милош земан – Kurir.mk

Чешкиот претседател предвидува дека Русија ќе се повлече од Украина

Ивана Ефремовски — Mon, 26 Dec 2022 18:40:56 +0000

Чешкиот претседател Милош Земан повика на дополнителна поддршка за Украина, вклучително и воена поддршка, тврдејќи дека Русија на крајот ќе мора да ја напушти Украина, јави ДПА. -Убеден сум дека притисокот на слободните земји порано или подоцна ќе ја принуди Русија да ја напушти територијата на Украина, рече Земан во своето традиционално божиќно телевизиско обраќање. Тој рече дека секогаш се залагал за коректни економски односи меѓу неговата земја и Русија, особено поради нејзините важни енергетски резерви. Сега, сепак, безбедноста на светот, а со тоа и на Чешка беше под закана, истакна тој. Во такви ситуации, економските интереси мораа да бидат на задното место на безбедносните интереси. До рускиот напад врз Украина, Земан важеше за противник на строгите санкции на ЕУ против Русија. Затоа тој често беше критикуван како „проруски настроен“. Овогодишното божиќно обраќање беше последното на Земан како шеф на државата. По два мандата, тој веќе не може да се кандидира за трет мандат на изборите на 13 и 14 јануари. (МИА)

Земан: Западот мора цврсто да одговори доколку Путин употреби нуклеарно оружје

Катерина Бојаџиева — Wed, 05 Oct 2022 20:06:13 +0000

Чешкиот претседател Милош Земан предупреди дека постои „сериозен ризик“ од нуклеарен конфликт поради војната во Украина, јави ДПА. Според неговото мислење, Западот треба да го предупреди Кремљ дека доколку таму се употреби нуклеарно оружје, ќе има „енергичен воен одговор“. – Со сите последици што ова може да ги има, додаде 78-годишниот политичар денеска во Прага на маргините на средбата со емирот на Катар, шеикот Тамим бин Хамад Ал Тани. Двајцата склучија договор за продлабочување на економската соработка. Чешката Република се надева, преку можни испораки на течен природен гас (LNG) од Емиратот, да стане понезависна од руските енергетски превозници. Катар е најголемиот извозник на ЛНГ во светот.

Земан: Русите кои бегаат од мобилизација заслужуваат азил во Чешка, како и Украинците

Ивона Петрова — Sun, 25 Sep 2022 12:32:49 +0000

Чешкиот претседател Милош Земан се спротивстави на одлуката на владата да не ги прими Русите кои бегаат од мобилизација во Чешка и денеска во интервју за телевизијата Прима предупреди дека луѓето што бегаат од Русија не се безбедносен ризик и оти треба да им се дадат хуманитарни визи. – Мислам дека треба да им дадеме хуманитарни визи на тие луѓе, како и на украинските бегалци. Човек што бега од Русија не е безбедносен ризик. Оваа мобилизација опфаќа милион луѓе, па сосема е јасно дека е топовско месо со се што оди со тоа, рече чешкиот претседател. Шефот на дипломатијата, Јан Липевски пред неколку дена изјави дека Чешка нема да дава хуманитарни визи за Русите кои бегаат од мобилизација бидејќи не ги исполнуваат условите, но премиерот Петр Фијала го коригира својот министер и рече дека Прага ќе ги третира потенцијалните руски дезертери како и сите други луѓе кои бараат азил во Чешка. – Ако некој дојде, неговото барање ќе биде разгледано во рамките на стандардната процедура за добивање азил. Нема сигнали за прилив на Руси кои би сакале да ја избегнат владината мобилизација, рече чешкиот премиер. Чешка, како прва членка на Европската унија, самоиницијативно го суспендираше издавањето визи за руските граѓани, ден по рускиот напад на Украина, на 25 февруари. Подоцна го прошири и на Белорусија, а единствен исклучок се хуманитарните визи, меѓу кои и оние за прогонетите противници на властите во тие две земји. Земан во денешното интервју за ТВ Прима оцени и дека во Русија „е можна промена на режимот, без разлика дали тоа ќе го иницираат бизнисмени или армијата“ и оти споредбите меѓу рускиот претседател Владимир Путин и Адолф Хитлер се неправедни. – Армијата покажа толку голема неспособност што нема да биде иницијатор за никаква промена, можностите на бизнисите се ограничени со санкции, а не зборувам за одземање на јахти. Доколку дојде до политички промени тоа го гледам како притисок од деловните кругови, рече Земан.

Земан: Русија со агресијата над Украина не добива ништо, а изгуби сè

Ивана Ефремовски — Tue, 23 Aug 2022 16:15:47 +0000

Русија со агресијата над Украина не добива ништо, а изгуби сè. Ова денеска го истакна чешкиот претседател Милош Земан на годишното советување чешки амбасадори во Прага. – Тоа дека војната во Украина е руска агресија, е став, што, барем во чешката политика, го застапуваме речиси сите. Доколку направиме едноставна анализа на трошоци и бенефиции, ќе видиме дека агресијата во Украина за Русија значеше недобивање ништо, а губење практично сè, преку економски загуби поради санкции до материјални и човекови. На крај и губење на угледот, подвлече Земан. Според него, мора реално да се смета на „долга и исцрпувачка војна“. – И тоа затоа што Русија погрешно ја процени нашата реакција. Но, ние дадовме одредена причина со повлекување од Авганистан, додаде тој. Земан ги поддржа праќањето оружје за Украина и примањето бегалци од земјата. Редовното советување чешки амбасадори започна вчера, кога свое обраќање имаше премиерот Петр Фијала. Тој пред амбасадорите нагласи дека приоритет на чешката политика и на претседавањето со Европската унија е да ѝ се помогне на Украина, со што помалку загуби да го издржи конфликтот. Да се запре руската империјална политика и светот да ја спречи Русија, како што тој посочи, како досега да ги уценува останатите држави околу себе. Како една од главните задачи за амбасадорите, Фијала наведе во нивните земји сега што повеќе да се ангажираат Чешка да добие испораки на гас од нови извори или технолошки решенија и инвестиции со што ќе ѝ помогнат да ја прекине зависноста од руските гас и нафта. (МИА)

Претседателот на Чешка ќе стави вето на законот за истополови бракови

Магдалена Андонова — Tue, 07 Jun 2022 16:23:02 +0000

Чешкиот претседател Милош Земан денеска изјави дека е подготвен да стави вето на предложениот закон со кој на истополовите парови во државата ќе им се даде право за граѓански венчавки, доколку парламентот го одобри. Предлог-законот подготвен од пратеници од целиот политички спектар денеска беше доставен до Долниот дом на чешкиот парламент, но не е одреден датум за почеток на неговата расправа. – Би сакал да објавам дека ќе ставам вето, доколку навистина добијам за потпис таков закон, рече Земан по средбата со унгарската колешка Каталин Новак. Земан нагласи дека Чешка веќе дозволува граѓански заедници за истополови парови, но дека „семејството е заедница само на маж и жена“. (МИА)

Земан тврди дека нема да има војна со Русија

Ивона Петрова — Thu, 17 Feb 2022 07:26:46 +0000

Чешкиот претседател Милош Земан ја обвини ЦИА за „бламажа“ поради најавите за руски напад врз Украина оваа недела и повтори дека верува оти нема да има војна освен можеби ограничен конфликт во сепаратистичките области на Украина. – Русите не се луди да се вклучат во операција која ќе им нанесе повеќе штета отколку корист. Кога станува збор за американските тајни служби, ова им е трета бламажа. Првата беше војната во Ирак каде не беше пронајдено оружје за масовно уништување. Втората во Авганистан кога тврдеа дека талибанците никогаш нема да го освојат Кабул. А третата е сега, изјави Земан во интервју што денеска го објави чешкиот весник „Млада Фронта Днес“. Како што пренесе Бета, чешкиот претседател изјави дека не верува оти нема напад врз Украина бидејќи западните разузнавачки служби однапред предупредија дека знаат за плановите и можноста за агресија врз Украина. – Мислам дека тоа е обид да се скрие срамот. Веста дојде од американски извори пред пет дена. И како што можете да видите, тоа не се случи. Во секој случај, тоа беше извештај на ЦИА. И не се прашувам какви извори на информации има. Само врз основа на споменатите три случаи се сомневам во квалитетот на тие извори, рече Земан. Претседателот на Чешка, сепак, не ја исклучува можноста дека во Украина ќе има војна. – Не можам да исклучам некој локален конфликт на границите на Доњецк или Луганск. Но, тоа е нешто сосема различно од руска агресија врз Украина. Кога ќе ме прашате зошто Западот го прави ова, а генералниот секретар на НАТО Јенс Столтенберг вели дека Русите се подготвени и војната може да започне во секој момент, против тоа зборува повлекувањето на руските единици, рече Земан. Според него, распоредувањето на руски трупи на границата со Украина е само воена вежба која русите ја завршуваат на своја територија.

ВИДЕО: Земан официјално го именуваше новиот премиер, поради Ковид-19 седеше изолиран

Ивона Петрова — Mon, 29 Nov 2021 09:22:34 +0000

Чешкиот претседател Милош Земан официјално го именуваше Петар Фијала за нов премиер на државата. Овој чин се случил вчера, а за време на истиот Земан седел во количка изолиран во кутија од плексиглас, а во придружба на медицински лица облечени во скафандери. Минатата недела Земан беше позитивно тестиран на коронавирус и во моментов заздравува по подолгиот престој во болница поради сериозно заболување неврзано за Ковид-19. Фијала, како и останатите на церемонија, носел маска кога го потпишувал официјалниот документ пред Земан кој седел во специјалната кутија. Претседатело на ОДС, Фијала предводи блок од пет опозициски партии. Си-Ен-Ен јавува дека за време на церемонијата Земан и Фијала разговарале преку микрофон. Земан истакнал дека ќе се сретне со потенцијалните министри во кабинетот поединечно додавајќи дека сака тој процес да заврши до 13 декември. Ден по парламентарните избори 77 годишниот Земан итно беше пренесен во болница каде помина неколку недели на интензивна нега поради црниот дроб и други здравствени проблеми. Претседателот е отпуштен од болница 46 дена подоцна, но повторно истиот ден бил вратен назад откако бил позитивен на тестот за коронаворус. Повторно е отпуштен од болница во саботата откако немал веќе симптоми, но со обврска да остане во карантин.

Земан замина дома по повеќе од шест недели во болница

Ивона Петрова — Thu, 25 Nov 2021 10:52:09 +0000

Претседателот на Чешка Милош Земан денеска е отпуштен од воената болница во Прага во која мина повеќе од шест недели, соопшти здравствената установа, пренесуваат британските медиуми. Земан (77) на 10 октомври итно беше пренесен на Одделот за интензивна нега во воената болница поради сериозно нарушеното здравје. Тој беше хоспитализиран ден по парламентарните избори на кои неговиот сојузник, премиерот Андреј Бабиш, беше поразен од опозицијата, која освои мнозинство во Долниот дом и планира да формира нова влада. Лидерот на опозициската десница Петер Фијала најави дека Земан утре ќе му додели мандат за состав на новата влада.

Претседателот на Чешка не е во состојба да ги исполнува своите должности

Ивона Петрова — Tue, 19 Oct 2021 06:13:58 +0000

Чешкиот претседател Милош Земан најверојатно нема да се врати на функцијата поради влошената здравствена состојба, соопшти претседателот на Горниот дом на парламентот на државата. Тој добил писмо од Централната воена болница во Прага, каде што се лекува Земан, во кое се вели дека шефот на државата не е во состојба да работи, а долгорочната прогноза е „многу неизвесна“. Земан итно беше примен во болница на 10 октомври, ден по парламентарните избори. Тој е сместен на одделот за интензивна нега и е о стабилна здравствена состојба.

Состојбата на Земан стабилна

Ивона Петрова — Mon, 11 Oct 2021 10:37:35 +0000

Состојбата на чешкиот претседател Милош Земан кој итно беше пренесен на инатензивна нега во Централната воена болница во Прага е стабилизирано, соопшти портпаролот на болницата Јитка Зинке. На прашањето дали потврдува или демантира дека претседателот е опериран, Зинке вели дека не може да каже бидејќи нема и нема да има други информации. Во Чешка расте огорченоста бидејќи Канцеларијата на Земан крие информации од јавноста. Од 22 септември кога тој е пуштен од болница по оум дена лекување, од Канцеларијата тврделе дека тој бил само исцрпен и дехидриран. Дури во петокот кога почнале парламентарните избори во Чешка, а Земан не се појавил на гласачкото место, портпаролот Јиржи Овчачек признал дека тој е болен. Чешкиот претседател е церемонијална фигура на политичката сцена во земјата бидејќи главните одлуки ги носат владата и парламентот, додека единствен важен момент е оној по избори кога се врачува мандатот за состав на владата. -За тоа дали здравјето му дозволува да ја извршува својата функција прашајте го неговиот портпарол. Лекарите на претседателот кажаа што имаа да кажат и денеска нема да излегуваат пред медиумите, изјави портпаролот на болницата.