Миколаев – Kurir.mk

Украина најави планови за проширување на евакуацијата на цивили од Харков, Запорожје и Миколаев

Ивана Ефремовски — Fri, 26 Aug 2022 15:54:06 +0000

Украинската вицепремиерка Ирина Верешчук изјави дека ќе има задолжителна евакуација на цивили од делови на Харков, Запорожје и Миколаев. Вицепремиерката на националната телевизија ги најави плановите за проширување на задолжителната евакуација за цивилите кои живеат на првите линии на војната. – Приоритет ќе биде евакуацијата на жените со деца и старите лица. Не зборувам за цели региони, но некои делови ќе бараат задолжителна евакуација и се подготвуваме за тоа. Жителите не треба да се спротивставуваат на евакуацијата бидејќи се соочуваат со закана од руска окупација. Ако останат таму ќе настрадаат … Посебно децата. Јас многу добро знам што може да направи непријателот за да ги натера луѓето да соработуваат. Затоа ги повикувам луѓето да се евакуираат и да не се надеваат на милоста на непријателот и дека непријателот ќе го следи меѓународното хуманитарно право, изјави вицепремиерката на Украина. Украинската влада во јули започна задолжителна кампања за евакуација на луѓето во источниот регион Доњецк, која почна да ја спроведува овој месец. Окрузите и градовите на индустрискиот исток контролирани од Украина се под постојано гранатирање од руски и проруски сили. (МИА)

Украински милионер загина во бомбардирањето на Миколаев

Тале Кристо — Sun, 31 Jul 2022 14:24:58 +0000

Еден од најбогатите украински бизнисмени, Олексеј Вадатурски, загина во бомбардирањето на јужниот украински град Миколаев. Неговата сопруга Раиса, исто така, загинала кога ракета го погодила нивниот дом во текот на ноќта, пренесува Би-Би-Си информации до украинските медиуми. Тој беше сопственик на Нибулон, компанија за извоз на жито. Градоначалникот на Миколаев, Олександар Сенкевич, изјави дека тоа е еден од најбруталните напади врз градот. Николаев е на пат кон Одеса, главното пристаниште во Украина, и често е цел на напади.

Руските сили ја нападнаа пристанишната инфраструктура во Миколаев

Ивона Петрова — Tue, 26 Jul 2022 08:37:44 +0000

Руските сили ја нападнаа пристанишната инфраструктура во регионот на Миколаев во јужна Украина, изјави денеска градоначалникот Олександр Сенкевич. „Извршен е голем ракетен напад врз јужниот дел на Украина од правец на Црното Море, со употреба на авијација“, изјави Сенкевич за украинската државна телевизија, без да даде детали за последиците од нападот. Минатата сабота, Русија нападна уште едно јужно украинско пристаниште – Одеса, само еден ден откако беше постигнат договор за испорака на жито со Обединетите нации, Турција и Украина. Договорот за жито има за цел да овозможи безбеден премин за испораките на жито до и од украинските пристаништа, кои Русија ги блокираше од нејзината инвазија на 24 февруари. Русија ја обвини Украина за запирање на испораките со минирање на пристанишните води.

Гранатирање на градот Миколаев: 10 загинати и 46 повредени

Катерина Бојаџиева — Mon, 04 Apr 2022 20:44:51 +0000

Десет цивили загинаа, а 46 се повредени во жестокото гранатирање на руската армија над украинскиот град Миколаев. Ова вечерва преку видео изјава го соопшти градоначалникот Александар Сенкевич. Во првиот напад на руската армија во 04:00 часот по Гринич (шест часот по македонско време) „е убиен еден, а пет лица се повредени, од кои двајца се наоѓаат во тешка состојба“. Во друг напад врз градот, девет лица загинаа, а 41 беа повредени“, истакна Сенкевич, додавајќи дека бројот на жртвите најверојатно ќе се зголеми.