минимални плати – Kurir.mk

„Власта се луксузира, а пари во Буџетот нема за поголеми плати за вработените во образованието – Ковачевски призна дека нема да има зголемување на платите“

Магдалена Андонова — Sun, 03 Apr 2022 07:11:59 +0000

Власта се луксузира со нов мебел, нови возила, енормно троши за непродуктивни трошоци, а нема пари за зголемување на платите на вработените во образовниот процес. Ковачевски призна дека нема пари во Буџетот за платите на наставниците, професорите и воспитувачките во градинките, стои во соопштението на ВМРО-ДПМНЕ. Од партијата посочуваат дека образовниот, здравствениот и воспитувачкиот кадар во градинките заслужуваат повисоки плати. - Потребно е веднаш да се усогласат платите на овие сектори со колективните договори. Власта е глува за барањата на наставниците, професорите и воспитувачките во градинките за покачување на платите. Ако се почитува колективниот договор кај професорите и наставниците, нивните плати ќе достигнат и до 45 илјади денари, се вели во партиското соопштение. ВМРО-ДПМНЕ ги поддржува барањата на вработените во образовниот систем, бидејќи тие заслужуваат поквалитетен живот и подобар стандард. - Владата мора да ги зголеми и платите во здравствениот систем. Токму поради лошите услови и малите плати се повеќе здравствени работници ја напуштаат државата. Потребно е и зголемувања на платите и во другите области, и раст на платите соодветен на минималната плата. Во услови кога во државата секој ден има зголемување на инфлацијата и опаѓање на животниот стандард, потребни се итни и реални мерки од страна на владата на администраторот Ковачевски, додаваат од партијата.

ЗК со барање до Владата: Доколку се покачи минималната плата таа да биде субвенционирана од државата

Магдалена Андонова — Mon, 13 Dec 2021 11:13:53 +0000

Утринава од Занаетчиската комора во земјата реагираа преку писмен допис во медиумите, во кој истакнаа дека испратиле барање до Владата и Министерството за економија, во кое истакнуваат дека доколку се покачи минималната плата, таа да биде субвенционирана од државата. - Занаетчиска комора на Република Македонија која ги застапува микро, малите и самостојните вршители на дејност односно занаетчиите, уште еднаш Ве информира дека реагиравме до Владата на РСМ и до Министерството за економија каде што дадовме наше образложение и потенциравме дека во моментот на оваа криза која е предизвикана од Ковид – 19 и во тешка економска состојба во која се наоѓа нашата земја, баравме доколку се покачи минималнта плата, таа да биде субвенционирана од државата се додека се тргнат рестрикциите за работа, односно субвенциите да бидат 3000 денари (разликата од 15000 до 18000 денари), се вели во дописот испратен до медиумите.

Колкави се минималните плати во Европа?

Ивона Петрова — Mon, 10 Feb 2020 11:22:34 +0000

Разликите во минималната плата во европските земји се многу големи – од 213 евра во Албанија до 2.142 евра во Луксембруг, покажуваат податоците на Евростат за јануари годинава. Минималната плата е законски пропишана во повеќето земји-членки на ЕУ и во некои други европски земји. Во земји каде минималната плата не е законски пропишана, пресметката се прави според вообичаениот број работни часови месечно. Најновите податоци покажуваат дека разликите во минималната плата во европските земји се многу големи. Според податоците на Евростат, во осум европски земји минималната плата надминува 1.000 евра. По Луксембург со „минималец“ од 2.142 евра следуваат Ирска со минимална плата од 1.656 евра, Холандија 1.636, Велика Британија 1.599, Белгија 1.594, Германија 1.584, Франција 1.539 и Шпанија 1.050 евра. Потоа следат 10 држави каде минималната плата е помеѓу 500 и 1.000 евра. Минималната плата во Словенија е 941 евро, во Малта 777, Грција 758, Португалија 741, Полска 611, Литванија 607, Естонија 584, Словачка 580, Чешка 575 и во Хрватска 546 евра. Најдолу на списокот со минимална плата помала од 500 евра се вкупно седум европски земји: Унгарија со 487 евра, Романија 466, Латвија 430, Србија 343, Црна Гора 331, Бугарија 312 и Албанија со 213 евра. Од земјите членки на ЕУ, најниската минимална плата ја примаат жителите на Бугарија, Романија и Латвија. Луксембург со години го држи првото место на листата на европски земји според висината на минималната плата. Во оваа држава со околу 602.000 жители минималната плата секоја година редовно се зголемува. Во последните пет години се зголеми за 219 евра, како што моментално е минималната плата во Албанија, која изнесува 213 евра.