министерство за образование и наука – Kurir.mk

По масакрот во Белград, МОН утре ќе одржи инклузивна средба со претставници на академската фела

Ивона Петрова — Thu, 04 May 2023 13:34:09 +0000

Образовниот систем има примарна улога во градењето на младите како личности кои треба да ги прифаќаат и применуваат вистинските човечки, етички и морални вредности и норми. Но, какви генерации ќе создадеме не зависи само од наставниот кадар и стручните служби во училиштата. Тоа е обврска на сите општествени чинители. Случувањата во нашето соседство вклучија сериозен аларм дека институционалната, семејната и индивидуалната посветеност и грижата за правилниот раст и развој на децата треба да се подигнат на уште повисоко ниво, се вели во соопштението на МОН. Оттаму истакнуваат дека младите денес растат во поинакви околности за разлика од минатото. Новите времиња носат поволности, нови достапни можности, но и многу нови фактори кои негативно би можеле да се одразат на однесувањето на децата и да доведат до ситуации со несакани последици. -Бројни законски решенија, проектни мерки и активности досега се спроведени во оваа насока. Континуирано се зајакнуваат стручните психолошко – педагошки служби во училиштата, се спроведува советување на ученици и на родители на ученици со проблеми во однесувањето од различна природа. Се имплементираат проекти за заштита од насилство заедно со општествено одговорни компании и со меѓународни организации. Како креатори на образовните политики, Министерството за образование и наука заедно со Владата на Република Северна Македонија и сите други засегнати институции и установи, согласно своите надлежности веднаш започнуваме со ревидирање на воспитната компонента на образовниот систем, механизмите за детекција на предизвици и формите на поддршка на учениците и семејствата. Очекуваме поддршка од сите засегнати чинители, експертската јавност, граѓанскиот и невладиниот сектор, бизнис заедницата и меѓународните партнери, кои и досега имаат важен придонес во напорите за заштита на правата на децата, за заштита на физичкото и менталното здравје, спречувањето на врсничко и неврсничко насилство и така натаму. Првиот чекор е инклузивна средба со претставници на академската фела и веќе во текот на утрешниот ден истата ќе се одржи во просториите на МОН, а ќе учествуваат универзитетски професори од областа на педагогијата и психологијата, социологијата, безбедноста и сајбер насилството и други. По завршување на средбата ќе бидат соопштени заклучоците, односно препораките кои како што посочивме ќе бидат иницијален чекор за подигнување на институционалната грижа за правилен раст и развој на младите, се наведува во соопштението.

Милошоски: Министерството за образование мора да реагира, деканот на факултетот за архитектура при Американ Колеџ е член во Управниот одбор на СДСМ

Дарко Андоновски — Thu, 30 Mar 2023 06:36:06 +0000

Пратеникот од редовите на ВМРО-ДПМНЕ, Антонијо Милошоски преку статус на Фејсбук пишува дека Министерството за образование мора да реагира до Универзитетот Американ Колеџ каде декан на факултетот за архитектура е член на Извршниот одбор на СДСМ. „🚩 Министерството за образование има обврска да реагира до Универзитетот Американ Колеџ Скопје во врска со деканот на Факултетот за архитектура, кој со членувањето во Извршниот одбор на СДСМ грубо го прекршува Законот за високо образование 👇 Пратеничка група на ВМРО ДПМНЕ“, стои во неговиот пост на Фејсбук.

Шаќири: Одговорниот однос кон здравјето се учи од најрана возраст

Катерина Бојаџиева — Thu, 22 Dec 2022 12:49:26 +0000

Градењето на свест кај учениците за здрав начин на живеење и стекнувањето знаења кои водат кон формирање психички, социјално и физички здрави личности, способни да се грижат за своето здравје и за здравјето на другите, во рамки на системот на образование на Република Северна Македонија, е системски засновано. Ова го истакна министерот за образование и наука Јетон Шаќири на отворањето на заедничката работилница со Министерството за здравство и Канцеларијата на СЗО во Скопје на која беше презентиран и потврден планот за имплементација на пилот-проектот во неколку основни училишта, информираат од МОН. Тој посочил дека новата иницијатива на СЗО и УНЕСКО, што има за цел секое училиште да биде училиште кое го промовира здравјето, е добредојдена, затоа што овозможува натамошно унапредување на работата на училиштата и подобрување на благосостојбата на децата од училишна возраст. Заштитата на здравјето е пресудно за севкупниот развој на државата и затоа, како што нагласил Шаќири, примарно е децата од најрана возраст да бидат во средина каде се развиваат позитивни обрасци на однесување поврзани со здравјето. – Воспитно-образовните институции имаат клучна улога во усвојувањето здрави животни навики поврзани со физичкото, менталното и социјалното здравје. Актуелниот Закон за основно образование, утврдувајќи го правото на образование на секое дете, ја определува грижата за здравјето како едно од основните начела на кои се развива образованието. Со наставниот план од прво до деветто одделение, согласно новата Концепција за основно образование, предметот Физичко и здравствено образование е задолжителен за сите одделенија, со три часа неделно. Дел од темите поврзани со здравјето се изучуваат и преку задолжителниот предмет природните науки, кој исто така се реализира во сите девет одделенија, вели Шаќири. Од ресорното министерство нагласуваат дека реформата на основното образование овозможува стекнување здравствена писменост и низ другите предмети, преку наставни и воннаставни активности, со вклучување на широка палета ресурси. -При тоа, наставниците имаат можност преку проектни активности да го поттикнуваат и развиваат одговорниот однос кон здравјето како добросостојба. Учениците стекнуваат знаења за превентива од болести, за здрава исхрана и за потребата за физички активности, на предавања и разговори на часот на одделенската заедница, со стручната служба, одделенските раководители и со надворешни стручни лица. Исто така, Програмата за унапредување на здравјето е составен дел на програмите за работа на училиштата, велат од МОН. Оттаму посочуваат дека иницијативата на СЗО и УНЕСКО е заснована врз глобалните процени за болестите и смртноста кај децата и адолесцентите кои сугерираат дека децата на училишна возраст имаат значителни потреби за унапредување на здравјето, на превенцијата и на услугите за здравствена заштита. -При тоа, училиштата кои го промовираат здравјето се препознаени како стратешко средство за промовирање на позитивен развој и здрави однесувања како што се физичка активност, рекреација и игра, урамнотежена исхрана, спречување на пушење и спречување на насилство, истакнуваат од МОН.

„Помирувачот помеѓу СОНК и владата е десна рака на Тренчевска, ова е измама, власта ги понижува наставниците“

Магдалена Андонова — Sat, 30 Apr 2022 07:26:12 +0000

Помирувачот помеѓу СОНК и владата е десна рака на Тренчевска, ова е измама, власта ги понижува наставниците. Помирувачот е човек вработен во кабинетот на министерката за труд и социјална политика. Тој не може да биде непристрасна страна, кога една од засегнатите страни е владата, односно Ковачевски и неговата шефица Тренчевска, стои во соопштението на ВМРО-ДПМНЕ. Од партијата вела дека СОНК е во подредена полжба, а наставниците се деградирани и понижени. - Владата го прекрши Занонот за мирно решавање на споровите. Владата лаже за ветеното покачување. Вистинско покачување на платите е кога ќе бидат исполнети барањата на СОНК, се друго е притискање на наставниците да ги прифатат условите на владата, за на истата да и останат повеќе пари за матни тендери, се додава во партиското соопштение.

УТРЕ ПРОТЕСТЕН МАРШ: Родителите со порака до Мила Царовска – учебници и настава мора да има!

Дарко Андоновски — Fri, 14 May 2021 10:22:19 +0000

Утре со почеток во 12 часот, во организација на граѓанската иницијатива „Учебници и настава мора да има“, се организира мирен протест против Законот за учебници и наставни материјали во основното и средното образование, според новиот концепт на министерката за образование и наука, Мила Царовска. Како што е објавено, собирот на учесниците од 11 до 12 часот ќе биде во Паркот на новинарите, спроти зградата на поранешна НИП „Нова Македонија“. Маршот започнува во 12 часот од Министерството за образование и наука по булевар „Свети Кирил и Методиј“, булевар „Свети Климент Охридски“ и булевар „Илинден“ до Владата на Македонија. Пред Владата на Македонија ќе биде прочитана изјава со барања од протестниот марш, кој продолжува по булевар „Илинден“, булевар „ВМРО“, булевар „Даме Груев“ и булевар „11 Октомври“ до Собранието на Македонија и Паркот „Жена борец“ во Скопје. Во 14 часот во „Жена борец“ ќе биде поставена импровизирана училница со отворена Книга за потписи за поддршка на граѓанската иницијатива „Учебници и настава мора да има“. Во импровизираната училница е предвидено да бидат поставени 10-15 училишни клупи, 20-30 училишни столчиња и училишни реквизити (расипани компјутери, таблети, скинати учебници и оштетени дидактички материјали). Импровизираната училница ќе остане до крајот на денот и наредниот ден 16 мај (недела) до 21 часот. Книгата за потписи ќе биде отворена и на 16 мај од 9 до 21 часот. Организаторот на протестот ги кани сите политички партии и здруженија на граѓани на масовно учество, без партиски обележја и обележја на здруженија. Организаторот на протестот апелира до сите учесници да се придржуваат на протоколите за време на пандемија, носење маски и на пропишана дистанца, како и на почитување на неповредливоста на имотите и неприкосновеноста на животите. Организаторот се оградува од навредливи скандирања и транспаренти на етничка и верска основа!

Претставници на фејсбук-групата „Учебници и настава мора да има“ утре на средба во МОН – Царовска нема да присуствува

Магдалена Андонова — Wed, 05 May 2021 10:57:38 +0000

Претставници на неформалната фејсбук-група граѓани „Учебници и настава мора да има“, која од четвртокот повикува на бојкот на наставата, утре ќе има средба со претставници на Министерството за образование и наука за да ги презентираат своите барања. Драгана Спасевска од фејсбук-групата изјави за МИА дека се поканети утре напладне да имаат средба со претставници на МОН, на која поради обврски нема да присуствува министерката Мила Царовска. Спасевска тврди дека бојкотот во училиштата, кој го почнаа минатиот четврток, е помасовен и имаат се поголема поддршка за нивното барање да се стопира постапката за донесување на законот за учебници и наставни материјали во основното и средното образование. – Се повеќе имаме поддршка за бојкотот, но утре е клучното што ние како родители го бараме и ќе видиме дали од нивна страна ќе имаме црвено или зелено светло. Потврдено е дека Царовска нема да биде на средбата, ние баравме, но не известија дека имала работни активности, рече Спасевска. Нивните барања и најавата за бојкот беа соопштени минатата среда пред МОН. Бараат да се организира јавна расправа за предложениот закон, а нивни стручни претставници непосредно да учествуваат во негова ревизија и интервенции. Според нив, предлог-законот не ги решава проблемите што постојат во образованието и генерира нови, има и недоследности и импликации во останатите закони што се однесуваат на образованието во земјава. Фејсбук-групата „Учебници и настава мора да има“ има над 70 000 приврзаници кои, како што рече Спасевска, се „гласот на родителите” кои алармираат дека во државата има руинирани училишта без нормални услови за настава, дека секое седмо дете нема ИТ- уред и интернет. Посочи дека не се против осовременување на образованието со дигитални алатки, но тие да бидат дополнителни помагала, а печатените учебници да останат во употреба. -Во нашата фејсбук-група направивме и анкета во која родителите имаат многу барања во образованието – печатените учебници да останат во употреба во наставата, да нема спојување на два предмета во еден, да се исклучи сеопфатното родово сензитивно образование, што побргу да се донесат протоколи за враќање на децата во училишните клупи и нам, родителите, да ни се овозможи да имаме право да предлагаме изучување на темите во образовнието, додаде Спасевска. Според Предлог-законот за учебници и други наставни и дидактички материјали во основно и средно образование, дигиталните учебници треба да почнат да се употребуваат од учебната 2021/2022 година, најпрво во наставата за четврто одделение, а потоа етапно, во наредните пет години, и во сите погорни одделенија. Учениците до трето одделение ќе продолжат да учат од печатени учебници.

Изреволтирани родители повикуваат на потпис пред МОН против воведување на дигитални учебници – најавуваат и протести!

Магдалена Андонова — Wed, 28 Apr 2021 09:33:46 +0000

Воведувањето на дигитални учебници кое го најави министерката за образование и наука, Мила Царовска и понатаму предизвикува големо незадоволство кај голем број родители. Веднаш по оваа нејзина најава по социјалните мрежи се формираше група под името „Учебници и настава мора да има“ каде што голем број на родителите јасно посочуваат дека се против тоа. Од истата група може да се увиди дека најпрво беше направена онлајн петиција против воведување на дигиталните учебници, а истите членови најавуваат и отварање на пунктови ширум целата држава, а истовремено од нивна страна се подготвуваат и протести. Имено, во Фејсбук групата се појави објава во која стои дека денеска пред Министерството за образование и наука во период од 10:00 до 14:00 часот ќе се собираат потписи за поддршка на барањата на родителите и граѓаните кои се против воведувањето на дигитални учебници. Овие барања како што се вели во самата Фејсбук објава, ќе се достават до МОН, Владата и Собранието а доколку не се прифатат нивните барања, изреволтираните родители и граѓани најавуваат протести, барање за оставка на министерката и покренување на граѓанска иницијатива.

Сојузот на средношколци го демантира МОН: Никогаш не дадовме целосна поддршка за дигитализација на учебниците!

Магдалена Андонова — Tue, 27 Apr 2021 08:07:15 +0000

Сојузот никогаш не дал целосна поддршка за дигитализацијата на учебниците. Написите кои ова го тврдат ги водат читателите во погрешна насока. Иако рековме дека дигитализацијата е чекор во вистински правец, ние го изразивме јавно нашиот скептицизам и предупредувања, се вели во Фејсбук статусот на Сојузот на средношколци на РМ.

Царовска е без поддршка, сите научни институции се против нејзиниот концепт за основно образование

Магдалена Андонова — Thu, 04 Feb 2021 18:18:53 +0000

Јавноста конечно дочека дебата за концептот за основно образование на МОН кој предизвика големи негодувања како кај граѓаните така и кај научните институции во државава. За утре во собранието е закажана расправа за оваа т.н. реформа која ќе се одржи во рамки на собраниската Комисија за образование, наука и спорт, каде што се очекува да се сублимираат сите ставови, но и забелешките и сугестиите кои стигнале до МОН. Министерката за образование и наука, Мила Царовска вели дека на дебатата ќе се искажат можеби спротивставени ставови и па ќе излезат во јавност што конечно е прифатливо, што не е од забелешките. - Мислам дека заеднички ќе донесеме став по ова прашање. Понатаму веќе влегуваме во фаза на усвојување и подготовка на наставните програми коишто се најзначајни, затоа што концепцијата е само прв чекор, рече Царовска. Не е познато кој се е поканет и ќе учествува на оваа јавна расправа, но познати се ставовите на јавноста, научните институции но и меѓународните релевантни институции. Бидејќи Царовска постојано споменува дека и меѓународните институции барале реформи, важно е да се каже дека Организацијата за економска соработка и развој (ОЕЦД) која го организира меѓународното ПИСА тестирање и кои заедно со УНИЦЕФ ги работат извештаите за квалитетот на образованието не препорачува вакво спојување на предмети, што може да се потврди и изјавата на поранешниот министер за образование и наука, Арбр Адеми. Тој за ТВ 24 изјави дека на конференција на ОЕЦД му било укажано дека спојување на ликовно со музичко, како и спојување на природни науки со општествени науки. Најстариот факултет во Македонија, Филозофскиот факултет беше еден од првите кои реагираа. Според факултетот најавениот концепт на МОН ќе предизвика сериозни проблеми во образованието и не соодејствува со воспитната и општествената реалност во Македонија и потенцираа дека неприфатливо е спојување на историја затоа што предметот е од незаменливо и витално образовно значење. - Потребно е да се предвиди и овозможи подолга разумна временска рамка за создавање на квалитетна реформа во основното образование во која ќе биде земена предвид комплексноста на сите процеси за натамошна имплементација како и критичкото мислење на сите релевантни фактори, а со оглед на комплексноста на предложените решенија и далекусежните последици што усвојувањето на оваа Концепција ќе ги предизвика за севкупниот образовен систем на сите три рамништа (основното, а потем, следствено и на средното и на високото образование), порачаа од Филозофски факултет. Потоа следеше реакција од УКИМ. Сенатот на УКИМ како едно од трите највисоки органи на универзитетот после деталната анализа дојде до заклучок дека во МОН го направиле Концептот без анализа, без мислење на образовните институции, и истиот е без план и претходна подготовка. Но, интересното беше што Сенатот на УКИМ потенцираше дека концептот е невешто преведен со бројни лошо преведени делови. Според Сенатот на УКИМ секоја реформа во образованието мора да ги има предвид општествено-културниот, економскиот и образовниот контекст на нашата држава и истите мора да бидат согласни на нашите потреби и можности, а овој Концепт нема финансиска конструкција, нема истражувања кои го оправдуваат во овој модел, а не е ни тестиран и усогласен на нашето образование. Во меѓувреме реагираа од Институт за историја, Институт за македонски јазик, Педагошкиот факултет, Асоцијација на наставници по историја, студентите, но можеби најважна е реакцијата на највисоката научна институција во Македонија, односно Македонската Академија на Науките и Уметностите кои побараа транспарентно, стручно и целисходно водење на сите реформи. Според МАНУ, доколку има реформи во образованието тие треба да овозможат систематско и посебно изучување на македонскиот јазик и македонската историја, укажувајќи на научниот факт дека македонскиот народ зборува на македонски јазик, веќе со векови, на територијата на нашата држава и надвор од неа. МАНУ бараат динамична рамнотежа меѓу математиката, природните и техничките науки, од една страна, и општествените и хуманистичките науки, вклучувајќи ги етиката и моралните вредности, од друга страна. Иако министерката упорно, бара поддршка од тројца или четворица членови на овие институции за да прикаже дека ја поддржуваат професорите или академиците, реалноста е дека постојат спротивни официјални ставови на факултети, институти, МАНУ и УКИМ. Официјалните ставови на научните институции се дека реформи се потребни, но овој Концепт за основно образование кој го турка Царовска во ваков модел е погрешен и треба веднаш да се повлече. Сите укажуваат на тоа дека истиот не е соодејствува со нашиот систем и во ваква форма единствено ќе донесе непоправлива штета кај учениците која после ќе се одрази на државата и нејзината иднина.

Матурантите со писмо до пратениците – бараат поддршка за проблемот со полагањето на матура во време на пандемија

Магдалена Андонова — Fri, 29 Jan 2021 10:26:48 +0000

Сојузот на средношколци и нејзиниот претседател Бленди Ходаи во име на генерацијата матуранти 2020/2021 вчера до пратениците по електронска пошта доставил писмо со барање за поддршка да полагаат два наместо четири предмети на државната матура, бидејќи Министерството за образование и наука, како што е наведено во нивното писмо – ги игнорира и е децидно во одбивањето на каков било компромис по ова прашање. Доколку МОН не покаже добра волја, од пратениците Сојузот бара измени на Законот за средно образование што, како што наведува во упатеното писмо, е последниот демократски чекор, а во тој дополнет Закон „јасно ќе биде наведено дека одредбите се привремени, т.е. се однесуваат само за учебната 2020/2021 година“. -Министерката Царовска е категорична дека државната матура треба да содржи четири предмети. Поради тоа, од вас како директни преставници на граѓаните и, пред сè, контролори на извршната власт бараме јавна поддршка за нашите барања и повикувања кон МОН нив да ги исполни; користење на вашето влијание како државни службеници за МОН конечно да се вразуми; и доколку Министерството не покаже добра волја и продолжи со својот безобѕирен однос – изготвување и донесување на законско решение кое ќе ги вклучи нашите барања. Ако дури и Вашата поддршка се покаже како залудна, единственото преостаното решение е Собранието да го измени Законот за средно образование, којшто МОН мора да го почитува, пишува во писмото кое Сојузот на средношколците и нивниот претседател Ходаи го доставиле до 85 пратеници односно до оние кои на официјалната страница на Собранието имаат наведено контакти по електронска пошта. Заради исполнување на барањето, матурантите организирани од Средношколски сојуз минатиот четврток, првиот ден од второто полугодие, почнаа бојкот на наставата, најавувајќи дека ќе трае една недела и потоа ќе одлучат што понатаму. Претседателот на Сојузот Бленди Ходаи за МИА изјави дека бојкотот денеска го завршуваат, а утре ќе одлучат за следните чекори, односно дали ќе се вратат на онлајн-настава од понеделник. Можно е да се иницира и собраниска дебата за нивното барање. – Претставници од матурантите во Сојузот утре ќе одлучуваме што ќе правиме од наредната недела. Осум дена бевме во бојкот и ќе одлучиме што е подобро за матурантите. Многу од нив се изнервирани од случувањата помеѓу Сојузот и МОН. Можеби ќе има порадикален чекор, како протест или слично, или ќе одлучиме да престанеме со бојкотот и да се вклучиме во наставата. Сè уште не се знае, ќе дискутираме утре и ќе се гласа што ќе се прави. Од разговори што вчера ги имав со неколку пратеници во Собрание, има индиции дека во понеделник може да се иницира дебата во Собранието. Така што, ќе видиме и пратениците дали и што ќе направат во наредните денови, изјави денеска Ходаи. Според него, се бојкотира во 20 градови. Пред два дена имале бојкот од 79 проценти, вчера 76 отсто и, за разлика од другите градови, како што рече, во Скопје се бојкотира делумно – во некои средни училишта има настава, а во други се бојкотира. Со ресорната министерка, рече Ходаи, немале контакт од 20 јануари, односно ден пред да го почнат бојкотот. Во упатеното писмо до пратениците за поддршка на нивното барање да полагаат два предмета – мајчин јазик (македонски, албански или турски) и втор предмет од областа која матурантит планира да ја студира, Сојузот истакнува дека е целосно разумно и изводливо и смета дека нашето општество не смее да ги игнорира последиците на неквалитетната настава на далечина.