Милена Стевановиќ – Kurir.mk

Стевановиќ: Пациентот позитивен на конго кримската хеморагична треска е хоспитализиран и во добра општа состојба

Дарко Андоновски — Mon, 14 Aug 2023 12:10:54 +0000

Пациентот е хоспитализиран кај нас и е во добра општа состојба. Тој пет дена наназад се жалел на покачена температура, главоболка и на мускулно-зглобни болки, поради што и побарал лекарска помош. Ја следиме неговата состојба, изјави денеска директорката на Инфективната клиника, Милена Стевановиќ, во врска со четириесет и двегодишен велешанец, кој е трет случај на конго кримската хеморагична треска. Таа информираше дека во саботата вечер е донесен суспектен пациент со конго кримска треска од велешката Болница и во текот на вечерта неговата дијагноза е потврдена. -Лабораториски анализите беа со намалени тромбоцити во текот на вчерашниот ден, но со соодветна супституција. Ние ова го третираме мултидисциплинарно во консултација со колегите од транфузиологија. Денешните анализи се уредни, но тоа не значи дека нема да имаме тек и развој на болеста, се надеваме поволен, како што беше и кај претходната пациентка, рече Стевановиќ. Во однос на вработената од Инфективната клиника која беше инфицирана во текот на својата работа, Стевановиќ посочи дека таа е стабилна и добра, опоравувањето е во тек и не очекуваат компликации.

Стевановиќ : За случаите со конго-кримска хеморагична треска во комуникација сме со СЗО и колеги од регионот

Тале Кристо — Tue, 08 Aug 2023 14:50:37 +0000

За случаите со конго-кримска хеморагична треска (ККХТ) во комуникација сме со Светската здравствена организација, ги црпиме сите искуства што светот ги има, што во нашиот регион се лимитирани, во комуникација сме со колеги од регионот и од Албанија и од Косово, Бугарија, изјави за МИА, директорката на Инфективна клиника, Милена Стевановиќ. - Со Светската здравствена организација сме на линија, така да, правиме сѐ што е во наша моќ, нагласи Стевановиќ. Претходно денеска, портпаролот на Комисијата за заразни болести, Злате Мехмедовиќ во изјава за МИА изјави дека не треба да се крева паника во однос на новата состојба со конго-кримска хеморагична треска. - Не очекуваме да има повеќе случаи, меѓутоа ова не е првпат да се јавува во државава ваков тип на заболување, зборуваме конкретно за конго-кримска хеморагична треска. Дека го имало во минатото – го имало, дека се појавува во регионот – се појавува, дека ќе има вакви инцидентни појавувања – ќе има. Меѓутоа тоа не значи дека сме на раб на избивање на нова епидемија што ќе ги загрози сериозно животот и здравјето, истакна Мехмедовиќ. Oд она што го виделе, како што додаде тој, првиот случај е случај на директно заразување, а вториот, болничарка од Инфективната клиника, е веројатно на пренесување преку контаминирана крв. Во првиот случај со директно заразување, почина 27-годишна пациентка, по инфекција со каснување од крлеж.

Совети до македонските граѓани: Како да се заштитите од „кракен“, новиот сој на Ковид-19?

Ивана Ефремовски — Wed, 25 Jan 2023 06:54:23 +0000

Заштитата од новиот сој на Ковид-19, „кракен“, е идентична со претходните. Неопходен е сериозен пристап на граѓаните и придржување до дадените препораки. Тоа се носење маска во здравствени институции, во затворен простор како што е јавниот транспорт, како и избегнување на затворени простории преполни со луѓе, вели во изјава за МИА директорката на Универзитетската клиника за инфективни болести и фебрилни состојби, Милена Стевановиќ. Во земјава е регистриран првиот случај на „кракен“ кај пациент од Гевгелија. Очекувањата се дека овој сој на вирусот ќе почне да осцилира и кај нас, како и во другите земји, но, како што нагласува Стевановиќ, нема место за паника. -Таа не помогна ни во највисоките трендови на развој на пандемијата, па нема ни сега, вели Стевановиќ. Додава дека станува збор за вирус кој е лесно пренослив, но дека не предизвикува тешка клиничка слика. Ризик да се развие потешка клиничка слика постои кај пациентите со тешки хронични болести. -Од клиничките искуства во светот, засега не се остава впечаток дека предизвикува потешка клиничка слика или различни симптоми од досегашните. Ризикот за потешка клиничка слика сѐ уште го има приматот кај пациенти со тешки хронични болести, како и кај повозрасните лица. Секако, постои можност за копликација, посебно поради сезоната на грип, каде може да има и повеќе вирусни инфекции одеднаш, а во деференцијали дијагностички сѐ потешко се разликуваат, нагласува Стевановиќ. Институтот за јавно здравје во неделата соопшти дека во земјава е регистриран првиот случај на „кракен“ кај пациент од Гевгелија, кој, како што вели Стевановиќ во изјава за МИА, не патувал надвор од државата и нема тешка клиничка слика. Третиран е амбулантски. (МИА)

За 32 проценти зголемен бројот на хоспитализирани од коронавирус, директорката на Инфективна порачува да бидеме одговорни

Ивона Петрова — Wed, 30 Nov 2022 07:14:42 +0000

Состојбата со коронавирусот во земјава остава впечаток дека работите се мирни. Во моментов, во регионот состојбата со КОВИД-19 е стабилна, но во Кина минатата недела беа регистрирани 32.695 случаи на инфекција со коронавирус. Иако е далеку од нас, д-р Милена Стевановиќ, директорката на Универзитетската клиника за инфективни болести и фебрилни состојби во изјава за МИА вели дека во изминативе години научивме дека КОВИД-19 не е болест што лесно може да се предвиди и од таа причина мора да се почитуваат мерките за заштита како и претходно. – Без разлика што бројките не се такви какви што беа, не смееме да си дозволиме да не се заштитиме. Не е поентата да се плашиме и да паничиме, туку да се грижиме и да бидеме одговорни, порача д-р Стевановиќ. На Универзитетската клиника за инфективни болести и фебрилни состојби – Скопје во моментов има пет до шест хоспитализирани пациенти, додека во амбулантата дневно доаѓаат околу десеттина пациенти. Директорката на Клиниката за инфективни болести вели дека дијагностички, ковидот и грипот имаат слични симптоми во дадениот момент, како покачена температура, сериозна главоболка, омалаксаност и од таа причина бараат пациентите да се тестираат. Согласно податоците од Институтот за јавно здравје, во период од 21 до 27 ноември 2022 година регистрирани се 174 нови случаи на КОВИД-19. Пријавени се две починати лица во изминатата недела. Се работи за едно лице од Скопје и едно лице од Куманово, со коморбидитети и починати во болнички услови. Во моментов активни се 172 случаи. Според извештаите од болниците, моментално се хоспитализирани вкупно 33 лица, со 32 проценти зголемување во споредба со претходната недела, од нив шест се на кислородна поддршка и нема пациенти на инвазивна/неинвазивна механичка вентилација.

Зголемена раздвиженост и мал процент вакцинирани, причина за пораст на ковид случаите

Ивона Петрова — Tue, 05 Jul 2022 05:32:32 +0000

Зголемувањето на ковид позитивните пациенти периодов се должи на зголемената раздвиженост, мал процент на вакцинирани против коронавирусот и опаѓање на имунитетот, изјави за МИА директорката на Универзитетска Клиника за Инфективни болести и фебрилни состојби, Милена Стевановиќ. Во моментов, како што информираше хоспитализирани се десет пациенти на Инфективната клиника и само неколку се со тешка клиничка слика. -Тоа што може да се забележи е дека за разлика од претходните денови, сега има по 20 пациенти дневно за преглед, вели Стевановиќ. Апелот на директорката е дека е потребно се зголеми процентот на вакцинирани лица, бидејќи повеќе од јасно е дека вакцините даваат заштита и полесна клиничка слика доколку се дојде во контакт со вирусот. Согласно податоците од Институтот за јавно здравје, во период од 1 до 3 јули, од 1 695 тестирања, регистрирани се 290 нови случаи на КОВИД-19, од кои најмногу се од Скопје-186. Од вкупниот број позитивни лица, 49 се реинфекции. Оздравени се 250 пациенти, а не е пријавено ниту едно починато лице. Во моментов, активни се 935 случаи на коронавирусот. Согласно податоците од ИЈЗ, најголем број од активните случаи се во главниот град, и тоа 536, потоа во Битола – 59 и 42 во Куманово. Без ниту еден активен случај се Валандово, Кратово, Демир Капија, Македонска Каменица, Пехчево и Дојран. Препораките од Комисијата за заразни болести остануваат исти како и досега. Комисијата препорачува граѓаните да бидат совесни и да го заштитат сопственото и јавното здравје и да ги применуваат општите мерки за заштита, како што се заштитна маска, одржување растојание и почесто миење раце. Засега во сила останува само обврската за задолжително носење маски во здравствените установи, згрижувачките установи, аптеките и јавниот превоз.

Стевановиќ: Следиме препораки и внимаваме на состојбата со мајмунските сипаници, нашиот систем е подготвен и има капацитет да се справи со заразна болест

Катерина Бојаџиева — Wed, 25 May 2022 18:17:05 +0000

Ги следиме препораките, внимаваме на состојбата, како во земјата, така и надвор. Апелираме до луѓето кои патуваат, да внимаваат, да се заштитат, да држат дистанца. Патувањето во ризичните подрачја не се препорачува и затоа треба да бидеме исклучително одговорни, апелира Милена Стевановиќ, директорка на Универзитетска Клиника за инфективни болести и фебрилни состојби во врска со мајмунските сипаници. Во гостување на Сител Телевизја, во Тема на денот, Стевановиќ посочи дека не треба да се потценува нашиот здравствен систем и оти сите пациенти ќе бидат следени, евидентирани и третирани на Клиниката за инфективни болести. – Немојте да ја намалувате вредноста на нашиот систем. Нашиот систем е далеку од идеален, но е подготвен и цврсто стоиме на нашите нозе и имаме капацитет да се справиме со заразна болест. Во моментот кога ќе излезат комерцијалните тестови за сипаниците, ќе ги имаме и ние, додаде таа. Во однос на инкубацијата за мајмунските сипаници, Стевановиќ појасни дека таа трае 21 ден, што значи дека човек може да биде инфициран до 21 ден, а да нема никакви симптоми, како што се појава на висока температура, главоболка, отекување на лимфните жлезди. Како и секоја друга вирусна инфекција, така и кај мајмунските сипаници, таа вели дека најпогодени би биле младите, повозрасните лица и лицата со хронични болести. – Прекинатите ланци на вакцинација, ќе доведе до појава на сериозни вирусни болести. Мојот апел е вакцинацијата да не престане и да не се дозволи пропуштање на вакцинацијата кај децата. Тоа е причина зошто ни се јавуваат поранешните вирусни болести, вели Стевановиќ.

Д-р Стевановиќ: Се пополнуваат капацитетите на Инфективната клиника во Скопје

Ивана Ефремовски — Tue, 16 Nov 2021 11:28:17 +0000

Се пополнуваат капацитетите на Инфективната клиника во Скопје. Директорката д-р Милена Стевановиќ во изјава за „Слободен печат“ вели дека во моментов има уште неколку слободни кревети, но голема е веројатноста до крајот на денот да се пополнат. -Утринава имаме неколку исписи, со што ќе се ослободи дел од капацитетот, но не ја исклучувам можноста до крајот на денот да се исполни капацитетот на Инфективна. Сепак, граѓаните не треба да стравуваат, ние веќе ги препраќаме пациентите на Интерните клиники кои што се пренаменети во ковид центри, вели Стевановиќ. Додека пациенти болни од ковид се препраќаат во други болници, каде што ги третираат интернисти, модуларната болница во рамки на Инфективна се уште не е во функција - Модуларната болница ќе ја отвориме откако ќе се пополнат капацитетите на интерните клиники. Во моментов не сакаме да ја отвориме затоа што мораме да размислување на рационално искористување на докторите и останатиот медицински персонал. Ние сепак сме мал број на инфектолози. Од друга страна воопшто не станува збор за стручност, сите колеги се стручни да лекуваат пациенти болни од ковид. Во случај да пораснат бројките на заразени и да се појави потреба од поголем број на хоспитализации, модуларната болница е подготвена повторно да почне да работи, вели Стевановиќ, пренесе „Слободен печат“. Таа се надева дека овој пат ќе не одмине опасниот бран со висок процент на заразени, но апелира дека само вакцинацијата и почитувањето на мерките се единствен начин побрзо да излеземе од пандемијата. -Тоа е одговорно општествено однесување, а не личен избор на поединецот. Кога еднаш граѓаните тоа ќе го сфатат многу брзо ќе ја надминеме пандемијата. За да нема навала на огромен број пациенти за кои е тешко да се грижиме истовремено, мора да има повисок степен на имунизација, апелира директорката на Инфективна клиника, Милена Стевановиќ.

Директорката на Инфективна: Јас сум за драконски мерки за невакцинираните, бројот на заразени ќе се зголемува

Ивана Ефремовски — Thu, 29 Jul 2021 15:15:18 +0000

На Клиниката за Инфективни болести во моментов се лекуваат уште само 15 пациенти порадо компликации од корона вирусот, дел од нив се со потешка клиничка слика. Во разговор за ФАКТОР, директорката, д-р Милена Стевановиќ вели дека ова е многу мал број на пациенти, за разлика од претходните неколку брана на вирусот, но приказната со Ковид-19, како што вели, не е завршена. -Бројот на заразени се менува. Секојдневно оди во нагорна линија, пред се поради многу позаразната варијанта од алфа, а тоа е делта сојот. Но, лично не верувам дека овој четврти бран на корона вирусот ќе удри со таква жестина, како што се соочивме во пролетта, и лани есента. Ние сме мала земја, половина милион веќе се вакцинирани, речиси 160.000 луѓе го прележаа вирусот, така што тоа се фактори кои ќе влијаат на големата слика. На Клиниката за инфективни болести, од компликациите на корона вирусот уште само 15 пациенти на кои им е потребно болничко лекување. Навистина, имаме неколку со потешка клиничка слика и мора да кажам дека тоа се пациенти и со други сериозни здравствени состојби. Но, секако тимот на Инфективна е максимално ангажиран околу нивното целосно излекување, посочува д-р Стевановиќ за Фактор. Посочува дека и покрај тоа што има луѓе кои се вакцинирани, а сепак се заразени со корона вирусот, не очекува притисок врз здравствениот систем, и буквално „тепачка“ за болнички кревет. -Целта на вакцината пред се е да не се заразиме, но бидејќи во светот, па и многу поблиску, во регионот, делта варијантата е доминантна, а веќе е утврдено дека е многу полесно пренослива, многу позаразна, вкацината нема да дозволи тешка клиничка слика кај оние кои се вакцинирани. Затоа не очекувам силен притисок врз ковид центрите. Особено треба да внимаваат луѓето кои примиле една доза и чекаат да ја примат втората. Во тој временски интервал огромна е веројатноста да се заразат, ако не се почитуваат оние основни правила за кои говориме од почетокот на епидемијата на ковид во Македонија, вели д-р Стевановиќ. Истовремено, директорката на Инфективната клиника нагласува дека и покрај тоа што антиковид мерките се целосно олабавени, граѓаните треба да се свесни дека секакво помасовно собирање, неносење маски во затворени простори носи големи ризици од зараза. -Се е веќе дозволено, но не мора веднаш да се прават свадби со по 300 луѓе. Кластерите произлегоа токму од такви семејни собирања, големи свадби, други веселби. Јас сум навистина за драконски мерки, вакцината не е задолжителна, но кој не сака да ја прими мора ќе мора да ги почитува мерките. Тука не зборуваме за некакови привилегии на вакцинираните. Тие секако многу помалку може да се заразат, за разлика од оние кои не се вакцинирани. Затоа, за невакцинираните мора да постојат силни рестриктивни мерки, како што впрочем направија голем дел од државите, вели д-р Стевановиќ. Целотоинтервју прочитајте го на ФАКТОР

Според д-р Стевановиќ постои голема можност за ширење на новиот сој по завршувањето на годишните одмори

Магдалена Андонова — Fri, 09 Jul 2021 18:19:30 +0000

Постои можност за ширење од новиот сој на коронавирусот и далеку е од тоа дека светот може со сигурност да пресмета кога би бил и дали наскоро ќе се случи крајот на пандемијата. Се додека имаме нови соеви кои го зголемуваат бројот на новоинфицирани низ целиот свет, пандемијата уште е далеку од завршување. Со завршувањето на годишните одмори можноста за проширување на инфекцијата е голема. Ова вечерва го истакна директорката на Клиниката за инфективни болести и фебрилни состојби Милена Стевановиќ во гостување на емисијата Трилинг на ТВ 24. Таа апелира сите граѓани кои сега одат на годишни одмори, ако не се вакцинирани, сериозно да внимаваат во смисла на дистанцата и користењето на тоа што значи лична заштита. – Многу е значајно дека потребата од прегледи на Ковид суспектни пациенти имаме се помалку или практично веќе и да ги немаме и тоа укажува дека стабилноста на епидемиолошката состојба во пракса е токму таа, дека не осцилира вирус во голема количина на нашата територија, но со завршување на годишните одмори и можноста за комуницирање и инфицирање ќе се зголеми, секако за време на јули и август. Сите тие луѓе ќе дојдат дома. Можноста да ја прошират инфекцијата е секако голема. Оттука и моето објаснување дека се уште мораме да бидеме внимателни во смисла на заштитата, рече д-р Стевановиќ. Посочи дека во овој момент не очекува нови рестриктивни мерки. Според неа, мерките ќе зависат од состојбата кај нас, меѓутоа и од состојбата која ќе ја диктира светот токму поради летниот период, токму поради тоа брзо и едноставно движење на луѓето низ државите. Затворањето, потенцира, за нас е проблем, премногу долго време трае, треба малку да го искористиме летото, можноста да бидеме на отворено и да одмориме малку од сето ова, но никако не смееме да ги занемариме основните мерки на превенција. – Вакцинацијата е главниот начин за што побрзо прекинување на ширење на инфекцијата и ставање крај на пандемијата. Ние исто така веќе почнуваме апсолутно масовна вакцинација дури и на деца на возраст над 12 години во повеќе различни центри низ државата со цел да се брзо постигне повисок процент на вакцинирана популација. Главната причина за вакцинацијата е дури и да не бидеме стопроцентно заштитени, последиците од инфекциите и можностите што развојот на болеста може да ги предизвика, сметаме дека ќе бидат навистина занемарливи во однос на можноста од компликации кај невакцинирана популација, рече д-р Стевановиќ. Во врска со тоа дали може да бидат спокојни граѓаните кои ги примиле и првата и втората доза вакцина во однос на делта вирусот, рече дека тие може да бидат далеку поспокојни од тоа што светот го кажува како искуство, иако рано е да се дадат прецизни математики и согледувања врзани со ширењето на делта сојот во Европа. – Но, она што го кажуваат искуствата е дека вакцинираната популација е безбедна, но повторно ќе кажам ниту една вакцина за која било болест не овозможува стопроцентна заштита. Но, тоа што ни го овозможува со сигурност, а е многу значајно, е дека може да не задржи надвор од болниците и подалеку од сериозни компликации на болеста и најнесаканиот исход од неа. Сега и достапоста на вакцини за нашата држава е поголема и можноста да бидат помладите структури вакцинирани исто така, истакна д-р Стевановиќ. Посочи дека Инфективната клиниката интензивно се подготвува за можноста повторно да има голем број пациенти кои ќе треба да ги згрижи во смисла на нега, третман, дијагностика и за се што е потребно и за тоа се подготвени. – Колегите ротираат и веќе одат на годишни одмори. Во случај бројката да се зголемува, ние сме подготвени пациентите да ги прифатиме како и во претходните ситуации кога ги имавме првите бранови, додаде д-р Стевановиќ. Ивана Хаџиванова, психолог, гешталт психотерапевт и супервизор рече дека се соочивме со огромен предизвик и оваа криза многу го загрози и афектираше менталното здравје и сите сега сфативме колку е сето тоа поврзано односно како стравот за соматското здравје и за егзистенција може да влијае и на менталното здравје и психолошката добросостојба. - Се соочивме со огромни предизвици и тоа го почувствуваа сите возрасни категории. Луѓето станаа послободни поотворени и самата криза и нарушување на психичката состојба ги натера да го надминат стравот, стигмата, предрасудите и да побараат стручна помош. Имаме голем прогрес во однос на тој дел. Тоа го докажува и зголемата бројка на клиенти со кои работиме во Центарот во сиот овој период. Има уште еден мал процент луѓе кои се уште имаат страв, срам, предрасуди и сл. меѓутоа има значително подобрување, рече Хаџиванова. Потенцира дека голем број луѓе кои прележале Ковид-19 едвај чекаат да се опуштат, да се придвижат послободно, да функционираат, да се вратат условно кажано во нормалното функционирање. Сето тоа, појасни, многу зависи од начинот на кој е прележан коронавирусот. – Има разлика согласно тоа како индивидуата поминала со вирусот, како поминало поблиското семејство или пријателите или кругот во кој тоа лице функционира, дали можеби се случиле некакви загуби. Некои луѓе поопуштено се чувствуваат и се однесуваат и полесно се враќаат во нормалата, но има и една категорија луѓе кај кои можеби поради тоа што се уште се соочуваат со одредени последици кои Ковид-19 ги остава долготрајно, се уште силно перзистира стравот и се уште можеби поопсесивно ги почитуваат и мерките и се однесуваат и не им е толку едноставен тој процес на враќање, истакна Хаџиванова и изрази надеж дека ќе успееме некако да се вратиме во нормала. Но, како што појасни, времето ќе биде најдобар дијагностичар што точно ќе се случува. – Се надевам дека што поскоро ќе дојдеме до тој конечен крај на оваа пандемиска криза. Секоја криза како и оваа пандемиска криза носат низа промени и дел од нив може да останат подолготрајни – зборувам за промени во човештвото, за промени во функционирањето. На ниво на навики може да има дел на луѓе кои може ќе задржат одредени навики или поопсесивно ќе се однесуваат во однос на хигиената или можеби во однос на начинот на блиското поздравување и сл. Се соочивме со еден изненаден непознат вирус кој направи да има голем број жртви и тоа буди огромен страв кој е очекуван, една егзистенцијална неизвесност, анксиозност, паника, вознемиреност, ескалирана грижа за сопственото здравје, живот, како и грижа за најблиското семејство, додаде Хаџиванова. (МИА)

Д-р Стевановиќ: Во зима ќе биде уште потешко да го намалиме ризикот од инфекција со Ковид-19 ако не се придржуваме до мерките

Ивона Петрова — Wed, 23 Sep 2020 09:07:40 +0000

Со доаѓањето на зимата ќе биде уште потешко да се заштитиме и да го намалиме ризикот од инфекција со новиот коронавирус, доколку строго и принципиелно сите не се придржуваме до препорачаните мерки. Поради ниските температури ќе бидеме затворени внатре, ако не се придржуваме на високите стандарди за одржување на хигиената, правилното користење на маската и избегнување собири каде не може да се обезбеди соодветна дистанца, ризикот од пренесување на инфекцијата ќе биде поголем. Ова го истакнува директорката на Универзитетската клиника за инфективни болести и фебрилни состојби, Милена Стевановиќ во интервју за агенцијата Марили. Таа посочува дека во текот на зимскиот период има многу други горно-респираторни инфекции кои се пренесуваат на ист начин и со слични симптоми како и новиот коронавирус, па ќе биде и потешко да се диференцираат. Затоа, нагласува д-р Стевановиќ, придржувајте се на препорачаните мерки за превенција. Според неа, сите преземени мерки за намалување на ширењето на епидемијата и минимизирање на бројот на новоинфицирани и заболени биле круцијални во справувањето со Ковид-19. – Не само со опремувањето, туку и со организација на целокупниот здравствен систем, мораше да се испланираат и организираат и дополнителни капацитети како болнички, така и професионални, иако во почетокот тие не беа потребни, но во наредните месеци се покажа дека се од круцијално значење за функционирање на здравството во целата држава, вели д-р Стевановиќ. Во врска со тоа какви се моменталните капацитети на Инфективната клиника за справување со Ковид-19 во однос на вкупните капацитети, дали при евентуален нов посилен бран есенва, би била активирана и мобилната болница поставена во кругот на Клиниката и дали има доволно персонал, д-р Стевановиќ потенцира „не се работи само за вкупните расположливи капацитети на Клиниката, кои се исполнети во околу 80 проценти во моментов, туку за простор кој мора да биде „чист“ без Ковид-19 каде ќе се лекуваат пациентите со инфективни заболувања, а нема да бидат инфицирани со новиот коронавирус, за нив мора да обезбедиме безбеден простор за лекување“. Таа верува дека во наредниот период и новата болница ќе биде активирана и ставена во функција за да ги задоволат сите потреби како просторни, така и со високи стандарди за лекување и грижа на пациентите. – Персоналот како здравствен, така и помошен, секогаш е во помал број од потребниот и тоа е пречка која мора да ја надминеме, додава д-р Стевановиќ.