекам, ова е натпреварот што сакате да го играте. Кога сè е во прашање, мора да одите таму за да победите. Тоа е убавината на фудбалот, сакаш да бидеш на првата позиција. Ќе имаме неверојатно патување во Манчестер и ќе се подготвиме одлично. Ова не е финале бидејќи има уште шест натпревари до крајот. Видов дека момците се подготвени да направат се. Духот на овој тим е неверојатен, а ние треба да се обидеме да го направиме тоа повторно - да ги победиме „граѓаните“, го цитира „Би-би-си“ Артета. Натпреварот Манчестер сити – Арсенал е закажан за 26 април. Арсенал е прв на табелата во Премиер лигата со 75 бодови. Водството пред второпласираниот Манчестер сити е 5 бода, но тимот на Хосеп Гвардиола има два натпревари помалку.

Артета за ремито на Ливерпул: Можевме да земеме три бода

Дарко Андоновски — Mon, 10 Apr 2023 06:47:20 +0000

Тренерот на Арсенал, Микел Артета ги сумираше впечатоците од натпреварот од 30. коло на Премиер лигата против Ливерпул.

„Топчиите“ вчеравечер на гостувањето во Ливерпул одиграа 2:2 иако има водство од 2:0 до 42. минута.

- Многу тензичен натпревар. Беше под наша контрола, до финишот на првиот дел кога примивме многу наивен гол. Почнавме добро во второто полувреме, но потоа ја загубивме контролата. Тоа беше многу нестабилна, хаотична игра. Ливерпул можеше да постигне три или четири гола. И ние имавме шанси да го решиме натпреварот, така што конечниот резултат е веројатно фер. Можевме да освоиме три бода. Моравме да продолжиме да играме како во првото полувреме уште 15 минути - тогаш натпреварот ќе се одвиваше во сосема поинакво сценарио, изјави Артета за „Би-би-си спорт“.

Арсенал е на врвот на табелата во Премиер лигата со 73 бода од 30 натпревари. Ливерпул е на 8. место со 44 бодови од 29 натпревари.

Клоп: Артета градеше тим веќе неколку години и резултатот е импресивен

Ивона Петрова — Fri, 07 Apr 2023 10:59:01 +0000

Тренерот на Ливерпул, Јирген Клоп го сподели своето мислење за работата на колегата од Арсенал, Микел Артета. - Артета гради неколку години, а резултатот е импресивен. Тоа е мешавина од навистина добар фудбал и екстремни емоции. Знам дека тренерите бараат трпение, но навистина мислам дека Микел ја заслужи секоја минута што ја имаше со тимот, дури и кога работите не одеа добро. Тимот е многу добро поставен, плус добри трансфери, многу стабилен тим. Сега тие ги собираат плодовите од таквиот пристап, изјави Клоп за британските медиуми. Арсенал е прв на табелата во Премиер лигата по 29 натпревари со 72 бода.

Артета за бурните прослави на Арсенал: Одете во црква ако не ви се допаѓа

Тале Кристо — Sun, 12 Mar 2023 14:00:39 +0000

Тренерот на Арсенал, Микел Артета ги советуваше незадоволните од прославата на Арсенал да ја посетат црквата. Во последното коло од Премиер лигата, Арсенал извлече победа над Бурнмаут (3:2) благодарение на голот на Рис Нелсон во 97. минута. „Топчиите“ многу емотивно со целиот тим го прославија победничкиот гол. - Воопшто не ми пречи како моите фудбалери се радуваат. Фудбалот слави победи. Сакаме страст и емоции. Нема ништо подобро од постигнување голови и победа на фудбалски натпревари. Ако не ви се допаѓа, одете во црква. Сигурно нема да барам од играчите да слават подискретно на претстојниот натпревар, одговори Артета за начинот на кој неговите играчи слават. Топџиите попладнево ќе играат против Фулам во натпреварот од 27. коло на Премиер лигата.

Перез го менува Анчелоти со Артета

Ристе Здравков — Wed, 08 Mar 2023 12:18:34 +0000

Претседателот на Реал Мадрид, Флорентино Перез не е задоволен со резултатите на екипата оваа сезона, па поради тоа планира да го отпушти Карло Анчелоти на крајот на сезоната. Анчелоти минатата сезона беше херој на Реал, откако ја освои Примера и Лигата на шампиони, но оваа сезона резултатите не се според очекувањата, па најверојатно ќе дојде до тренерска смена на лето. Според шпанските медиуми, најголема желба на претседателот Перез е треерот на Арсенал, Микел Артета, кој врши одлична работа на „Емирати“. Артета оваа сезона неочекувано го предводи Арсенал до титула во Премиер лигата, а Перез верува дека Шпанецот може да биде долгорочно решение за клупата на „кралевите“.

🚨💣 Real Madrid are seriously considering Mikel Arteta to be Ancelotti’s replacement. @tgm46 pic.twitter.com/ZUPsQVSzGO
— Madrid Xtra (@MadridXtra) March 7, 2023